Reykjavíkurborg fjárfestir í innviðum og þjónustu fyrir 18 milljarða á þessu ári, sem er það mesta á einu ári í sögu borgarinnar. Á næstu fimm árum mun borgin fjárfesta í innviðum fyrir 70 milljarða.

Sé horft til samstæðu Reykjavíkurborgar nemur fjárfesting næstu ára 226 milljörðum næstu fimm árin.

Þessar upplýsingar komu fram í kynningu á  framkvæmdaáætlun Reykjavíkurborgar, en Dagur B. Eggertsson borgarstjóri var gestur á Útboðsþingi Samtaka iðnaðarins í dag.

Fjárfestingar ársins skiptast í grunninn í þrennt. Um 8 milljörðum verður ráðstafað í fasteignir og stofnbúnað, nær 8,5 milljarðar fara í götur og umhverfisframkvæmdir og rúmir 2 milljarðar í aðrar fjárfestingar.

Bróðurparturinn af framkvæmdafé fasteigna fer til skóla- og frístundasviðs eða nær 2,8 milljarðar og þá fer 1,8 milljarður til íþrótta- og tómstundamála. Stærsta einstaka framkvæmdin er leik- og grunnskóli í Úlfarsárdal. 

Nánar um einstök verkefni má sjá í kynningu borgarstjóra.

Nýbyggingahverfi eru svo stærsti einstaki liðurinn í gatna- og umhverfisfjárfestingum en til þeirra mála fara rúmlega 2,5 milljarðar, en þar undir fellur gatnagerð á Hlíðarenda, Vogabyggð, Úlfarsárdal, Kirkjusandi og við Landspítala. Undir gatna- og umhverfisfjárfestingar falla einnig malbikunarframkvæmdir, en í sumar verður slegið met í malbikun gatna.

Kynning borgarstjóra er aðgengileg í frétt á vef Reykjavíkurborgar >  http://reykjavik.is/frettir/staersta-framkvaemdaar-i-sogu-borgarinnar

Messa kl. 11:00 í Grafarvogskirkju á sunnudaginn. Séra Guðrún Karls Helgudóttir prédikar og þjónar. Kór Grafarvogskirkju leiðir söng og organisti er Hákon Leifsson.

Sunnudagaskóli á neðri hæð kirkjunnar kl. 11.00. Umsjón hefur Aldís Rut Gísladóttir og undirleikari er Ásgeir Páll Ágústsson. Sögur, söngvar og límmiðar.

Selmessa kl. 13:00 í Kirkjuselinu. Séra Sigurður Grétar Helgason þjónar. Vox Populi leiðir söng og organisti er Hilmar Örn Agnarsson.

Fyrirlestur fyrir alla foreldra, stjúpforeldra, forráðamenn, kennara, ömmur, afar og allra sem koma að uppeldi barna sem nota snjalltæki, fartölvur, leikjatölvur eða önnur tæki sem tengjast inn á internetið.

Fræðslumolar um:
• meðferð persónuupplýsinga.
• alvarleika rafræns eineltis.
• alvarleika óvarlegra samskipta.
• alvarleika myndbirtinga á netinu.
• slæm áhrif ofnotkunar á tölvum og neti.
• helstu heilræði í rafrænu uppeldi.
• einfaldar öryggisstillingar.

Fyrirlesarar:
Bryndís Jónsdóttir, verkefnastjóri SAFT og Ingibjörg (Systa) Jónsdóttir, verkefnastjóri SAFT.

Netið hefur opnað fyrir ótal möguleika sem notendur geta nýtt sér á uppbyggilegan hátt. En ótal dæmi um misnotkun og óvarlega netnotkun sýna fram á nauðsyn þess að við temjum okkur og börnum okkar snemma að nota netið á uppbyggilegan hátt.

Rannsóknir sýna að á grunnskólaaldri er netnotkun orðin hluti af daglegu lífi. Mörg börn eiga snjalltæki sem býður þeim upp á að vera nettengd allan sólarhringinn alla daga vikunnar auk þess sem félagslíf barna fer að stórum hluta fram á netinu.

