Vilborg Davíðsdóttir rithöfundur og þjóðfræðingur hefur sent frá sér sjö sögulegar skáldsögur sem gerast á fyrri öldum á Íslandi, Grænlandi og Bretlandseyjum. Tvær þær síðustu, Auður og Vígroði, segja frá ævi Auðar djúpúðgu og aðdraganda landnáms á Íslandi. „Þykjast menn varla dæmi til vita að einn kvenmaður hafi komist í brott úr þvílíkum ófriði með jafnmiklu fé og föruneyti.“ Þannig farast sögumanni Laxdælu orð um ferð Auðar frá Skotlandi til Íslands í lok níundu aldar. Vilborg vinnur nú að þriðju og síðustu bókinni um landnámskonuna þar sem hún spinnur þráðinn út frá þessum þekktu orðum.

Í erindi sínu mun Vilborg segja frá skrifum sínum um Auði djúpúðgu í máli og myndum og einnig nýjustu bók sinni sem kom út í fyrra, sannsögunni Ástin, drekinn og dauðinn. Hún hefur vakið mikla athygli og hlotið lof fyrir að fjalla um ástvinamissi og sorg á áhrifamikinn en um leið jarðbundinn hátt. Þar segir Vilborg frá vegferð sinni og eiginmanns síns með sjúkdómnum sem þau vissu að myndi draga hann til dauða í blóma lífsins og deilir með lesendum því sem sorgin hefur kennt henni: mikilvægi þess að lifa í sátt og viðtekt í núinu og vanda sig við að elska, lifa og deyja.

Í leiðinni er röð fræðandi fyrirlestra sem haldin er í Borgarbókasafninu Spönginni síðasta mánudag í hverjum mánuði, frá kl. 17.15 til 18. Viðburðurinn er liður í Viku bókarinnar.

Umsjón: Sunna Dís Másdóttir, deildarbókavörður, sunna.dis.masdottir@reykjavik.is

Kæru foreldrar og skólafólk.

Það hefur lengi verið vitað að þegar börn með einhvers konar sérstöðu passa ekki í „kassann“ á kerfið erfitt með takast á við það. Nýútkomin skýrsla ríkisendurskoðunar um geðheilbrigðisþjónustu við börn og unglinga, annað og þriðja þjónustustig, staðfesti það sem fagfólk og aðstandendur hafa lengi vitað. Kerfið virkar ekki alltaf rétt. Börn eru allt of lengi á biðlistum og á meðan gerist oft lítið eða ekkert í þeirra málum, þroska þeirra og námi.

Málþingið er haldið með það að fyrir augum að skoða hvað sé hægt að gera, eiga samtal við sem flesta hlutaðeigandi og bæta verklag og þjónustu við börnin sem þurfa á að halda. Við vitum hver vandinn er, nú þarf að leysa hann.  Lausnaþingið fer fram í Skriðu, Stakkahlíð, í sal menntavísindasviðs Háskóla Íslands, fimmtudaginn 28. apríl frá kl. 14-17 og er ætlað fagfólki jafnt sem foreldrum og öðrum áhugasömum. Aðgangur er ókeypis.

Skráning fer fram hér.  Einnig má fylgjast með Facebookviðburðarsíðu þingsins.

Drög að dagskrá

Kl. 14 – Jakob Guðmundur Rúnarsson, Ríkisendurskoðun, kynnir niðurstöður skýrslunnar Geðheilbrigðisþjónusta við börn og unglinga.

Kl. 14.15 – Amanda Watkins, aðstoðarforstjóri Evrópumiðstöðvar um nám án aðgreiningar og sérþarfir, kynnir úttekt á framkvæmd skóla án aðgreiningar hér á landi sem Evrópumiðstöðin annast á þessu ári. Hún kynnir einnig lauslega starfsemi Evrópumiðstöðvarinnar.

Kl. 14.35 – Kristín Björnsdóttir, dósent við HÍ, og Haukur Guðmundsson fjalla um skóla án aðgreiningar.

Kl. 14.55 – Inga Birna Sigfúsdóttir, Sjónarhóli, fjallar um lausnamiðaða teymisvinnu.

