Lögreglan á höfuðborgarsvæðinu vill koma á framfæri þakklæti til vegfarenda sem veittu lögreglu aðstoð á Gullinbrú í gærmorgun þar sem alvarlegt umferðarslys varð. „Vegfarendur aðstoðuðu lögreglu við að koma slösuðum einstaklingi til hjálpar, en slík aðstoð er ómetanleg þegar á þarf að halda,“ skrifar lögreglan á Facebook í dag.
Slysið varð á tíunda tímanum í gærmorgun á Gullinbrú í Grafarvogi. Maður slasaðist alvarlega í slysinu. Vísir greindi frá því í gærkvöldi að hann væri á gjörgæslu, þar sem honum var haldið sofandi í öndunarvél.
Bíllinn sem maðurinn ók valt á miðjum veginum og þurfti að loka Gullinbrú um tíma vegna slyssins.
Follow