Opið um helgina 12 – 16. Mikið úrval af myndlist og hönnun.
Alveg tilvalið í jólapakkann. Þeir sem versla í Galleríinu geta sett nafn sitt í jólapott, sem dregið verður úr rétt fyrir jól.
Vinningur verður auðvitað eitthvað fallegt úr Galleríinu.
Endilega komið og takið þátt.
Hlökkum til að sjá ykkur.
Ætlunin er að búa til kransa og/eða aðrar skreytingar á leiði barnanna okkar. Við höfum fengið til liðs við okkur Svövu Rafnsdóttur garðyrkjufræðing sem vann í 18 ár hjá Blómaval og rekur nú fyrirtækið Blóm á leiði. Hún verður með ákveðin föndurverkefni fyrir börnin og einnig kransaverkefni á leiði, ásamt sýnishornum af hurðakrönsum sem fólk getur pantað og fleira skemmtilegt. Svava verður með allt efni á staðnum. Við viljum benda á að fólki er einnig frjálst að koma með eigið efni og endilega ef þið viljið koma með eitthvað persónulegt á kansana. Birta tekur þátt í kostnaði að því leiti að borga föndurverkefni barnanna. Einnig borgar Birta kransa á leiði barna félagsmanna að hálfu. Áætlaður heildarkostnaður við hvern krans er um 4000 krónur. Ekki er hægt að taka við greiðslukortum. Mjög erfitt er að áætla fjölda og viljum við þess vegna biðja þá sem geta að senda tölvupóst á netfangið kata1151@hotmail.com, það er þó ekki nauðsynlegt. Birta mun bjóða uppá veitingar og viljum við hvetja fólk til að mæta og taka systkini, ömmur, afa, frændur og frænkur með því við ætlum að eiga saman góða stund á fyrsta sunnudegi í aðventu.
Birta er landssamtök foreldra/forráðamanna barna og ungmenna sem látist hafa fyrirvaralaust. Hér er hægt að nálgast nánari upplýsingar um samtökin.
Velkomin!
Í gærkvöld fór fram leikur Fjölnis og Þróttar í 1.deild karla í handknattleik í Dalhúsum, Grafarvogi.
Fjölnir byrjaði leikinn örlítið betur, en jafnt var á með liðunum fyrstu 18 mínútur leiksins upp í 5-4. Þá skoraði Fjölnir 6 mörk á móti einu o og breytti stöðunni í 11-5.
Staðan í hálfleik var 14-8 fyrir Fjölni. Aftur var jafnræði með liðunum í markaskorun framan af síðari hálfleik, en í stöðunni 23-16 skipti Fjölnir um gír og skoraði 9 mörk í röð. Fjölnir kláraði svo leikinn með öruggum sigri 35-19.
Markaskorarar hjá Fjölni: Kristján Örn Kristjánsson 8, Bergur Snorrason 5, Brynjar Loftsson, Björgvin Páll Rúnarsson og Bjarki Lárusson með 4 mörk hver, Breki Dagsson og Hlynur Már Guðmundsson með 3 mörk hvor, Bjarni Ólafsson með 2 mörk, og Sveinn Þorgeirsson og Unnar Arnarsson með 1 mark hvor.
Ingvar Kristinn Guðmundsson varði 14 skot og Bjarki Snær Jónsson varði 5 skot.
Markaskorarar hjá Þrótti: Viktor Jóhannsson með 4, Kristmann Dagsson 3, Leifur Óskarsson, Eyþór Snæland Jónsson, Hákon Gröndal og Hallur Sigurðarson með 2 mörk hver, og Ólafur Guðni Eiríksson, Sigurbjörn Edvardsson, Logi Ágústsson og Sigurður Magnússon með 1 mark hver.
Bjarki Garðarsson varði 11 skot, þar af 4 til baka og Hjörvar Gunnarsson varði 6 skot.
