Aðalfundur Fjölnis fór fram þriðjudaginn 15. mars kl. 17:30. Fundurinn var haldinn í félagsaðstöðu Fjölnis í Egilshöll.

Ásamt venjulegum aðalfundarstörfum voru veittar heiðursveitingar til handa góðum hópi Fjölnis fólks.

Silfurmerki

Nr. 187  Davíð Arnar Einarsson handboltadeild

Nr. 188 Magnús Þór Arnarsson handboltadeild

Nr. 189 Þorgeir Lárus Árnason.

Nr. 190 Þorsteinn Yngvi Guðmundsson karatedeild

Nr. 191 Baldvin Örn Berndsen aðalstjórn/ljósmyndari

Nr. 192 Zoran Stosic

Gullmerki.

Merki nr. 34 Ingibjörg Kristinsdóttir

Heiðursfélagi Fjölnis.

Merki nr. 3 Erla Gunnarsdóttir.

Óskum þessum fagra hópi fólks til hamingju með viðurkenningarnar.

Áfram Fjölnir

Hérna er hægt að skoða ársskýrslu

Lög Fjölnis má finna hér

Samskiptaráðgjafi íþrótta- og æskulýðsstarfs tók til starfa á vormánuðum eftir að mennta- og menningarmálaráðuneytið setti lög um starfið síðastliðið haust. Samskiptaráðgjafi er óháður aðili sem getur aðstoðað og leiðbeint einstaklingum sem telja sig hafa verið beittir ofbeldi eða misrétti í íþrótta- eða æskulýðsstarfi. Þjónusta samskiptaráðgjafa er gjaldfrjáls.

Samskiptaráðgjafi hefur það markmið að auka öryggi í íþrótta- og æskulýðsstarfi barna, ungmenna og fullorðinna. Markmiðið er að allir geti tekið virkan þátt á sínum vettvangi og jafnframt leitað sér aðstoðar eða leitað réttar síns vegna atvika og misgerða sem hafa átt sér stað án þess að óttast afleiðingar. 

Þjónusta og ráðgjöf samskiptaráðgjafa stendur öllum þeim til boða sem tilheyra skipulögðu íþrótta- og æskulýðsstarfi á landinu. Til samskiptaráðgjafa er hægt að leita með mál er varða andlegt-, líkamlegt- og kynferðislegt ofbeldi og áreitni, einelti og önnur sambærileg tilvik sem hafa komið upp á vettvangi íþrótta- eða æskulýðsstarfs. Einnig mun samskiptaráðgjafi koma á samræmdum viðbragðsáætlunum á landsvísu í þessum málaflokkum.

Eftir samtal eða fyrstu samskipti við samskiptaráðgjafa er boðið upp á viðtal ef málið varðar áreitni, ofbeldi eða einelti. Þá er frekari upplýsinga aflað og í kjölfarið eru næstu skref ákveðin, ávallt í samráði við þann sem leitar til samskiptaráðgjafa. Einnig er hægt að leita eftir ráðgjöf hjá samskiptaráðgjafa, ekki þarf að fara lengra með mál ef viðkomandi kýs það ekki. 

Heimasíða samskiptaráðgjafa mun þjóna sem upplýsinga- og fræðslusíða starfsins. Hægt er að setja sig í samband við samskiptaráðgjafa í gegnum síðuna, tilkynna atvik og fá ráðgjöf eða aðrar upplýsingar. 

Sambandsaðilar eru hvattir til að setja lógó samskiptaráðgjafa á heimasíður sínar með beina tengingu inn á heimasíðu embættisins.

Kynning á starfi samskiptaráðgjafa

Skákdeild Fjölnis og Frístundamiðstöðin Gufunesbær stóðu fyrir Vetrarleyfisskákmóti í Hlöðunni fyrir grunnskólanemendur í vetrarleyfi. Um 50 krakkar fjölmenntu og hvert borð skipað strákum og stelpum, allt frá 6 – 15 ára.

Tefldar voru sex umferðir og í lok móts var boðið upp á skúffuköku af stærri gerðinni.

Keppt var í þremur flokkum og veitt 20 verðlaun. Bestum árangri náði skákdrottningin Emilía Embla sem sigraði í öllum sínum skákum. Hún tefldi í stúlknaflokki. Sigrún Tara, Nikola, Silja Rún,Tara Líf, Stefnanía og Lilja Kathlen nældu sér einnig í verðlaun.

