Skákdeild Fjölnis heldur skákmót í Hlöðunni Gufunesbæ á vetrarleyfisdögum grunnskólannna. Mótið fer fram fimmtudaginn 23. febrúar frá kl. 13:30 – 15:30. 

6 umferðir með tímamörkin 4.02. 

Allir vetrarleyfisnemendur grunnskólanna velkomnir á ókeypis skákmót. 

Í boði verður hin eina sanna skúffukaka sem alla skákkrakka hressir, bætir og kætir. 

20 verðlaun. Skákmótið er á dagskrá Brúarinnar frístundamiðstöðvar á vetrarleyfisdögum. 

Þátttakendur eru beðnir um að mæta tímanlega til skráningar kl. 13:15. 

Árið 2023 verður innleitt nýtt flokkunarkerfi á höfuðborgarsvæðinu þar sem fjórum úrgangsflokkum verður safnað við hvert heimili. Þetta verður stórt framfaraskref í umhverfis- og loftslagsmálum en meðal annars munu öll heimili fá tunnu fyrir matarleifar.

Þrátt fyrir að lög um hringrásarhagkerfi taki gildi 1. janúar 2023 hefjast tunnuskiptin ekki fyrr en í vor 2023.

Fjórir flokkar á hverju heimili

Á hverju heimili verður fjórum úrgangsflokkum safnað:

• Matarleifar
• Pappír og pappi
• Plastumbúðir
• Blandaður úrgangur

Íbúar finna lítið fyrir breytingunum

Tunnum verður skipt út þegar innleiðing hefst og íbúar þurfa ekki að grípa til neinna aðgerða hvað það varðar. Fyrir flest heimili mun lítið breytast varðandi fjölda tunna þar sem mörg heimili flokka nú þegar plast og pappír.
Stærsta breytingin er að öll heimili munu fá tunnu fyrir matarleifar en framkvæmd þess verður kynnt betur síðar.

Tvær til þrjár tunnur við sérbýli

Íbúar munu ekki þurfa að aðhafast neitt í tengslum við þessa breytingu annað en að tileinka sér nýja flokkunarsiði. Tunnum fyrir þessa fjóra flokka verður komið fyrir við íbúðarhús eftir þörfum en í einhverjum tilvikum verður tunnum skipt út fyrir tvær tvískiptar tunnur. Mismunandi útfærslur verða á fjölda tunna en hægt er að sjá mögulegar útfærslur á meðfylgjandi mynd.

Mismunandi fyrirkomulag við fjölbýli

Mismunandi fyrirkomulag verður við fjölbýli og fer útfærsla eftir aðstæðum hverju sinni.

Meginmarkmiðið er að fjölga tunnum hjá íbúum eins lítið og hægt er og í flestum tilfellum verður leitast við að halda rúmmáli tunna óbreyttu, þ.e að koma þeim fyrir í rýmum sem eru til staðar. Dæmi um fyrirkomulag í fjölbýlishúsi:

• Fyrir breytingu: þrjú 660 lítra kör eða samtals 1.980 lítrar.
• Eftir breytingu: tvö 660 lítra kör (annað fyrir pappír/pappa og hitt fyrir plastumbúðir), ein 360 lítra tunna fyrir blandaðan úrgang og ein 240 lítra tunna fyrir matarleifar, samtals 1.920 lítrar.

Samanlögð breidd á 360 lítra tunnu og 240 lítra tunnu er ekki meiri en breiddin á einu 660 lítra kari.

Á mynd hér að ofan má sjá dæmi um fyrirkomulag í fjölbýli.

Hvað þarf ég að flokka?

Í tunnu fyrir matarleifar fer meðal annars:

• eggjaskurn
• matarleifar með beini
• kaffikorgur
• fiskiúrgangur

Í tunnu fyrir plastumbúðir fer meðal annars:

• snakkpokar
• plastfilma
• plastpokar
• sjampóbrúsar

Í tunnu fyrir pappír og pappa fer meðal annars:

• dagblöð
• pappírsumbúðir
• bréfpokar
• pítsakassar

Í tunnu fyrir blandaðan úrgang fer meðal annars:

• dömubindi
• blautklútar
• bleyjur
• ryksugupokar

Þá verður málmumbúðum (niðursuðudósir o.fl.) og glerumbúðum (glerkrukkur o.fl.) safnað á grenndarstöðvum.

Öll heimili fá ílát og bréfpoka undir matarleifar

Matarleifum verður safnað í bréfpoka sem sveitarfélögin útvega íbúum. Pokarnir hafa gefist mjög vel á Norðurlöndunum og skipta lykilmáli til að hægt sé að vinna nothæfa moltu úr matarleifunum. Þá munu sveitarfélögin útvega íbúum ílát til að safna matarleifum inn á heimilum.

