Nemendur Rimaskóla gefa ekkert eftir þegar Íslandsmót skáksveita eru annars vegar. Um helgina fór fram afar spennandi Íslandsmót grunnskóla, 1. – 10. bekkur. Snemma varð ljóst að keppni 30 skáksveita yrði afar jöfn og spennandi. Helstu keppinautar Rimaskóla fyrirfram, skáksveit Álfhólsskóla í Kópavogi, tefldi við Rimaskóla í 1. umferð og unnu Kópavogsbúarnir 3-1. Eftir það gáfu Rimaskólakrakkar ekkert eftir og unnu hinar 8 viðureignirnar örugglega á meðan aðrir skólar voru að missa niður vinninga. Fyrir síðustu umferð voru Rimaskóli og Álfhólsskóli hnífjafnir en Rimaskóla gekk betur í lokaumferð. Þetta var fimmta árið í röð sem Rimaskóli vinnur þetta sterkasta grunnskólaskákmót landsins og á þeim tíma hefur skáksveitin algjörlega endurnýjast. Rimaskóli sendi líka B og C sveitir á mótið og varð C sveitin unga langefst í sínum flokki.Skáksveit Rimaskóla hefur með sigrinum tryggt sér sæti á Norðurlandamóti grunnskóla sem haldið verður í Danmörku í september. Rimaskóli hefur sex sinnum orðið Norðurlandameistari, oftar en nokkur annar skóli á Norðurlöndum. (HÁ)

Hagkaup opnar í dag glæsilega verslun F&F í Hagkup Spönginni.

Frábært úrval af gæða fatnaði.

Kíkið við.

Frá Grafarvogsdeginum 2014

Grafarvogsdagurinn verður haldinn hátíðlegur í 18. sinn og fer hann að þessu sinni fram laugardaginn 30. maí. Vefurinn Grafarvogsbúar.is hitti Guðmund Pálsson, verkefnastjóra dagsins, og ræddi við hann um verkefnið.

Menning og mannauður í forgrunni

„Markmið dagsins er fyrst og fremst að sameina íbúa hverfisins og skapa þeim tækifæri og vettvang til að hittast og skemmta sér og öðrum“ segir Guðmundur. „Hér í hverfinu er öflugt félags- og menningarstarf og Grafarvogsdagurinn er frábært tækifæri til að draga fram þann mikla mannauð sem í því starfi býr. Það verður því stór þáttur í mínu starfi að ná sambandi og tengslum við fólk og félög og fá þau til samstarfs og skapa vettvang fyrir þá aðila til að láta ljós sitt skína“ bætir Guðmundur við.

Öflug aðkoma fyrirtækja og stofnanana

Guðmundur glaðbeittur með skátagítarinn

Að sögn Guðmundar hafa fyrirtæki og stofnanir lagt deginum lið í gegnum tíðina með margvíslegum hætti. „Starfsemi fyrirtækja og stofnana hér í hverfinu er að sjálfsögðu hluti af samfélaginu sem hér blómstrar og því mikilvægt að þessir aðilar taki einnig virkan þátt í hátíðarhöldunum. Stuðningur við einstök dagskráratriði, kynning á starfsemi, vörum og þjónustu eru allt mögulegar leiðir fyrir fyrirtæki og stofnanir til að hafa virka og beina aðkomu. Ég vona að okkur takist að eiga öflugt samstarf við alla þessa aðila og að þeir nálgist verkefnið þannig að þetta sé sameiginlegur vettvangur sem búa og starfa í hverfinu“ segir Guðmundur.

Fréttir af undirbúningi

„Ég tók þetta verkefni að mér fyrir nokkrum dögum síðan og hef notað tímann vel til að kynna mér hvernig þetta hefur farið fram á undanförnum árum. Næstu skref eru svo að hafa samband við félög, fyrirtæki og stofnanir og leita samstarfs“ segir Guðmundur og bætir við að hann sé bjartsýnn og að mikill áhugi sé hjá þeim sem hann hefur þegar verið í sambandi við.

Útfærslan í mótun

„Nákvæm útfærsla á dagskrá liggur ekki fyrir en hún skýrist betur þegar fyrir liggja nánari upplýsingar um aðkomu aðila að verkefninu. Ég sé þó fyrir mér að með því að virkja sem flesta til þátttöku náum við að bjóða upp á fjölbreytta dagskrá á fjölmörgum stöðum í Grafarvoginum og að fólk verði á faraldsfæti og líti við sem víðast“. Guðmundir nefnir að dagurinn muni svo að líkindum ná hápunkti með sameiginlegri dagskrá við Spöngina.

Hver er maðurinn?

„Ég hef fjölbreyttan bakgrunn í margvíslegri verkefna- og viðburðarstjórnun og hef verið virkur í skátastarfinu alla tíð og sæki þangað mest af minni reynslu af undirbúningi og skipulagningu viðburða af þessu tagi“. Guðmundur leggur stund á meistaranám í hagnýtri menningarmiðlun við Háskóla Íslands. „Það má segja að þetta verkefni falli eins og flís við rass við þau viðfangsefni sem ég er að takast á við í náminu sem snýst að stórum hluta um miðlun menningar með margvíslegum hætti og í sínu víðasta samhengi“ segir Guðmundur að lokum.

Áhugasamir hafi samband sem fyrst!

„Ég hvet alla þá sem hafa áhuga á að taka þátt í deginum með einhverskonar dagskrá, kynningu, opnu húsi eða samstarfi og stuðningi af hvaða tagi sem er, að hafa samband sem allra fyrst. Best er að senda mér línu á netfangið gudmundur.palsson@reykjavik.is eða slá á þráðinn í síma 692 6733“ segir Guðmundur og stekkur af stað enda í mörg horn að líta í þessu viðamikla verkefni.