30 drengir tefldu í eldri og yngri flokki. Verðlaunahafar: Viktor, Tristan Fannar, Oliver, Ásgeir Smári, Ómar Jón, Kristján Freyr og Arthur í yngri flokk. – Birkir, Örvar, Adam, Engilbert Viðar, Jósef, Guðmundur Orri og Theodór Helgi í eldri flokki. Einnig var dregið í happadrætti og endaði því helmingur þátttakenda með glaðning.

Þau Lenka Ptacnikova, Kristjan Dagur Jonsson og Helgi Árnason stjórnuðu skákmótinu sem lauk nákvæmlega kl. 16:00 eins og stefnt var að. Veitingastjóri var Aneta Kamila Klimaszewska sem býr til bestu skúffukökurnar að mati skákkrakka í Skákdeild Fjölnis.

Takk krakkar fyrir flotta frammistöðu og góða framkomu.

Grafarvogskirkja er ein stærsta og myndarlegasta kirkjubygging landsins. Kirkjan hýsir stærsta söfnuð landsins. Eitt af mikilvægari verkefnum safnaðar, sem á aðsetur sitt í svo myndarlegri kirkju, er að eignast orgel. Að því hefur nú verið unnið jafnt og þétt í á þriðja áratug.

Safnast hafa yfir 70 milljónir króna í orgelið. Fyrirhugað orgel mun með öllu kosta 110 milljónir, þannig að okkur vantar nú um 40 milljónir króna til að ljúka verkefninu. Þess vegna langar okkur nú að leita til ykkar, safnaðarfólk, um að taka þátt í þessu verðuga verkefni með okkur. Gerður hefur verið samningur við Aeris Organa, (Budapest) um smíði orgels. Stefnt er að því að það verði vígt í semptember 2021. Orgel kirkjunnar mun auka til muna fjölbreytni í öllu helgihaldi í Grafarvogskirkju og þátttöku kirkjunnar í menningarlífi borgarinnar. Orgelið mun þá einnig styrkja menningarlega ásýnd og stöðu Grafarvogs. Tónleikalíf hverfisins mun styrkjast til mikilla muna og athafnir allar fá dýpra inntak.

Ljóst má vera Grafarvogssöfnuður hefur ekki fjárhagslegt bolmagn til að kosta þetta verkefni einn og sér. Örlátir einstaklingar og velunnarar kirkjunnar hafa fært okkur, söfnuðinum, allt það fé sem nú myndar höfuðstól orgelsjóðs. Fyrir þær gjafir erum við afar þakklát. En betur má ef duga skal.

Möguleikar til söfnunar eru miklir í Grafarvogi, þar sem í Grafarvogssókn telur nú um sjö þúsund heimili. Hver hjálparhönd og hver gjöf, lítil eða stór, skiptir miklu máli til þess að klára smíði þessa undursamlega hljóðfæris. Gaman er geta þess, að orgelið er í sögulegu samengi, oft kallað „Drottning allra hjóðfæra“ !!!

Hægt er lesa meira um þetta glæsilega orgel og söfnunina hérna á vef Grafarvogskirkju……

FYRRI HELGIN 29. JANÚAR – 1. FEBRÚAR

Hér að neðan má sjá grófa dagskrá fyrri keppnishelgarinnar, 29. – 1. febrúar. Allar tímasetningar eru birtar með fyrirvara um breytingar og er mælt með að áhugasamir fari inná Facebook viðburði hverrar greinar til að fá nánari upplýsingar og tilkynningar ef eitthvað breytist. Hægt er að finna alla Facebook viðburði hér eða með því að ýta á nöfn greinanna í töflunni hér fyrir neðan.

SEINNI HELGIN 2. – 6. FEBRÚAR

Hér að neðan má sjá grófa dagskrá seinni keppnishelgarinnar, 2. – 6. febrúar. Allar tímasetningar eru birtar með fyrirvara um breytingar og er mælt með að áhugasamir fari inná Facebook viðburði hverrar greinar til að fá nánari upplýsingar og tilkynningar ef eitthvað breytist. Hægt er að finna alla Facebook viðburði hér eða með því að ýta á nöfn greinanna í töflunni hér fyrir neðan.