Hins vegar fá þau mis mikla leiðsögn heima fyrir um hvernig umgangast beri netið á jákvæðan og uppbyggilegan hátt. Mörg börn eru þ.a.l. ekki nógu vel upplýst um ýmsar hættur sem steðja að þeim. á þar helst nefna tælingu, óvarlegar myndbirtingar, rafrænt einelti og netfíkn svo fátt eitt sé nefnt. Því miður er raunin sú að á netinu fyrirfinnst fólks sem villir á sér heimildir í þeim tilgangi að komast í tæri við börn á þessum aldri.

Okkar vinsæla TORG skákmót Fjölnis verður haldið í Rimaskóla næsta föstudag, 26. janúar kl. 15.00 – 17.15

Stórmeistarinn okkar og goðsögnin Friðrik Ólafsson verður heiðursgestur mótsins. Hann á afmæli þennan dag á Skákdegi Íslands.

Það er mikill heiður fyrir okkur Fjölnismenn að fá Friðrik til okkar af þessu tilefni og því vona ég að allir grunnskólakrakkar í Fjölni nýti sér þetta tækifæri og taki þátt í mótinu.

• Ókeypis þátttaka
• 40 verðlaun eða happadrætti
• Fríar veitingar frá Hagkaup og Emmess

Gott er að mæta tíu mínútum fyrir mót upp á að ná skráningu.  

Skoða upplysingar hérna……

Sjá www.fjolnir.is,  www.skak.is

Ungmennafélagið Fjölnir í Grafarvogi heldur í kvöld, laugardaginn 20 janúar eitt glæsilegasta og fjölmennasta þorrablót landsins. Þar sem 30 ára afmæli félagsins verður fagnað með stæl. Þetta er áttunda þorrablótið sem félagið heldur og uppselt var á blótið strax í október. Þorrablótsgestir eiga heldur betur von á góðu.  

Dagskrá þorrablótsins er öll hin glæsilegasta þar sem Eyfi, Birgitta, Margrét Eir, Ingó og leynigestur munu skemmta gestum. Ásamt skemmtiatriði frá þorrablótsnefnd.

Það er því ljóst að stuðið verður í Grafarvoginum á laugardagkvöldið. 

Reykjavíkurborg kaupir Sævarhöfða af Faxaflóahöfnum

• Gatnagerð á nýju íbúðasvæði hefst í ár
• Heildargreiðslur fyrir lóð og fasteignir eru um 1,1 milljarður króna
• Nýtt deiliskipulag er í auglýsingaferli
• Búið að veita Bjargi og Búseta vilyrði fyrir lóðum

Í dag var gengið frá kaupum Reykjavíkurborgar á Sævarhöfða 33 af Faxaflóahöfnum. Dagur B. Eggertsson borgarstjóri og Gísli Gíslason hafnarstjóri skrifuðu undir kaupsamninginn. Kaupin eru gerð í tengslum við fyrirhugaða uppbyggingu á lóðinni og landfyllingu henni tengdri. Heildargreiðslur fyrir landið og húseignir eru nær 1,1 milljarður króna.  Lóðin Sævarhöfði 33 er alls um 76 þús. fermetrar en einnig er keypt 400 fermetra skrifstofubygging, rúmlega 800 fermetra verkstæði og 400 fermetra vörugeymsla, sem og 100 metra viðlegukantur.

Kaupin eru gerð að undangengnum samningum við Björgun ehf. um brottflutning og hreinsun svæðisins ásamt gerð hluta þeirrar landfyllingar sem fyrirhuguð er. Um langt skeið hefur legið fyrir að notkun svæðisins muni breytast úr hafntengd starfsemi yfir í íbúðabyggð. Fyrir liggur rammaskipulag um svæðið og er deilskipulag í auglýsingaferli. Umhverfismat fyrir landfyllingu liggur fyrir ásamt framkvæmdaleyfi og eru framkvæmdir við fyllingargerðina hafnar af hálfu Björgunar samkvæmt verksamningi milli Faxaflóahafna og Björgunar þar um.