Tvískiptar tunnur ef pláss er lítið

Tvískiptar tunnur verða í boði við sérbýli þar sem pláss er af skornum skammti. Þegar um tvískiptar tunnur er að ræða verður matarleifum og blönduðum úrgangi safnað í sitthvort hólfið í sömu tunnunni og plastumbúðum annars vegar og pappír og pappa hins vegar verður safnað í aðra tvískipta tunnu.

Gler- og málmumbúðum safnað í grenndargámum

Til viðbótar við fjögurra flokka kerfi við heimili verður grenndargámum fjölgað.

• Gleri, málmum, textíl og skilagjaldsskyldum umbúðum verður safnað á grenndarstöðvum sem verða staðsettar um 500 metra frá hverju heimili.
• Stærri grenndarstöðvar verða í um kílómetra fjarlægð frá hverju heimili og þar bætast við gámar fyrir pappír og pappa, og plast.

Spurt og svarað um nýtt flokkunarkerfi

• Af hverju er verið að fara í þessar breytingar?
• Hvað þýða þessar breytingar fyrir umhverfið?
• Hvað á ég að gera við málma og gler?
• Verður breyting á grenndargámum?

Spurt og svarað um nýjar tunnur

• Hvernig tunnur verða hjá mér?
• Hvenær koma tunnur til mín?
• Hversu mikið pláss taka tvískiptu tunnurnar?
• Verða tvískiptar tunnur líka í sorpgeymslum fjölbýlishúsa?
• Hvað geri ég ef pappa- eða plast hólfið í tvískiptri tunnu fyllist?
• Ég þarf að búa til nýtt tunnuskýli heima hjá mér. Hvað þarf ég að hafa í huga?
• Hvernig bílar eru notaðir til að tæma tvískiptar tunnur?
• Hversu oft verða tunnurnar tæmdar?
• Get ég breytt fyrirkomulagi á tunnum hjá mér?
• Hvernig verða tunnurnar merktar?
• Hvað verður gert þar sem eru djúpgámar?

Spurt og svarað um söfnun matarleifa

• Hvernig safna ég matarleifum og hvernig poka á ég að nota?
• Munu bréfpokar ekki leka?
• Af hverju þarf að flokka matarleifar?
• Munu matarleifar ekki lykta illa í tunnunni?
• Þarf ég að fá tunnu fyrir matarleifar ef ég er með heimamoltugerð?
• Hversu stórar eru körfurnar fyrir matarleifar?

Viltu vita meira?

Til að fá meiri upplýsingar um nýtt flokkunarkerfi er meðal annars hægt að hafa samband við sitt sveitarfélag:

• Reykjavík
• Kópavogur
• Garðabær
• Hafnarfjörður
• Mosfellsbær
• Seltjarnarnes
• Kjós

Hér má sjá skýrslu um nýtt flokkunarkerfi.

Dagskrá jóla og áramóta í Grafarvogssöfnuði

 24. desember kl. 11:00

Beðið eftir jólunum – Jólastund barnanna í Grafarvogskirkju.

Syngjum saman jólalög og hlustum á sögu.

Umsjón hefur Ásta Jóhanna Harðardóttir.

Undirleikari er Stefán Birkisson.

24. desember kl. 17:00

Aftansöngur Kirkjuselinu í Spöng.

Sr. Sigurður Grétar Helgason þjónar.

Vox Populi leiðir söng.

Einsöngur: Hera Björk Þórhallsdóttir.

Organisti er Lára Bryndís Eggertsdóttir.

24. desember kl. 18:00

Aftansöngur í Grafarvogskirkju.

Sr. Arna Ýrr Sigurðardóttir þjónar.

Kór Grafarvogskirkju og Barna – og unglingakór kirkjunnar leiða söng.

Einsöngur: Hanna Dóra Sturludóttir.

Organistar eru Hákon Leifsson og Lára Bryndís Eggertsdóttir.

Stjórnandi barnakórs Svava Kristín Ingólfsdóttir.

24. desember kl. 23:30

Miðnæturguðsþjónusta í Grafarvogskirkju.

Sr. Sigurður Grétar Helgason þjónar.

Kammerkór Grafarvogskirkju leiðir söng.

Organisti er Hákon Leifsson.

25. desember kl. 14:00

Hátíðarguðsþjónusta í Grafarvogskirkju.

Guðrún Karls Helgudóttir þjónar.

Kór Grafarvogskirkju leiðir söng.

Einsöngur: Sigríður Ósk Kristjánsdóttir.

Organisti er Lára Bryndís Eggertsdóttir.

25. desember kl. 15:30

Hátíðarguðsþjónusta á Eir.

Sr. Guðrún Karls Helgudóttir þjónar.

Kór Grafarvogskirkju leiðir söng.

Einsöngur: Sigríður Ósk Kristjánsdóttir.

Organisti er Lára Bryndís Eggertsdóttir.

25. desember

Hátíðarguðsþjónusta kl. 11:00 í útvarpinu – Rás 1.

Hátíðarguðsþjónusta kl. 12:30 í sjónvarpinu – RÚV.