Hérna er hlekkur á dagskrá leikanna…..https://www.rig.is/dagskra-2022

Aðalskipulag Reykjavíkur 2040 er uppfærð og endurbætt útgáfa AR2030, sem samþykkt var árið 2014. Aðalskipulagið var samþykkt í borgarstjórn Reykjavíkur þann 19.október 2021, sbr. einnig samþykkt hennar 21. desember 2021. Aðalskipulagið var undirritað þann 13. janúar 2022 og mun taka gildi með birtingu í Stjórnartíðindum á næstu dögum

Dagur B. Eggertsson borgarstjóri, Ásdís Hlökk Theodórsdóttir forstjóri Skipulagsstofnunar og Pawel Bartoszek form. skipulags- og samgönguráðs undirrituðu. Hér má sjá fleiri myndir í fullri upplausn: Hlekkur.

„Það er með einstakri ánægju og gleði sem ég staðfesti gildistöku nýs aðalskipulags Reykjavíkur til 2040 með undirritun minni. Nýtt aðalskipulag Reykjavíkur til 2040 leggur grunn að kraftmeiri og grænni uppbyggingu borgarinnar en dæmi eru um í sögu hennar,“ sagði Dagur B. Eggertsson borgarstjóri við undirritun í Höfða í dag.

Ný meginmarkmið, breytingar og aðrar viðbætur sem settar eru fram í AR2040, miða allar að því að herða á framfylgd þeirrar stefnu sem mörkuð var í fyrra aðalskipulagi um sjálfbæra þróun, þétta og blandaða borgarbyggð og vistvænar ferðavenjur. Markmiðið er að stuðla að kröftugri borgarþróun innan núverandi vaxtarmarka til ársins 2040. Með skipulaginu er sýnt fram á að þau landsvæði sem við höfum tekið frá undir íbúðarbyggð, atvinnusvæði og samgöngumannvirki í aðalskipulagi undanfarna áratugi, geta dugað okkur til ársins 2040. Þetta þýðir að auðveldara verður að framfylgja markmiðum borgarinnar um sjálfbæra þróun, verndun ósnortinna svæða í útjaðri byggðar, líffræðilega fjölbreytni, kolefnishlutleysi, vernd grænna útivistarsvæða, vistvænni ferðavenjur og uppbyggingu Borgarlínu og fjölbreyttari og skemmtilegri borg.

Meiri borg, meiri náttúra

Fjölgun íbúa og starfa innan núverandi byggðar er mikilvæg af svo mörgum ástæðum. Með því styttum við almennt vegalengdir innan borgarinnar, styðjum við vistvænar ferðavenjur, drögum úr losun CO₂ og komum í veg fyrir rask á ósnortinni náttúru í útjaðri byggðar. Þétting byggðar gefur okkur tækifæri til nýta betur fjárfestingar, s.s. í skólum, opnum svæðum, götum og veitukerfum. Hægt er að draga þar með úr kolefnisspori uppbyggingar og skapa hagkvæmari borgarþróun. Fjölgun íbúa innan eldri byggðar leiðir einnig til þess að skólasamfélagið styrkist, bakland verslunar og þjónustu eflist og almenningsrýmin verða meira lifandi. Áhersla á þéttingu innan núverandi byggðar gefur okkur líka tækifæri til að skapa fjölbreyttara og lífvænlegra samfélag, fyrir alla félagshópa. Uppbygging vistvænnar íbúðarbyggðar á eldri atvinnusvæðum leiðir einnig til þess að umhverfisgæðin í hverfinu aukast og leiðir til frekari endurbóta á innviðum og opnum svæðum í grenndinni. Það er líka ákveðið réttlætismál að nýir íbúar fái tækifæri til að njóta þeirra umhverfisgæða, þjónustustofnana og innviða sem eru til staðar í grónum hverfum borgarinnar. 

Betra stjórntæki og skilvirkari stjórnsýsla

Jafnhliða því að endurbæta og herða á stefnu aðalskipulagsins um sjálfbæra þróun, hefur vinnan við skipulagið miðað að því að gera áætlunina að betra stjórntæki.  Markmiðið er að styrkja samningsstöðu borgaryfirvalda í viðræðum við lóðarhafa um magn og gerð uppbyggingar á einstaka reitum. Með því verður auðveldara að tryggja gæði byggðar í samræmi við sett markmið. Breytt framsetning miðar einnig að því að stefna aðalskipulagsins verði almennari og sveigjanlegri, sem ætti að leiða til færri breytinga á því í framtíðinni og skjótvirkara afgreiðsluferlis í húsnæðismálum.

