Sr. Arna Ýrr Sigurðardóttir þjónar, félagar úr kór kirkjunnar leiða söng undir stjórn organista.
Ísland leikur seinasta leik sinn í riðlakeppni EM í Frakklandi í dag en það eru Austurríkismenn sem eru mótherjar Íslands í leiknum.
Það er ljóst að sigur í leiknum fleytir íslenska liðinu áfram í 16-liða úrslit en eitt stig gæti einnig gert það eins lengi og úrslit í öðrum riðlum eru okkur hagstæð.
Allir leikmenn eru til í slaginn fyrir utan Alfreð Finnbogason en hann er í leikbanni eftir að fá tvö gul spjöld.
Leikurinn hefst klukkan 16:00 að íslenskum tíma (18:00 að frönskum tíma) og er leikið á Stade de France í París.
Fjölmörg fyrirtæki á Íslandi taka þátt í fjörinu og gefa starfsfólki tækifæri á að horfa á leikinn, mörg hver loka fyrr og önnur eru með leikinn á skjá hjá sér.
Áfram Ísland
Malbikunarframkvæmdir 21.júníSamkvæmt tilkynningu frá Reykjavíkurborg verða malbikunarframkvæmdir við Kringluna þriðjudaginn 21.júní með tilheyrandi lokunum gatna.
Hér er orðrétt tilkynning frá borginni. EF VEÐUR LEYFIR mun Malbikunarstöðin Höfði hf. vinna við malbikun á Kringlunni, frá Listabraut að Kringlu nr. 41.
Byrjað verður um klukkan 9 eða þegar veður leyfir og unnið fram eftir degi.
Götukaflinn verður lokaður fyrir alla umferð á meðan framkvæmdum stendur.
Meðfylgjandi er teikning af áætlaðri lokun á þessum kafla. Smelltu hér til að skoða teikninguna.
Með fyrirfram þökkum fyrir skilninginn Zophanías Þ. Sigurðarsson Tæknistjóri Rekstrarfélags Kringlunnar.
Í kvöld, mánudaginn 20. júní, verður farið í sólstöðugöngu í Viðey þá sjöttu í röð, en slíkar göngur hafa tíðkast í Reykjavík frá árinu 1985. Gengið verður um fallegar slóðir á vesturhluta Viðeyjar og staldrað við á nokkrum stöðum til þess að hlýða á erindi leiðsögumanna kvöldsins. Þór Jakobsson veðurfræðingur mun segja frá sólstöðum, sólstöðumínútunni, hátíðum og hefðum í tengslum við sólstöður. Sævar Helgi Bragason formaður Stjörnuskoðunarfélags Seltjarnarness verður með áhugavert erindi í fjöruborðinu í Viðey.
Venju samkvæmt verður slegið upp varðeldi og sungið saman undir harmónikkuspili. Gönguleiðin er hæfileg en mælt er með góðum skóm, skjólgóðum jakka og smá nesti.
Siglt verður frá Skarfabakka kl. 20:30 og siglt til baka kl. 23:00. Gjald í ferjuna fram og til baka er 1.200 kr. fyrir fullorðna, 1000 kr. fyrir eldri borgara og 600 kr. fyrir börn 7–15 ára í fylgd fullorðinna. Börn 6 ára og yngri sigla frítt.
Minnt er á að handhafar Menningarkorts Reykjavíkur fá 10% afslátt í Viðeyjarferjuna og handhafar Gestakortsins sigla frítt.
Í tilkynningu frá Veitum kemur fram að vegna viðgerðar á stofnlögn á heitu vatni í Foldahverfi verður vatnslaust í Hamrahverfi og hluta Foldahverfis frá kl 09:00 til 16:00 á morgun, mánudaginn 20.júní. (sjá kort).
Fjölnismenn eru komnir í toppsætið í Pepsídeild karla í knattspyrnu eftir frábæran sigur á KR, 3-1, á Extravellinum í kvöld. Fjölnir verður í efsta sætinu að minnsta kosti í einn sólarhring en FH á leik inni gegn Val á morgun og getur með sigri skotist í efsta sætið að nýju.
KR-ingar byrjuðu betur í leiknum í Grafarvogi í kvöld þegar Michael Præst kom vesturbæjarliðinu yfir. Mínútu fyrir lok fyrri hálfleiks jafnaði Martin Lund Pedersen fyrir Fjölni.
Fjölnismenn voru hættulegri eftir sem á síðari hálfleikinn leið og komust yfir á 53. mínútu með marki frá Gunnari Má Guðmundssyni. Það var síðan Marcus Solberg sem innsiglaði sigur Fjölnis með glæsilegu skallamarki á 72. mínútu.
Byrjun Fjölnismanna er frábær í deildinni og virðist liðið hafa alla burði til að vera í toppbaráttunni í sumar.
Sjá fleiri myndir hérna….
Einstaklingskeppni WOW Cyclothon hófst klukkan 17 í gær, þegar sjö hjólreiðamenn lögðu af stað í hring um landið frá Egilshöll.
Þá lögðu fimmtán lið frá samtökunum Hjólakrafti af stað klukkan 18. Í liðum Hjólakrafts eru hátt í 100 börn ásamt foreldrum og fylgdarmönnum en nær allir hjálpast að við að hjóla kílómetrana 1.358.
Í dag miðvikudag munu aðrir keppendur í WOW Cyclothon leggja af stað. A-flokkur, með fjórum hjólreiðamönnum og tveimur aðstoðarmönnum, kl. 17.00 og B-flokkur, með 10 liðsmönnum, kl. 18.00.
Hægt er að skoða myndir frá Egilshöll hérna…. og verður bætt við myndum eftir startið í kvöld.
Óskum öllum góðs gengis.
Þegar starfsfólk og börn komu í leikskólann 14. júní þá blasti við okkur miklar skemmdir sem unnar höfðu verið á sumarblómunum í fallega garðinum okkar. Pottar og blóm brotin og mold út um allt. Þótti okkur þetta mjög leiðinlegt því við í Brekkuborg leggjum áherslu á virðingu við umhverfi og náttúru.
Hvert vor eru gróðursett fjöldin allur af sumarblómum sem þau hafa lagt mikla natni við að sá fyrir og rækta. Börnin rækta líka kartöflur og grænmeti. Er þetta stór partur af fræðslu sumarsins.
Við viljum endilega að garðurinn okkar sé nýttur eftir leikskólatíma og fólk njóti þess að koma í fallega garðinn okkar með börn og að börnin í hverfinu sæki í hann. En við viljum biðja fólk að sýna garðinum sömu virðingu og við kennum börnunum í Brekkuborg.
Kveðja börn og starfsfólk í Brekkuborg
Follow