–    Dagskráin  hefst  kl. 10

–    Lögreglan og slökkviliðið í Reykjavík  mun  vera með bíla og mótorhjól til sýnis fyrir börnin

–    Lalli töframaður mun  kíkja í heimsókn og  sýna ýmis  töfrabrögð

–   Afhending reiðhjólahjálma

–   Við verðum með  happdrætti , dregið verður úr hatti –  þar sem  vinningar  verða  m.a.  tvö  reiðhjól, og fleira

Muna að hafa  boðskortið meðferðis, sem jafnframt er  happdrættismiði

–   kaffiveitingar og ís fyrir börnin

–   Áætluð  lok  hátíðar er  um kl. 11 

Sjáumst  hress á laugardaginn  –  enn og aftur  bestu þakkir fyrir veittan stuðning

Kær kveðja

Brynjólfur

f.h. Kiwanisklúbbsins Höfða

Grafarvogi

Starfsfólk umhverfis- og skipulagsviðs í Borgartúni hreinsuðu nærumhverfi sitt í morgun í góðu veðri í tilefni af evrópskri hreinsunarviku 2.-7. maí. Á laugardaginn er sérlegur hreinsunardagur borgarbúa.

Starfsfólkið safnaðist saman á kaffistofum og tók sér poka og hanska í hönd og arkaði á tiltekin svæði. Margar hendur vinna létt verk og á klukkustund höfðu safnast saman margir pokar af almennu rusli. Plast og pappír var algengasta efnið en sígarettustubbar lágu hvarvetna. Sá hvimleiði siður reykingafólks að kasta sígrettum hvert sem er, hefur vaxið stórlega.

Eftir hreinsunarstarfið gekk fólk aftur í hús, hreinsaði hendur sínar og gæddi sér á gómsætum samlokum. Umhverfis- og skipulagssvið Reykjavíkurborgar hvetur aðrar stofnanir og fyrirtæki til að huga að nærumhverfi sínu og efna til hreinsunar.

Hreinsum borgina okkar

„Tökum þátt og látum okkur annt um umhverfið, því borgin er okkar,“ segir Einar Guðmannsson verkefnisstjóri hreinsunarátaksins Hreinsum Reykjavík saman. Í ár er lögð áhersla á að hreinsa opin leiksvæði vel og er takmarkið sé að hreinsa Reykjavík eftir veturinn og gera hana hreina fyrir sumarið. Yfirleitt komi mikið af rusli undan snjónum á vorin. Borgarbúar geta sótt ruslapoka á hverfisstöðvar Reykjavíkurborgar á Njarðargötu, við Jafnasel og Stórhöfða meðan á átakinu stendur.

Til að auðvelda borgarbúum og félagasamtökum verkið hefur skráningarsíða verið sett upp þar sem hægt er að velja sér opin leiksvæði. Þá er fólk hvatt til að senda myndir á facebook síðu átaksins og einnig #hreinsumsaman.

Dagur B. Eggertsson, borgarstjóri, afhenti fulltrúum Korpúlfa viðurkenningarskjal í upphafi vikunnar fyrir öflugt starf félagsmanna við hreinsun Grafarvogshverfis. Gönguhópar Korpúlfa eru góð fyrirmynd í þessum efnum.

Tökum þátt og tínum rusl

Starfsfólk Reykjavíkurborgar verður til staðar laugardaginn 6. maí og mun svo sækja ruslapokana á valda staði sem merktir verða á kortum af hópunum sjálfum eða þeir tilkynntir til borgarinnar á netfangið upplysingar@reykjavik.is eða í síma 411 1111.

Mjög gott veður verður í Reykjavík og um allt land næstu daga.

Á hinu fjölmenna og glæsilega Sumarskákmóti Fjölnis á Barnamenningarhátíð var tilkynnt um hvaða skákmenn væru útnefndir afreksmeistari og æfingameistari skákdeildarinnar á skákæfingum vetrarins sem nú er lokið.