Fjölbreytt húsnæðisuppbygging og vistvænar ferðvenjur

„Borgin mun byggjast þéttar en áður meðfram nýjum þróunarásum Borgarlínu, virkir samgöngumátar eru stórefldir og Reykjavík á að verða hjólaborg á heimsmælikvarða. Hugað er að þróun og eflingu grænna svæða og tengingum þeirra á milli og fjölbreyttri húsnæðisuppbyggingu í þágu allra tekjuhópa. Loftslagsmálum er mætt af meiri festu en nokkru sinni áður og lýðheilsa borgarbúa er meðal nýrra áherslna. AR2040 leggur grunn að því og staðfestir að næstu tveir áratugir verða áratugir Reykjavíkur,“ segir borgarstjóri.

Mikilvægar breytingar í mörgum skilningi

• Sett eru metnaðarfyllri markmið um vöxt Reykjavíkur og fjölgun íbúða.
• Skapaðar eru forsendur fyrir stóraukið framboð íbúðarhúsnæðis á fjölbreyttum svæðum í öllum borgarhlutum. Lagður er grundvöllur að hinum nýja borgarhluta í Elliðaárvogi og Ártúnshöfða með þremur nýjum skólahverfum. 
• Réttur þeirra sem höllum fæti standa á húsnæðismarkaði er betur tryggður.
• Gerðar eru auknar kröfur um hönnun íbúðarbyggðar og blandaðrar byggðar varðandi gróðursvæði, sólrík dvalarsvæði og önnur umhverfisgæði. 
• Skerpt er almennt á kröfum um lýðheilsu, umhverfisáhrif, umhverfisgæði og vernd náttúru, menningarminja og byggðar.
• Stefnan miðar að því að styrkja stöðu borgaryfirvalda í samningagerð við byggingaraðila um magn og umfang byggðar á einstökum reitum.
• Leiðarljósið er að stuðla að markvissara skipulags- og uppbyggingarferli, m.a. með fækkun tafsamra breytinga á aðalskipulaginu. 
• Réttindi starfandi fyrirtækja um endurnýjun starfsleyfis til skemmri tíma eru betur tryggð og þannig létt á þrýstingi á ótímabæran flutning viðkomandi starfsemi.
• Sett fram skýrari markmið um þróun byggðar í Keldnalandi og skapað svigrúm til að hefja undirbúning skipulagsvinnu á svæðinu.
• Tryggð eru starfsskilyrði fyrir innanlandsflugvöll í Vatnsmýri til ársins 2032 og sköpuð aðstaða til framtíðar fyrir þyrluflug Landhelgisgæslunnar.
• Stefna um stokk á Miklubraut og á Sæbraut og aukin umhverfisgæði í aðliggjandi hverfum er fest í sessi.
• Borgarlínan er fest í sessi í aðalskipulaginu og uppbyggingarsvæði í grennd við hana njóta forgangs. Áréttað er að uppbygging innviða byggi á þeim samgöngusáttmála sem samþykktur var 2019, milli sveitarfélaga á höfuðborgarsvæðinu annars vegar og hins vegar þeirra og ríkisvaldsins. 
• Sett eru metnaðarfyllri markmið í loftslagsmálum og kröfur um mat á kolefnisspori allrar uppbyggingar.

Sjá greinargerð Aðalskipulags Reykjavíkur 2040

Slóð á eldri fréttir af AR2040:

Aðalskipulag í auglýsingu 19.6.21

Sjá kynningarskjal (ágrip) með auglýstri tillögu

Hlaupahópur Fjölnis í Grafarvogi hefur starfað í nær 30 ár. Hópurinn er öllum opinn og eru meðlimir hans á öllum aldri og á getustigi sem spannar allt frá frístundaskokkurum til afrekshlaupara. Hlaupahópurinn starfar innan frjálsíþróttadeildar Fjölnis.

Nú leitar frjálsíþróttadeildin að nýjum þjálfara (eða þjálfurum) sem er tilbúinn að leiða áframhaldandi starf hópsins og hefur metnað til frekari uppbyggingar og nýliðun hjá hópnum. Æskilegt er að viðkomandi hafi reynslu af þjálfun í langhlaupum auk þess að eiga auðvelt með mannleg samskipti. Kostur er að viðkomandi hafi menntun í íþrótta- og þjálfunarfræðum. Möguleiki er að tveir þjálfarar skipti með sér verkum. Gert er ráð fyrir þremur föstum æfingum á viku sem fela í sér hlaupaþjálfun auk styrktarþjálfunar. Æskilegt er að viðkomandi geti hafið störf sem fyrst.
Áhugasamir eru hvattir til að skila inn umsókn til formanns frjálsíþróttadeildar Fjölnis á netfangið: toggi@vov.is, sem fyrst. Ráðið verður í stöðuna eins fljótt og kostur er.

