Þinn árangur er okkar ástríða!

Metabolic Reykjavík er þjálfunarstöð þar sem allir iðkendur æfa undir leiðsögn framúrskarandi þjálfara og í hópi fólks sem hvetur hvert annað áfram og veitir stuðning.

Við vinnum með hágæða æfingakerfi með vísindalegan bakgrunn. Það er engin tilviljun í æfingavali eða uppröðun, allar æfingar eru skipulagðar frá upphafi til enda með ákveðið markmið í huga. Unnið er með markvissa álagsstýringu til að hámarka árangur og minnka hættu á meiðslum.

Við veitum leiðsögn, viðmót og þjónustu sem þú munt ekki finna annarsstaðar. ​Við viljum vita hvað þú heitir og hver markmið þín eru – við viljum virkilega hjálpa þér að ná þessum markmiðum. Við viljum að þú hlakkir til að koma til okkar og upplifir hreyfingu ekki sem kvöð heldur skemmtun. Við viljum að þú upplifir þig sem hluta af samfélaginu okkar. Þannig áttu ekki að þurfa að stóla á einn vin eða vinkonu til að fara með þér á æfingu heldur eiga æfingafélagarnir þínir og þjálfararnir í Metabolic að verða félagsskapurinn sem þú vilt æfa með.

---

---

Niðurskurðarhnífnum beitt í Grafarvog

Aftur er verið að gera atlögu að skólunum okkar hér í Grafarvogi. Það á að loka einum af grunnskólunum okkar og færa börn á milli þriggja annara skóla. Þessar aðgerðir snerta því 820 börn. Fyrstu fréttir um þessi áform komu í mars á þessu ári og síðan þá hafa foreldrar og nemendur stöðugt verið að senda okkur borgarfulltrúum pósta og óska eftir því að þessari ákvörðun verði ekki framfylgt. Það hafa margar hugmyndir komið fram sem miða að því að halda núverandi skólum opnum, allar hafa þær þó verið slegnar út af borðinu af meirihlutanum. Þar á meðal tillaga sem var lögð fram í borgarstjórn um það að leikskólinn og grunnskólinn myndu verða reknir undir sama þaki í Staðahverfinu líkt og á að gera í Skerjafirði og Vogabyggð.

Stærstu breytingar sem gerðar hafa verið í skólamálum

Aldrei hefur verið farið í jafn viðamiklar breytingar á einu bretti vegna grunnskóla í Reykjavík. Þar má einnig nefna að aldrei áður hefur grunnskóla verið lokað í íbúðahverfi án þess að önnur sambærileg þjónusta hafi komið í staðinn. Til stendur að loka Kelduskóla Korpu sem staðsettur er í Staðahverfi. Þar eru í dag börn frá 1. til 7. bekkjar.  Síðan á að breyta Kelduskóla- Vík í unglingaskóla, nú eru þar börn frá 1. til 10. bekkjar.  Börn úr borgarhverfinu og engjahverfi fá að stunda nám upp í 7. bekk í sínum hverfisskóla og síðan þá fara þau í Kelduskóla Vík. Þetta rót hefur áhrif á 820 börn á grunnskólaaldri í norðanverðum Grafarvogi.

200 milljónir í sparnað

Það er ólíðandi að ætla að spara 200 milljónir á ári með því að loka skóla. Stærsti útgjaldaliður skóla- og frístundasviðs er launaliðurinn og ef ekki á að reka starfsfólk hvernig er þá hægt að spara 200 milljónir á ári? Húsnæðið verður á sínum stað það þarf viðhald þó svo ekki sé starfsemi í því. Börnin munu ekki gufa upp og halda áfram að kosta borgina peninga. Er þá sparnaðurinn falinn í því að segja upp ræstingarfólki ? Stjórnenda kostnaður mun aukast því það á að ráða þrjá skólastjóra í stað tveggja sem eru yfir fjórum byggingum núna. Skólar munu aldrei verða hagnaðardrifnar einingar og því er þetta tal um sparnað óábyrgt sér í lagi þegar meirihlutinn fékk falleinkunn fyrir að veita ekki nægu fjármagni til skóla- og frístundasviðs. Enda skólarnir nánast allir að reka sig í mínus ár eftir ár. Það þekkja það allir sem fylgjast með skólastarfi að þar er ekki verið að bruðla með peninga enda nýtni og útsjónarsemi mikil hjá stjórnendum.