Við upphaf á föstudagsfjöri í Rimaskóla var skólanum afhent innrammað veggspjald frá Landlæknisembættinu því til staðfestingar að skólinn sé “Heilsueflandi grunnskóli.
Það voru þau Hrafnhildur Inga, deildarstjóri verkefna, Eyrún íþróttakennari, og Gunnar Bollason matreiðslumeistari skólans sem tóku við veggspjaldinu en þau mynda fagteymi um verkefnið innan skólans.
Meðal þess sem skólinn þarf að uppfylla sem skilyrði til þess að teljast heilsueflandi grunnskóli er að matarframboð og matseld sé í samræmi við ráðleggingar embættis landlæknis fyrir skólamötuneyti og að starfsfólk fái fræðslu og þjálfun í samráði við embætti landlæknis til að annast kennslu um skaðsemi áfengis og annarra vímuefna.
27. nóvember fer fram samsýning listamanna á Korpúlfsstöðum.
Þeir munu sýna verk sín í gömlu hlöðunni (sem nú fæst leigð undir viðburði) og í vinnustofum sínum.
Það verður gælt við öll skilningarvit því meðfram því að bjóða upp á flotta list verða vínkynningar og tónlistarflutningur í boði.
Listunnendur og þeir sem hyggja á viðburðahald ættu svo sannarlega að láta sjá sig.
Karlakór Grafarvogs heldur sína árlegu hausttónleika í Grafarvogskirkju laugardaginn 29. nóvember nk. og hefjast þeir kl. 17. Gestur Karlakórsins á tónleikunum verður hinn rómaði Drengjakór íslenska lýðveldisins.
Karlakór Grafarvogs sem er á sínu fjórða starfsári hefur stimplað sig rækilega inn í tónlistarlífið í Reykjavík. Hafa tónleikar kórsins jafnan verið fjölsóttir og gestir skemmt sér hið besta, enda kórinn þekktur fyrir líflega framkomu og skemmtilegt lagaval. Drengjakór íslenska lýðveldisins var stofnaður árið 2008 og hefur komið fram við margvísleg tækifæri og hlotið einróma lof fyrir létta framkomu og góðan söng, enda er hópurinn skipaður reyndum söngmönnum sem allir hafa gaman af því að skemmta sér og öðrum með söng og sprelli. Vart er við öðru að búast en að að tónleikagestir eigi eftir að skemmta sér vel á tónleikunum.
Á fjölbreyttri efnisskránni eru vinsæl íslensk og erlend lög úr ýmsum áttum. Þar er fléttað saman vinsælum íslenskum lögum, bæði alkunnum kórlögum sem og lögum sem hafa verið útsett sérstaklega fyrir kórana.
Söngmenn kóranna beggja eru um 50 talsins en stjórnendur beggja kóranna eru konur. Stjórnandi og stofnandi Karlakórs Grafarvogs er Íris Erlingsdóttir, en Drengjakór íslenska lýðveldisins lýtur stjórn Sólveigar Sigríðar Einarsdóttur.
Aðgöngumiðar eru seldir við innganginn, en einnig má nálgast miða hjá félgum beggja kóranna.
Líkt og undanfarin ár var góð þátttaka á TORG skákmóti Fjölnis í Rimaskóla í gær en 50 grunnskólakrakkar lögðu leið sína á mótstað í Rimaskóla, þar af um 30 utan Grafarvogs. Meðal keppenda voru allir bestu skákkrakkar landsins. Vinsældir TORG mótisins mótast af hversu margir vinningar eru í boði frá fyrirtækjum á TORGINU í Hverafold, mótið er ókeypis og vinsælar veitingar eru í boði frá NETTÓ. Eftir að Helgi Ólafsson stórmeistari og heiðursgestur mótsins hafði leikið fyrsta leikinn fyrir Hákon Garðarsson Fjölni hófst keppnin. Keppendur tókust í hendur og tefldu sex umferðir.