Nánari upplýsingar veita formaður frjálsíþróttadeildar Fjölnis; Þorgrímur Guðmundsson í síma 861 6131 eða í pósti toggi@vov.is og hjá meðlimi hlaupahópsins Bragi Birgisson sími 669-0888 (bragi.birgisson@gmail.com).

Séra Guðrún Karls Helgudóttir, sóknarprestur við Grafarvogskirkju segir kirkjuna í siðferðislegri klemmu þessi jólin, vegna samkomutakmarkana. Þó að heimild sé fyrir helgihaldi í 50 manna sóttvarnarhólfum hafi þessi fjölmennasta sókn landsins afráðið að hafa engar opnar messur þessi jól, í því skyni að vernda sóknarbörn, starfsfólk og kórmeðlimi fyrir smitum.

„Þetta er mjög erfið ákvörðun og við vorum búin að vera í þrjá daga að ræða allar hugsanlegar lausnir. Við vorum tilbúin með allar mögulegar útgáfur, eftir því hvaða reglur væru kynntar,“ segir Séra Guðrún Karls Helgudóttir sóknarprestur við Grafarvogskirkju, um áhrif samkomutakmarkana á helgihald um jól og áramót.

Siðferðisleg klemma

Helgihald í Grafarvogskirkju þessi jól og áramót fer eingöngu fram í streymi þetta árið. Grafarvogssókn er fjölmennasta sókn landsins og við kirkjuna starfa fjórir prestar og tveir organistar.

Guðrún segir kirkjuna standa frammi fyrir siðferðislegri klemmu, en þó að reglurnar segi eitt geti siðferðiskenndin sagt annað og ekki sé endilega æskilegt að stefna fólki saman miðað við núverandi ástand, þó að jafnvel sé heimild til þess. Aftur á móti hafi takmarkanirnar slæm áhrif á kirkjustarfið.

„Það er eitt að hafa opið og leyfa þeim að koma sem vilja, en svo erum við með kóra sem hafa ekki eins mikið val. Eigum við að láta þau mæta í þessu ástandi?“ Spyr Guðrún. „Við erum með 40 manna fullorðinskór, barna- og unglingakór sem telur 50 manns og svo þriðja kórinn sem er aðeins minni,“ segir hún. „Við ætluðum að vera með alla þrjá kórana á aðfangadagskvöld.“

Guðrún kveðst þó vera öllu vön í þessum efnum. „Við frestuðum fermingum í fyrra, þremur dögum fyrir fyrstu fermingu og þá var fólk var búið að panta sal og allt. Þetta ástand er rosalega slæmt fyrir kirkjuna og þá sem vilja sækja kirkju,“ segir hún og bætir við að ekki sé eins að koma í kirkju og að fylgjast með helgihaldi í gegnum streymi.

Færri við jarðarfarir en áður

Guðrún segir jarðarfarir undanfarið hafa farið fram með hraðprófum, „en þrátt fyrir það eru mun færri að mæta í jarðarfarir en fyrir Covid. Fólk bara velur að halda sig heima.“

„En svo finnum við líka að það er stór hópur sem er búinn að fá nóg og vill bara koma í kirkju. Margar kirkjur eru það stórar að auðvelt er að fylgja öllum sóttvarnareglum og gera ráðstafanir,“ segir hún.

„Fyrir Covid voru svona 700 manns í jólamessum í Grafarvogskirkju.“ Hún segir Grafarvogskirkju hafa stefnt á að nota hraðpróf þessi jólin, og reiknað hafi verið með 300-400 kirkjugestum. „Við erum ekki að reikna með sama fjölda núna út af Covid. Svo eru margir líka fastir í einangrun eða sóttkví,“ segir Guðrún.

Hún segir að jafnan standi kirkjan fyrir tveimur messum á aðfangadag, en einnig sé messað í Kirkjuseli í Spöng, og þangað mæti yfirleitt 150 manns í jólamessu.