Kl. 15.15 – Kaffihlé

Kl. 15.25 – Kristín María Indriðadóttir, verkefnastjóri fjölgreinadeildar grunnskóla Hafnarfjarðar, fjallar um vinnu með börnum með fjölþættar þarfir.

Kl. 15.45 – Foreldrar barna í vanda segja frá reynslu sinni.

Kl. 16.00 – Umræður – pallborð þátttakenda

Eftirtalin samtök standa fyrir lausnaþingi um næstu skref:

SAMFOK, ADHD samtökin, Barnaheill – Save the Children á Íslandi, Einhverfusamtökin, Félag skólastjórnenda í Reykjavík, Heimili og skóli, Landssamtökin Þroskahjálp, Olnbogabörn, Sjónarhóll, Umboðsmaður barna Umhyggja og UNICEF

Vinsamlegast vekjið athygli á viðburðinum meðal foreldra í ykkar skóla.

Bestu kveðjur,

Björn Rúnar Egilsson

Verkefnastjóri hjá Heimili og skóla og SAFT

Í sumar verður fjölbreytt framboð af afþreyingu og fræðslu fyrir börn og unglinga í Reykjavík. Finna má upplýsingar um sumarstarfið á frístundavefnum www.fristund.is, s.s um starf frístundamiðstöðva, siglinganámskeið, sumarbúðir, íþróttanámskeið, reiðnámskeið og margt fleira sem í boði er.

Næsta sunnudag verður útvarpað frá messu í Grafarvogskirkju kl. 11. Sr. Vigfús mun flytja kveðjumessu sína og eru allir velkomnir.

Sunnudagaskólinn verður á neðri hæðinni kl. 11. Sr. Sigurður Grétar og Benjamín Pálsson leiða stundina, Stefán Birkisson sér um undirleik.

Í sumar verður fjölbreytt framboð af afþreyingu og fræðslu fyrir börn og unglinga í Reykjavík. Finna má upplýsingar um sumarstarfið á frístundavefnum www.fristund.is, s.s. um starf frístundamiðstöðva, siglinganámskeið, sumarbúðir, íþróttanámskeið, reiðnámskeið og margt fleira sem í boði er.

Skráning í sumarstarf frístundaheimila (sumarfrístund), sértækt félagsmiðstöðvastarf, siglinganámskeið í Siglunesi og á dýranámskeið í Húsdýragarðinum hefst mánudaginn 25. apríl kl. 8:20 en skráning í sumarsmiðjur fyrir börn sem eru að ljúka 5.-7. bekk hefst 18. maí n.k.

Skráning í sumarstarf á vegum Reykjavíkurborgar fer fram á vefnum http://sumar.fristund.is.

Skráning í sumarstarf frístundaheimilanna, sértækt félagsmiðstöðvastarf og siglinganámskeið þarf að fara fram fyrir kl. 12:00 á föstudögum eigi barn að byrja á
mánudeginum á eftir. Skráning á dýranámskeið þarf að fara fram á miðvikudegi í vikunni áður en námskeið hefst. Foreldrum er bent á að skrá börn sín tímanlega þar sem námskeiðin geta fyllst fljótt.

Athugið að ef foreldrar geta ekki nýtt sér rafræna innritun geta þeir farið á frístundamiðstöðvar borgarinnar (helst fyrir hádegi) og fengið aðstoð við skráningu. Ekki er hægt að skrá börn í sumarstarf Reykjavíkurborgar í gegnum síma en hægt er að fá leiðbeiningar símleiðis hjá þjónustuveri Reykjavíkurborgar í síma 411-1111 ef foreldrar eru við nettengda tölvu.

Skráning í sumarstarf annarra fer fram hjá viðkomandi félagi/aðila.

Með von um ánægjulegt samstarf,
Soffía Pálsdóttir, skrifstofustjóri frístundamála á skóla- og frístundasviði og Steinþór Einarsson skrifstofustjóri íþróttamála á íþrótta- og tómstundasviði

Information on summar activities for children and your/Information in English – http://reykjavik.is/sites/default/files/ymis_skjol/skjol_frettir/bref_um_sumarstarf_2016_enska.pdf

Informacje o zajeciach letnich dla dzieci i mlodziezy/ Information in Polish – http://reykjavik.is/sites/default/files/ymis_skjol/skjol_frettir/bref_um_sumarstarf_2016_polska.pdf

Hátíðarhöld verða í öllum hverfum Reykjavíkur í tilefni af sumardeginum fyrsta. Boðið er upp á fjölbreytta dagskrá fyrir alla fjölskylduna, þ. á. m. skrúðgöngur, dans- og söngatriði, hoppukastala, andlitsmálun, dýrablessun og víkingaskylmingar.