Frú Agnes M. Sigurðardóttir biskup prédikar og þjónar ásamt sr. Guðrúnu Karls Helgudóttur og sr. Sigurði Grétari Helgasyni.

Kór Grafarvogskirkju syngur ásamt félögum úr Vox Populi.

Einsöngur: Sigríður Ósk Kristjánsdóttir.

Organisti er Lára Bryndís Eggertsdóttir.

31. desember kl. 18:00

Aftansöngur í Grafarvogskirkju.

Sr. Sigurður Grétar Helgason þjónar ásamt Bjarka Geirdal Guðfinnssyni guðfræðinema.

Kór Grafarvogskirkju leiðir söng.

Einsöngur: Sigrún Hjálmtýsdóttir.

Organisti er Hákon Leifsson.

1. janúar 2023 kl. 14:00

Hátíðarguðsþjónusta í Grafarvogskirkju.

Sr. Guðrún Karls Helgudóttir þjónar.

Kór Grafarvogskirkju leiðir söng.

Einsöngur: Gissur Páll Gissurarson.

Organisti er Lára Bryndís Eggertsdóttir.

Verið öll hjartanlega velkomin!

Uppskeruhátíð Fjölnis fór fram í kvöld að viðstöddum 100 manns. Veitt voru verðlaun fyrir íþróttaafrek ársins, gull- og silfurmerki sjálfboðaliða ásamt vali á íþróttakarli og -konu. Þar að auki var Fjölnismaður ársins heiðraður fyrir ómetanlegt starf í þágu félagsins.

Fimleikadeild

Fimleikakarl: Sigurður Ari Stefánsson

Sigurður Ari eða Siggi átti glæsilegt fimleikaár. Hann varð íslandsmeistari unglinga í fjölþraut í áhaldafimleikum. Á árinu var hann einnig valinn til þátttöku í fjölmörgum erlendum verkefnum á vegum Fimleikasambands Íslands. Við óskum honum alls hins besta í framtíðinni og hlökkum til að fylgjast með honum í framtíðinni.

Fimleikakona: Lilja Katrín Gunnarsdóttir

Lilja Katrín var valin í úrvalshóp unglinga og í kjölfarið á því í æfingahóp fyrir Norðurlandamót unglinga sem fram fór hér á landi í lok júní. Við óskum henni alls hins besta í framtíðinni og hlökkum til að fylgjast með henni í framtíðinni.

Frjálsíþróttadeild

Frjálsíþróttakarl: Bjarni Anton Theódórsson

Bjarni Anton hefur æft frjálsar íþróttir í fjöldamörg ár. Hann hefur einbeitt sér að styttri hlaupum og keppir aðallega í 200 og 400 m hlaupum. Á þessu ári hljóp hann best 400 m á tímanum 49,69 sek sem er jafnframt besti tíminn á árinu í 400 m hlaupi. Hann var einnig í boðhlaupssveit Fjölnis á Meistaramóti Íslands í 4×400 m boðhlaupi og vann Íslandsmeistaratitil með sigri sveitarinnar.

Frjálsíþróttakona: Vilhelmína Þór Óskarsdóttir

Vilhelmína hefur æft frjálsar íþróttir frá unga aldri og hefur síðustu ár einbeitt sér að keppni í hlaupum. Hefur hún náð mjög góðum árangri í 60, 100, 200 og 400 m hlaupum. Hún á fimmta besta tímann á árinu í 200 og 400 m hlaupi. Vilhelmína eða Minna eins og hún er alltaf kölluð starfar sem þjálfari yngri iðkenda hjá frjálsíþróttadeildinni.

Handknattleiksdeild

Handboltakarl ársins: Óðinn Freyr Heiðmarsson

Óðinn Freyr stimplaði sig strax inn í ungt og efnilegt Fjölnislið þegar hann gekk í raðir félagsins árið 2019. Hann býr yfir mikilli baráttugleði og dugnaði ásamt því að vinnusemi hans er til fyrirmyndar bæði á æfingum og í keppnum. Hann var lykilmaður í vörn og sókn þegar liðið var hársbreidd frá sæti í efstu deild á síðustu leiktíð.

Handboltakona ársins: Þyri Erla Sigurðardóttir

Þyri Erla er uppalin í Fjölni og spilaði þar alla yngri flokka áður en hún fór að leika með meistaraflokknum. Þyri hefur gríðarlega marga kosti bæði innan vallar og utan og er frábær fyrirmynd fyrir alla iðkendur. Hún er mjög metnaðarfull og er alltaf tilbúin að leggja meira á sig til að bæta sig.

Íshokkídeild

Íshokkíkarl ársins: Martin Simanek

Með ástríðu og gleði, ásamt leiðtogahæfni hefur Martin sýnt okkur öllum að hann er mikil fyrirmynd og leikmaður með mikinn metnað fyrir íshokkídeild Fjölnis. Hann leggur sig ávallt fram og er fyrsti maður til að bjóða fram aðstoð sína.

