Á þessu ári eru þrjátíu ár liðin frá því að Barnasáttmálinn var samþykktur á allsherjarþingi Sameinuðu þjóðanna þann 20. nóvember 1989. Þessum merka áfanga verður fagnað með ýmsu móti víða um heim enda hafa öll ríki heims, utan Bandaríkjanna, staðfest sáttmálann og er Barnasáttmálinn á þrjátíu ára afmælinu því orðinn útbreiddasti mannréttindasáttmáli í heiminum. Embætti umboðsmanns barna stendur á tímamótum við upphaf afmælisársins því á síðustu starfsdögum Alþingis fyrir jól voru samþykktar breytingar á lögum um embættið sem munu styrkja það verulega auk þess sem þingið hafði samþykkt auknar fjárveitingar til embættisins í fjárlögum stuttu áður.

Með breytingum á lögum um umboðsmann barna er kveðið skýrar á um hlutverk embættisins með sérstakri áherslu á réttindi barna, m.a. með vísun til Barnasáttmálans og fleiri alþjóðasamninga sem lúta að réttindum barna, eins og til dæmis samningur Sameinuðu þjóðanna um réttindi fatlaðs fólks. Með samþykkt laganna hefur embættinu verið falið sérstakt hlutverk við að afla og miðla gögnum um stöðu tiltekinna hópa barna hverju sinni í samvinnu við ýmsa aðila. Þau gögn munu liggja til grundvallar samræmdri og markvissri stefnu í málefnum barna hjá stjórnvöldum. Þá hefur verið lögfest virkt samráð við börn en embættið hefur haft hóp barna sér til ráðgjafar um árabil. Loks er kveðið á um að umboðsmaður barna boði annað hvert ár til þings um málefni barna þar sem farið verði yfir stöðu og þróun í málefnum barna á helstu sviðum samfélagsins og þá verða niðurstöður þingsins kynntar ríkisstjórn og hlutaðeigandi ráðherrum. Fyrsta þingið um málefni barna – barnaþing – verður haldið í nóvembermánuði á þessu ári og verður án efa einn stærsti viðburður afmælisársins. Gera má ráð fyrir um 400-500 þátttakendum en í nýsamþykktum lögum er kveðið á um virka þátttöku barna í skipulagningu og framkvæmd þingsins og að börn verði meðal gesta og mælenda þess. Umboðsmanni barna er ekki kunnugt um að sambærilegt þing hafi verið haldið annars staðar þó ýmsar leiðir hafi verið farnar til að virkja þátttöku barna víða um heim.

Í umræðum þingmanna og nefndaráliti velferðarnefndar við afgreiðslu lagabreytinganna kom fram mikill einhugur meðal þingmanna um að styrkja embætti umboðsmanns barna og tryggja þannig börnum á Íslandi öflugan málsvara. Þá kom fram skýr vilji þingmanna um aukið samráð við börn í starfi þingsins og var fulltrúum úr ráðgjafarhópi barna við embættið boðið á fund velferðarnefndar til samráðs um fyrirhugaðar lagabreytingar. Í áliti velferðarnefndar við afgreiðslu frumvarpsins var sérstaklega fjallað um þær áherslur sem komu fram í samræðu við fulltrúa barna þar sem sagði »að Alþingi hefði reglulegt og raunverulegt samráð við börn þegar til umfjöllunar væru mál sem snerta hagsmuni þeirra. Sérstaklega var vísað til þess sem ungmennin komu á framfæri um að vefsíður og skjöl Alþingis væru ekki alltaf nógu aðgengileg, en jafnframt að styrkja þyrfti fræðslu til barna um lýðræðisþátttöku svo að þeim væri gert auðveldara að afla sér upplýsinga og hafa áhrif á framgang mála á Alþingi. Telur nefndin þetta mikilvæga þróun sem öflugra embætti umboðsmanns barna muni reynast traustur bandamaður í.« Álit velferðarnefndar og jákvæð afstaða þingmanna er mikilvægt veganesti fyrir embættið á næstu misserum en þar hefur á síðustu árum verið lögð áhersla á að stofnanir og sveitarfélög styrki samráð við börn með því að setja á laggirnar ráðgjafarhópa barna eða ungmennaráð.

