Borgarstjóri fór í kynningu sinni yfir þau mál sem eru á döfinni í Grafarvogi í þjónustu og uppbyggingu innan hverfisins, en þar kennir margra grasa.  Bryggjuhverfið er í hraðri uppbyggingu og mun stækka. Hann sýndi einnig nýjar myndir frá deiliskipulagsvinnu fyrir Ártúnshöfða sem taka mun miklum breytingum á næstu árum.  Kynningu borgarstjóra má skoða hér í heild sinni.

Þorsteinn R. Hermannsson samgöngustjóri var með stutta kynningu á undirbúningi Borgarlínu og hvernig hún mun bæta samgöngur í borginni.  Kynningu Þorsteins má skoða hér

Sesselja Eiríksdóttir sem verið hefur virk í starfi eldri borgara horfði á Grafarvog frá þeirra sjónarhóli.

Íbúar í Grafarvogi höfðu fjölmargar fyrirspurnir til framsögumanna sem svöruðu jafnóðum. Ábendingar og athugaemdir voru teknar niður færðar í fundargerð og verður henni bætt við tengt efni hér í þessari frétt.

Fundarstjóri var Ingibjörg Þ. Sigurþórsdóttir, framkvæmdastjóri Miðgarðs þjónustumiðstöðvar Grafarvogs og Kjalarness.  Fundarritari var Margrét Richter.

Til stóð að frumsýna myndband um Grafarvog á fundinum en vegna tæknilegra hnökra gekk það ekki eftir. Myndbandið má sjá hér fyrir neðan.

Tengt efni:

• Kynning borgarstjóra 
• Borgarlína – kynning samgöngustjóra

Follow

Í framhaldi af hugmyndasöfnun meðal íbúa var í sumar settur upp Pétanque völlur við Gufunesbæ í Grafarvogi og er hann opinn öllum borgarbúum til æfinga. Völlurinn er sá fyrsti á Íslandi  sem er sérstaklega gerður fyrir pétanque og uppfyllir hann staðla sem keppnisvöllur 4×15 metrar hver braut. Þetta kemur fram á vef Reykjavíkurborgar

„Systir mín og mágur kynntust íþróttinni í Danmörku og töluðu mikið um leikinn,” segir Sigurlaug Sigurðardóttir sem setti hugmyndina að þeirra áeggjan í hugmyndasöfnunina,  Hverfið mitt í fyrra. Verkefnið hlaut kosningu og var hrundið í framkvæmd í sumar. Sigurlaug er að vonum ánægð með að hugmyndin hafi verið kosin og hún er nú í 16 manna hópi sem mætir reglulega á æfingar.

Pétanque er upprunalega franskur leikur en er í dag spilaður víða um heim. Sigurlaug rifjar upp að í sumar hafi þau spilað við finnska Pétanque spilara þegar þau voru á ferð um Helsinki.  Hún segir að flestir geti tekið þátt í leiknum og haft gaman af því leikreglur séu auðlærðar.

Á vellinum í Gufunesi eru 6 brautir. Tveir einstaklingar eða tvö lið etja kappi og geta verið þrír í liði.  Í einmenningi og tvímenningi hefur hver keppandi þrjár kúlur, en þegar þrír eru í liði hefur hver þáttakandi tvær kúlur.

Leikurinn hefst með því að lítilli kúlu, sem kallast grís, er kastað út á brautina.  Keppendur kasta síðan kúlum til skiptis að grísnum og fær það lið stig sem nær sínum kúlum næst grísnum.  Það lið sem fyrr fær 13 stig vinnur leikinn.  Kúlurnar sem spilað er með eru ca 700 gr. og 71-76 mm í þvermál.

Follow

Útvarpsmessa í Grafarvogskirkju kl. 11:00. Séra Arna Ýrr Sigurðardóttir prédikar og þjónar. Kór Grafarvogskirkju leiðir söng og organisti er Hákon Leifsson. Auður Hafsteinsdóttir leikur á fiðlu og Þórdís Sævarsdóttir syngur.

Sunnudagaskóli á neðri hæð kirkjunnar kl. 11:00. Brúðuleikhús, söngvar, sögur og límmiðar. Þóra Björg Sigurðardóttir og Hólmfríður Frostadóttir hafa umsjón. Undirleikari er Stefán Birkisson.

Selmessa í Kirkjuselinu kl. 13:00. Séra Grétar Halldór Gunnarsson prédikar og þjónar. Vox Populi leiðir söng og organisti er Hilmar Örn Agnarsson.

Follow

Ballettskóli Eddu Scheving er með kennslu í Grafarvogi í Hamraskóla.

Kennsla hófst 15. september. Allar upplýsingar á http://www.schballett.is/

Ballettskóli Eddu Scheving var stofnaður árið 1961 og er því elsti einkarekni listdansskóli landsins. 