Björgun mun afhenda lóðina í áföngum og verður síðasti hlutinn afhentur 1. júní 2019. Byggingarhæfar lóðir verða þó til á hluta svæðisins nokkru fyrr, en lengri tíma mun taka að gera lóðir byggingarhæfar á nýrri landfyllingu. Gert er ráð fyrir að hefja gatnaframkvæmdir á þessu ári á hluta svæðisins.

Vilyrði fyrir tveimur lóðum á svæðinu hefur þegar verið veitt. Annars vegar til Bjargs hses. og hins vegar til Búseta á þeim lóðum sem verða fyrstar byggingarhæfar. Eftir því sem að landfyllingu vindur fram og hægt verður að losa jarðefni af þegar gerðu landi verður fyrsti hluti svæðisins síðan einnig byggingarhæfur.

Myndir eru í frétt á vef Reykjavíkurborgar >  http://reykjavik.is/frettir/reykjavikurborg-kaupir-saevarhofda-af-faxafloahofnum

Viltu læra á gítar? Þá er námskeiðið Frosttónar kjörið fyrir þig!

Laugardaginn 13. janúar leika tveir nemendur Frosttóna, Hrafnkell Haraldsson og Petra María Ingvaldsdóttir, létta og hugljúfa gítartónlist allt frá miðöldum til dagsins í dag, á Borgarbókasafninu Spönginni, kl. 14:30. Hrafnkell og Petra María hafa stundað gítarnám í nokkur ár í Frosttónum, hjá Erni Viðari Erlendssyni.

Stutt kynning verður á þróun gítartónlistar frá miðöldum ef tími gefst.

Auk þessa að hlusta á fallega gítartónlist geta hlustendur lagt fram spurningar um gítarinn og námskeiðið Frosttóna, meira um það hér Gítarnámskeið – Frosttónar.

Verið öll velkomin!

Getraunakaffið hefst núna á laugardaginn 13. janúar í Egilshöll og verður á milli kl. 10-12 eins og alltaf.
Fjölnir á 30 ára stórafmæli í ár eins og þið vitið. Við lofuðum stærra og flottara kaffi og við stöndum við það
Vinningarnir eru eftirfarandi:
1.sæti - 100.000 kr. gjafabréf frá Icelandair og 1x Gullkort á völlinn (25.000 kr.)
2. sæti - 15.000 kr. gjafabréf frá Hverfisbúðinni, 1x Árskort á völlinn (15.000 kr.) og 10.000 kr. gjafabréf frá Gullöldinni.
3. sæti. - 1x Árskort á völlinn (15.000 kr.) og 10.000 kr. gjafabréf frá Gullöldinni.

Hér má sjá reglur hópleiksins (allir standa jafnt):
http://www.fjolnir.is/knattspyrna/getraunir1/

Sérstakur vinningur er í boði fyrir þá sem skrá sig til leiks. Þú ert kominn í pottinn með því bara að taka þátt. Dregið úr skráðum liðum.
Þá ætlum við reglulega að fá góða aðila til að mæta og halda smá tölu. Þjálfarar meistaraflokka kvenna og karla þeir Páll Árnason 
og Ólafur Páll Snorrason ríða á vaðið og fara yfir stöðuna hjá liðunum sínum. 
Guðni Bergson formaður KSÍ ætlar svo að heiðra okkur með nærveru sínni þann 3. febrúar í tilefni af 30 ára afmæli Fjölnis! Fleiri fallbyssur verða tilkynntar síðar.

Húspotturinn verður reglulega yfir tímabilið (þá er lagt í púkk og stofnaður einn stór seðill).
Svo er auðvitað kaffi og bakkelsi frá Bakarameistaranum á sínum stað.
Þannig að þetta er spikfeit dagskrá, gert til að hafa gaman og félagslegt. Spurningin er bara ert þú klár? 
Ef svo er skráðu þig þá bara strax til leiks í gegnum meðfylgjandi skráningarblað og sendu á 1x2@fjolnir.is og málið er dautt. 
Annars er alltaf hægt að græja þetta á laugardaginn í persónu.

Sjáumst á laugardaginn 
Allir velkomnir hvort sem þeir hafa áhuga á fótbolta eða ekki :) 

Áfram Fjölnir!