Íshokkíkona ársins: Kolbrún Garðarsdóttir

Dugnaðarforkur og valkyrja sem berst af miklum eldmóð á ísnum en rífur upp gleðina með drengskap og gleði utan íssins.

Karatedeild

Karatekarl ársins: Gabríel Sigurður Pálmason

Gabríel er fyrirmyndar iðkandi. Einbeittur og duglegur karatemaður. Í ár hefur hann dregið heim silfurpeninga fyrir frammistöðu sína í kata á GrandPrix mótaröðinni, á Íslandsmeistaramóti unglinga og brons fyrir frammistöðu sína á RIG. Metnaður og Heilbrigði eru þau Fjölnisgildi sem Gabríel hefur staðið fyrir í starfi sínu innan karatedeildarinnar.

Karatekona ársins: Eydís Magnea Friðriksdóttir

Sem afrekskona átti Eydís frábært ár. Oftar en ekki kom hún heim með ekki einn, heldur tvo verðlaunapeninga eftir mót. Hún varð GrandPrix meistari í kata og svo bikarmeistari á Bikarmótaröð Karatesambands Íslands. Metnaður er það gildi Fjölnis sem Eydís hefur lifað í starfi sínu innan deildarinnar.

Knattspyrnudeild

Knattspyrnukarl ársins: Lúkas Logi Heimisson

Lúkas Logi Heimisson er afar fjölhæfur og sóknarþenkjandi leikmaður. Í gegnum tíðina hefur Lúkas leikið 9 landsleiki yfir yngri landslið Íslands. Þá hefur hann nú þegar spilað 52 leiki og skorað í þeim 14 mörk fyrir meistaraflokk félagsins þrátt fyrir ungan aldur. Lúkas er mikil fyrirmynd yngri leikmanna og á bjartan feril framundan sem knattspyrnumaður.  

Knattspyrnukona ársins: Elvý Rut Búadóttir

Elvý Rut Búadóttir er uppalinn leikmaður hjá Fjölni. Elvý er öflugur miðvörður sem hefur verið lykilmaður í liðinu lengi en hún hefur spilað 179 leiki fyrir Fjölni og skorað 2 mörk. Hún smitar út frá sér jákvæðni og vinnusemi og er alltaf tilbúin að gefa allt sem hún á inn á vellinum. Elvý er frábær leikmaður og mikil fyrirmynd yngri leikmanna.

Körfuknattleiksdeild

Körfuboltakarl ársins: Karl Ísak Birgisson

Karl Ísak er uppalinn Fjölnismaður, mikil þriggjastigaskytta sem hefur verið burðarás í sínum aldursflokki auk þess að vera í lykilhlutverki hjá eldri árgöngum hjá Fjölni. Í vor varð hann bæði bikarmeistari og  Íslandsmeistari með drengjaflokki auk þess sem hann var valinn mikilvægasti leikmaður úrslitaleiks Íslandsmótsins þá með 25 stig og 10 fráköst.

Körfuboltakona ársins: Dagný Lísa Davíðsdóttir

Dagný Lísa Davíðsdóttir var valin mikilvægasti leikmaður Subway deildar kvenna á síðasta tímabili þar sem hún leiddi Fjölni til deildarmeistaratitils, þess fyrsta hjá félaginu í boltagreinum í efstu deild. Einnig var hún valin í A-landslið Íslands á síðasta tímabili. Dagný Lísa er framúrskarandi leikmaður en ekki síður góður karakter sem nýtur virðingar liðsfélaga sem ekki er síður mikilvægt í hópíþróttum.

Listskautadeild

Skautakona ársins: Júlía Sylvía Gunnarsdóttir

Júlía Sylvía er landsliðskona í Junior flokki. Hún hefur staðið sig vel á árinu og tekið miklum framförum. Hún stóð sig eftir væntingum í vor og keppti meðal annars á Reykjarvíkurleikunum og Norðurlandamóti í Danmörku. Á Íslandsmeistaramótinu stóð hún sig sérstaklega vel og varð Íslandsmeistari með mikilli bætingu og einu af hæstu skorum sem Íslendingur hefur náð.

Skákeild

Skákkarl ársins: Jóhann Arnar Finnsson

Jóhann Arnar var einn af nemendum Rimaskóla sem hóf að æfa skák á sínum fyrstu grunnskólaárum. Eftir að grunnskólagöngu lauk hóf Jóhann Arnar að leiðbeina á hinum vinsælu skákæfingum Fjölnis og leiðir það starf ásamt Helga Árnasyni. Hann var m.a. í 6 manna skáksveit Fjölnis sem tefldi á EM félagsliða í Austurríki í sumar.