Samstaða allra íbúa í Grafarvogi mikilvæg

Það er gríðarlega mikilvægt að allir íbúar í Grafarvogi standi saman og reyni að stoppa þessar breytingar. Hér er verið að setja fordæmi sem ekki er gott. Enda skólarnir inni á gildandi deiliskipulagi. Það er því verið að brjóta sem þessari ákvörðun. Skýrsla innriendurskoðunar segir síðan skýrt að Hamraskóli sé næst dýrasti skólinn í Reykjavík á eftir Kelduskóla – Korpu. Það er því mikilvægt að við sýnum samstöðu fyrir öll börn í Grafarvogi.

Frábært og faglegt starf

Það er hlutverk okkar kjörinna fulltrúa að sýna ráðdeild í rekstri og velta við öllum steinum til þess að ná fram sparnaði. Eins og þau fjölmörgu framúrkeyrslu dæmi sem hafa komið upp síðan að núverandi meirihluti tók til starfa þá hefði mér þótt eðlilegt að byrja að spara í öðru en í lögbundnum verkefnum fyrir börnin okkar.

Skólastarf í norðanverðum Grafarvogi er frábært, þar er unnið gríðarlega faglegt starf innan skólanna. Starf sem er verðlaunað. Frístunda og félagsstarf er með því besta sem þekkist í Reykjavík. Þarna ætlar meirihlutinn að spara. Spara þar sem vel er unnið, skólastarf er svo miklu meira en bara krónur og aurar.

Er ekki eðlilegt að við krefjumst þess að skólarnir okkar fái að starfa áfram og þess í stað verði sparað í verkefnum sem ekki eru lögbundinn hjá sveitarfélaginu. Enda mjög mikilvægt að hafa skóla í nærumhverfi barna, skólinn er hjartað í hverju hverfi.

Valgerður Sigurðardóttir

Íbúi í Grafarvogi og borgarfulltrúi

Körfuknattleiksdeild Fjölnis í samvinnu við SAMbíóin Egilshöll heldur enn eitt árið stórmót í körfuknattleik fyrir yngstu iðkendurnar.

Þátttakendur á mótinu eru stelpur og strákar fædd 2008 og síðar. Tæplega 700 þátttakendur í 139 liðum hafa skráð sig til leiks í mótið.

Mótið fer fram fyrstu helgina í nóvember líkt og síðustu ár, þ.e. helgina 2. – 3. nóvember 2019.

Mótið er frábær fjölskylduskemmtun þar sem m.a. er boðið upp á fullt af körfubolta, bíó, sund, skauta, hrekkjavökustemmingu, andlitsmálun fyrir blysför og kvöldvöku, gistingu, mat, ís og verðlaun.

Hægt að skoða nánari upplýsingar um mótið hérna……

Allra heilagra messa verður sunnudaginn 3. nóvember kl. 14:00 í Grafarvogskirkju. Þar minnumst við sérstaklega þeirra sem látist hafa á árinu og hafa verið jarðsungin í Grafarvogskirkju eða af prestum safnaðarins í öðrum kirkjum. Prestar kirkjunnar þjóna og séra Sigurður Grétar Helgason prédikar. Kór Grafarvogskirkju syngur ásamt barna- og unglingakór kirkjunnar. Organisti er Hákon Leifsson og stjórnandi barna- og unglingakórsins er Sigríður Soffía Hafliðadóttir.
Eftir guðsþjónustuna verður kaffisala og framlög renna í Líknarsjóð Grafarvogskirkju. Kaffiveitingar kosta 2.500 kr fyrir fullorðna, 1.000 kr fyrir unglinga og ókeypis fyrir börn.

Bangsablessun verður í sunnudagaskólanum á neðri hæð kirkjunnar kl. 11:00. Börnin eru því sérstaklega hvött til að taka með sér bangsa í sunnudagaskólann 3. nóvember. Umsjón hefur Þóra Björg Sigurðardóttir og Hólmfríður Frostadóttir. Undirleikari er Stefán Birkisson.

Selmessa í Kirkjuselinu kl. 13:00. Séra Grétar Halldór Gunnarsson prédikar og þjónar. Organisti er Hilmar Örn Agnarsson og Vox Populi leiðir söng.

