Íslandsmót barnaskólasveita í skák 2015 var haldið í Rimaskóla helgina 25. -26. apríl. Metþátttaka var á mótinu, 48 skáksveitir og 5 þeirra frá Rimaskóla, A – E sveitir .

Miðað við frábæra frammistöðu helgina áður þegar Rimaskóli vann Íslandsmeistaratitil grunnskólasveita fimmta árið í röð var A sveit skólans talin ein af líklegustu skáksveitum til sigurs. Þriðja sætið varð að nægja að þessu sinni og bronsverðlaun mótisns. Skáksveit Hörðuvallaskóla í Kópavogi vann mótið og sinn fyrsta Íslandsmeistaratitil.

Nansý Davíðsdóttir leddi A sveitina og fékk hæsta vinningsskor á 1. borði sem er frábær árangur. C sveitin, áhugasamir drengir í 4. bekk, stóð sig eiginlega best og vann flokk C liða og Íslandsmeistaratitill skáksveita í 4. bekk og yngri. Fimm áhugasamir strákar sem eiga framtíðna fyrir sér á skólamótum skipa þessa sveit. Önnur 4. bekkjar sveit, E sveit Rimaskóla, vann flokk E liða og var þetta í fyrsta sinn sem flestir þeirra taka þátt í Íslandsmóti.

B sveit skólans var líka mjög sterk og náði bestum árangri B sveita ásamt B sveit Álfhólsskóla. Aðeins D sveitin lenti ekki upp á verðlaunapalli allra þessar 5 sveita Rimaskóla. D sveitin varð í 2. sæti. Öll þessi frábæra frammistaða Rimaskólakrakka þýddi það að bikurum og verðlaunapeningum rigndi yfir nemendur skólans, tveir bikarar og 25 verðlaunapeningar. Framtíðin er aldeilis björt í skáklistinni í Rimaskóla og ljóst að skólinn verður afreksskóli í skák annan áratug.

Þegar farfuglarnir okkar flykkjast heim til Íslands er vorið komið og sumarið á næsta leiti. Laugardaginn 25. apríl munu þeir Gunnar Þór Hallgrímsson, dósent við Líf- og umhverfisvísindadeild Háskóla Íslands, og Tómas Grétar Gunnarsson, forstöðumaður Rannsóknaseturs Háskóla Íslands á Suðurlandi, leiða gönguferð í Grafarvog þar sem farfuglarnir safnast saman. Ferðin er í röðinni Með fróðleik í fararnesti.

Þeir félagar munu bjóða upp á fræðslu um líf þeirra fugla sem ber fyrir augu en þátttakendur eru hvattir til að taka með sér sjónauka og gjarnan fuglabækur til að fletta í. Það verður samt án efa hægt að fletta duglega upp í þeim Gunnari Þór og Tómasi Grétari enda miklir fuglasérfræðingar og með margra ára reynslu í rannsóknum á fuglum himinsins.

Margir af þeim farfuglum sem halda nú til í Grafarvogi eru langt að komnir. Ótrúleg ratvísi farfugla hefur enda lengi verið rannsóknarefni vísindamanna.

Brottför verður kl. 11 á laugardag og mun hópurinn ganga saman frá bílastæðinu við Grafarvogskirkju. Við mennirnir þurfum að sætta okkur við að ferðast með fótunum á sama tíma og fuglarnir svífa um himinninn.

Fyrir tíu árum var fyrsta Flugmessan haldin í Grafarvogskirkju.

Nú hefur flugfólk á Íslandi ákveðið að halda aðra flugmessu kl. 11.00 sunnudaginn 26. apríl.

Hátíðarhöldin hefjast með því að þyrla Landhelgisgæslunnar lendir við Grafarvogskirkju kl. 10:30,

með presta og fleiri sem taka þátt í messunni.

Flugkappinn, flugstjórinn Arngrímur Jóhannsson flytur hugvekju.

Flugfreyjukórinn syngur undir stjórn Magnúsar Kjartanssonar tónlistarmanns.

Organisti er Ólafur W. Finnsson flugstjóri.

Séra Vigfús Þór Árnason sóknarprestur mun þjóna fyrir altari.

Einsöngur og tónlistaratriði verða flutt af „flugfólki“.

Eftir messu er  boðið upp á kaffi og meðlæti.