Glaðir krakkar

Barnamenningarhátíð í Reykjavík verður sett í sjötta skipti þriðjudaginn 19. apríl kl. 11 með gleðihátíð í Hörpu.

Barnamenningarhátíð er ein stærsta hátíð sem haldin er á vegum Reykjavíkurborgar en í boði eru um 150 ókeypis viðburðir fyrir börn og unglinga dagana 19.-24. apríl. Dagskráin fer fram í öllum hverfum borgarinnar; í grunnskólum, frístundaheimilum, félagsmiðstöðvum, leikskólum, menningarstofnunum, Ráðhúsinu og á fleiri stöðum. Hægt er að nálgast ítarlegri upplýsingar á vefnum barnamenningarhatid.is.

Um Barnamenningarhátíð
Barnamenningarhátíð er skipulögð af Höfuðborgarstofu og verkefnastjóra barnamenningar í Reykjavík. Með hátíðinni skapast vettvangur fyrir menningu barna, menningu með börnum og menningu fyrir börn. Hátíðin er þátttökuhátíð þar sem gæði, margbreytileiki, jafnræði og gott aðgengi eru höfð leiðarljósi. Í ár er áhersla lögð á fjölmenningu og réttindi barna.

Barnamenningarhátíð í Reykjavík verður sett í sjötta skipti á morgun 19. apríl með gleðihátíð í Eldborgarsal Hörpu. Hátíðin stendur til 24. apríl.
Margbreytileikanum í íslensku samfélagi verður fagnað sérstaklega og hefur hljómsveitin Pollapönk samið lagið Litríkir sokkar og vettlingar af því tilefni og verður það flutt við setningarathöfnina þar sem 1.450 börn í fjórða bekk í grunnskólum borgarinnar taka undir.

Á Barnamenningarhátíð verða um 150 ókeypis viðburðir í boði fyrir börn og unglinga. Dagskrá verður í öllum hverfum borgarinnar; í grunnskólum, frístundaheimilum, félagsmiðstöðvum, leikskólum og menningarstofnunum, Ráðhúsinu og víðar.

Á vef Barnamenningarhátíðar er hægt að kynna sér viðburði hátíðarinnar; http://barnamenningarhatid.is/

Gleðilega Barnamenningarhátíð!

Kiwanismenn úr Höfða, Grafarvogi og Eimskip efna til sannkallaðrar “hjálmaveislu” sumardaginn fyrsta þann 21. apríl n.k. þar sem þeir færa   um 250   börnum í 1. bekk grunnskóla Grafarvogs reiðhjólahjálm að gjöf.

Afendingin fer fram á plani Olís við Gullinbrú og hefst kl. 10 og þar verður ýmislegt gert til skemmtunar   m.a. dregið úr happadrættismiðum, þar sem heppinn fær reiðhjól að gjöf og fleira.

Kiwanismenn hafa gefið 1. bekkingum í grunnskólum   Grafarvogs reiðhjólahjálma allt frá árinu 2000 í góðri samvinnu við grunnskóla Grafarvogs, en nú hafa borgaryfirvöld tekið fyrir slíka afhendingu í skólum borgarinnar og hafa Kiwanismenn því þurft að leita annarra leiða til að koma þessu mjög svo þarfa öryggistæki til barnanna.

Kiwanismenn munu njóta aðstoðar Olís og Foreldrafélaga grunnskóla Grafarvogs við afhendinguna.

Sjáumst vonandi sem allra flest ásamt foreldrum barnanna þann 21. apríl n.k.

Þar sem rýmið á plani Olís er ekki mikið er óskað eftir því að foreldrar skilji bíla sína eftir heima ef það er mögulegt

Kiwanisfélagar úr Höfða, Grafarvogi