Margir íbúar Grafarvogs hafa undanfarið kvartað undan vondri lykt sem kemur frá Gufunesinu.
Ýmsar getgátur hafa verið á lofti um upptökin, en eins og má lesa á MBL.is telja menn sig hafa fundið upptökin.
Vonandi tekst að hreinsa þetta þannig að fólk verði sátt.
Þriðjudaginn 22. ágúst verða grunnskólar borgarinnar settir og hefja þá hátt í fimmtán þúsund börn skólastarf.
Rösklega 1.350 börn hefja nám í 1. bekk grunnskólanna á þessu hausti en alls verða nemendur í borgarreknu skólunum um 14.000 á skólaárinu 2017-2018. Nemendur í sjö sjálfstætt reknum grunnskólum eru tæplega sjö hundruð.
Nánari upplýsingar um tímasetningu skólasetninga hjá einstökum skólum eru á heimasíðum þeirra.
Í upphafi skólaárs má jafnframt minna ökumenn á að sýna aðgát í umferðinni þegar ungum vegfarendum fjölgar á ferð í og úr skólanum.
Opið er fyrir skráningu í fimleika á haustönn 2017.
Nýtt fyrirkomulag hefur verið tekið í notkun fyrir börn á aldrinum 2-7 ára, hægt er að skrá þau í fimleikahópa í gegnum heimasíðu félagsins. Boðið er upp á mismunandi æfingatíma og geta foreldrar valið hversu oft í viku barnið stundar fimleikaæfingar.
Sama fyrirkomulag og undanfarin ár gildir fyrir börn 8 ára og eldri, þau þurfa að skrá sig á biðlista hjá deildinni.
UPPLÝSINGAR UM STARF HAUSTANANR MÁ NÁLGAST HÉR: http://www.fjolnir.is/fimleikar/frettir-fimleikadeild/haustonn-2017#.WZLboMlpzZ0
SKRÁNING Í FIMLEIKA/BIÐLISTA FER FRAM HÉR: https://fjolnir.felog.is/
Með bestu kveðju,
Halla Karí Hjaltested
Framkvæmdastjóri Fimleikadeildar Fjölnis
Fyrir 18 ára og eldri Fjölnis stráka og stelpur sem vantar vinnu með skóla (t.d. framhalds eða háskóla) í vetur þá eru laus störf hjá frístundaheimilunum í Grafarvogi.
Vinna með 6-9 ára krökkum eftir hádegið, hægt er að vinna frá einum upp í fimm daga í viku. Hvet alla áhugasama að sækja sem fyrst um, vinsælustu störfin eru í Grafarvogi og klárast oftast fyrst að ráða þau! Fyrir aðra áhugasama þá eru þetta líka frábær hlutastörf fyrir fólk á öllum aldri, mjög gefandi og skemmtileg.
Frábært að á frístundaheimilunum sé sem mest af Fjölnis íþróttafólki, það tengir börnin við íþróttir og þau fá góðar fyrirmyndir! 
Forskráningu í Reykjavíkurmaraþon Íslandsbanka á rmi.is lýkur kl. 13:00 á morgun, fimmtudaginn, 17. ágúst. Þeir sem ætla sér að taka þátt eru hvattir til að skrá sig fyrir þann tíma þar sem að þátttökugjöld hækka eftir að forskráningu lýkur.
Reykjavíkurmaraþon Íslandsbanka fer fram í 34. sinn á laugardaginn 19.ágúst n.k. Rúmlega 11.300 manns eru þegar skráðir til þátttöku í hlaupið og safnar stór hluti þeirra til góðra málefna á vefnum hlaupastyrkur.is. Skráning og áheitasöfnun gengur vel og er töluvert meiri en á sama tíma í fyrra.
Kveðja
f.h. Reykjavíkurmaraþons Íslandsbanka
Anna Lilja Sigurðardóttir
Nú í haust stækka skólahljómsveitirnar í Reykjavík, en þeim verður heimilt að taka inn 130 nemendur í stað 120. Samtals geta því 520 nemendur verið í skólahljómsveitum í Reykjavík.