Keppnin var æsispennandi á efstu borðum allan tímann og mikið um jafntefli. Það voru tvíburabræðurnir Björn Hólm og Bárður Örn Birkissynir úr Smáraskóla í Kópavogi sem urðu efstir, Óskar Víkingur í Davíðsson vann yngri flokkinn og Rimaskólastúlkan Nansý Davíðsdóttir varð efst í stúlknaflokki.
Auk Nansýjar urðu fimm aðrir Fjölniskrakkar í 20 efstu sætunum, þeir Jóhann Arnar Finnsson, Jóshua Davíðsson, Kristófer Halldór Kjartansson, Sæmundur Árnason og Róbert Orri Árnason. Keppendur og foreldrar þeirra virtust mjög ánægðir með mótið, skipulegið og góðar aðstæður.
Flestir keppendur fóru heim með verðlaun, allir fengu eins og þeir vildu af veitingum og borðtennisaðstaðan í Rimaskóla reyndist vinsæl á milli umferða. Þetta var í 11. sinn sem skákdeild Fjölnis stendur fyrir TORG skákmótinu og enginn vafi á að mótið verður haldið aftur að ári.
Skákdeild Fjölnis vill þakka fyrirtækjunum á TORGINU sem gáfu verðlaun og veitingar kærlega fyrir frábæran stuðning, NETTÓ, Runni – Stúdíóblóm, Colo´s, bakaríið, bókabúðin og Pizzan.
Myndir: Baldvin Örn Berndsen
ÍH menn tóku á móti Fjölni úr Grafarvoginum í kvöld og margir kannski litu spurnaraugum á ÍH liðið eftir 22 marka tap í síðasta leik. En ÍH menn rifu sig upp og þeir áttu ágætis leik á móti Ungviðinu úr Grafarvoginum sem spiluðu meðal annars án gamla refsins Sveins Þorgeirssonar sem var í banni..
Fjölnis menn voru ávallt skrefinu á undan í þessum leik og eftir rétt um 20 mínútna leik voru þeir komnir með 4 marka forystu 5-9 sem var nokkuð verðskulduð. Þeir voru svo ennþá 4 mörkum yfir í hálfleik 9-13.
Mikið af dauðafærum sem Fjölnir var ekki að nýta. Forystan var þó aldrei í neinni hættu hjá gestunum sem voru komnir með 7 marka forystu þegar seinni hálfleikur var hálfnaður. Hornamaðurinn Bjarki Lárusson fór á kostum og gerði 9 mörk í 5 marka sigri Fjölnir 23-28.
Viðtöl og frekari tölfræði koma á vefinn í kvöld.
Markahæstir ÍH: Guðni Siemsen 5.
Markahæstir Fjölnir: Bjarki Lárusson 9.
Umferðarguðsþjónusta kl. 11
Fermingarbörn og foreldrar eru hvött til að mæta.
Félagar úr Lögreglukórnum syngja. Organisti er Hilmar Örn Agnarsson.
Séra Sigurður Grétar Helgason, Haraldur Sigurðsson frá Lögreglunni á höfuðborgarsvæðinu og Þóra Magnea Magnúsdóttir, fræðslustjóri Samgöngustofu ræða um mikilvægi þess að við sjáumst og förum varlega í umferðinni.
Börnin fá óvæntan glaðning að lokinni guðsþjónustu.
Kaffibolli eftir stund í kirkjunni.
Sunnudagaskóli kl. 11
Umsjón hefur Séra Arna Ýrr Sigurðardóttir og
Þóra Björg Sigurðardóttir.
Undirleikari: Stefán Birkisson.
Regína Ósk kemur og syngur fyrir börnin.
Guðsþjónusta kl. 13
Séra Arna Ýrr Sigurðardóttir prédikar og þjónar fyrir altari.
Vox Populi syngur.
Organisti: Hilmar Örn Agnarsson.
Sunnudagaskóli á sama tíma
Umsjón hefur Þóra Björg Sigurðardóttir.
Undirleikari: Stefán Birkisson.
