Seinasti æfingaleikur hjá strákunum á þessu ári verður gegn Val á morgun, laugardaginn 21. des. Leikið verður í Egilshöllinni og byrjar leikurinn á bilinu 13:00 til 13:30.
Með því að haka á myndina hér að ofan má sjá syrpur úr seinni hálfleik í lokaleiknum okkar í sumar.

Gengið frá samningum við lykilmenn meistaraflokks kvenna Fjölnis

Knattspyrnudeild Fjölnis gekk í gær frá samningum við nokkra lykilleikmenn meistaraflokks kvenna hjá félaginu og gilda þeir til tveggja ára.  Leikmennirnir sem um ræðir eru Kristjana Þráinsdóttir, Katrín Arnardóttir, Oddný Arnardóttir, Ásta Sigrún Friðriksdóttir, Regína Einarsdóttir og Tinna Þorsteinsdóttir. Þetta kemur fram í fréttatilkynningu frá liðinu.

Fjölnisliðið hefur verið í mikilli uppbyggingu síðustu ár og hefur á að skipa reyndum leikmönnum í bland við unga og efnilega sem nær allir eru uppaldir hjá félaginu.  Fjölnir hefur verið í hörkubaráttu síðustu tímabil um að komast upp í úrvalsdeild og er stefnan sett á að taka næsta skref á komandi leiktíð.  Þá eru æ fleiri leikmenn félagsins sem rata inn á æfingar hjá yngri landsliðunum og nokkrir þeirra sem hafa spilað fyrir Íslands hönd svo ljóst að framtíðin er björt í Grafarvogi.

Sonný Lára Þráinsdóttir, markvörður og fyrirliði Fjölnisliðsins síðustu ár, gekk til liðs við úrvalsdeildarlið Breiðabliks fyrir skemmstu en Sigurður Víðisson, þjálfari Fjölnisliðsins, er bjartsýnn á framhaldið þrátt fyrir breytingar á liðinu:

,,Nú er búið að ganga frá samningamálum flestra okkar lykilleikmanna og er ég bjartsýnn fyrir komandi tímabil.  Vissulega verða breytingar hjá okkur, Sonný fyrirliði hefur ákveðið að freista gæfunnar í úrvalsdeild á næsta tímabili og er gengin til liðs við Breiðablik.  Þetta er vissulega mikil blóðtaka fyrir okkur, frábær markvörður og okkar markahæsti leikmaður síðasta sumar.  Við óskum henni alls hins besta og tökum vel á móti henni þegar hún kemur aftur heim.  Margir ungir leikmenn okkar hafa fengið að spreyta sig á landsliðsæfingum síðustu vikurnar og staðið sig vel,“ sagði Sigurður Víðisson.

Aðstoð starfsmanna kirkjugarðanna við aðstandendur yfir jólahátíðina

Á Þorláksmessu og aðfangadag milli kl. 9:00 – 15:00 eru starfsmenn Kirkjugarða Reykjavíkurprófastdæma til aðstoðar í Gufuneskirkjugarði. Þeir aðstoða fólk við að finna leiði og afhenda ratkort ef með þarf.

Skrifstofan í Gufuneskirkjugarði er með síma 585 2770 og er skrifstofan opin frá kl. 9:00 – 15:00 og geta aðstandendur fengið upplýsingar um leiði þar.

Gufuneskirkjugarður

Þorrablót 2014

Þorrablót Fjölnis verður haldið í Íþróttamiðstöðinni Dalhús laugardaginn 25 janúar 2014

Miðaverð

Matur og ball kr; 8.500.-

Ball kr: 3.500

Húsið opnar kl: 19.00 og borðhald hefst kl: 20.00

Miðasala hefst 3.janúar 2014 í Hagkaup Spönginni.

Ekki missa af balli ársins.

Nýársnámskeið handboltans fer fram dagana 2-4 janúar 2014

Smellið á hanppinn til að skoða.

Jólamynd eftir nemanda í Foldaskóla

Undanfarna daga hafa grunnskólanemar um alla borg undirbúið jólin, skreytt skólann sinn og tekið þátt í jólaskemmtunum. Í dag og á morgun eru víða haldin jólaböll, en kærkomið jólaleyfi hefst í flestum skólum þann 21. desember. Skólastarf hefst aftur 2. og 3. janúar.

SAMAN-hópurinn sem skóla- og frístundasvið starfar með hvetur til samverustunda fjölskyldunnar og minnir á að samvera og tími með fjölskyldunni er besta jólagjöfin.

www.samanhopurin.is heldur úti samverudagatali á aðventunni þar sem finna má hugmyndir að nærandi samverustundum.