Hækkun framlaga til skólahljómsveita voru samþykkt á fundi skóla- og frístundaráðs nú í vikunni. Með henni er komið til móts við óskir stjórnenda sveitanna um að kjörstærð skólahljómsveitanna sé 130-140 börn. Hækkun framlags mun einnig nýtast þeim nemendum sem þurfa sérstakan stuðning í hljómsveitarstarfinu.
Reykjavíkurborg rekur fjórar skólahljómsveitir; Skólahljómsveit Austurbæjar, Skólahljómsveit Vesturbæjar og Miðbæjar, Skólahljómsveit Árbæjar og Breiðholts og Skólahljómsveit Grafarvogs.
Nemendur fá einkakennslu á hljóðfæri á grundvelli aðalnámskrár tónlistarskóla og skylda er að taka þátt í hljómsveitaræfingum og starfi hljómsveitanna.
Fyrir ári síðan, haustið 2016, var heimilt að hafa alls 441 nemanda í skólahljómsveitum borgarinnar en 1. janúar 2017 var fjölgað í sveitunum og heimild hækkuð í 480 nemendur eða 120 nemendur í hverri sveit., Með samþykkt ráðsins nú fjölgar nemendum í 130 í hverri sveit eins og áður segir.
Almennt er mikil ánægja hjá foreldrum með starf skólahljómsveitanna. Kostnaðarþátttöku foreldra er markvisst haldið í lágmarki og felst annars vegar í gjöldum sem falla undir ráðstöfun frístundakorts og hins vegar hljóðfæraleigu fyrir þá sem þurfa. Gjöldin vegna 2016-2017 voru 27.350 kr. og hljóðfæragjald 8.300 kr.
Í vinnu með starfsmönnum hljómsveitanna í vor kom fram sterk ósk um geta sett saman smærri samspilshópa samhliða hinu sterka hljómsveitarstarfi. Slíkt myndi styrkja nemendur sem tónlistarmenn og þjálfa þá í að nýta möguleikana sem ýmsar hljóðfærasamsetningar bjóða upp á. Settir verðar fjármunir til að gera tilraunir í þessa átt og fylgt eftir hvernig það nýtist og reynist.
Nánari upplýsingar veitir Sigfríður Björnsdóttir deildarstjóri
listfræðslu skóla- og frístundasviðs Reykjavíkur, sími 6648491.
Næstkomandi sunnudag verður kertamessa kl. 11:00 í Grafarvogskirkju.
Séra Sigurður Grétar Helgason þjónar.
Organisti er Hákon Leifsson og forsöngvari leiðir söng.
Sumarið er tími kaffihúsaguðsþjónustunnar í Grafarvogskirkju. Andrúmsloftið er afslappað og fólk getur setið við borð með kaffiveitingum á meðan guðsþjónustan fer fram.
Sunnudaginn 6. ágúst verður kaffihúsaguðsþjónusta í Grafarvogskirkju kl. 11.00.
Sr. Grétar Halldór Gunnarsson prédikar, Hákon Leifsson leikur á píanó og Þórdís Sævarsdóttir er forsöngvari.
Vertu velkominn og láttu fara vel um þig!
Rey Cup – Alþjóðlega knattspyrnuhátíðin verður haldin í Laugardalnum frá 26. til 30. júlí 2017. 
Stjórn Rey Cup þakkar þeim liðum sem hafa skráð sig og við hlökkum til að sjá ykkur öll í lok júlí.
94 lið
9 erlend lið
1500 keppendur
282 leikir
Á Rey Cup hafa margir af okkar bestu knattspyrnumönnum og konum spilað í fyrsta sinn gegn erlendum andstæðingum. Aldursbil þátttakenda á Rey Cup er 13-16 ára og er þetta langstærsta knattspyrnumót landsins, fyrir þennan aldur, þar sem um eða yfir 1.500 unglingar koma saman, spila fótbolta og skemmta sér frá miðvikudegi til sunnudags.
Í gegnum árin hafa yfir 50 erlend lið frá ýmsum löndum tekið þátt sem gefur mótinu enn meira vægi fyrir íslensku liðin.
Á Rey Cup 2017 eru 9 erlend lið skráð til leiks. Auk liða víðsvegar úr Evrópu verður lið frá Síle, Suður-Ameríku í fyrsta skipti með.