Á þessu ári mun Ísland sitja fyrir svörum hjá Sameinuðu þjóðunum um framkvæmd Barnasáttmálans og viðbrögð stjórnvalda við lokaathugasemdum barnaréttarnefndarinnar frá árinu 2011. Meðal tilmæla nefndarinnar til íslenskra stjórnvalda var ábending um nauðsyn þess að þróa heildstætt kerfi um söfnun, vinnslu og greiningu gagna sem grundvöll árangursmats á framkvæmd réttinda þeirra sem Barnasáttmálinn tryggir börnum. Þá mæltist nefndin jafnframt til þess að tryggt verði að tillit verði tekið til sjónarmiða barna hjá öllum stofnunum sem aðkomu hafa að málefnum barna. Ljóst er að efling embættis umboðsmanns barna er mikilvægur liður í því að gera nauðsynlegar úrbætur í samræmi við athugasemdir og tilmæli Sameinuðu þjóðanna um framkvæmd Barnasáttmálans á Íslandi.

Ísland hefur sjaldan staðið betur efnahagslega en nú um stundir og án efa er betra að vera barn á Íslandi en víða annars staðar. Margt bendir þó til þess að þær þjóðfélagsbreytingar sem orðið hafa á síðustu áratugum hafi aukið verulega álag á börn. Sú kynslóð sem nú er að vaxa úr grasi er í skipulagðri dagskrá nánast allan ársins hring, fyrst í leikskóla, síðan grunnskóla og loks framhaldsskóla og jafnframt hefur skóladögum ársins fjölgað. Þá sýna nýjustu tölur að um helmingur ungmenna á aldrinum 15-17 ára vinnur með skóla. Skjánotkun og samfélagsmiðlum fylgir meiri félagslegur þrýstingur en áður hefur þekkst sem skapar aukna félagslega samkeppni með tilheyrandi álagi og streitu. Það ætti því ekki að koma á óvart að vaxandi fjöldi barna glímir við kvíða og vanlíðan og lyfjanotkun barna hefur aukist verulega á síðustu árum.

Þessi staða barna er umhugsunarefni fyrir íslenskt samfélag sem allir verða að taka alvarlega. Stjórnvöld hafa sett málefni barna í forgang og einn liður í því er stofnun nýs ráðuneytis barnamála sem tók til starfa nú um áramótin. Það verður vonandi mikilvægt skref í átt að því að móta stofnanir samfélagsins út frá þörfum og hagsmunum barna ekki síður en fullorðinna og tryggja þannig réttindi allra barna á Íslandi.

Hérna eru fleiri Upplýsingar…..

og einnig hérna……..

Follow

Hvað felst í að vera traustur bifvélavirki?

Á Íslandi búa í kringum 350.000 manns og á sama tíma er svipaður fjöldi skráðra bifreiða á landinu. Það þýðir að miðað við fjölda skráðra bifreiða ætti hver íbúi að vera virkur notandi allavega einnar bifreiðar og þar af leiðandi að hafa þörf fyrir áreiðanlegan bifvélavirkja.

En hvað felst í því að vera áreiðanlegur bifvélavirki?

Bifvélavirki – sinnir bílnum þínum persónulega

„Í augum viðskitpavinarins er bifreiðin nauðsynlegur faraskjóti í daglegu amstri svo sem við akstur í og úr vinnu, skóla, verslun og fleiri áfangastaða. Við sem bifvélavirkjar þurfum að ábyrgjast rétt eftirlit og viðhald svo að hægt sé að nota bifreiðina á öruggan máta í daglegu lífi” segir Michael Lempicki, eigandi Thor Bifreiðaverkstæði.