„Þetta er mikil óvissa, við erum vön miklu fjölmenni og hér fara í gegn allt að 2000 manns yfir jólin.“ Hún bætir við að sjö messur séu í kirkjunni yfir jól og áramót, auk annara viðburða á borð við útfarir, skírnir og giftingar.

„Útfarirnar detta ekki niður, þær eru það eina sem er ekki hægt að fresta í kirkjunni,“ segir Guðrún. 

Fréttin kemur frá Fréttablaðinu.

Íþróttafólk og Fjölnismaður ársins 2021 var heiðrað fimmtudaginn 16. desember við hátíðlega athöfn í Keiluhöllinni.

Hátt í 80 manns úr öllum deildum voru viðstödd þegar aðalstjórn félagsins verðlaunaði og heiðraði afreksfólkið okkar.

Við viljum sérstaklega þakka Keiluhöllinni fyrir frábært samstarf, ljósmyndurum félagsins þeim Baldvini Erni Berndsen og Þorgils Garðari Gunnþórssyni og tæknimanni kvöldsins Gunnari Jónatanssyni.

Íþróttakarl Fjölnis 2021

Íþróttakarl ársins: Ólafur Ingi Styrmisson (körfuknattleiksdeild)

Ólafur Ingi hefur verið burðarás upp alla yngri flokka hjá Fjölni síðustu ár og hefur í vetur sýnt að hann er einn af bestu leikmönnum 1. deildar karla. Ólafur, sem er fyrirliði meistaraflokks karla, er mikill leiðtogi, innan vallar sem utan og setur hag liðsins ávallt í fyrsta sæti. Hann hefur verið framúrskarandi með yngri landsliðum Íslands síðustu ár auk þess að vera á meðal fremstu leikmanna í sínum árgangi. Hann stefnir hátt í körfubolta. Ólafur hefur tvívegis orðið Íslandsmeistari með liðum sínum í Fjölni og í bæði skiptin verið valinn mikilvægasti leikmaður úrslitakeppninnar, síðast núna í vor þegar drengjaflokkur varð Íslandsmeistari. Meistaraflokkslið Fjölnis hefur sýnt undanfarið að það á góða möguleika á að ná inn í úrslitakeppni í vor og valda usla þar, þó ungir séu, jafnvel komast upp í Subway deildina ef heppni og elja blandast vel saman á réttum tíma. Ljóst er að Ólafur mun leika lykilhlutverk í þeirri vegferð og verður spennandi að fylgjast með honum og liðinu næstu mánuði. Ólafur er framúrskarandi íþróttamaður og mikil fyrirmynd.

Íþróttakona Fjölnis 2021

Íþróttakona ársins: Emma Sóldís Svan Hjördísardóttir (körfuknattleiksdeild)

Emma Sóldís er lykilleikmaður í meistaraflokki kvenna en Fjölnisstúlkur hafa sýnt í vetur að þær eru til alls líklegar í Subway deildinni en Emma hefur spilað stórt hlutverk í árangri liðsins, bæði í vörn og sókn. Þrátt fyrir ungan aldur hefur Emma náð miklum árangri í körfubolta. Hún hefur leikið stórt hlutverk með yngri landsliðum Íslands hingað til. Á Norðurlandamótinu í sumar var hún byrjunarliðsmaður í U18 ára liði Íslands þrátt fyrir að hafa verið á yngra ári. Þar var hún stigahæst íslensku leikmannanna og næst stigahæst á mótinu. Emma Sóldís var í fyrsta sinn núna í haust valin í A-landslið Íslands, aðeins 17 ára gömul. Emma lék sinn fyrsta A-landsleik í nóvember þar sem hún skoraði sín fyrstu stig fyrir landslið Íslands. Emma hefur ávallt verið meðal fremstu leikmanna í sínum árangi enda setur hún frábært fordæmi með eigin dugnaði bæði á æfingum sem og í leikjum. Hún lætur aldrei neitt eftir sig liggja. Emma Sóldís er samviskusöm og virkilega dugleg að æfa og vinna í sínum leik. Emma er virkilega góður karakter með góða nærveru sem t.d. endurspeglaðist í þjálfun hennar á sumarnámskeiðum Fjölnis þar sem hún náði mjög vel til krakkanna. Klárt er að það verður spennandi að fylgjast með henni í framtíðinni.