Þetta er árlegur viðburður hjá skákdeildinni. Margir tilnefndir en aðeins tveir útnefndir. Afreksmeistari æfingatímabilið 2016 – 2017 er Arnór Gunnlaugsson 6. bekk Rimaskóla sem tefldi til úrslita á Barnablitz skákmótinu í Hörpunni og fékk borðaverðlaun á Íslandsmóti grunnskólasveita 2017.

Æfingameistari skákdeildarinnar er Ylfa Ýr Welding Hákonardóttir 6. bekk Foldaskóla sem er núverandi Íslandsmeistari stúlkna, 13 ára og yngri. Helgi Árnason formaður skákdeildar Fjölnis afhenti þeim Arnóri og Ylfu Ýr veglega bikara sem Rótarýklúbbur Grafarvogs gaf af þessu tilefni.

Falur Harðarson verður næsti þjálfari meistaraflokks karla í körfuknattleik hjá Fjölni. Skrifað hefur verið undir samning þess efnis sem gildir til ársins 2019.

Falur tekur við keflinu af Hjalta Þ Vilhjálmssyni sem hefur verið þjálfari meistaraflokks karla undanfarin ár.

Það þarf vart að kynna Fal fyrir körfuboltaáhugafólki en hann var í fremstu röð íslenskra leikmanna um árabil með Keflavík og hefur verið þjálfari hjá Keflavík til margra ára.

Á myndinni eru Guðmundur L. Gunnarsson, framkvæmdastjóri Fjölnir, Falur Harðarson nýráðinn þjálfari meistaraflokks karla og Guðlaug Björk Karlsdóttir, formaður körfuknattleiksdeildar Fjölnis.

Korpúlfar, samtök eldri borgara í Grafarvogi, stóðu nýlega fyrir hreinsunarátaki í hverfinu sínu og tóku um 30 Korpúlfar til hendinni og söfnuðu um 250 kg af rusli víða um hverfið.

Messa í Grafarvogskirkju kl. 11:00. Séra Arna Ýrr Sigurðardóttir prédikar og þjónar fyrir altari. Kór Grafarvogskirkju syngur og organisti er Hákon Leifsson. Sunnudagaskóli á neðri hæð kirkjunnar kl. 11:00. Umsjón hefur Þóra Björg Sigurðardóttir og undirleikari er Stefán Birkisson.

Selmessa í Kirkjuselinu kl. 13:00. Séra Guðrún Karls Helgudóttir prédikar og þjónar fyrir altari. Vox Populi syngur og organisti er Hilmar Örn Agnarsson. Þetta er síðasta Selmessan í Kirkjuselinu fyrir sumarfrí.

Eflir íþróttaiðkun í Grafarvogi      

·       Nýbyggingin rúmar tvo handbolta- og körfuboltavelli

·       Reykjavíkurborg leigir meirihluta tíma fyrir íþróttastarf Fjölnis og annarra félaga

·       Afreksíþróttabraut Borgarholtsskóla fær aðstöðu

·       Reginn og Fjölnir sameinast um rekstrarfélag til að efla íþróttir í Egilshöll

Í dag var tekin fyrsta skóflustunga að nýju alhliða íþróttahúsi  við Egilshöll.  Dagur B. Eggertsson, borgarstjóri, Helgi S. Gunnarsson, forstjóri Regins, Sunna Hrönn Sigmarsdóttir, framkvæmdastjóri Egilshallar og Jón Karl Ólafsson, formaður Fjölnis  ásamt fulltrúum og íþróttafólki frá Fjölni tóku skóflustunguna.

Með hinu nýja alhliða íþróttahúsi, sem verður 2.500 fermetrar að stærð, er verið að bæta og efla valkosti til íþróttaiðkunar í Egilshöll og efla hið fjölbreytta starf Fjölnis og annarra íþróttafélaga. Gert er ráð fyrir að nýbyggingin verði tekin í notkun í byrjun næsta árs.  