/Baldvin Örn Berndsen

Í menningarstefnu Reykjavíkurborgar gegna börn og menningaruppeldi mikilvægu hlutverki. Þar er lögð áhersla á að menning og listir séu snar þáttur í uppeldi og kennslu barna og ungmenna í borginni. Ekki síður er lögð áhersla á þátttöku barna, ungmenna og fjölskyldna í menningarlífinu og að framlag þeirra til menningar sé metið að verðleikum.

Á Barnamenningarhátíð í Reykjavík má upplifa þessi markmið í verki. Þessi skemmtilega hátíð er nú haldin í fimmta sinn og hefst hún þriðjudaginn 21. apríl og stendur til sunnudagsins 26. apríl.

Í þessari viku fá öll börn í leikskólum og grunnskólum Reykjavíkur sendan heim bækling með upplýsingum og dagskrá hátíðarinnar. Um 120 viðburðir verða á hátíðinni í ár og fara þeir fram víðsvegar um Reykjavík. Gæði, fjölbreytni, jafnræði og gott aðgengi eru höfð að leiðarljósi við skipulagningu hátíðarinnar sem rúmar allar listgreinar. Allir viðburðir á Barnamenningahátíð eru ókeypis.

Hátíðin er fyrir börn og unglinga allt frá tveggja ára til 16 ára. Það eru því fjölbreyttir viðburðir í boði sem höfða til ólíkra hópa á þessu aldursbili.

Á Barnamenningarhátíð gefst kærkomið tækifæri fyrir börn og foreldra að njóta samveru og skemmtunar. Hægt er að kynna sér nánar dagskrá hátíðarinnar á www.barnamenningarhatid.is Gleðilega Barnamenningarhátíð!

F.h. stjórnar Barnamenningarhátíðar í Reykjavík og skipuleggjenda hátíðarinnar á Höfuðborgarstofu í náinni samvinnu við skóla- og frístundasvið.

Signý Pálsdóttir,

skrifstofustjóri menningarmála á Menningar- og ferðamálasviði.

Fjölnir tryggði sér í kvöld réttinn til að leika um sæti í Olís-deild karla í handknattleik þegar að liðið lagði Selfoss að velli, 24-23, í sannkölluðum háspennuleik í Dalhúsum í Grafarvogi. Stemningin á leiknum var engu lík, troðfullt hús en 700 áhorfendur fylgdust með leiknum sem er met í Dalhúsum.

Kristján Örn Kristjánsson tryggði Fjölni sigurinn með marki ellefu sekúndum fyrir leikslok og ætlaði allt um koll að keyra. Selfyssingar brunuðu í sókn en leiktíminn fjaraði út og Fjölnismenn fögnuðu innilega í leiksok.

Fjölnir var yfir í hálfleik, 13-12, en í síðari hálfleik var leikurinn mjög sveiflukenndur og náðu Selfyssingar um tíma þriggja marka forystu. Fjölnismenn vöknuðu á ný til lífsins, jöfnuðu, og allt til loka var leikurinn í járnum en Fjölnir var sterkara á lokasprettinum. Jafnt var 23-23, þegar innan við mínúta var eftir en markið frá Kristjáni Erni í lokin gerði gæfumuninn.

Fjölnir mætir Víkingi í úrslitarimmu um sæti í Olís-deildinni á næstu leiktíð. Fyrsta viðureign liðanna verður í Víkinni á mánudaginn 20 apríl klukkan 19.30. Annar leikurinn verður fimmtudaginn 23. apríl, sumardaginn fyrsta, í Dalhúsum klukkan 16. Það lið sem verður fyrr til að vinna tvo leiki tryggir sér keppnisrétt í Olís-deildinni.

Video myndir frá leiknum sem sýna vel spennuna og skemmtunina.

[su_youtube url=“https://youtu.be/mmkJyN_iB2A“]

[su_youtube url=“https://youtu.be/O6wUsu9LWDA“]

[su_youtube url=“https://youtu.be/-dVbQTZjcN4″]

[su_youtube url=“https://youtu.be/_2xT5AOTjyU“]

Kæru Fjölnismenn.

Ég vona að það hafi ekki farið framhjá neinum að í kvöld fer fram mikilvægasti handboltaleikur Fjölnis frá upphafi. Þetta er oddaleikur í umspili gegn Selfyssingum og sigurvegararnir í þessari viðureign mæta Víkingum í úrslitum um laust sæti í Olísdeildinni. Liðið hefur fengið frábæran stuðning í síðustu tveimur leikjum og stúkan verið þétt. Nú ætlum við hins vegar að gera heiðarlega tilraun til að sameina Grafarvoginn og troðfylla Dalhúsin okkar.
Við þurfum á þínum stuðningi að halda til að ætlunarverkið náist. Að venju er flott sjoppa á staðnum, Domino’s pizzur til sölu, Domino’s skotið í hálfleik og svo frábær skemmtun í sjálfum handboltaleiknum og sérstaklega þegar húsið er smekkfullt og stuðningurinn í hámarki.

Leikurinn hefst kl. 19:30 og við viljum gjarnan sjá ykkur öll í stúkunni að hvetja snillingana áfram.
Það kostar 1000 krónur fyrir fullorðna og frítt fyrir 16 ára og yngri.
Mætum öll gul og glöð og tökum öll undir:

Við syngjum áfram – áfram Fjölnir!

Fyrir hönd handknattleiksdeildar Fjölnis,
Ingvar Örn Ákason