Markmið skólans er að veita nemendum markvissa þjálfun sem sett er fram á skemmtilegan og jákvæðan hátt. Áhersla er lögð á fjölbreyttar æfingar, góða tæknivinnu, jafnvægisæfingar, liðleika og styrktaræfingar sem og uppbyggilegar og jákvæðar leiðbeiningar. Nemendur kynnast mörgum mismunandi dansformum og stílum.

Dansinn er listform þar sem listamaðurinn er efniviðurinn og krefst klassískur listdans margra ára þjálfunar.

Brynja Scheving

Follow

Ragnar Axelsson segir frá upplifunum sínum á Grænlandi

Menningarhús Spönginni, mánudaginn 25. september kl. 17:15-18:00

Ragnar Axelsson ljósmyndari hefur undanfarin þrjátíu ár helgað sig því verkefni að skrá líf og störf íbúa norðurslóða og þær breytingar sem orðið hafa á umhverfi þeirra og samfélagi.

Hann hefur á fjölmörgum ferðum sínum til Grænlands orðið vitni að algjörum stakkaskiptum sem þar hafa orðið á gróðurfari, dýralífi og mannlífi, í kjölfar hlýnunar jarðar, sem er sérlega mikil á norðurhveli og hefur keðjuverkandi áhrif á loftslag um allan heim. Þegar Ragnar hóf ljósmyndun við Scoresby-sund á Grænlandi fyrir þrjátíu árum var hitastigið -25°, í dag er hitinn -1°.  Þróunin er ískyggileg.

Ragnar sýnir ljósmyndir og segir frá upplifunum sínum á Grænlandi  í Borgarbókasafni Menningarhúsi Spönginni mánudaginn 25. september kl. 17:15.

Ragnar Axelsson er afkastamikill ljósmyndari og á að baki langan feril, m.a. sem blaðaljósmyndari. Á undanförnum árum hefur hann skapað sér æ stærra nafn í heimi alþjóðlegrar ljósmyndunar og verk hans hafa verið birt í fjölmiðlum um allan heim. Fyrr á þessu ári hlaut Ragnar Íslensku bókmenntaverðlaunin í flokki fræðirita og bóka almenns efnis fyrir ljósmyndabókina Andlit  norðursins.

Ljósmyndin hér að ofan er að sjálfsögðu eftir Ragnar og er sótt á vefsíðu hans.

Nánari upplýsingar veitir:
Sigríður Stephensen
sigridur.steinunn.stephensen@reykjavik.is
s. 411 6230

Follow

Lokahóf yngri flokka í knattspyrnu 8.- 3. flokkur verður haldið í Dalhúsum sunnudaginn 24. september kl. 12:30 – 13:30. Að lokahófi loknu er svo leikur hjá mfl. karla þar sem Fjölnir tekur á móti KR kl:14:00 og ætlum við að fjölmenna á leikinn.
Gengið er inn um sundlaugarinnganginn og þaðan inn í íþróttasalinn.
Ekki verða veitt verðlaun en allir flokkar verða kallaðir upp og farið verður yfir tímabilið og félagið þakkar öllum fyrir ánægjulegt samstarf á tímabilinu.

Biðjum alla iðkendur og forráðamenn að mæta í Fjölnispeysum.
Nánari dagskrá auglýst þegar nær dregur.
Síðan verða flokkarnir kallaðir upp og farið verður yfir tímabilið og fara svo í liðsmyndatöku.

Allir að mæta glaðir og kátir og síðan styðjum við okkar stráka til sigurs !
Áfram Fjölnir.

Follow

Opið hús fyrir eldri borgara í kirkjunni alla þriðjudaga kl. 13:00 – 16:00.

Í upphafi er söngstund í kirkjunni og gestur dagsins er sr. Guðrún Karls Helgudóttir.

Þá er í boði handavinna, spil og spjall fyrir þau sem vilja.

Samverunni lýkur með kaffiveitingum kl. 15:30.

Follow

3. fl. karla félagsins eru Íslandsmeistarar! Liðið vann í dag 4-1 sigur á Breiðblik á Extra vellinum í úrslitaleik Íslandsmótsins fyrir framan töluverðan fjölda áhorfenda og kórónaði þar með frábært tímabil flokksins.

Til að stikla á stóru og rétt til að setja árangurinn og tímabilið í samhengi þá varð A-liðið Reykjavíkurmeistari með fullt hús stiga og markatöluna 74-4, sigruðu síðan A-deildina með markatöluna 56-16 og unnu jafnframt bikarúrslitaleikinn í þarsíðustu viku 6-0 gegn Stjörnunni.

Follow

Íbúafundur borgarstjóra um málefni Grafarvogs verður haldinn miðvikudaginn 27. september kl. 20.00 í Borgum, félags- og menningarmiðstöðinni Spönginni 43.

Allir velkomnir og heitt á könnunni.

Follow