Fjölnir

Nú í haust var hrundið af stað verkefni sem kallast Íþróttaakademía Fjölnis [ÍAF] og er það tækifæri ætlað unglingum sem æfa boltaíþrótt í Fjölni og í 9. og 10. bekk. Verkefnið snýst um að bjóða upp á skipulagða tækniþjálfun í handbolta, fótbolta og körfubolta ásamt hagnýtri fræðslu í þeim þáttum sem skipta máli, s.s. íþróttasálfræði og næringarfræði. Aðalmarkmið ÍAF er að bjóða upp á þjálfun og fræðslu sem styður við það sem þegar er gert í flokkum félagsins, annað og fleira en gert er nú þegar í deildunum. Þetta verkefni er hugsað fyrir þá íþróttamenn sem vilja ná langt í sinni íþrótt og eru tilbúin að leggja mikið á sig, til að svo megi verða.

ÍAF byggir á samstarfi unglingadeilda grunnskóla Grafarvogs og Umf. Fjölnis og felst tækifærið fyrir unglingana að fá að velja ÍAF sem valgrein í náminu sínu í stað hefðbundinna námsgreina. Þess má geta að verkefnið er unnið að fyrirmynd sem hefur gengið afar vel hjá Haukum í Hafnarfirði, Afreksskóla Hauka, undir stjórn Kristjáns Ómars Kristjánssonar.

Skráning í verkefnið var mjög góð og um 36 nemendur eru nú skráðir, og koma þeir úr boltagreinunum þremur af báðum kynjum. Haldinn var kynningarfundur með foreldrum og iðkendum í byrjun annar og verkefnið kynnt.  (sjá mynd)

Ein megin forsenda þess að verkefnið gengur eins vel og raunin er, eru þeir góðu þjálfarar sem fengust til að starfa með okkur. Til að stýra bóklegu tímunum þar sem allar greinarnar koma saman fengum við Elmar Hjaltalín yfirþjálfara fótboltans og Arnór Ásgeirsson íþróttafræðing til liðs við okkur. Um tækniþjálfunina sem er einnig einu sinni í viku sjá þeir Pétur Sigurðsson (körfubolti), Elmar Hjaltalín (fótbolti) og Guðmundur Rúnar Guðmundsson (handbolti).

Haustönnin sem er senn á enda runnin var vonandi aðeins fyrsta af mörgum og mun verkefnið vera í stöðugri þróun næstu misserin. Vonumst við til að í framtíðinni getum við boðið upp á þetta tækifæri fyrir fleiri greinar úr Fjölni. Við erum nefnilega þess fullviss að æfingarnar og fræðslan mun hjálpa okkar íþróttamönnum að ná fram sínum besta árangri þegar fram í sækir.

Með jólakveðju fyrir hönd þjálfara ÍAF

Sveinn Þorgeirsson, verkefnisstjóri ÍAF

Undanfarna mánuði hefur starf handknattleiksdeildar Fjölnis breyst mikið. Má þar helst nefna að deildin fékk gæðavottun sem fyrirmyndardeild ÍSÍ og var hún samþykkt sama dag og farið var á Partille Cup í sumar. Iðkendum deildarinnar hefur fjölgað jafnt og þétt, sérstaklega í yngstu flokkunum (7. og 8. flokk). Í haust var ákveðið að gera átak í yngstu flokkunum og meðal verkefna var að stofna 8. flokk sem sér hóp. Áður hafði hann æft saman með 7. flokki. Þetta átak ásamt velheppnuðu ís og bíó átaki hefur ýtt undir fjölgun í deildinni sem er vel.

Það eru gleðitíðindi að 7. flokkar karla og kvenna hafa ekki verið eins stórir í mörg ár. Á síðasta móti sem haldið var í lok nóvember af Haukum og FH skráði Fjölnir 10 lið (6 stráka og 4 stelpu).  Við bindum miklar vonir við að þessi fjölgun haldi áfram.

Handknattleiksdeildin stóð fyrir ráðningu á mjög hæfum og reyndum þjálfurum, alveg niður í yngstu flokkana. Deildin er afskaplega ánægð með gæði þeirra þjálfara sem tekist hefur að laða til félagsins. Gæðin sjást meðal annars í margra ára reynslu og íþróttafræðimenntunar fimm, að verða sex þjálfarar deildarinnar búa að. Þeir eru: Gísli Guðmundsson markmannsþjálfari, Halldóra Björk Sigurðardóttir þjálfari 7. flokks, Sveinn Þorgeirsson yfirþjálfari og þjálfari 7. flokks, Guðmundur Rúnar Guðmundsson þjálfari 3. og 4. flokks karla ásamt því að aðstoða meistaraflokk karla og Arnór Ásgeirsson nýraðinn framkvæmdarstjóri deildarinnar. Ásamt þessu föruneyti stefnir Grétar Eiríksson þjálfari meistaraflokks og 2. flokks karla á útskrift í sumar.

