Búið er að koma upp Teqball velli við Egilshöll í Grafarvogi og var formleg opnun á honum sumardaginn fyrsta..

Teqball er nýleg íþrótt sem spiluð er á borði sem svipar til borðtennisborðs. Íþróttin á auknu fylgi að fagna um alla veröld og því erum við stolt að opna þennan nýja völl fyrir almenning. Borðin eru tvö og staðsett á upphituðum og upplýstum gervigrasvelli við Egilshöll.

Borðin voru fjármögnuð með styrk frá íbúaráði Grafarvogs og er aðal sprautan á bakvið verkefnið Grafarvogsbúinn og Fjölnismaðurinn, Gunnar Hauksson sem einnig er knattspyrnuþjálfari hjá félaginu.

Borðin eru frábær viðbót við það flotta íþróttastarf sem fram fer í Egilshöll og óskar Fjölnir öllum Grafarvogsbúum gleðilegs sumars. #Félagið Okkar

Menntun, menning, samband við foreldra, heilsa, líðan og vímuefnaneysla ungmenna í framhaldsskólum á Íslandi.

Á heimasíðu Rannsóknir & Greiningu er hægt að lesa tvær skýrslur frá því okt. 2020 bæði grunn- og framhaldsskólum í þeim eru niðurstöður fyrir heildina (https://rannsoknir.is/SKYRSLUR/)

Rannsóknirnar hafa meðal annars kannað þætti í lífi barna og unglinga á borð við andlega og líkamlega heilsu og líðan, fjölskylduaðstæður, frístundaiðkun, áfengis- og vímuefnaneyslu, árangur í námi, líkamsrækt og þátttöku í íþróttastarfi, trúarskoðanir, mataræði og sjálfsvíg. Niðurstöður rannsóknanna hafa verið birtar í tugum ritrýndra vísindagreina skrifuðum af vísindamönnum víða að úr heiminum. Eins hafa þær verið nýttar með staðbundnum hætti, innan sveitarfélaga, hverfa og skóla til að auka skilning á högum ungs fólks og bæta aðstæður þeirra, heilsu og líðan.

Foreldrarölt myndar tengsl og stuðlar að auknu samtali milli foreldra í hverfinu. Með því að taka þátt í foreldrarölti kynnist þú öðrum foreldrum og kynnist hverfinu þínu á annan hátt. Einnig hefur þú góð áhrif á hverfisbraginn og það félagslega umhverfi sem börn hverfisins búa í. Nærvera fullorðinna þar sem unglingar hafa safnast saman hefur róandi og fyrirbyggjandi áhrif. Slík nærvera gefur unglingunum líka tækifæri til að leita aðstoðar fullorðinna ef á þarf að halda.

Hérna er hægt að nálgast handbókina……..

Teqball borð í hjarta Grafarvogs.

Komið hefur verið fyrir tveimur Teqball borðum á einum af battvöllunum fyrir utan Egilshöll.

Hvað er Teqball?
Teqball er ný íþrótt sem spiluð er á kúptu borði sem svipar til borðtennisborðs. Teqball sameinar fótbolta og borðtennis en í gegnum tíðina hefur „íþróttin“ verið kölluð skallatennis hér á landi. Hægt er að spila bæði einliða- eða tvíliðaleik. Íþróttin nýtist vel samhliða knattspyrnuiðkun þar sem Teqball krefst áherslu á tækni, samhæfingu og góða fyrstu snertingu á boltann.

Teqball borðin eru 3 metrar á lengd og 1,7 metrar á breidd, með hæsta punkt 0,76 metra.

Borðin eru sett upp af knattspyrnudeild Fjölnis og eru allir Grafarvogsbúar hvattir til að koma og prófa þessa skemmtilegu íþrótt.

#FélagiðOkkar

Næstkomandi fimmtudag opnar nýr “smassborgara” staður sem nefnist Plan B Burger á Suðurlandsbraut 4.