Skákkona ársins: Lisseth Acevedo Méndez

Liss eins og hún er alltaf kölluð er landsliðskona Íslands í skák. Hún tefldi með íslenska kvennalandsliðinu á Ólympíuskákmótinu á Indlandi nú í sumar og vann kvennaflokkinn á Alþjóðlega helgarskákmótinu í Gautaborg nú í haust. Liss er ein af fjórum konum frá Fjölni sem tilheyra landsliðshópi Íslands.

Sunddeild

Sundkarl ársins: Kristján Gylfi Þórisson

Kristján er stigahæstur sundmanna í afrekshóp og stóð sig einkar vel á árinu. Kristján hefur æft með félaginu meira og minna allan sinn feril og því er hann vel að þessum titli kominn.

Sundkona ársins: Coco Margaret Johansson

Coco er ung og efnileg sundkona og hefur æft með Fjölni síðustu 2 ár. Hún er stigahæst sundkvenna í afrekshóp og hefur staðið sig gríðarlega vel síðan hún kom til félagsins.

Tennisdeild

Tenniskona ársins: Saulé Zukauskaité

Saulé átti mjög gott ár og náði frábærum og eftirtektarverðum árangri. Þar má helst nefna sigur í  einliðaleik á U14 móti í Georgíu, Íslandsmeistari í liðakeppni meistaraflokks og 1. sæti í einliðaleik á U16 Íslandsmóti utanhúss. Hún er dugnaðarforkur og mikil fyrirmynd.

Silfurmerki

193 Álfheiður Sif Jónasdóttir (fimleikar)

Heiða hefur verið í stjórn deildarinnar frá árinu 2017 og starfar enn. Heiða er orkumikill stjórnarmaður sem hefur mikinn áhuga á því að gera starf fimleikadeildarinnar betra fyrir iðkendur.

194 Gunnar Bjarnason (fimleikar)

Gunni hefur verið í stjórn deildarinnar frá árinu 2018 og starfar enn. Hann tók við sem formaður í lok árs 2019 og sinnti því starfi til 2021. Á mótum er hann rödd deildarinnar þar sem hann fer oftar en ekki á kostum með skemmtilegri framkomu.

195 Helga Ásdís Jónasdóttir (fimleikar)

Helga hefur verið í stjórn deildarinnar frá árinu 2018 og starfar enn. Hún er núverandi formaður deildarinnar. Hún hefur áður sinnt gjaldkerastörfum ásamt því að vera mjög kröftug í mótahaldi og stokkið inn í þjálfun þegar mest reynir á.

196 Ágúst Jónsson (frjálsar)

Ágúst hefur starfað í stjórn deildarinnar í fjöldamörg ár og hefur undanfarin fjögur ár sinnt gjaldkerastörfum. Hann hefur verið afar virkur í mótahaldi og dómgæslu ásamt því að halda vel utan um elsta viðburð félagsins, sjálft Fjölnishlaupið.

197 Halldór Torfi Pedersen (handbolti)

Halldór hefur verið óþreytandi í sjálfboðaliðastarfi deildarinnar frá árinu 2017. Hann tók snögglega við formannsstarfinu í barna- og unglingaráði og hefur leyst það með sóma ásamt því að vera alltaf til staðar þegar á þarf að halda.

198 Hans Liljendal Karlsson (handbolti)

Hans hefur á undanförnum árum verið í stjórn deildarinnar og starfað sem formaður barna- og unglingaráðs. Þar vann hann af mikilli eljusemi og dugnaði að stækkun deildarinnar ásamt því að ganga í öll verk sem þörf var á.

199 Margrét Theodórsdóttir (handbolti)

Margrét hefur sinnt störfum í barna- og unglingaráði ásamt því að hún hefur verið meðlimur stjórnar. Sem meðlimur í barna- og unglingaráði hefur hún haft umsjón með öllum almennum rekstri með aðaláherlsu á styrktarumsóknir, gerð kynningarefnis og samskipti við þjálfara.

200 Róbert Línberg Runólfsson (handbolti)

Róbert hefur verið virkur í barna- og unglingaráði í 7 ár. Róbert er mjög öflugur sjálfboðaliði, ef vantað hefur sjálfboðaliða á meistaraflokksleiki hvort heldur er kvenna eða karla þá er Róbert fyrstur til að bjóða fram sína aðstoð. Hann hefur einnig sinnt málum er varðar mótahald, launamál og fleira.

201 Esther Hlíðar Jensen (karate)

Það eru kannski ekki margar íþróttir þar sem foreldrar elta börnin inn í íþróttina og fara að æfa samhliða þeim. En það gerði Esther með sanni og svo þegar sonurinn heltist úr lestinni hélt hún áfram að æfa og hefur nú auk þess um fimm ára skeið lagt félaginu lið sem gjaldkeri deildarinnar og stjórnarmanneskja.

202 Páll Haraldsson (karate)

Páll er einn af þeim sem hefur lengi verið til fyrirmyndar innan félagsins sem og innan karateíþróttarinnar. Hann hóf æfingar hjá Fjölni árið 2007 og hefur síðan verið óslitið að æfingum og störfum hjá félaginu. Hann tók jafnframt að sér þjálfun árið 2016 og er nú vinsæll þjálfari og stuðningsmaður keppenda á mótum.