Allir eru boðnir velkomnir, „flugfólk“ er beðið um að mæta í einkennisklæðnaði sínum,

sem er notaður í dag eða var það á sínum tíma.

[su_youtube url=“https://youtu.be/OVzxuP3p4sc“]

[su_button url=“http://grafarvogsbuar.is/grafarvogskirkja/flugmessa-haldin-i-annad-sinn-a-islandi/“]Skoða meira…[/su_button]

Skáksnillingar Grafarvogs og fjölmargir úr helstu skákskólum höfuðborgarsvæðisins voru sannarlega í sumarskapi á Sumarskákmóti Fjölnis 2015. Mótið hefur sjaldan verið glæsilegra og betur mannað enda liður í Barnamenningarhátíð Reykjavíkurborgar og haldið með stuðningi Rótarýklúbbs Grafarvogs. Biðröð myndaðist við skráningu og alls voru það 62 efnilegir skákkrakkar sem hófu mótið sem hófst nokkuð stundvíslega í lok hverfishátíðarinnar í Rimaskóla. Mótið var jafnt og spennandi frá upphafi til enda og verðlaunin 20 greinilega eftirsótt. Bárður Örn Birkisson í Smáraskóla í Kópavogi sigraði mótið og eldri flokkinn með fullt hús, 6 vinninga sem er frábær árangur á svona sterku skákmóti. Mikael Maron Torfason 11 ára Rimaskólastrákur varð efstur allra í yngri flokk með 5 vinninga og Nansý Davíðsdóttir í Rimaskóla efst stúlkna með 4,5 vinninga. Þessi þrjú hlutu til eignar glæsilega Rótarýbikara. Aðstæður voru hinar bestu enda Rimaskóli vinsælasti skákstaður landsins. Skákstjórar voru þeir Helgi Árnason og Omar Salama alþjóðlegur skákdómari. Skákstarfi Fjölnis í vetur fer að ljúka en síðasta skákæfingin verður næsta miðvikudag kl. 17.00 í Rimavar skóla.

Óskum öllum gleðilegs sumars, njótum dagsins.

Vetur og sumar frusu saman og segir þjóðtrúin að það veiti á gott sumar samkvæmt þessu.

Sumardaginn fyrsta ber alltaf upp á fyrsta fimmtudag eftir 18. apríl og er því alltaf á tímabilinu frá 19.-25. apríl.
Samkvæmt íslenskri þjóðtrú boðar það gott sumar ef sumar og vetur frjósa saman, það er, ef það frystir aðfaranótt sumardagsins fyrsta. Það má því segja að sumarið sé alveg að koma, ef það er bara ekki þegar komið.

Ekki eru samt allir sammála þessu en við vonum það besta.

Prestar Grafarvogskirkju

Biskup Íslands auglýsir laust til umsóknar embætti prests í Grafarvogsprestakalli, Reykjavíkurprófastsdæmi eystra, frá 1. ágúst 2015. Biskup Íslands skipar í embætti presta til fimm ára.

