Fjölnir vann Bose mótið eftir að hafa burstað Íslandsmeistara FH 6-1 í úrslitaleik í Egilshöll í kvöld.

Bojan Stefán Ljubicic leikmaður Keflavíkur er á reynslu hjá Fjölni þessa dagana og hann skoraði fyrsta mark leiksins á 14. mínútu með glæsilegu skoti upp í samskeytin. FH jafnaði með marki Atla Guðnasonar mínútu síðar.

Fjölnir rúllaði svo yfir Hafnfirðingana með fimm mörkum í viðbót. Ægir Jarl Jónsson kom þeim yfir með skallamarki og Viðar Ari Jónsson skoraði svo gott mark á lokamínútu fyrri hálfleiks.

Þórir Guðjónsson lyfti boltanum yfir Vigni Jóhannsson markvörð FH eftir klukkutíma leik og Ingimundur Níels Óskarsson skoraði fimmta markið af stuttu færi tíu mínútum síðar. Hinn 18 ára gamli Ingibergur Kort Sigurðsson skoraði svo sjötta markið á lokamínútunum.

Fjölnir er því Bose meistari árið 2016 og að verðlaunum fékk liðið Bose hljóðkerfi í búningsklefann.

Þórir Guðjónsson leikmaður Fjölnis fékk svo verðlaun fyrir að vera leikmaður mótsins

Markaskorið sáu þessir um:

1-0 Bojan Stefán Ljubicic (’14)
1-1 Atli Guðnason (’15)
2-1 Ægir Jarl Jónsson (’35)
3-1 Viðar Ari Jónsson (’45)
4-1 Þórir Guðjónsson (’63)
5-1 Ingimundur Níels Óskarsson (’70)
6-1 Ingibergur Kort Sigurðsson (’88)

jóla, jóla …Opinn vinnustofa í Gufunesi í  „Gullhöllin“ hús nr. 8 hjá Íslenska Gámafélaginu.
Listamennirnir Sigrún Lára Shanko og Þóra Björk Schram opna vinnustofu sína ásamt hönnuðinum Ólafi Þór Erlensdssyni, grænmetiskokkinum Hönnu Hlíf Bjarnadóttur, rithöfundunum Ingibjörgu Kr. Ferdinandsdóttur, Þorgrími Kára Snævarr og Gunnari Helgasyni leikara.

Dagskrá:
Sigrún Lára mun sýna textíl myndverk og hönnun sína ásamt öðrum myndverkum og kortum.
Þóra Björk verður með tilboð á púðum og kynnir einnig teppi, málverk og kort unnin út frá málverkum hennar.
Þóra Björk og Ólafur Þór sýna og kynna samvinnuverkefni sitt „Spot“ og „Spor“ húsgögnin sem þau unnu fyrir HönnunarMars 2016.
Ólafur Þór verður einnig með hönnunina „Hár úr Hala“ til kynnis og sölu.
Upplestur verður úr bókinni „Rödd hafsins“ milli kl 15.00-17.00, en Ingibjörg Kr. Ferdinandsdóttir höfundur bókarinnar les sjálf upp úr verkinu.
Kl. 16.00-18.00 mun Þorgrímur Kári Snævarr kynna og lesa úr skáldsögu sinni “ Skögla“ en fjallar hún um dverg í jötunheimum.
Gunnar Helgason leikari og barnabókarithöfundur les með leikrænum tilburðum úr nýjustu bókinni sinni kl 17.00-19.00
„Pabbi prófessor“ og áritar plaggöt.
Hanna Hlíf Bjarnadóttir grænmetiskokkur mun kynna bókina sína „Eldhús grænkerans“ og gefur fólki að smakka kl. 18.00-19.00.

Boðið verður upp á mjög jólalegar veitingar og nokkrir heppnir gestir geta dottið í lukkupottinn og fengið jólapakka með sér heim.
Allir eru velkomnir.

Það voru kátir krakkar úr Rimaskóla sem heimsóttu Grafarvogskirkju í morgun.

Krakkarnir léku á hljóðfæri, sungu, hlustuðu á sögu og höfðu gaman.

Voru þau öll til fyrirmyndar.

“ JólaVox 2016 verður haldið í Grafarvogskirkju laugardaginn 17. des kl 17. Við lofum notalegu andrúmslofti, hátíðlegri dagskrá og skemmtilegum tónleikum. JólaVox kakó og smákökusmakk eftir tónleika.

Með okkur verða meðal annars beatboxari og óvæntir gestir ásamt glæsilegri hljómsveit.

2500kr inn, frítt fyrir börn yngri en 12 ára og eldri borgara afsláttur.

Sjáum ykkur sem flest! „

Jólabingó í Borgum. 14 desember 2016. Mikið af frábærum vinningum.