Verið innilega velkomin!

Helgi Árnason, fyrrverandi skólastjóri Rimaskóla, er kominn á eftirlaun en er þó hvergi nærri sestur í helgan stein. Hann er formaður Skákdeildar Fjölnis sem hefur hafist handa við að skák­væða Grafarvog og Stórhöfða eins og svæðið leggur sig. Fyrsta skáksettið var afhent við athöfn í heimsókn í Íslandsbankaútibúið á Höfðabakka í gær.

Hægt er að lesa meira um þessa frétt á Visir.is

Messa kl. 11:00 í Grafarvogskirkju. Séra Guðrún Karls Helgudóttir prédikar og þjónar. Organisti er Hilmar Örn Agnarsson og Kór Grafarvogskirkju leiðir söng.

Sunnudagaskóli kl. 11:00 í Grafarvogskirkju. Brúðuleikhús, söngvar, saga og fjör. Umsjón hafa Þóra Björg Sigurðardóttir og Hólmfríður Frostadóttir. Undirleikari er Stefán Birkisson.

Selmessa kl. 13:00 í Kirkjuselinu. Séra Arna Ýrr Sigurðardóttir prédikar og þjónar. Organisti er Hilmar Örn Agnarsson og Vox Populi leiðir söng.

Sjáumst í messu!

erglind Waage, Jóhanna Þorvaldsdóttir, Kristrún María Heiðberg og Marta Gunnarsdóttir skrifa á Visír.is í dag

Við undirritaðar, umsjónarkennarar í Kelduskóla Korpu, getum ekki lengur á okkur setið varðandi þá umræðu sem nú á sér stað varðandi breytingar á skólahaldi í norðanverðum Grafarvogi, sérstaklega er snýr að skólanum okkar, en samkvæmt tillögu sem nú liggur fyrir í borgarstjórn Reykjavíkur á að loka skólanum haustið 2020.

Okkur finnst oft afar villandi umræða hafa farið fram um allt það góða starf sem fram fer í Kelduskóla Korpu. Í tilkynningu inn á vef Reykjavíkurborgar er haft eftir Skúla Helgasyni, formanni skóla- og frístundaráðs Reykjavíkurborgar, að börn í hverjum árgangi skólans séu allt niður í fjögur talsins og að það sé „ávísun á verri aðbúnað en við viljum bjóða okkar nemendum bæði námslega og félagslega.“ Í Kelduskóla Korpu er um að ræða samkennslu milli árganga.Samkennslan og góð teymisvinna kennara gerir það að verkum að styrkleikar hvers og eins fá að njóta sín. Námsefni er við hæfi hvers árgangs eins og vera ber samkvæmt aðalnámskrá grunnskóla.

Í Kelduskóla er leiðsagnarnám (e. assessment for learning) og var skólinn valinn þekkingarskóli í leiðsagnarnámi fyrir skólaárið 2019-2020, ásamt fjórum öðrum skólum í Reykjavík. Kelduskóli Korpa hlaut Hvatningarverðlaun skóla- og frístundaráðs í mars á þessu ári fyrir verkefnið „Fimman – kennsluaðferð.“ Á vef Reykjavíkurborgar segir: „Vinna Kelduskóla að Fimmunni hefur vakið athygli víða. Má þar nefna að læsisráðgjafar Menntamálastofnunar hafa fylgst með framvindu hennar sem og aðrir grunnskólar.“ Einnig segir um verkefnið: „Það er mat dómnefndar að hér sé um að ræða metnaðarfullt verkefni sem hefur það markmið að bæta námsárangur og líðan nemenda.“

Að framansögðu er erfitt að láta hjá leiða að heyra formann skóla- og frístundaráðs segja að vegna fækkandi nemendafjölda sé ekki hægt að halda uppi faglegu starfi í skólanum.  Faglegt starf fer fram á hverjum degi í Kelduskóla Korpu. Við umsjónarkennarar skólans, sem erum fagmenn á okkar sviði, sjáum til þess. Leiðsagnarnám gengur að miklu leyti út á þá kenningu að hafa trú á nemendum og að þeir öðlist trú á sjálfum sér. Þegar við umsjónarkennarar höfum að undanförnu hlustað á ákveðna einstaklinga í skóla- og frístundaráði Reykjavíkurborgar tjá sig um skólann okkar í fjölmiðlum þá höfum við oft óskað þess að þeir hefðu meiri trú á því starfi sem við vinnum dag hvern. Nemendum okkar líður vel og þeim er vel sinnt, bæði námslega og félagslega.