• Í Grafarvogsprestakalli er ein sókn, Grafarvogssókn, með um átján þúsund íbúa og eina kirkju, Grafarvogskirkju, og Kirkjuselið í Spöng. Áhersla er lögð á fjölbreytt  helgihald og framsækni í boðun og safnaðarstarfi.
• Grafarvogsprestakall er á samstarfssvæði með Grafarholtsprestakalli og Árbæjarprestakalli.
• Um þjónustuskyldur prestsins fer eftir samþykktum kirkjuþings um innri málefni kirkjunnar.
• Umsækjendur geri skriflega grein fyrir persónulegum upplýsingum, menntun sinni, starfsferli og öðru því sem þeir óska eftir að taka fram. Staðfest afrit af prófskírteini skal fylgja umsókn svo og upplýsingar um starfsþjálfun.
• Umsækjendum ber að fylla út eyðublað þar sem biskupi er heimilaður aðgangur að sakaskrá viðkomandi umsækjanda. Skal undirrituð heimild þar um fylgja umsókninni. Eyðublaðið er á vef kirkjunnar, https://innri.kirkjan.is/pdf/samthykki-fyrir-oflun-upplysinga-ur-sakaskra.pdf
• Valnefnd velur prest samkvæmt starfsreglum um val og veitingu prestsembætta nr. 1109/2011 og er stuðst við ráðgjafa í öllu umsóknarferlinu.
• Við val á presti verður lögð sérstök áhersla á reynslu af fjölbreyttu safnaðarstarfi og helgihaldi. Einnig verður hæfni í mannlegum samskiptum og leiðtogahæfni lögð til grundvallar.
• Heimilt er að óska eftir því að almennar prestskosningar fari fram samkvæmt 15. gr. starfsreglna nr. 1109/2011.
• Um embættið gilda lög um stöðu, stjórn og starfshætti þjóðkirkjunnar nr. 78/1997, lög um réttindi og skyldur starfsmanna ríkisins nr. 70/1996, starfsreglur er kirkjuþing setur og samþykktir um innri málefni kirkjunnar. Einkum er vísað til starfsreglna um presta nr. 1110/2011.
• Um laun og önnur kjör fer samkvæmt ákvörðun kjararáðs.
• Upplýsingar um embættið og helstu lög og reglur sem um starfið gilda, eru veittar á Biskupsstofu, hjá sóknarpresti Grafarvogsprestakalls og hjá prófasti Reykjavíkurprófastsdæmis eystra.
• Umsóknarfrestur um embættið rennur út 22. maí 2015.
• Umsóknir sendist Biskupi Íslands, Biskupsstofu, Laugavegi 31, 150 Reykjavík.

Vísað er til laga um jafna stöðu og jafnan rétt kvenna og karla nr. 10/2008.

Blár hjálmur

Kiwanismenn úr Höfða, Grafarvogi og Eimskip efna til sannkallaðrar “hjálmaveislu” sumardaginn fyrsta þann 23. apríl n.k. þar sem þeir færa   um 250   börnum í 1. bekk grunnskóla Grafarvogs reiðhjólahjálm að gjöf.

Afendingin fer fram á plani Olís við Gullinbrú og hefst kl. 10 og þar verður ýmislegt gert til skemmtunar   m.a. dregið úr happadrættismiðum, þar sem heppinn fær reiðhjól að gjöf og fleira.

Kiwanismenn hafa gefið 1. bekkingum í grunnskólum   Grafarvogs reiðhjólahjálma allt frá árinu 2000 í góðri samvinnu við grunnskóla Grafarvogs, en nú hafa borgaryfirvöld tekið fyrir slíka afhendingu í skólum borgarinnar og hafa Kiwanismenn því þurft að leita annarra leiða til að koma þessu mjög svo þarfa öryggistæki til barnanna.

Kiwanismenn munu njóta aðstoðar Olís og Foreldrafélaga grunnskóla Grafarvogs við afhendinguna.

Sjáumst vonandi sem allra flest ásamt foreldrum barnanna þann 23. apríl n.k.

Þar sem rýmið á plani Olís er ekki mikið er óskað eftir því að foreldrar skilji bíla sína eftir heima ef það er mögulegt

Kiwanisfélagar úr Höfða, Grafarvogi

Frá Grafarvogsdeginum 2014

Grafarvogsdagurinn verður haldinn hátíðlegur í 18. sinn og fer hann að þessu sinni fram laugardaginn 30. maí. Vefurinn Grafarvogsbúar.is hitti Guðmund Pálsson, verkefnastjóra dagsins, og ræddi við hann um verkefnið.

Menning og mannauður í forgrunni

„Markmið dagsins er fyrst og fremst að sameina íbúa hverfisins og skapa þeim tækifæri og vettvang til að hittast og skemmta sér og öðrum“ segir Guðmundur. „Hér í hverfinu er öflugt félags- og menningarstarf og Grafarvogsdagurinn er frábært tækifæri til að draga fram þann mikla mannauð sem í því starfi býr. Það verður því stór þáttur í mínu starfi að ná sambandi og tengslum við fólk og félög og fá þau til samstarfs og skapa vettvang fyrir þá aðila til að láta ljós sitt skína“ bætir Guðmundur við.

