Góðan dag,

Nú er komið að lokakafla Íslandsmótsins í knattspyrnu hjá bæði meistaraflokki karla og kvenna.

Meistaraflokkur kvenna tekur á móti Einherja í síðasta leik tímabilsins á Extra vellinum kl. 11:00 á laugardaginn.  

Það er ljóst að sigur tryggir liðinu sæti í 1. deild að ári.

Af því tilefni er bæði FRÍTT inn á völlinn og jafnframt er áhorfendum boðið upp á súkkulaðiköku og mjólk, að kostnaðarlausu.

Það er mikið um að vera í Grafarvoginum og í Dalhúsum þennan dag og við eigum von á metfjölda, því hvetjum fólk eindregið til þess að mæta tímanlega. 

Eftir leikinn hjá stelpunum er svo kjörið að taka bíltúr vestur á Ólafsvík þar sem meistaraflokkur karla spilar kl. 16:30 í gríðarlega mikilvægum leik í baráttunni í Pepsi-deildinni.

Þinn stuðningur skiptir máli.

Hlökkum til að hefja laugardaginn með þér snemma á Extra vellinum.

Áfram Fjölnir !

Follow

Nemendur í 6. – 9. bekk Rimaskóla sýndu einstaka samstöðu og frábæran árangur þegar þeir tóku sig til, velstuddir af umsjónarkennurum og skólastjóra, og komu, sáu og sigruðu á Grunnskólamóti Reykjavíkur í frjálsum.

Þátttaka Rimaskóla vakti mikla og verðskuldaða athygli fyrir ótrúlegan fjölda þátttakenda og hæfileikaríka keppendur.

 Rimaskóli vann líkt og í fyrra afar sannfærandi sigur í öllum fjórum árgöngunum og hlaut samtals 3629 stig. Sæmundarskóli í Grafarholti varð í 2. sæti með 288 stig.

Fyrir sigurinn vann Rimaskóli alla fjóra farandbikarana og varðveita þá næsta ár. Alls tóku 16 grunnskólar í Reykjavík þátt í frjálsíþróttakeppninni sem fram fór í sjálfri Laugardalshöllinni við bestu aðstæður.

Það eru ótrúlega margir og flottir frjálsíþróttakrakkar í Rimaskóla og skólinn er stoltur af öllum þessum fjölda unglinga sem vakti mikla athugli á mótinu fyrir góða samheldni, skipulag og frábæran árangur.

Fleiri myndir hérna….

Follow

Guðsþjónusta með kaffihúsabrag þar sem prjónafólk er velkomið að koma með prjónana sína.

Kaffi og meðlæti á boðstólnum.

Prjónaklúbbskonur sýna prjónles og bækur, og segja frá starfsemi prjónaklúbbs Grafarvogskirkju.

Litabækur og litir fyrir krakkana.

Follow

Handknattleiksdeild Fjölnis í samstarfi við
BYLGJUNA, ÍSLENSKA GÁMAFÉLAGIÐ, SENDIBÍLA REYKJAVÍKUR

Umhverfisdagur Fjölnis 9. september 2017

Allir þátttakendur mæta við Fjölnishús laugardaginn 9. september kl. 10:30 stundvíslega.
Þar taka flokkstjórar við þátttakendum en þeir munu allir hafa fengið þjálfun og kynningu á sorpflokkun hjá Íslenska gámafélaginu.
Skipt verður upp í fjóra ca. 20 manna hópa.

Hópar 1 og 2 ganga frá Fjölnishúsi niður að læk innst í Grafarvogi og hefjast þar handa kl. 11:00. Það fjarar hratt út á þessum tíma til kl. 14:00 skv. flóðatöflu.

Hóp 3 verður skutlað niður að fjörunni norðan Hamrahverfis

Hópur 4 er staðsettur hjá Gylfaflöt en þar munu meistaraflokksleikmenn hefjast handa.

Hóparnir munu svo allir vinna sig að Gullinbrú en þar verða staðsettir gámar frá Íslenska gámafélaginu.
Sendibílar Reykjavíkur verða með í för til að létta á þátttakendum og munu taka sorp á ákveðnum stöðum og verða þeir í sambandi við flokkstjóra.

Stefnt er að því að allir flokkarnir hittist við gámana við Gullinbrú fyrir kl. 14:00 en þaðan verður farið upp í Fjölnishús.
Þar verður boðið upp á grillaðar pyslur fyrir alla þátttakendur en á meðan fer fram leikur meistaraflokks kvenna í knattspyrnu við lið Einherja.

Það er von okkar að verkefnið hafi bæði góð samfélagsleg og jafnframt uppeldisleg áhrif og verði árviss viðburður í framtíðinni en mikil vitundarvakning hefur átt sér stað um náttúru okkar og umhverfi og umgengni manna. Mikill áhugi hefur verið á verkefninu og er það von okkar Fjölnismanna að sá áhugi endurspeglist í góðri þátttöku þann 9. september.

Follow

Góðan daginn,

Fjölnir, Strætó og Korpúlfar (félag eldriborgara í Grafarvogi) ætla að vinna saman að tilraunarverkefni í vetur. Iðkendum félagsins í 1. og 2. bekk býðst fylgd frá frístundarheimilum hverfisins og aftur til baka með Strætó á æfingar í Egilshöll sem eru frá 14:30 – 15:30 mánudaga til fimmtudaga. Iðkendur á þessum aldri sem byrja æfingar klukkan 15:00 eru hvattir til að nýta sér fylgdina á sínar æfingar. Við hvetjum foreldra barna í 3. bekk og eldri til að kenna börnum sínum á Strætó. Því miður gátum við ekki byrjað með fylgdina strax í byrjun annar, en við miðum við að að verkernið verði komið á fullt skrið um miðjan september.