Thor Bifreiðaverkstæði tekur að sér hvers konar bílaviðgerðir og viðhald, svo sem bremsuviðgerðir, athugun á vélbúnaði ásamt olíu- og síuskiptum. Við hjá Thor tökum einnig að okkur stærri viðgerðir eins og að skipta um og gera við kúplingar, mismunadrif og fjaðurbúnað ásamt ýmsum öðrum stærri viðgerðum.

„Það er án efa þægilegra að eiga samfelld viðskipti við sama verkstæðið þar sem bifvélavirkinn þekkir bifreiðina og sögu hennar og viðskiptavinurinn veit hvaða þjónustu honum verður veitt. Þannig verða bæði eftirlit og viðgerðir skilvirkari og viðskiptavinirnir þar af leiðandi ánægðari”, segir Michael.

Góð samskipti eru mikilvæg

Góð þjónusta felur ekki bara í sér sérhæfða þjónustu bifvélavirkjans heldur er líka mikilvægt að góð samskipti séu á milli viðskiptavinar og bifvélavirkja. Það myndar gott traust á báða bóga sem stuðlar að ánægju beggja aðila.

„Viðskiptavinur sem treystir okkur fyrir bifreið sinni þarf að geta fengið að vita nákvæmlega hvert vandamálið er, hversu dýr viðgerðin verður með eða án varahluta sem mögulega þarf að sérpanta og hversu langan tíma viðgerðin mun taka. Oft eru viðskiptavinirnir tímabundnir og þurfa að nota bifreiðina við dagleg störf, eins og að sækja börn í skóla eða fara til læknis”, segir Michael. Það gerir góð samskipti milli viðskiptavinar og bifvélavirkja enn mikilvægari þar sem að flestir nota bifreiðina til daglegra erinda og því mikilvægt að báðir aðilar séu meðvitaðir um hvaða tími hentar best, bætir hann við.

Michael og aðrir bifvélavirkjar hjá Thor Bifvélaverkstæði leggja mikið upp úr því að mynda góð sambönd við viðskiptavini sína með gagnkvæmt traust að leiðarljósi og nýtingu bestu verkferla sem völ er á til að tryggja góð samskipti auk vandaðrar og sanngjarnrar þjónustu.

 Fjölbreytt verkstæði

Auk venjulegra bifreiðaviðgerða taka bifvélavirkjar Thor Bifreiðaverkstæðis einnig að sér fjölbreytt verkefni eins og uppfærslur og breytingar á sportbílum, breyttum jeppum og ýmsum torfærutækjum. Meðal þessara sértæku verkefna má nefna: suðuvinnu, bílaréttingar, vinnu við undirvagna, brettakanta og drifrás.

Þessa dagana eru bifvélavirkjarnir okkar til dæmis að fást við þá áskorun að gera upp Mazda 818 GT Coupe árgerð 1974. “Þetta er mjög skemmtilegt og metnaðarfullt verkefni fyrir okkur þar sem við sameinum áralangra reynslu af því að fást við bifvélar í bland við ástríðu okkar og virðingu fyrir starfinu” segir Michael. Þá er verkefnið sérstaklega krefjandi þar sem fyrri tilraunir til viðgerða hjá öðru verkstæði báru lítinn árangur, svo bifvélavirkjarnir hjá Thor þurfa nánast að byggja bifreiðina upp frá grunni.

Einungis það að útvega varahluti í þessa árgerð af Mazda 818 GT er svo gott sem ómögulegt. Þrátt fyrir það ákváðum við að taka þessari spennandi áskorun og endurbyggja bifreiðina úr varahlutum úr öðrum bifreiðum sem voru fáanlegir og henta verkefninu. Á næstunni munum við setja í bifreiðina fjaðurbúnað að framan og aftan úr BMW E36 og 2.0 vél með 5 gíra beinskiptingu úr Mazda 929. Fylgjast má með framvindu uppgerðar á Mözdunni góðu á Facebook síðu verkstæðisins, tekur Michael fram.

Að lokum. Góður bifvélavirki mun:

– Upplýsa þig um umfang bilana og veita þér nákvæmar upplýsingar um hverskonar viðgerða er þörf.