Öflug aðkoma fyrirtækja og stofnanana

Guðmundur glaðbeittur með skátagítarinn

Að sögn Guðmundar hafa fyrirtæki og stofnanir lagt deginum lið í gegnum tíðina með margvíslegum hætti. „Starfsemi fyrirtækja og stofnana hér í hverfinu er að sjálfsögðu hluti af samfélaginu sem hér blómstrar og því mikilvægt að þessir aðilar taki einnig virkan þátt í hátíðarhöldunum. Stuðningur við einstök dagskráratriði, kynning á starfsemi, vörum og þjónustu eru allt mögulegar leiðir fyrir fyrirtæki og stofnanir til að hafa virka og beina aðkomu. Ég vona að okkur takist að eiga öflugt samstarf við alla þessa aðila og að þeir nálgist verkefnið þannig að þetta sé sameiginlegur vettvangur sem búa og starfa í hverfinu“ segir Guðmundur.

Fréttir af undirbúningi

„Ég tók þetta verkefni að mér fyrir nokkrum dögum síðan og hef notað tímann vel til að kynna mér hvernig þetta hefur farið fram á undanförnum árum. Næstu skref eru svo að hafa samband við félög, fyrirtæki og stofnanir og leita samstarfs“ segir Guðmundur og bætir við að hann sé bjartsýnn og að mikill áhugi sé hjá þeim sem hann hefur þegar verið í sambandi við.

Útfærslan í mótun

„Nákvæm útfærsla á dagskrá liggur ekki fyrir en hún skýrist betur þegar fyrir liggja nánari upplýsingar um aðkomu aðila að verkefninu. Ég sé þó fyrir mér að með því að virkja sem flesta til þátttöku náum við að bjóða upp á fjölbreytta dagskrá á fjölmörgum stöðum í Grafarvoginum og að fólk verði á faraldsfæti og líti við sem víðast“. Guðmundir nefnir að dagurinn muni svo að líkindum ná hápunkti með sameiginlegri dagskrá við Spöngina.

Hver er maðurinn?

„Ég hef fjölbreyttan bakgrunn í margvíslegri verkefna- og viðburðarstjórnun og hef verið virkur í skátastarfinu alla tíð og sæki þangað mest af minni reynslu af undirbúningi og skipulagningu viðburða af þessu tagi“. Guðmundur leggur stund á meistaranám í hagnýtri menningarmiðlun við Háskóla Íslands. „Það má segja að þetta verkefni falli eins og flís við rass við þau viðfangsefni sem ég er að takast á við í náminu sem snýst að stórum hluta um miðlun menningar með margvíslegum hætti og í sínu víðasta samhengi“ segir Guðmundur að lokum.

Áhugasamir hafi samband sem fyrst!

„Ég hvet alla þá sem hafa áhuga á að taka þátt í deginum með einhverskonar dagskrá, kynningu, opnu húsi eða samstarfi og stuðningi af hvaða tagi sem er, að hafa samband sem allra fyrst. Best er að senda mér línu á netfangið gudmundur.palsson@reykjavik.is eða slá á þráðinn í síma 692 6733“ segir Guðmundur og stekkur af stað enda í mörg horn að líta í þessu viðamikla verkefni.

/Baldvin Örn Berndsen

Skákmót í Rimaskóla

Hið árlega sumarskákmót Fjölnis verður haldið í Rimaskóla á sumardaginn fyrsta, n.k. frá kl. 14:00 – 16:00. Sumarskákmótið er að þessu sinni hluti af dagskrá Barnamenningarhátíðar Reykjavíkur og einnig á dagskrá hverfishátíðar Grafravogs sem að vanda er haldin í Rimaskóla.

Mótið hefst eins og áður segir í Rimaskóla kl. 14.00 og því lýkur rúmlega 16:00 með verðlaunahátíð þar sem afhentir verða þrír verðlaunagripir sem Rótarýklúbbur Grafarvogs gefur til mótsins. Bikarana hljóta sigurvegari eldri flokks 1999-2003, sigurvegari yngri flokks og sigurvegari stúlkna.

Að vanda eru ótrúlega margir vinningar á skákmótum Fjölnis og nú eru það 20 bíómiðar á SAMbíó – Egilshöll sem dreifast á 20 þátttakendur. Í skákhléi verða seldar veitingar á 300 kr.

Mótið er ætlað nemendum grunnskóla og er þátttaka ókeypis. Tefldar verða sex umferðir með sex mínútna umhugsunartíma. Skákstjórar verða þeir Omar Salama alþjóðlegur skákdómari og Helgi Árnason formaður Skákdeildar Fjölnis. Fjölmennum á skákmót Fjölnis