203 Sif Ólafsdóttir (karate)

Það eru ekki margir sem hafa unnið jafn ósérhlífið starf fyrir hönd karatedeildarinnar. Sif hefur tekist á við sum af erfiðari verkefnum deildarinnar frá því hún kom til starfa. Sif er nefnilega þessi dæmigerða karatemamma sem tók deildina upp á arma sér og hefur svo haldið áfram að hjálpa deildinni sem stjórnarkona löngu eftir að börnin hennar hættu æfingum.

204 Sigríður Þórdís Pétursdóttir (karate)

Sigríður hefur starfað við karatedeildina síðan 2014 og þjálfar nú unglinga og fullorðna í framhaldshópum. Hún hefur æft karate hjá Fjölni síðan hún var örlítil písl árið 2006 en er nú með 2. dan svart belti auk dómararéttinda.

205 Hjörleifur Þórðarson (knattspyrna)

Hjölli hefur setið í stjórn deildarinnar samfleytt frá árinu 2018. Á þeim tíma hefur hann tekið þátt í mörgum uppbyggilegum verkefnum fyrir deildina. Í dag er Hjörleifur formaður meistaraflokks ráðs karla og sinnir því af mikilli yfirvegun og dugnaði þrátt fyrir krefjandi aðstæður á köflum.

206 Marinó Þór Jakobsson (knattspyrna)

Marinó hefur setið í stjórn deildarinnar samfleytt frá árinu 2018. Þar sem hann var m.a. formaður meistaraflokksráðs kvenna í tvö ár. Líkt og Hjölli þá byrjaði Marinó sem iðkandi hjá félaginu ungur að árum og spilaði upp alla flokka félagsins.

207 Guðleif Hafdís Indriðadóttir (körfubolti)

Gulla Dís hefur síðustu árin skilað ómetanlegu starfi fyrir deildina. Hún hefur setið í stjórn deildarinnar með hléum en þegar hennar hefur notið við hefur hennar sýn á rekstur deildarinnar, ráðningu þjálfara og samskipti við leikmenn verið verðmæt síðustu árin.

208 Kristján Rafnsson (körfubolti)

Stjáni Rafns er sá sem hefur verið lengst í kringum starfið af þeim sem nú eru að starfa við deildina. Hann missir nánast aldrei af heimaleikjum meistaraflokkana þar sem hann hjálpar til við uppsetningu og tiltekt. Að auki hefur Stjáni keyrt meistaraflokkana báða í ófáar keppnisferðir, hvort sem er til Ísafjarðar, Akureyrar, Egilsstaða eða Hafnar í Hornafirði í öllum tegundum af veðrum og vindum.

209 Magnús Ingi Björnsson (körfubolti)

Maggi stattari hefur síðustu árin tekið tölfræðivinnuna í kringum leiki meistaraflokkana föstum tökum. Einnig gengur Maggi vasklega til verks við uppsetningu leikja og móta, í raun langfljótastur af okkur öllum. Maggi er klárlega haukur sem allar íþróttadeildir myndu vilja hafa í sínu horni.

210 Olga Björney Gísladóttir (körfubolti)

Olga hefur setið í aðalstjórn Fjölnis síðustu árin en hennar naut við í stjórn Körfuknattleiksdeildar árin á undan. Skipulag, fagmennska og vönduð vinnubrögð eru þættir sem koma upp í hugann þegar Olga er annars vegar.

211 Styrmir Böðvarsson (körfubolti)

Styrmir hefur verið lengi viðriðinn stjórnarstörf hjá Fjölni, bæði hjá deildinni auk þess að hafa setið í aðalstjórn félagsins um tíma. Styrmir er sannkallaður þúsundþjalasmiður en hann hefur verið heimaleikjastjóri hjá meistaraflokkunum síðustu árin með glæsibrag auk þess sem hann hefur tekið að sér að keyra liðin í útileiki þegar svo ber undir.

212 Eva Björg Bjarnadóttir (listskautar)

Eva hefur helgað sig að starfi deildarinnar. Hún byrjaði ung að æfa listskauta og þegar hún var orðin nógu gömul byrjaði hún samhliða æfingum að þjálfa í skautaskólanum. Hún hefur alltaf sýnt hvað skautadeildin skiptir hana miklu máli og hefur lagt sitt að mörkum að byggja hana upp og ítrekað farið út fyrir það sem ætlast er til af starfinu hennar til að gera meira og betur.

213 Rakel Hákonardóttir (listskautar)

Rakel hefur verið ötull sjálfboðaliði í gegnum árin. Hún hefur verið viðloðandi listskauta allt frá árinu 2005, bæði í foreldrafélaginu og einnig setið í stjórn í nokkur ár. Rakel er ósérhlífin, metnaðarfull og einstaklega dugleg. Hún er alltaf viljug að hlaupa til og hjálpa þegar kemur að mótum eða sýningum.