Í næstu viku verður borinn út póstur í allt hverfið þar sem samstarfið verður kynnt betur og boðað verður á kynningarfund í Egilshöll þar sem farið verður ýtarlega yfir samstarfið og seld verða barna- og ungmennakort í Strætó, kortin verða prentuð með mynd á staðnum.

Hægt er að senda tövupóst á skrifstofa@fjolnir.is ef foreldrar óska eftir frekari upplýsingum.

Áfram Fjölnir, kveðja starfsfólk skrifstofu Fjölnis.

Follow

Nú er komið að meistaraflokki karla og veislan heldur áfram. Við viljum bjóða öllum þeim FRÍTT á leikinn á sunnudaginn gegn Víkingi R. sem mæta í Fjölnislitunum eða eru Fjölnismerkt. Þetta er því kjörið tækifæri til að mæta með alla fjölskylduna á völlinn, hafa gaman og styðja strákana okkar í þessum gríðarlega mikilvæga leik í Pepsideildinni. Grafarvogur er bestur þegar hann stendur saman.

Hlökkum til að sjá ykkur gul og glöð á Extra vellinum á sunnudaginn kl. 18:00.

Áfram Fjölnir!

Follow

Messa í Grafarvogskirkju kl. 11:00 sunnudaginn 27. ágúst.

Séra Sigurður Grétar Helgason prédikar og þjónar.

Kór Grafarvogskirkju syngur og organisti er Hilmar Örn Agnarsson.

Follow

Nú fer vetrarstarfsemi körfuknattleiksdeildar að komast á fullt skrið.  Krílaboltinn sem hefur verið í Rimaskóla verður í  Vættaskóla Borgum í vetur.

Nýr þjálfari verður með hópinn í vetur, hún heitir Berglind Karen Ingvarsdóttir. Berglind er bæði leikmaður og aðstoðarþjálfari meistaraflokks kvenna.

Berglind var með krílaboltann hjá Breiðablik veturinn 2015-2016.

Allar skráningar í krílahópinn eru gerðar rafrænt í Nora skráningarkerfi félagins á heimasíðu þess, https://fjolnir.felog.is/

Follow

Gunnunes til skoðunar sem nýtt athafnasvæði:

Björgun flytur og Bryggjuhverfið stækkar

• Bryggjuhverfið við Elliðaárvog mun stækka.
• Íbúðir koma á núverandi athafnasvæði Björgunar.
• Undirbúningur að umhverfismati er hafinn.
• Unnið er að tillögu að breytingu á aðal- og deiliskipulagi í Gunnunesi Fyrirhuguð uppbygging á Álfsnesi kallar á  uppbyggingu innviða og framkvæmdir.

Dagur B. Eggertsson borgarstjóri og Lárus Dagur Pálsson framkvæmdastjóri Björgunar  skrifuðu í dag undir viljayfirlýsingu þess efnis að Björgun flytji athafnasvæði sitt í Gunnunes sem er á sunnanverðu Álfsnesi. Vilyrði fyrir lóð er í samræmi við samþykkt borgarráðs.  

Vinna við breytingar á skipulagi er þegar hafin og hefur ráðgjafafyrirtækinu Alta verið falin umsjón með verkinu. Umhverfismat er forsenda breytinga á skipulagi og m.a. verður gerð könnun á gróðurfari og dýralífi á svæðinu. Þá verða landkostir metnir út frá útivist, sjónrænni röskun, mati á menningarminjum og mögulegri mengun eða truflun í nágrenni svæðisins.  Fjölmenn íbúðahverfi eru nokkuð langt undan og því sjónræn áhrif mest á nesinu sjálfu. Lítið er um að svæðið sé nýtt til útivistar.  Gert er ráð fyrir umtalsverðum framkvæmdum í Gunnunesi eins og gatnagerð og annarri uppbyggingu innviða í framhaldi af breyttu skipulagi.  

Björgun er framleiðandi steinefna til mannvirkjagerðar á Reykjavíkursvæðinu. Fyrirtækið nær í hráefni úr námum á hafsbotni með uppdælingu sem hefur til þessa verið flutt til frekari vinnslu á athafnasvæði félagsins vestan Bryggjuhverfisins við Ártúnshöfða, þar sem fyrirtækið hefur verið síðustu áratugina. Fyrirtækið hefur  dregið  úr starfsemi sinni á svæðinu og flytur i í síðasta lagi fyrir lok maí árið 2019. Stærsta verkefni Björgunar á Sævarhöfðanum sem hefst innan skamms er gerð fyrsta áfanga landfyllingar við Elliðavoginn sem felur jafnframt í sér endanleg skil lóðarinnar og mikilvægan undirbúning fyrir uppbyggingu svæðisins.   Einnig  er fyrirhugað hreinsunarstarf sem  felst í að fjarlægja fínefni sem runnið hafa í sjó næst núverandi lóðamörkum í Elliðavognum. 

Íbúabyggð við Elliðaárvoginn

Á athafnasvæði Björgunar við Elliðaárvoginn kemur næsti áfangi Bryggjuhverfis og hyllir undir lok deiliskipulagsvinnu. Eftir lögbundið kynningarferli verður mögulegt að bjóða lóðir til sölu og uppbyggingar.

Stækkun bryggjuhverfisins tengist niðurstöðu hugmyndasamkeppni um að breyta Ártúnshöfða í blandaða byggð íbúða og atvinnuhúsnæðis, auk þess að stækka hverfið með landfyllingum til norðurs út í Elliðaárvoginn.   

Í frétt á vef Reykjavíkurborgar eru myndir og  virkir tenglar á nánari upplýsingar  http://reykjavik.is/frettir/bjorgun-flytur-og-bryggjuhverfid-staekkar

Follow