Kæru foreldrar og skólafólk.

Við minnum á málþingið Sæktu þér að lesa sögur eða ljóð sem haldið verður í Norræna húsinu þann 12. maí kl 14-16 þar sem fjallað verður um gildi og áhrif upplestrar, þá möguleika sem felast í upplestrarkeppni í skólum, tengsl lesskilnings og vandaðs upplestrar og horf fram á veginn. Áhugafólk um lestur ætti því ekki að láta það fram hjá sér fara.

Nánari upplýsingar má lesa hérna……

Björn Rúnar Egilsson

Verkefnastjóri hjá Heimili og skóla og SAFT

Vinnuvélar frá borginni að hreinsa göturnar síðustu vikur

Vorhreinsun í götunni þinni 

Nú er komið að árvissri hreinsun gatna og göngustíga í þínu hverfi. Það flýtir mjög fyrir og skilar betri þrifum þegar bílar eru færðir úr götunni og er ekki lagt á ný fyrr en hreinsun er að fullu lokið. Þetta gildir eingöngu um almenn stæði í götunni og á borgarlandi, en ekki stæði innan lóðarmarka íbúðarhúsa og fyrirtækja. 

Við vinnum eftirtalda daga frá kl. 08:00 – 18:00. 

Miðvikudaginn 1. júní 2016.

Hallsvegur, Gagnvegur, Dalhús, Grundarhús, Vallarhús, Hlíðarhús, Garðhús, Brekkuhús, Völundarhús, Veghús, Vesturhús, Baughús, Miðhús, Sveighús, Suðurhús, Garðsstaðir, Brúnastaðir, Bakkastaðir, Barðastaðir. 

Fimmtudaginn 2. júní 2016.

Hamravík, Breiðavík, Ljósavík, Gautavík, Mosavegur, Vallengi, Fróðengi, Gullengi, Reyrengi, Laufengi, Starengi.

Föstudaginn 3. júní 2016.

Vættaborgir, Móavegur, Dísaborgir, Álfaborgir, Æsuborgir, Tröllaborgir, Jötnaborgir, Hulduborgir, Dofraborgir, Melavegur, Goðaborgir, Dvergaborgir.

Mánudaginn 6. júní 2016.

Gylfaflöt, Bæjarflöt, Stararimi, Smárarimi, Viðarrimi, Sóleyjarimi, Hrísrimi, Flétturimi, Berjarimi, Langirimi, Laufrimi, Klukkurimi, Mosarimi, Lyngrimi, Rósarimi, Mururimi, Hvannarimi, Grasarimi, Fífurimi. 

Þriðjudaginn 7. júní 2016.

Fannafold, Fjallkonuvegur, Reykjafold, Logafold, Hverafold, Funafold, Jöklafold, Frostafold, Austurfold, Vesturfold. 

Miðvikudaginn 8. júní 2016.

Neshamrar, Leiðhamrar, Krosshamrar, Hesthamrar, Salthamrar, Rauðhamrar, Hlaðhamrar, Gerðhamrar, Sporhamrar, Geithamrar, Lokinhamrar, Dyrhamrar, Dverghamrar, Bláhamrar, Lokinhamrar, Vegghamrar, Svarthamrar, Stakkhamrar.

Sunnudaginn 8. maí er uppskeruhátíð barnastarfsins í Grafarvogskirkju kl. 11. Umsjón hafa sr. Arna Ýrr Sigurðardóttir og Benjamín Pálsson og undirleikari er Stefán Birkisson.

Jói og Sóley frá Sirkus Íslands koma og skemmta.
Sænski Nacka unglingakórinn syngur einnig í messunni.
Hoppukastali, grillaðar pylsur og gos.

Viltu hafa áhrif í kirkjunni þinni?
Nú þarf að kjósa fólk í nokkur sæti í sóknarnefnd safnaðarins og í kjörnefnd sem sér um að kjósa nýja presta safnaðarins. Í kjörnefndina þarf 29 aðalmenn og 11 varamenn. Sóknarbörn í Grafarvogssókn sem eru 16 ára og eldri hafa atkvæðisrétt og kjörgengi. Ef þú hefur áhuga væri gott að hafa samband við formann sóknarnefndar, Önnu Guðrúnu Sigurvinsdóttur í netfangið annasigurvins@gmail.com og láta hana vita.

Hér er hægt að lesa starfsreglur um val og veitingu prestsembætta.

Að öðru leyta verða aðalfundarstörfin hefðbundin.