Staðurinn er hugarfóstur Óskars Kristjánssonar og mun hann reka staðinn ásamt syni sínum Kristjáni Óskarssyni. Staðurinn er í svokölluðum “diner” stíl, en þar verður á boðstólnum smassaðir hamborgarar, kjúklingaborgarar, heimatilbúnir sjeikar og magnaðir kleinuhringir svo fátt eitt sé nefnt.

Óskar er alls ekki nýgræðingur þegar það kemur að hamborgaragerð, en hann rak meðal annars hinn geysivinsæla hamborgarastað Murphy´s í Danmörku sem naut mikilla vinsælda þar í landi.

Núna síðast stofnaði hann hamborgarastaðinn Smass á Ægissíðu 123 ásamt Guðmundi Óskari Pálssyni, en Óskar ákvað að renna á önnur mið þar sem að hann gæti fullkomnað sínar hugmyndir um besta smassborgarann í bænum. 

Hugmyndafræði Óskars er einföld þegar það kemur að rekstrinum. Einfaldur matseðill, topp hráefni og gott verð.

Blásið verður til opnunargleði frá næstkomandi fimmtudegi fram yfir helgi, en þá verður hamborgari að eigin vali ásamt gosi og frönskum á 1500 krónur.

Sundabrú er hagkvæmari kostur en jarðgöng fyrir legu Sundabrautar að mati starfshóps á vegum Vegagerðarinnar en Reykjavíkurborg, Faxaflóahafnir og Samtök sveitarfélaga á höfuðborgarsvæðinu áttu einnig fulltrúa í hópnum. Sigurður Ingi Jóhannsson samgöngu- og sveitarstjórnarráðherra fól starfshópnum að meta þessa tvo valkosti og tók við skýrslu hópsins fyrir helgi. Starfshópurinn telur vega þyngst að kostnaður við brúarleið væri lægri, brú henti betur fyrir alla ferðamáta og almenningssamgöngur og að ný Sundabraut á brú bæti samgöngur innan höfuðborgarsvæðisins og til og frá borginni með því að dreifa umferð, minnka álag á öðrum stofnvegum og stytta ferðatíma. 

sjá nánar hérna…..

Hægt er að lesa skýrslunar / kynninguna hérna…..

Rúv greinir frá þessu á vef sínum

Einar Hansberg Árnason sló í gær heimsmet þegar hann lyfti samtals 528.090 kílóum í réttstöðulyftu á einum sólarhring. Heimsmetið tileinkar hann baráttunni fyrir velferð barna.

Einar var lengst af með 60 kíló á stönginni en undir morgun létti hann í 45 kíló. Lyfturnar urðu samtals 9.287. Metið verður sent heimsmetabók Guinnes til staðfestingar sem mesta þyngd sem lyft er á einum sólarhring. Um hádegisbil tók Einar seinustu lyftuna við mikinn fögnuð viðstaddra í Crossfit Reykjavík í Faxafeni. Hann setti markið á að slá fyrra met sem var 521 tonn á einum sólarhring og því bætti hann það um rúmlega 7 tonn.

• Sjá einnig: Metri fyrir hvert barn sem beitt er ofbeldi

Hann segist vera virkilega þakklátur fyrir þann stuðning og undirtektir sem hann hefur fengið, bæði hjá þeim sem studdu hann í verkefninu og frá almenningi.

„Eftir á var þetta bara mjög gaman, en þetta reyndi á vissulega og það voru erfiðir kaflar, eins og klukkan 9 í morgun þá sigldi skipið í strand í smá stund, en við fundum leið í kringum það, ef maður bara setur hægri fótinn fram fyrir þann vinstri og vinstri fram fyrir hægri þá kemst maður ýmislegt,“ segir Einar.

Einar vill með framtakinu vekja fólk til umhugsunar um velferð barna. Fólk þurfi að hlusta á börnin sín og bæta samskipti við þau. Hann segir að þó að afrekið hafi reynt á sé skrokkurinn í góðu ásigkomulagi.