Deildin gekk frá ráðningu á nýjum þjálfara 3. og 4. flokks kvenna. Hún fékk til liðs við sig reynsluboltann Andrés Gunnlaugsson. Við erum mjög þakklát fyrir að hafa krækt Andrés sem mun vafalítið koma með ný og fersk sjónarmið í starf deildarinnar, og þá mun áralöng reynsla hans án efa hjálpa okkur mikið. Það verður ekki rætt um þjálfara deildarinnar án þess að minnast á að enn njótum við krafta Boris Bjarna Akbachev. Boris hefur þjálfað handbolta í um hálfa öld og hélt upp á 80 ára afmælið í sumar að viðstöddum fyrrum lærisveinum sínum og velunnurum. Það eru hrein forréttindi að hafa slíkan mann í deildinni og viljum við þakka honum sérstaklega fyrir sitt framlag til deildarinnar. (sjá mynd)

Gengi 3. flokks kvenna hefur verið upp og niður í 2. deild en í síðustu leikjum hafa stelpurnar sýnt góða takta og krækt í mikilvæga sigra. Margar stelpur úr eldra ári 4. flokks spila með 3. flokkinum.

4. og 5. flokkar félagsins hafa verið að gera flotta hluti í vetur.  Eldra ár 4. flokks kvenna er þessa stundina ósigrað í 1. deild og virðast til alls líklegar. Yngri stelpurnar gefa ekkert eftir og eru í toppbaráttunni í 1. deild en hafa verið óheppnar í tapleikjum. Strákarnir eru einnig að gera góða hluti þess má geta að eldra árið sem er í 2. deild er taplaust og hafa unnið sína leiki nokkuð sannfærandi. Yngri árs lið strákanna eru í 1. og 2. deild og standa sig vel þar. Toppbaráttan í 1. deildinni er æsispennandi þar sem okkar menn gefa ekkert eftir. Margir strákar í 5. flokki eru að stíga sín fyrstu skref í spili með harpix bolta.

5. flokkar félagsins sem hafa tekið þátt á fjölliðamótum á vegum HSÍ hefur gengið vel undir stjórn Steinþórs Andra Steinþórssyni (kvenna) og Páls Daníelssyni (karla) í haust og munu halda áfram að æfa vel og standa sig á næstkomandi mótum. 6.flokkar deildarinnar hafa sömuleiðis gengið vel undir stjórn þeirra Jakobs Steins og Sigurðar Guðjónssonar. Drengirnir æfa í Dalhúsum og Rimaskóla og stúlkurnar eru alfarið í Rimaskóla. Þetta eru skemmtilegir hópar og góður aldur til að prófa, sem við mælum að sjálfsögðu með því æfingarnar og félagsskapurinn er mjög skemmtilegur!

Að lokum er vert að skoða áhugaverðan árangur meistaraflokks karla. Þeir hafa spilað flesta leiki sína vel og eru um miðja deild þegar jólafríið fer að bresta á. Áhugavert er að skoða aldur liðsins en elstu leikmenn liðsins eru fæddir árið 1988 og sá yngsti 1997. Yfir 80% af strákunum eru uppaldnir sem gefur til kynna góða umgjörð í yngri flokkum. Unnið er eftir hugmyndafræði Borisar undir stjórn Grétars Eiríkssonar, honum til aðstoðar er Guðmundur Rúnar Guðmundsson.

Með áframhaldandi starfi og umgjörð í yngri flokkum vonast deildin eftir að meistaraflokkur karla haldi áfram að bæta sig og verði von bráðar meðal bestu liða á landinu. Meistaraflokkur kvenna er innan seilingar en það er klárt mál að halda þurfi rétt á spilunum til að koma þeim í efstu deild.

Við hvetjum ykkur kæru Grafarvogsbúar til að fylgjast vel með handboltanum í vetur og hjálpa okkur við að koma honum á hærra stig. Kíkið við á facebook síðu deildarinnar https://www.facebook.com/handboltifjolnir og verið með í rússíbananum!

Saman komust við alla leið!

Fyrir hönd handknattleiksdeildar Fjölnis,

Arnór Ásgeirsson,

Framkvæmdarstjóri HKD Fjölnis

Landsnet styrkir

Leiðarljós, stuðningsmiðstöð fyrir fjölskyldur barna með sjaldgæfa og alvarlega langvinna sjúkdóma, og Geðhjálp fengu í dag afhenta fjárhagsstyrki frá Landsneti sem ætlaðir eru til að styrkja hið góða og öfluga starf sem fram fer hjá þessum samtökum.

Hefð er orðin fyrir því hjá Landsneti að í stað þess að senda út jólakort til viðskiptavina er andvirði þeirra látið renna til verðugra málefna. Að þessu sinni urðu fyrir valinu samtökin Geðhjálp, sem gætir hagsmuna þeirra sem þurfa eða hafa þurft aðstoð vegna geðrænna vandamála, og stuðningsmiðstöðin Leiðarljós, fyrir fjölskyldur barna með sjaldgæfa og alvarlega langvinna sjúkdóma.

Forstjóri Landsnets, Þórður Guðmundsson, afhenti styrkina við athöfn hjá Landsneti í dag. Anna Gunnhildur Ólafsdóttir veitti styrknum viðtöku fyrir hönd Geðhjálpar og Bára Sigurjónsdóttir fyrir hönd Leiðarljóss.