214 Ágúst Guðmundsson (sund)

Ágúst hefur unnið mjög svo óeigingjarnt starf í þágu félagsins og einkum sem stjórnarmaður í sunddeild. Ágúst er toppmaður af skaganum sem hefur gríðarlegt tengslanet og án hans væri stjórnarstarfið mun erfiðara. Hann er maður með meiru og sannarlega með hjartað á réttum stað.

Gullmerki

35 Þorgrímur H. Guðmundsson (frjálsar)

Toggi hefur verið viðloðandi starf frjálsíþróttadeildarinnar í 10 ár, lengst af sem formaður deildarinnar. Hann er mjög öflugur í öllu starfi og hefur stýrt deildinni af miklum sóma. Hann hefur verið mjög virkur í mótahaldi, bæði komið að undirbúningi móta og unnið á mótum. Það hefur verið mikill fengur fyrir deildina að hafa notið starfskrafta Togga.

36 Þorgils Garðar Gunnþórsson (handbolti)

Þorgils hefur starfað sem sjálfboðaliði við myndatöku fyrir handknattleiksdeild í rúman áratug. Eftir hann liggja ógrynnin öll af myndum bæði liðsmyndum og myndum af leikjum. Hann var sæmdur silfurmerki árið 2017 og finnst okkur vel við hæfi að hann fái gullmerki að þessu sinni.

37 Laufey Jörgensdóttir (knattspyrna)

Laufey hefur sinnt miklu og góðu sjálfboðaliðastarfi frá árinu 2008. Hún hefur setið í barna- og unglingaráði og stjórn deildarinnar í fjölda ára þar sem hún hefur sinnt málum tengd bæði yngri flokkum og meistaraflokkum. Laufey er þeim kosti gædd að geta drifið alla í kringum sig áfram með metnaði, krafti og dugnaði sínum að vopni.

38 Trausti Harðarson (knattspyrna)

Trausti hefur sinnt miklu og góðu sjálfboðaliðastarfi í yfir áratug fyrir Fjölni og það í fleiri en einni íþróttagrein á þeim tíma. Trausti hefur verið óþreytandi í að safna styrkjum fyrir deildina, hann er núverandi formaður meistaraflokksráðs kvenna og hefur átt stóran þátt í aukinni og betri umgjörð í kringum meistaraflokk kvenna.

39 Anna Podolskaia (tennis)

Anna hefur verið þjálfari hjá deildinni í mörg ár. Eftir nokkurra ára pásu kom hún aftur að fullu inn í starfið, bæði sem þjálfari og sjálfboðaliði. Anna hefur þjálfað okkar besta íþróttafólk frá 2000. Hún hefur yfirgripsmikla reynslu og þekkingu úr tennisheiminum og við erum heppin að hafa hana í okkar teymi.

Hérna má sjá myndir frá Baldvin Örn Berndsen.

Myndir frá Þorgils G:

Með lögum sem samþykkt voru 1. nóvember 2021 geta einstaklingar og fyrirtæki nú fengið endurgreiðslu frá skatti ef þau styrkja íþróttafélög.

Einstaklingar geta fengið skattfrádrátt (lækkun á tekjuskattstofni) með því að styrkja Fjölni um allt að 350.000 kr. en að lágmarki 10.000 kr.

Dæmi: Einstaklingur sem greiðir 30.000 kr. styrk til Fjölnis fær skattafslátt að fjárhæð 9.435 kr. og greiðir þannig í raun 20.575 kr. fyrir 30.000 kr. styrk til félagsins.

Fyrirtæki geta líka fengið skattafslátt vegna styrkja. Fyrirtækjum er heimilt að draga frá skattstofni allt að 1,5% af rekstrartekjum.

Dæmi: Fyrirtæki sem styrkir Fjölni um 500.000 kr. getur lækkað tekjuskattinn sinn um 100.000 kr. fyrirtækið greiðir þannig í raun 400.000 kr. fyrir 500.000 kr. styrk til Fjölnis.

Svona gengur ferlið fyrir sig:

Þú millifærir upphæð að eigin vali að lágmarki 10.000 kr. og sendir kvittun á skrifstofa@fjolnir.is.

Fjölnir sendir kvittun til baka á greiðanda þar sem fram kemur nafn og kennitala greiðanda ásamt upphæð styrks.

Fjölnir sendir upplýsingar um styrki til skattsins, sem kemur skattafslættinum til skila til þín.

Til þess að geta nýtt heimildina fyrir árið 2022 þarf greiðsla að hafa borist fyrir 30. desember næstkomandi.

Reikningsupplýsingar:

0114-26-155

kt 631288-7589

Kvittun sendist á skrifstofa@fjolnir.is

Við hjá Ungmennafélaginu Fjölni sendum kærlegar þakkir til allra þeirra sem veitt okkur ómetanlegan stuðning í gegnum tíðina.