Stórt skref fyrir framtíð Fjölnis

Húsið rúmar tvo handbolta- og körfuboltavelli en þar fá körfuknattleiks- og handboltadeildir æfinga- og keppnisaðstöðu, Borgarholtsskóli fær aðstöðu fyrir afreksíþróttabraut ásamt öðru íþróttastarfi.

Fjölnir er þegar með fimleikahús, karateaðstöðu, knatthús og   fótboltavelli utanhúss  ásamt skrifstofu- og félagsaðstöðu. Að mati forsvarsmanna Fjölnis er verið að stíga stórt skref í framtíðaruppbyggingu félagsins í Egilshöll með hinu nýja húsi. Reykjavíkurborg leigir meirihluta tíma í hina nýja húsi fyrir fjölbreytt íþróttastarf Fjölnis og fleiri félaga.  

Sameiginlegt rekstrarfélag tryggi afkomu hússins

Kostnaðaráætlun byggingarinnar nemur um 780 milljónum króna. Reginn byggir íþróttahúsið og mun einnig sjá um rekstur þess. Félagið mun afla hluta nauðsynlegra leigutekna vegna fjárfestingarinnar frá þriðja aðila.  Arkitekt hússins eru Alark arkitektar og verkfræðihönnun og verkefnisstjórn annaðist Verkís hf.

Reginn og Fjölnir hafa sammælst um stofnun rekstrarfélags með það að markmiði að tryggja afkomu hins nýja íþróttahúss. Hluta tekna verður varið til að efla almenna íþróttastarfsemi í Egilshöll og starfsemi Fjölnis. Ennfremur verður Fjölnir gerður sýnilegri í húsinu með tilfærslu á skrifstofu og félagsaðstöðu félagsins í anddyri Egilshallar.  

Íþróttir, afþreying, skemmtun og heilsuefling

Á síðasta ári heimsóttu 1,2 milljón manns Egilshöll, en það gera 3.300 manns á dag að meðaltali. Sunna Hrönn Sigmarsdóttir, framkvæmdastjóri Egilshallar segir að húsið sé gott dæmi um vel heppnað samstarfsverkefni sveitarfélags og einkaaðila. Í Egilshöll hefur á liðnum árum verið að þróast gríðarlega öflug starfsemi á sviði  Íþrótta, afþreyingar, skemmtunar og heilsueflingar.

Nánari upplýsingar veita:

·       Sunna Hrönn Sigmarsdóttir, framkvæmdastjóri Egilshallar, sími 8246386

·       Guðmundur L. Gunnarsson, framkvæmdastjóri Fjölnis, sími 852 3010

Yfirskrift morgunverðarfundar Náum áttum er að þessu sinni Hvernig líður börnum í íþróttum?

Flutt verða nokkur erindi: Líðan barna í íþróttum sem Margrét Guðmundsdóttir, aðjúnkt íþróttafræðasviðs Háskólans í Reykjavík og sérfræðingur hjá Rannsóknum og greiningu flytur, Samfélagslegt hlutverk íþrótta sem Sveinn Þorgeirsson, aðjúnkt íþróttafræðasviðs Háskólans í Reykjavík og yfirmaður afrekssviðs Borgarholtsskóla flytur.

Sýnum karakter – markmið og áherslur  sem þær Sabína Steinunn Halldórsdóttir, starfsmaður UMFÍ og Ragnhildur Skúladóttir, starfsmaður ÍSÍ flytja.

SJÁ AUGLÝSING
„Sýnum karakter“ er átaksverkefni íþróttahreyfingarinnar um þjálfun sálrænnar og félagslegrar færni barna og ungmenna í íþróttum.
Fundarstjóri verður Karitas H. Gunnarsdóttir skrifstofustjóri íþrótta- æskulýðs- og menningarmála mennta- og menningarmálaráðuneytisins.

Reykjavíkurborg sér um hreinsun á götum og gönguleiðum. Megináherslan er hreinsun gatna og gönguleiða á vorin og fram á sumar.

Hvenær eru götur og gönguleiðir hreinsaðar?