– Tala opinskátt og heiðarlega við viðskiptavininn.

– Taka tillit til aðstæðna viðskiptavina hverju sinni.

Þar að auki þarf varla að taka fram að færni bifvélavirkjans í sínu fagi er grunnurinn að góðri þjónustu. En ásamt mikilli þekkingu og reynslu vill verkstæðið okkar einnig bjóða fram hlýtt viðmót og vingjarnlegt andrúmsloft.

Við teljum að það sem veiti viðskiptavininum mesta ánægju sé að yfirgefa verkstæðið með bifreiðina í góðu ástandi eftir vel heppnaða viðgerð og góð samskipti við vingjarnlegan bifvélavirkja. En það er einmitt það sem við leggjum okkur fram við að gera.
Veita sem besta þjónustu í góðu umhverfi og góðu andrúmslofti þar sem að fagmennska ræður ríkjum. 

Leitar þú að góðum, traustum og heiðarlegum bifvélavirkja?

Bifvélavirkjarnir hjá Thor Bifreiðaverkstæði hugsa vel um þig og bifreiðina þína.

Thor Bifreiðaverkstæði

Desjamýri 1

270 Mosfellsbær

S: 565-5605

www.facebook.com/thorgarage

Myndir tók Marcin Matusiak

Follow

Kvöldopnun á Korpúlfsstöðum í aðdraganda aðventu er viðburður sem lýsir upp skammdegið og notaleg stemning ríkir í gamla stórbýlinu þegar listamenn taka á móti gestum.
Samsýning KorpArt og Rósuveitingar á Kaffistofu
Jólaleikurinn “Gyllta askjan” verður ræstur í Galleríi Korpúlfsstaða. Viðskiptavinir gallerísins geta átt von á óvæntum glaðningi í desember.
Jólahappdrætti Leirlistafélagsins í Austurporti.
Tónlist ómar um allt hús.
Verið velkomin – KorpArt

Follow

Mánuður myndlistar hefst á Korpúlfsstöðum með því að listamenn opna vinnustofur sínar og taka á móti gestum laugardaginn 6. október kl. 13-17.
Gallerí Korpúlfsstaðir er opið frá kl.12-17 og býðst þar fjölbreytt úrval af myndlist og hönnun.
Veitingar á kaffistofunni (Rósukaffi)
Allir velkomnir í heimsókn á stórbýlið við borgarmörkin.

Follow

Í dag fimmtudaginn 27 desember 2018, fór fram val á íþróttafólki Fjölnis 2018 í fimleikasalnum okkar í Egilshöll. Að loknu vali var boðið uppá léttar veitingar í félagsrýminu okkar í Egilshöll.

Þetta er í 29 skipti sem valið fór fram á íþróttakonu og íþróttakarli ársins. Við hvetjum allt Fjölnisfólk, iðkendur, þjálfara, foreldra og Grafarvogsbúa almennt að fjölmenna og heiðra íþróttafólkið okkar. Þetta er orðin árviss hefð og gaman að sjá hversu margir mættu og heiðruðu íþróttafólkið okkar.

Íþróttakona Fjölnis 2018 er – Hera Björk Brynjarsdóttir, tennisdeild

Íþróttakarl Fjölnis 2018 er – Kristinn Þórarinsson, sunddeild, fimleikadeild

Fjölnismaður ársins.

Eins og segir í reglugerð, þá er Fjölnismaður ársins kjörinn ár hvert af aðalstjórn félagsins.
Fjölnismaður ársins er valin með hliðsjón af framúrskarandi framlagi til félagsins í formi sjálfboðavinnu, hvatningu, unnið óeigingjarnt starf og eða annað sem tekið hefur verið eftir.
Deildir félagsins geta komið með ábendingar um einstaklinga, sem gætu komið til greina. Eins og alltaf þá komu margir til greina, enda eru handtök sem þarf að vinna nær endalaus og félagið byggir á því að eiga góða að sem leggja sitt á vogarskálar.

