Fátt er mikilvægara foreldum með ung börn en að þau nái að sofa vel. Hluti af góðum svefni er að skapa heilbrigðar svefnvenjur og er reglufesta mikilvæg í því sambandi.

Þriðjudaginn 20. september kl. 14:00 mun Ingibjörg Leifsdóttir svefnráðgjafi á barnaspítala Hringsins fræða okkur um svefn ungra barna og segja frá því hvaða svefnvenjur hafa reynst foreldum bestar í gegnum tíðina. Ingibjörg situr í teymi um svefnvanda barna og hefur því mikla reynslu af ráðgjöf við fjölskyldur á því sviði.

Við hvetjum foreldra með ung börn til að mæta og spyrja Ingibjörgu um allt sem þeim liggur á hjarta varðandi svefn og svefnvenjur barna sinna.

Samgönguvika hófst í morgun með hjólaferð og tóku sveitarstjórar á höfuðborgarsvæðinu þátt í henni. Hjólað var úr Reykjavík upp í Mosfellsbæ þar sem ráðstefnan Hjólum til framtíðar er haldin.

Samgönguvika er evrópskt átak um bættar samgöngur í borgum og bæjum. Boðið er upp á ýmsa viðburði til að hvetja fólk til umhugsunar um eigin ferðavenjur og virkja það til að nota almenningssamgöngur,hjóla eða ganga.

Hjólum er hampað í dagskránni. Ráðstefnan Hjólum til framtíðar er í dag, fyrsta laugardagshjólaferð vetrarins er á morgun, formleg opnun hjólastígs á mánudag og á þriðjudag er kynningarfundur um hjólreiðar. Sjá nánar í dagskrá Samgönguviku.

Lesum og berum saman bækur!

Lesthringurinn í Spönginni tekur til starfa á ný næsta mánudag kl. 17:15. Byrjað verður á tveimur nýlegum íslenskum bókum, önnur er Vinkonur eftir Rögnu Sigurðardóttur og hin Raddir úr húsi Loftskeytamannsins eftir Steinunni G. Helgadóttur.

Lestur er einstaklingsathöfn, oft mjög gefandi – en hver þekkir ekki það, að hafa lesið áhrifamikla bók og vilja ræða um efni hennar við aðra sem hafa lesið hana?

Allir velkomnir, en skráning nauðsynleg:

Herdís Þórisdóttir, deildarbókavörður
Netfang: herdis.thorisdottir@reykjavik.is
sími: 411 6230

Jazz í hádeginu | Sólartónar frá Brasilíu kl 13.00-14.000 laugardaginn 17.sept.

Fiðlu og Básúnuleikarinn Sigrún Kristbjörg Jónsdóttir hefur sérhæft sig í heimstónlist og býður hér uppá dagskrá þar sem tónlistarstílarnir choro og samba leika aðalhlutverkið.

Choro tónlistarstílllinn kemur upphaflega frá Rio de Janeiro en er jafnframt spilaður út um alla Brasilíu við miklar vinsældir. Hljómar og laglínur stílsins eiga rætur sínar að rekja til evrópskra dansa sem Portúgalir og aðrir Evrópubúar fluttu með sér en sjóðheitur takturinn kemur úr trúarbragðatónlist og slagverkshefð Afríkuríkja sem barst til Brasilíu með þrælahaldi Portúgala. Choro er saminn í rondo formi eða ABACA og er laglínan oftast leikin á flautu, klarinett eða annað laglínuhljóðfæri við undirleik sjöstrengja gítars, cavaquinho sem er nokkurskonars stálstrengja ukulele og pandeiro, aðal slagverkshljóðfæris choro stílsins en hljóðfærinu má líkja við tamborínu með strekktu skinni sem leikið er á með lófa slagverksleikaranns.

Einn þekktasti choro utan Brasilíu sem flestir kannast við er Tico tico no Fubá, sem söngkonan Carmen Miranda gerði vinsælt. Sögnin chorar á portúgölsku þýðir að gráta og því choro eða chorinho lauslega þýtt sem stuttlegt harmaljóð enda laglínurnar hádramatískar, ef sungnar um vonlausar ástir en undirniðri sýður óstöðvandi ritminn á pandeiro-inu. Samba stílinn kannast heimsbyggðin mun betur við og er hann og choro náskildir, choro er þó mun lágstemdari en samban þróttmeiri og ætluð til dans. Á tónleikunum verða flutt nokkur lög í choro og samba stíl eftir aðal höfunda stílanna svo sem Pixinguihna og Nelson Cavaquinho.

Aðgangur ókeypis og allir velkomnir.

Igor Jugovic hefur framlengt samning sinn við Fjölni til tveggja ára eða út tímabilið 2018.

Igor sem gekk í raðir okkar Fjölnismanna fyrir tímabliið hefur komið við sögu í öllum leikjum liðsins á tímabilinu og hann hefur verið algjör lykilmaður í leik liðsins í sumar.

Á myndinni sjást Igor og Árni Hermannsson formaður knattspyrnudeildar Fjölnis handsala samninginn.

Fjölnir tekur á móti Þrótti á fimmtudaginn 15. september kl. 17:00 á heimavellinum okkar fagra í Grafarvogi og við viljum bjóða ykkur öllum frítt á leikinn.
Fjölnir er að spila sína allra stærstu leiki þessa dagana og eru í mikilli baráttu um Evrópusæti.

Í tilefni þess er frítt inn fyrir alla á þennan leik.

Við hvetjum ykkur til þess að mæta á völlinn með alla fjölskylduna í gulu, hafa gaman og styðja Fjölni!

Á vellinum verður sjoppan opin, seldar gómsætar pizzur, grillaðir hamborgarar og því er kjörið að afgreiða kvöldmatinn á vellinum.