Megináherslan í hreinsun gatna og gönguleiða er á vorin og fram á sumar. Einnig er farin yfirferð að hausti til að viðhalda góðu ástandi og þá er sérstök áætlun um hreinsun miðborgarinnar. Upplýsingar um þessi verkefni eru hér neðar á síðunni.  Á veturna tekur við snjóhreinsun og er sérstök upplýsingasíða um hana.

Hreinsun að vori

Vorhreinsun fer fram í öllum hverfum þegar svæði koma skítug undan snjó. Húsagötur, stofnbrautir, tengi- og safngötur og gönguleiðir eru sópaðar.  Dreifibréf eru send til íbúa og merkingar settar upp áður en húsagötur eru sópaðar og þvegnar. Íbúar eru beðnir um að færa bíla sína af almennum svæðum í götunni til að auðvelda þrifin. Einungis er þrifið á borgarlandi en ekki er farið inn fyrir lóðamörk.

Forgangsröð í vorhreinsun

Hreinsun í borginni miðar við eftirfarandi forgangsröð vorið 2017:

• Helstu göngu- og hjólastígar – stofnbrautir og tengibrautir gatna og stígar í kringum þær (frá viku 12, sem er 19.-25. mars)
• Húsagötur og stéttir og stígar við þær (frá viku 14 sem er 2. – 8. apríl).

Smella á mynd til að fá sem pdf-skrá.

og vikutalið er eftirfarandi:

• Vika 12 er 19. – 25. mars
• Vika 13 er 26. mars – 1. apríl
• Vika 14 er 2.- 8. apríl
• Vika 15 er 9 – 15. apríl
• Vika 16 er 16. – 22. apríl
• Vika 17 er 23. – 29. apríl
• Vika 18 er 30. apríl – 6. maí
• o.s.frv.

Kort yfir forgang í vorhreinsun 2017:

• Forgangur vorhreinsunar 2017 – kort af allri borginni    
• Forgangur vorhreinsunar 2017 – kort af Árbæ, Breiðholti og Grafarholti  
• Forgangur vorhreinsunar 2017 – kort af Grafarvogi
• Forgangur vorhreinsunar 2017 – kort af vesturhluta borgarinnar  

Hreinsun að hausti

Að hausti fer fram ein umferð af sópun á götum og gönguleiðum til að viðhalda góðu ástandi eftir að laufblöð eru byrjuð að falla.

Hvenær er miðbærinn þrifinn?

Á tímabilinu 15. apríl – 15. nóvember er miðbærinn hreinsaður fimm sinnum í viku að morgni frá kl. 4.00 til 8.00  virka daga og frá kl. 6.00 til 9.00 um helgar. Miðbærinn er sápuþveginn að meðaltali aðra hverja viku og tjarnarbakkinn er hreinsaður vikulega. Stampar eru á fjölförnustu stöðunum tæmdir daglega.  Skoða mynd af miðbæjarþrifum sem pdf-skrá.

Hvaða búnaður er notaður?

Til verksins eru notuð sérútbúin vélknúin tæki:

• 2 götusópar með háþrýstisugu,
• 4 götusópar,
• 6 gangstéttasópar,
• 2 dagsópar,
• 4 sugur,
• 4 stórir vatnsbílar,
• 2 litlir vatnsbílar,
• 1 stampalosunarbíll.

Fyrirspurnir og/eða ábendingar

Þjónustumiðstöð borgarlandsins hefur umsjón með hreinsun gatna og gönguleiða.

Við viljum gjarnan fá ábendingar um það sem betur má fara. Þú getur sett inn ábendingu og upplýsingar í ábendingakerfið okkar >>> SETJA INN ÁBENDINGU <<< eða hringt í þjónustuver Reykjavíkurborgar, Borgartúni 12 – 14, í síma 4 11 11 11. Starfsmenn þar færa þá ábendingu inn í kerfið. Opið kl. 8.20 – 16.15 alla virka daga. Netfang: upplysingar@reykjavik.is.