Fjölnismaður ársins 2021

Fjölnismaður ársins: Sarah Buckley

Fjölnismaður ársins er Sarah Buckley. Sarah hefur verið viðloðandi sunddeildina í fjöldamörg ár og átt þrjá sundmenn sem hafa allir náð góðum árangri. Sarah gekk til liðs við deildina sem iðkandi fyrir nokkuð mörgum árum þegar hún fór að synda með garpahópnum okkar. Sarah keppti núna í haust bæði á Íslandsmóti garpa og Norðurlandameistaramótinu sem haldið var hér á landi og vann til verðlauna á þeim báðum. Sarah fór fljótlega að sinna dómgæslu á sundmótum fyrir deildina og hefur á þeim árum náð sér í réttindi sem yfirdómari og er á lista yfir alþjóðlega ræsa hjá FINA (Alþjóðlega sundsambandið) og hefur þar með rétt til að dæma á alþjóðlegum mótum. Sarah hefur farið fyrir Íslands hönd og dæmt á Smáþjóðaleikunum árin 2015 á Íslandi, 2017 í San Marínó og 2019 í Svartfjallalandi auk þess að vera dómari/ræsir á Norðurlandameistaramóti sem haldið var hér á landi. 

Þrátt fyrir að Sarah eigi ekki lengur sundmann hjá deildinni hefur hún haldið áfram að vinna fyrir okkar hönd á sundmótum hvort heldur sem er Íslandsmeistaramótum eða félagsmótum. Sá tími sem hún ver til vinnu fyrir okkar hönd er töluverður og erum við óendanlega þakklát fyrir hennar framlag fyrir okkar hönd. Það er hverju íþróttafélagi nauðsyn að hafa svona einstaklinga innan sinna raða, þ.e. þá sem vinna sjálfboðaliðastörf í þágu félagsins og halda því áfram eftir að börnin feta inn á nýjar slóðir.

Afreksfólk deilda 2021

Fimleikar:

Fimleikakona: Lilja Katrín Gunnarsdóttir

Fimleikakarl: Sigurður Ari Stefánsson

Frjálsar:

Frjálsíþróttakona: Helga Þóra Sigurjónsdóttir

Frjálsíþróttakarl: Bjarni Anton Theódórsson

Handbolti:

Handboltakona ársins: Kolbrún Arna Garðarsdóttir

Handboltakarl ársins: Elvar Otri Hjálmarsson

Íshokkí:

Íshokkíkona ársins: Harpa Dögg Kjartansdóttir

Íshokkíkarl ársins: Steindór Ingason

Karate:

Karatekona ársins: Eydís Magnea Friðriksdóttir

Karatekarl ársins: Gabriel Sigurður Pálmason

Knattspyrna:

Knattspyrnukona ársins: Sara Montoro

Knattspyrnukarl ársins: Jóhann Árni Gunnarsson

Körfubolti:

Körfuboltakona ársins: Emma Sóldís Svan Hjördísardóttir

Körfuboltakarl ársins: Ólafur Ingi Styrmisson

Listskautar:

Skautakona ársins: Júlía Sylvía Gunnarsdóttir

Skautakarl ársins: Marinó Máni Þorsteinsson

Skák:

Skákkona ársins: Sigrún Tara Sigurðardóttir

Skákkarl ársins: Tristan Fannar Jónsson

Sund:

Sundkona ársins: Ingunn Jónsdóttir

Sundkarl ársins: Kristinn Þórarinsson

Tennis:

Tenniskona ársins: Eva Diljá Arnþórsdóttir

Tenniskarl ársins: Hjalti Pálsson

Þetta er í 32. sinn sem valið fer fram. Í fyrra voru þau Fanney Ragnarsdóttir, körfuknattleiksdeild og Hans Viktor Guðmundsson, knattspyrnudeild valin íþróttafólk ársins og Gunnar Jónatansson var valinn Fjölnismaður ársins.

Hlekkur á myndband af íþróttakarli ársins – https://www.facebook.com/ungmennafelagidfjolnir/videos/1084091582433872

Hlekkur á myndband af íþróttakonu ársins – https://www.facebook.com/ungmennafelagidfjolnir/videos/435709081482486

Hlekkur á myndband af Fjölnismanni ársins – https://www.facebook.com/ungmennafelagidfjolnir/videos/195470982798838

Hlekkur á myndband af afreksfólki deilda – https://www.facebook.com/ungmennafelagidfjolnir/videos/221907886758783

Bestu kveðjur,

Arnór Ásgeirsson – Íþróttastjóri Fjölnis