„Ég er fínn, en það er örugglega eitthvað Endorfín sem er að flæða um líkamann, en ég er mjög stífur,“ 

Ætlarðu að taka æfingu á morgun?

„Nei, en ég hugsa að það sé bara af því að konan mín leyfir mér það ekki,“ segir Einar að lokum og hlær.

Andri Freyr sigraði Hafþór Harðarson úr ÍR í úrslitum. Forkeppnin í keilunni hófst í gær þar sem en í dag réðst það hvaða fjórir keilarar kepptu til úrslita í kvöld. Það voru þeir Andri, Hafþór, Adam Pawel Blaszczak úr ÍR og Jón Ingi Ragnarsson úr KFR. Í úrslitunum féll svo einn úr í hverjum leik þar til einn stóð eftir sem sigurvegari. Andri Freyr og Hafþór sem léku til úrslita. Leikurinn var jafn en þreyta var farin að segja til sín í lokaleiknum. Andri Freyr vann að lokum en hann hefur ekki unnið Reykjavíkurmeistaratitilinn í keilu áður.

• Setningarhátíð Lífshlaupsins fór fram í morgun í  Rimaskóla í Grafarvogi. 
• Lilja Alfreðsdóttir, mennta- og menningarmálaráðherra, Dagur B. Eggertsson, borgarstjóri, Líney Rut Halldórsdóttir, framkvæmdarstjóri ÍSÍ og Þóranna Rósa Ólafsdóttir skólastýra ávörpuðu gesti.  
• Jónína Ómarsdóttir, íþróttakennari stjórnaði þrautabraut sem ræðumenn, skólastýra og nemendur tóku þátt í. Blossi lukkudýr ÍSÍ hvatti keppendur áfram og var stemningin gríðarlega góð.

Mikil gleði ríkti í Rimaskóla í morgun þegar Lífshlaupið var ræst í fjórtánda sinn. Þóranna Rósa Ólafsdóttir skólastýra bauð gesti velkomna. Líney Rut Halldórsdóttir, framkvæmdarstýra ÍSÍ ávarpaði svo gesti ásamt þeim Lilju Alfreðsdóttur, mennta- og menningarmálaráðherra og Degi B. Eggertssyni, borgarstjóra. Að lokum kepptu ræðumenn og skólastýra í skemmtilegri þrautabraut ásamt nemendum undir stjórn Jónínu Ómarsdóttur íþróttakennara skólans. Blossi, lukkudýr ÍSÍ mætti á svæðið öllum til mikillar ánægju.

Lífshlaupið er heilsu- og hvatningarverkefni Íþrótta- og Ólympíusambands Íslands sem höfðar til allra landsmanna með það að markmiði að hvetja landsmenn til að gera hreyfingu að föstum lið í lífi sínu, hvort sem er í frítímanum, í vinnunni, í skólanum eða við val á ferðamáta. Lífshlaupið er góður vettvangur fyrir þá sem vilja byrja að hreyfa sig eða eru nú þegar að hreyfa sig reglulega og vilja skrá hreyfinguna markvisst, hafa yfirsýn og setja sér markmið. Auk þess að hvetja til hreyfingar daglega þá skapar verkefnið skemmtilega stemningu á vinnustöðum og í skólum sem keppa sína á milli og innanhúss.

Nýjung í ár er smáforrit Lífshlaupsins sem finna má bæði í App Store og Play Store undir nafninu Lífshlaupið. Í því má skrá alla sína daglegu hreyfingu á afar einfaldan hátt.

Nánari upplýsingar um Lífshlaupið og skráningu gefur Hrönn Guðmundsdóttir, sviðsstjóri Almenningsíþróttasviðs ÍSÍ, á hronn@isi.is, eða í síma: 514-4000.

Vefsíða: https://lifshlaupid.is/