Endilega addið Fjölni á: Twitter: Fjolnir_FC

Snapchat: umf.fjolnir

#ÁframFjölnir

– Garðeigendur klippi gróður sem hindrar vegfarendur

Eftir góða tíð í sumar hefur trjágróður víða vaxið inn á stíga og götur. Starfsmenn Reykjavíkurborgar fara nú skipulega um borgina og skoða hvar líklegt er að gróður hindri för snjóruðningstækja og sorphirðu.

Reykjavíkurborg hvetur garðeigendur til að klippa þann trjágróður sem vex út fyrir lóðarmörk og hindrar vegfarendur, hylur umferðarskilti eða  götulýsingu.  Þar sem ekki er brugðist við geta starfsmenn borgarinnar klippt á kostnað garðeigenda.

Eftirfarandi atriði verða garðeigendur að hafa í huga allan ársins hring:

• Umferðarmerki  séu sýnileg.
• Gróður byrgi ekki götulýsingu.
• Gangandi og hjólandi eigi greiða leið um gangstíga.
• Þar sem vélsópar og snjóruðningstæki fara um má lágmarkshæð gróðurs yfir stígum ekki vera lægri en 2,8 metrar.
• Yfir akbrautum má gróður ekki slúta niður fyrir 4,2 metra og gildir þessi hæðarregla einnig þar sem sorphirðubílar, slökkvilið og sjúkrabílar þurfa að komast eftir stétt eða stíg.

Gróður sem tilheyrir borginni verður klipptur og eigendur garða þar sem trjágróður vex út fyrir lóðarmörk eru hvattir til að huga að sínum gróðri.   Þeir sem vilja fá nánari upplýsingar eða koma ábendingum um trjágróður á framfæri geta hringt í síma 411 11 11, sett þær á vef reykjavik.is/abendingar eða sent skeyti á upplysingar@reykjavik.is

Trjágróðri sé haldið innan lóðarmarka
Byggingarreglugerð setur garðeigendum þá skyldu á herðar að halda gróðri innan lóðarmarka. Í reglugerðinni nr. 112/2012 segir í grein 7.2.2: „Lóðarhafa er skylt að halda vexti trjáa eða runna á lóðinni innan lóðarmarka. Sinni hann því ekki og þar sem vöxtur trjáa eða runna fer út fyrir lóðarmörk við götu, gangstíga eða opin svæði er veghaldara eða umráðamanni svæðis heimilt að fjarlægja þann hluta er truflun eða óprýði veldur, á kostnað lóðarhafa að undangenginni aðvörun“.

Á vefsíðunni >>>> http://reykjavik.is/trjagrodur  eru upplýsingar um hæðarmörk trjágróðurs, m.a. skýringarmynd sem fjölmiðlum er að sjálfsögðu heimilt að nota.

Hjólreiðaviðburðurinn Tour of Reykjavik verður haldinn í fyrsta sinn sunnudaginn 11.september næstkomandi. Það er Íþróttabandalag Reykjavíkur í samvinnu við hjólreiðafélögin í Reykjavík sem hefur veg og vanda að skipulagningunni.

Tour of Reykjavík býður upp á fjölbreyttar hjólaleiðir fyrir alla þá sem áhuga hafa á hjólreiðum en keppnin sjálf er haldin í Laugardalnum og ýmist hjólað alla leið að Þingvallavatni eða styttri hringi í Laugardal og miðborginni. Sérstök barnabraut verður fyrir yngstu kynslóðina þar sem sjálfur Íþróttaálfurinn sér um upphitun.

Víðtækar götulokanir og truflun á umferð verða vegna Tour of Reykjavik sunnudaginn 11.september. Á kortinu má sjá nákvæmlega hvaða götur eru lokaðar á hvaða tíma. Ýta þarf á stopp- og þríhyrningamerkin til að fá nánari upplýsingar um hverja götu fyrir sig.

Aðallega er um að ræða lokanir á götum frá Laugardal að Hörpu en einnig verður Hafravatnsvegur, Nesjavallarleið og Grafningur lokaður í 1-2 klukkustundir fyrir hádegi.

Bendum á að íbúar í Fossvogi geta keyrt austur Bústaðaveg (í átt að Sprengisandi) en ekki í vestur. Íbúar í Smáíbúðahverfi geta ekki keyrt Bústaðaveg þar sem hann er lokaður til vesturs (í átt að Landspítala) en þeir geta notað Miklubraut og Grensásveg til að komast til og frá heimilum sínum. Íbúum í Miðbæ og Hlíðum er bent á að Miklabraut er alltaf opin og eiga allir að geta komist þangað sem þeir þurfa með smá krókaleiðum.

Sérstök athygli er vakin á því að þó Sæbraut sé lokuð fyrir framan Hörpu er hægt að komast í bílakjallara Hörpu ef keyrt er eftir Skúlagötu. Starfsmenn verða þar við gatnamótin og hleypa umferð yfir þegar engin hjól eru nálægt.

Skráning í Tour of Reykjavik er í fullum gangi en netskráningu lýkur í dag föstudaginn 9.september kl.23:00.

Gunnar Már Guðmundsson, Herra Fjölnir eins og hann er oft kallaður, hefur framlengt samningi sínum við félagið um tvö ár.  Gunnar Már hefur verið einn af lykilmönnum Fjölnis í sumar eins og undanfarin ár. Hann er eins og gott rauðvín, batnar með aldrinum!

Auk þess að spila með meistaraflokksliði Fjölnis næstu 2 árin mun hann einnig halda áfram að þjálfa meistaraflokkslið kvenna hjá félaginu, eins og hann gerði á þessu leiktímabili.

Á myndinni má sjá Gunnar Má og Árna Hermannsson, formann knattspyrnudeildar Fjölnis, handsala samninginn.