Látum draumana rætast heitir menntastefna Reykjavíkurborgar til ársins 2030. Þar er m.a. rætt um  Barnasáttmála SÞ og að virkni barna og lýðræðisleg þátttaka í leik og starfi séu ,,mikilvæg leiðarljós.‘‘ Nemendur í 7. bekk Kelduskóla Korpu unnu nýlega áhugavert verkefni um Barnasáttmála SÞ þar sem rætt var um réttindi barna og mikilvægi þess að hlustað sé á raddir barna. Þau lærðu m.a. um 12. grein Barnasáttmálans þar sem segir að „börn eiga rétt á að láta í ljós skoðanir sínar í öllum málum er varða þau og að tekið sé réttmætt tillit til skoðana þeirra í samræmi við aldur þeirra og þroska.“

Það er mikið líf og fjör í skólanum okkar. Tekist er á við alls konar mál sem upp koma á hverjum degi, eins og gengur og gerist í öllum skólum. Þetta er vinnustaður barnanna og vinnustaðurinn okkar. Okkur þykir afskaplega vænt um skólann okkar og ekki síst nemendur okkar. Þess vegna finnst okkur ekki gott þegar teknar eru ákvarðanir um okkur án okkar. Kynningar og fundir voru haldnir á vegum borgarinnar en okkar tilfinning er hins vegar sú að þetta hafi allt verið ákveðið áður en raunverulegar samræður áttu sér stað. Ef lokun Kelduskóla Korpu verður að veruleika þá er það alla vega ekki samkvæmt vilja okkar kennara við skólann.

Við viljum hér með bjóða borgarfulltrúum í skóla- og frístundaráði Reykjavíkurborgar að koma í heimsókn í okkar fallega og góða skóla, Kelduskóla Korpu, og kynna sér allt það góða og faglega starf sem þar fer fram.  Við viljum endilega biðja ykkur um að koma á skólatíma svo þið getið einnig hitt alla okkar frábæru nemendur sem hafa margt til málanna að leggja.

Höfundar eru kennarar við Kelduskóla, Korpu.
Berglind Waage, B.Ed. í náms- og kennslufræði.
Jóhanna Þorvaldsdóttir, M.Ed. í menntunarfræðum.
Kristrún María Heiðberg, M.Ed. í náms- og kennslufræði.
Marta Gunnarsdóttir, B.Ed. í náms- og kennslufræði.

Ungmennafélagið Fjölnir og Grafarvogskirkja bjóða í nærandi og skemmtilega Fjölnismessu næstkomandi sunnudag kl. 11.00. Þessar tvær mannræktarstofnanir í Grafarvogi koma saman og lyfta að ljósi mikilvægi þess að vera heilbrigð sál í hraustum líkama.

Séra Grétar Halldór Gunnarsson leiðir stundina. Iðkendur Fjölnis ganga saman inn með heiðursfána Fjölnis undir söng Fjölnislagsins. Jón Karl Ólafsson, formaður aðalstjórnar, segir frá Fjölni og svarar spurningum um starfið. Ungir iðkendur úr starfi Fjölnis verða messuþjónar og flytja bænir.  Kór Grafarvogskirkju leiðir söng undir stjórn Hákons Leifssonar organista. Halldóra Ósk Helgadóttir flytur einsöng.

Við hvetjum ykkur öll að koma í Fjölnislitunum og/eða Fjölnistreyjum.
Eftir góða stund í kirkjunni er ykkur öllum boðið að þiggja messukaffi.

---

Sunnudagaskóli verður á neðri hæð kirkjunnar kl. 11:00. Umsjón hefur Þóra Björg Sigurðardóttir og Hólmfríður Frostadóttir. Undirleikari er Stefán Birkisson.

---

Selmessa kl. 13:00. Séra Sigurður Grétar Helgason prédikar og þjónar. Barna- og unglingakór Grafarvogskirkju leiðir söng. Stjórnandi kórsins er Sigríður Soffía Hafliðadóttir og organisti er Hákon Leifsson.

---