Á laugardaginn kemur, 17.desember,  ætla meistaraflokkar boltagreina Fjölnis að sameinast og spila handbolta,fótbolta og körfubolta í fjórum blönduðum liðum í íþróttahúsinu í Dalhúsum.

Gleðin byrjar kl 16:00 og stendur yfir til 18:00 ( nánari dagskrá að neðan). Hvert lið hefur fyrirliða og hafa náðst samningar við Aron Sigurðarson leikmann Tromsö og Guðlaug Victor Pálsson leikmann Esbjerg  að taka það hlutverk að sér. Samningar standa yfir við handboltamann og körfuboltamann.

Dagskrá:
16:00 Liðin kynnt út á völl ( Kynnir Ingvar Örn Ákason)
16:10 Leikir í körfubolta
16:30 Þriggja stiga keppni
16:45 Leikir í handbolta
17:10 Hálfleikur Svavar Elliði
– Happadrætti
– Áttan
– Donni og Malín
– Kristmundur Axel
– Miðjuskot handbolti
17:50 Leikir í fótbolta
18:10 Dagskrá lokið

Dómarar verða:
Gunnar Jarl Jónsson
Gunnar Óli Gústafsson

Hægt að kaupa sig inn í lið og spila með einn leik á 5.000 k

Happadrættismiðinn kostar 500 kr. og eru vinningarnir eftirfarandi:
Árituð treyja af leikmönnum sem taka þátt
Fontana heilsulind á Laugarvatn, spa fyrir tvo X3
Hummel taska *2
HSÍ landsliðstreyja
Pizza og gos af matseðli frá Shake&pizza *4
Pizzuveisla fyrir tvo á Gullöldinni *5
Bíómiðar fyrir tvo *5

Uppboð á eftirfarandi treyjum stendur yfir til 13.desember kl 12:00.
1) Bandaríska landsliðstreyja Arons Jóhannssonar,
2) Esbjerg treyja Guðlaugs Victors Pálssonar,
3) Íslenska landsliðstreyja Ægis Þórs Steinarssonar,
4) Ausburg treyja Alfreðs Finnbogasonar.
5) Fjölnistreyja Harðar Axels Vilhjálmssonar.
6) Treyja Gunnars Steins Jónssonar

Lágmarksboð í hverja treyju er 10.000 kr. Sendið tilboð í treyjur og upplýsingar um þann sem býður á unnar@fjolnir.is.

Um leikinn:
Boban Ristic hefur unnið undanfarin árin í íþróttamiðstöðinni í Grafarvogi. Hann setti strax svip sinn á hlutina og hefur unnið frábært starf. Það líkar öllum vel við meistara Boban.

Núna er faðir hans í Serbíu langt leiddur af krabbameini og á lítið eftir. Boban er að sjálfsögðu farinn út að njóta hugsanlegra síðustu vikna með föður sínum. Þetta er ekki gefins að ferðast svona á milli og eins og hann gerir.

Núna þarf Fjölnisfjölskyldan að sameinast – eigum góðan dag saman í Dalhúsum með skemmtilegri dagskrá og hjálpum okkar manni á sama tíma, hann á það skilið.

Hægt er að skoða myndir hérna……

Sveitarfélögin sex á höfuðborgarsvæðinu undirrituðu í byrjun mánaðarins samninga um innleiðingu Borgarlínu – léttlesta- eða hraðvagnakerfis um höfuðborgarsvæðið.

Borgarlínan hefur verið í undirbúningi um nokkurt skeið. Sveitarfélögin vinna nú með hugmyndir hvar biðstöðvar og leiðir hennar muni liggja en endanlegar tillögur koma frá innlendum og erlendum sérfræðingum í byrjun næsta árs.

Dagur B. Eggertsson borgarstjóri segir það tímamót að sveitarfélög á höfuðborgarsvæðinu, öll sem eitt, séu með þessu að setja stefnuna á hágæða almenningssamgöngur, hraðvagna eða léttlestir.

Sveitarfélögin horfa til þess að Borgarlínan dragi úr umferðartöfum í framtíðinni og ljóst er að til mikils er að vinna. Á næstu 25 árum er búist við að íbúum höfuðborgarsvæðisins fjölgi um a.m.k. 70.000. Það jafngildir íbúafjölda í Hafnarfirði, Garðabæ og Kópavogi í dag og að óbreyttu fjölgar einkabílum á götunum um 40.000 á þessum tíma. Verði ekkert að gert mun tafatími í umferðinni margfaldast. Umferðarspár sýna að þrátt fyrir mjög miklar fjárfestingar í nýjum umferðarmannvirkjum myndu umferðartafir aukast verulega ef þeim fjölgar ekki sem nýta sér aðra ferðamáta en einkabíl. Þess vegna eru afkastamiklar almenningssamgöngur mikilvægt lífsgæðamál fyrir íbúa höfuðborgarsvæðisins.