Hér er netútgáfa af blaði Knattsprynudeildar sem var að koma út. Einfaldlega smella á tengilinn hér að neðan

Skoða blaðið hérna…..

Ágætu Fjölnismenn

Sumarið er tíminn. Nú styttist í að knattspyrnuvertíðin hefjist. Glæsilegir fulltrúar Fjölnis, stelpur og strákar, reimi á sig skóna, og við sem stöndum fyrir utan völlinn öskrum okkur hás við að styðja okkar lið. Við eigum fjölmennustu knattspyrnudeildina í Reykjavík og eigum að vera stolt af okkar fulltrúum.

Grafarvogsbúar eiga að sameinast um að styðja liðið okkar, hver sem bakgrunnurinn er. Flest okkar sem í hverfinu búa eigum okkar fortíð með öðrum liðum, en þó fer gegnheilum Fjölnismönnum jölgandi enda styttist í að félagið komist á fertugsaldurinn. Öflugt íþróttastarf og góður árangur félagsins okkar, gerir Grafarvog að enn meira spennandi hverfi og áhugaverðari stað til að búa á.

Segir Árni Hermannsson formaður knattspyrnudeildar meðal annars í blaðinu.

Sæmundur Árnason ,Ágúst Ívar Árnason, Svandís Gunnarsdóttir

Vikulegar skákæfingar Fjölnis á miðvikudögum hafa undantekningarlaust verið afar vel sóttar í vetur. Um 30 – 40 börn og unglingar hafa mætt á hverja einustu æfingu, bæði drengir og stúlkur. Á síðustu æfingu vetrarins voru krýndir afreks-og æfingameistarar vetrarins líkt og undanfarin ár.

Sæmundur Árnason fyrirliði skáksveitar Foldaskóla hlaut afreksbikarinn að þessu sinni og Ágúst Ívar Árnason í Rimaskóla var valinn æfingameistari vetrarins en þar var valið erfitt þar sem fjöldi Fjölniskrakka voru með 100% mætingu.

Í fyrsta sinn var verðlaunað fyrir peðaskák. Leikskólabarnið Svandís Gunnarsdóttir er óumdeilanlega peðaskákdrottning Fjölnis því þessi væntanlegi Rimaskólanemi varð í 1. – 3. sæti á Peðaskákmóti Fjölnis á sumardaginn fyrsta og var einnig efst stúlkna á Peðajólaskákmóti Hugins í des. sl.

Helgi Árnason formaður skákdeildar Fjölnis hefur haft umsjón með Fjölnisæfingunum í vetur og haft unga og efnilega Fjölnisskákmenn sér til aðstoðar ásamt hópi foreldra sem hefur séð um veitingar og aðra ómetanlega aðstoð við þessar fjölmennu skákæfingar.

Menningarhús Spönginni, laugardagur 7. maí kl. 14

Skólahljómsveit Grafarvogs var stofnuð 1993 og sinnir nú á annað hundrað grunnskólanemendum í Grafarvogi, Grafarholti og Úlfarsárdal.

Starfinu er að jafnaði skipt í þrjár hljómsveitir, A B og C sveit. Sveitin gegnir veigamiklu hlutverki í hverfunum við tónlistarflutning við hátíðleg tækifæri. Elsta hljómsveitin fer að jafnaði í tónleikaferðir til útlanda annað hvert ár til viðbótar við fjölmargar æfingaferðir innanlands. Hljómsveitin hefur hlotið viðurkenningu Nótunnar fimm sinnum og komið fram í sjónvarpi fjölmörgum sinnum.

Hópurinn sem kemur fram á bókasafninu í Spönginni er næstelsta sveitin, svokölluð B-sveit, aðallega krakkar í 5. – 7.bekk. Þau leika fjörug lög og skemmtileg lög: allt frá Thriller til tónlistar úr teiknimyndinni Alladín.

Umsjónarmaður er Ásta Halldóra Ólafsdóttir, asta.halldora.olafsdottir@reykjavik.is.

Fimmtudaginn 5. maí verður haldið fjáröflunarbingó fyrir Dropann.
Bingóið verður milli kl. 14 – 16. í sal hjá Íslenska Gámafélaginu í Gufunesi (Gamla áburðarverksmiðjan).

Glæsilegir vinningar í boði og góð skemmtun þar sem verið er að
styrkja gott málefni.

Bingóspjaldið kostar 750 kr. en 3 spjöld á 2000 kr. og svo hvert spjald á
500 kr. eftir það. Einnig verða veitingar seldar á staðnum.
Posi verður á staðnum en seðlar eru vel þegnir.