Fjölnir er ungt félag, sem hefur vaxið mjög hratt á undanförnum árum. Það hefur verið mjög gefandi að sjá mikið af ungu fólki koma inn í starfið – ungt fólk sem verið hefur Fjölnisfólk allt sitt líf og hafa alltaf verið í félaginu. Fram til þessa hafa flestir sem starfa hjá félaginu verið fyrrverandi eitthvað. Unga fólkið sem tekur við hefur aldrei efast um félagið. Aðalstjórn ákvað, að Fjölnismenn ársins væru þeir sem standa á bak við Getraunakaffi Fjölnis, en það eru þeir Geir og Kolbein Kristinssynir, Hjörleif Þórðarson og Marinó Þór Jakobsson.

Þessir ungu menn eru fulltrúar alls þessa unga fólks, sem okkur langar til að heiðra og þakka fyrir þeirra framlag. Þeir tóku að sér að sjá um Getraunakaffi Fjölnis og hafa á stuttum tíma gert það að einu stærsta getraunakaffi hér á landi. Á laugardagsmorgnum kemur saman stór hópur fólks úr öllum deildum hér í Egilshöll og spjallar og fær sér kaffi um leið og það styrkir félagið með þátttöku í Getraunum. Það eru allir velkomnir og þetta er orðið fastur þáttur í helgum hjá mörgum Fjölnismönnum. Þessir drengir eru vel að þessu komnir – til hamingju – og takk fyrir það sem þið hafið þegar gert – en það er eins og alltaf nóg að gera framundan.

Íþróttakarl fimleikadeildar árið 2018 er – Sigurður Ari Stefánsson

Íþróttakona fimleikadeildar árið 2018 er – Ásta Kristinsdóttir.

Frjálsíþróttadeild

Íþróttakona frjálsíþróttadeildar árið 2018 er – Vilhelmína Þór Óskarsdóttir

Íþróttakarl frjálsíþróttadeildar árið 2018 er – Hugi Harðarson

Handknattleiksdeild

Íþróttakona handknattleiksdeildar fyrir árið 2018 er – Elísa Ósk Viðarsdóttir.
Íþróttakarl handknattleiksdeildar fyrir árið 2018 er – Brynjar Loftsson.

Íshokkídeild

Íþróttakarl Íshokkídeildar fyrir árið 2018 er – Kristján Albert Kristjánsson

Íþróttakona Íshokkídeildar fyrir árið 2018 er – Karen Ósk Þórisdóttir

Listskautadeild

Íþróttakona listskautadeildar fyrir árið 2018 er – Sólbrún Erna Víkingsdóttir

Karatedeild

Íþróttakarl karatedeildar fyrir árið 2018 er – Baldur Sverrisson

Íþróttakona karatedeildar fyrir árið 2018 er – Eydís Magnea Friðriksdóttir

Knattspyrnudeild
Íþróttakarl knattspyrnudeildar fyrir árið 2018 er – Torfi Tímóteus Gunnarsson.

Íþróttakona knattspyrnudeildar fyrir árið 2018 er – Margrét Ingþórsdóttir
Körfuboltadeild

Íþróttakarl körfuknattleiksdeildar fyrir árið 2018 er – Róbert Sigurðsson

Íþróttakona körfuknattleiksdeildar fyrir árið 2018 er – Margrét Ósk Einarsdóttir

Skákdeild

Íþróttakarl Skákdeildar fyrir árið 2018 er – Dagur Ragnarsson

Íþróttakona Skákdeildar fyrir árið 2018 er – Nansý Davíðsdóttir

Sunddeild

Íþróttakarl sunddeildar fyrir árið 2018 er – Kristinn Þórarinsson

Íþróttakona sundadeildar fyrir árið 2018 er – Eygló Ósk Gústafsdóttir

Tennisdeild

Íþróttakona tennisdeildar fyrir árið 2018 er – Hera Björk Brynjarsdóttir

Hérna eru myndir frá viðurkenningunni……..

#FélagiðOkkar

Follow

Hérna er hægt að skoða myndir frá deginum

Follow