Þorsteinn R. Hermannsson samgöngustjóri Reykjavíkur segir gott léttlesta- og hraðvagnakerfi auka afkastagetu samgöngukerfisins verulega, ein akrein Borgarlínu geti afkastað á við 2-4 akreinar fyrir almenna umferð. Borgarlínan verði lykilverkefni næstu ára í samgöngum á höfuðborgarsvæðinu og jafnframt hryggjarstykkið í skipulags- og uppbyggingaráætlunum. Reynsla annarra þjóða sýni að svæði nálægt borgarlínunni verði eftirsótt til búsetu og starfsemi.

Áslaug Hulda Jónsdóttir formaður bæjarráðs Garðabæjar, Haraldur Sverrisson bæjarstjóri Mosfellsbæjar, Dagur B. Eggertsson borgarstjóri Reykjavíkur, Ásgerður Halldórsdóttir bæjarstjóri Seltjarnarness, Ármann Kr. Ólafsson bæjarstjóri Kópavogs og Haraldur L. Haraldsson bæjarstjóri Hafnarfjarðar.

Kostnaðurinn við að koma kerfinu upp mun hlaupa á tugum milljarða og víða erlendis kemur ríkið inn í fjármögnun verkefna af þessari stærðargráðu.  Á vef samtaka sveitarfélaga á höfuðborgarsvæðinu (SSH) kemur fram að stofnun sjálfstæðs félags sem tekst á við uppbygginguna sé í undirbúningi.  Þar má einnig sjá skýrslur og kynningarefni tengt verkefninu >  skoða vefsíðu ssh.is/borgarlina

Þrjú félög voru dregin út með slembiúrtaki á fundi mannréttindaráðs 22. september 2015: Fjölnir, Knattspyrnufélag Reykjavíkur og Þróttur. Settur var á fót vinnuhópur til að sjá um úttektina og í honum áttu sæti starfsfólk frá mannréttindaskrifstofu Reykjavíkurborgar, íþrótta- og tómstundasviði Reykjavíkur (ÍTR) og Íþróttabandalagi Reykjavíkur (ÍBR). Úttektin var svo unnin í samvinnu við fulltrúa frá íþróttafélögunum þremur og efni hennar kynnt á fundi með þeim þann 27. janúar 2016.

Úttektin byggist í fyrsta lagi á svörum við spurningalista sem sendur var til íþróttafélaganna. Svör bárust frá félögunum í mars 2016 og miða tölur um kynjahlutföll í stjórnum o.fl. við þau svör. Í öðru lagi var byggt á upplýsingum um kynjahlutföll iðkenda hjá íþróttafélögunum, 6-18 ára, samkvæmt skráningu árið 2015. Í þriðja lagi voru vefsíður félaganna skoðaðar.  Ekki var unnt að greina skiptingu fjármagns eftir kyni í þessari úttekt og eru ástæður þess raktar á bls. 21.

Hægt er að lesa skýrsluna hérna…..

Jólafótboltamót Fjölnis 2016 var haldið, líkt og undanfarin ár, nú 10. desember í Egilshöllinni. Mótið er fyrir 6. og 7. flokk kvenna.
Voru um 550 hressar fótboltastelpur í jólafótboltastuði og eitthvað um 1000 foreldrum til að styðja við bakið á þeim.
Spilaður var 5 manna bolti, leiktími 10 mín og hvert lið lék 5 leiki.
6. flokkur byrjaði um morguninn og svo tók við 7. flokkur. Viðaveran í Egilshöll var um 2,5 klst. hjá hverju liði.

Þátttökugjald var 2500 kr. Innifalið var: verðlaunapeningur, þátttökuverðlaun og pizzuveisla.
Sportbitinn var opinn og boðið var uppá kaffi og bakkelsi á sanngjörnu verði í umsjá foreldrafélags 3. flokks kvenna Fjölnis. Þá sáu iðkendur 4. flokks kvenna og karla Fjölnis um dómgæslu á mótinu.

Foreldrar og þátttakendur áttu ánægjulegan dag í Egilshöllinni með því að fara í bíó í Sambíóunum, keilu í Keiluhöllinni, skauta á Skautasvellinu eða æfingu í World Class og borðað á eftir á Shake and Pizza. Einnig voru margir sem fóru í Grafarvogslauginni, en Reykjavíkurborg bauð stelpunum frítt í sund í Grafarvogslauginni að móti loknu.
Jólafótboltamót Fjölnis !