Dropinn, styrktarfélag barna með sykursýki starfrækir  verkefnið „Vinir Dropans“ þar sem ömmum, öfum, frænkum og frændum, eða bara öllum sem vilja sýna málefninu stuðning býðst að styrkja félagið um fjárhæð að eigin vali í gegnum heimabanka.

Dropinn hefur starfað síðan 1995. Höfuðmarkmið félagsins er að stuðla að velferð barna og unglinga með sykursýki og að miðla fræðslu og veita stuðning foreldrum barna með sykursýki. Stærsta verkefni Dropans er að standa fyrir árlegum sumarbúðum, annars vegar fyrir börn og hins vegar fyrir unglinga með sykursýki. Allt starf félagsmanna í þágu Dropans er unnið í sjálfboðavinnu og er félagið því háð styrkjum frá velunnurum til að halda starfseminni áfram.

Fyrirspurnir um spartunnur í Reykjavík eru langt umfram væntingar. Sífellt meira magn af plasti berst til endurvinnslu en um 33 tonn bárust frá heimilum í Reykjavík fyrstu 4 mánuði ársins. Aukning er í pappírstunninni á milli ára, fór úr 27 kg á íbúa árið 2014 í 29 kg á íbúa 2015.

Spartunnan er greinilega ákjósanlegur góður kostur fyrir borgarbúa. „Fyrirspurnir um spartunnur eru langt umfram væntingar, við þurftum að panta fleiri en áætlað var og von er á nýrri sendingu upp úr mánaðamótum,“ segir Eygerður Margrétardóttir deildarstjóri umhverfis- og úrgangsstjórnunar hjá Reykjavíkurborg.  Spartunnan stendur sérbýlishúsum til boða og er sótt á 14 daga fresti.

Reykjavíkurborg hefur farið þá leið að bjóða íbúum að velja það þjónustustig sem hentar þeim og að greiða fyrir þjónustuna í takt við það. Þannig geta íbúar valið hvort þeir vilja nýta sér þjónustu grenndar- eða endurvinnslustöðva eða hvort þeir kjósa að endurvinnanlegur úrgangur sé sóttur frá heimilum þeirra. Á heimilum þar sem lítið fellur til af blönduðum úrgangi geta íbúar í sérbýli óskað eftir spartunnu sem er ódýrari og helmingi minni en gráa tunnan eða 120 lítrar.

Íbúar í fjölbýlum geta endurskoðað fjölda grárra tunna og fækkað þeim ef tilefni er til og greitt þannig lægri gjöld. Oft má fækka gráum tunnum í fjölbýlishúsum þar sem tunnur eru samnýttar og getur þá skapast svigrúm til að fá grænar og bláar tunnur undir endurvinnsluefni.

Blandaður úrgangur frá heimilum fer í spartunnuna eins og í gráu tunnuna. Hún er minni en sú hefðbundna og tekur 120 lítra í stað 240. Spartunnan var áður sótt á 20 daga fresti. Fyrir hirðubreytinguna voru 3.500 spartunnur sóttar á 20 daga fresti og tóku 240 lítra, það gera 80 lítrar á viku. Spartunnunni var breytt og tekur nú 120 lítra og er sótt á 14 daga fresti en það gera um 60 lítra á viku.

Spartunnan stendur öllum sérbýlum til boða og eru um 31% þeirra að nota hana. Hún er góður kostur fyrir heimili sem flokka og hafa tamið sér vistvæna neysluhætti.

Magn endurvinnsluefna vex

Blandaður úrgangur frá heimilum í Reykjavík stóð nánast í stað á milli áranna 2014 og 2015, fer úr 149 kg á íbúa í 151 kg á íbúa. Aukning er í pappírstunninni á milli ára, fór úr 27 kg á íbúa árið 2014 í 29 kg á íbúa 2015.

Sífellt meira magn af plasti berst til endurvinnslu en um 33 tonn bárust frá heimilum í Reykjavík fyrstu 4 mánuði ársins en í dag eru ríflega 2000 slíkar tunnur við heimili. Plastið fór úr 4,5 tonnum í janúar í 10,5 tonn í mars sem er 57% aukning.

Heildarmagn af úrgangi frá heimilum í Reykjavík var 233 kg á íbúa árið 2006 en árið 2015 hafði sú tala lækkað um 22% og var 181 kg á íbúa. Þar af voru 29 kg endurvinnsluefni svo magn blandaðs úrgangs hefur dregist saman um 35% á tæpum 10 árum.