#FélagiðOkkar

Fjölnir FimleikarFjölnir FrjálsarFjölnir HandboltiFjölnir ÍshokkíKaratedeild FjölnisFjölnir KarfaFjölnir KnattspyrnaFjölnir ListskautarFjölnir Sunddeild

Haldnir í Grafarvogskirkju 24. nóvember

Karlakór Grafarvogs og kvennakórinn Söngspírurnar halda sameiginlega hausttónleika í Grafarvogskirkju fimmdudagskvöldið 24. nóvember nk. og hefjast tónleikarnir kl. 19.30. Þetta er í fimmta skipti sem kórarnir koma sameiginlega fram á tónleikum í Grafarvogskirkju og hafa þessir viðburðir jafnan verið mjög vel sóttir. Einsdæmi er að svo stór blandaður kór syngi létta tónlist á tónleikum.

Efnisskrá tónleikanna verður fjölbreytt. Kórarnir munu syngja bæði innlend og erlend lög hvor í sínu lagi, en einnig munu þeir syngja saman nokkur íslensk lög, m.a. úr smiðju einnar ágætustu hljómsveitar á Íslandi fyrr og síðar; Stuðmanna. Þar að auki munu kórarnir syngja saman tvær vinsælar syrpur, önnur með tónlist úr söngleiknum Abba en hina úr My Fair Lady, en báðar eru syrpurnar klassísk meistaraverk.

Karlakór Grafarvogs var stofnaður árið 2011 en Söngspírurnar árið 2014, en stofnandi og stjórnandi beggja kóranna er Íris Erlingsdóttir söngkennari og kórstjóri.

Meðleikari með kórnum er Einar Bjartur Egilsson á píanó, en auk hans leika með kórunum þeir Birgir Steinn Theodórsson á bassa, Gísli Gamm á trommur og Þórður Árnason á gítar sem saman mynda hina ágætustu hljómsveit.

Söngfólk kóranna beggja er ríflega 60 manns og er álíka margt í hvorum. Þessir tónleikar eru í raun óvenjulegur viðburður, enda er langt síðan svona stór kór hefur haldið tónleika í Reykjavík með tónlist við allra hæfi. Það er einstakt að hægt sé að flytja jafn skemmtilega tónlist með lögum úr smiðju Abba eða þá fallegu lögin úr My Fair Lady með 60 manna kór – og hvað þá þegar kemur að nokkrum þekktustu lögum Stuðmanna.

Það verður tilkomumikið að heyra í kórunum hljóma saman í Grafarvogskirkju fimmtudagskvöldið 24. nóvember og eru gestir hvattir til að mæta snemma því von er á góðri aðsókn. Aðgöngumiðar fást við innganginn og er miðaverði stillt í hóf, en miðinn kostar kr. 4.000,-.

Íbúaráð eru lifandi samstarfsvettvangur samráðs íbúa, bakhóps hverfisins, félagasamtaka, atvinnulífs og borgaryfirvalda. Íbúaráðin eru virkir þátttakendur í útfærslu á allri stefnumörkun hverfanna, ráðgefandi fyrir starfsemi þjónustumiðstöðva í hverfum og stuðla að eflingu félagsauðs í hverfum Reykjavíkurborgar.

Hægt að lesa meira……https://reykjavik.is/ibuarad-grafarvogs

SKÁKHÁTÍÐ Í HÖLLINNI

Það fór vel um 350 skákmenn og skákkonur í Egilshöllinni á Íslandsmóti skákfélaga, fyrri hluta, sem fram fór um helgina í Úrvalsdeild og í 1. – 4. deild.

Skákdeild Fjölnis hefur í 15 ár skaffað þessu fjölmennasta skákmóti heppilegt húsnæði og þar með keppnisskilyrði, fyrst í Rimaskóla og nú annað árið í röð í Egilshöll.

Það sem einkennir mótið er óvenju breið aldursdreifing keppenda. Þeir eru á aldursbilinu frá yngstu bekkjum barnaskóla og allt upp i 90 ára öldunga. Þarna eru mættir íslensku stórmeistararnir, erlendir stórmeistarar sem styrkja skáksveitir úrvals-og 1. deildar svo og þekktir íslenskir einstaklingar sem kunna ýmislegt fyrir sér í skáklistinni.

Skákmenn kunna vel við sig í rúmgóðri Egilshöll og njóta veitinga sölunnar sem efnilegar skákstúlkur Fjölnis sinna og safna fyrir þátttöku á skákmóti erlendis næsta ár.

Skákdeild Fjölnis sendi 3 skáksveitir til leiks á Íslandsmótið og eru flestir skákmenn Fjölnis uppaldir Grafarvogsbúar og íbúar í hverfinu.

A sveitin teflir i 6 liða efstu deild og á þar í harðri baráttu um að halda sæti sínu. Með A sveitinni tefldi tvítugur stórmeistari, Litháinn Valery Kazakouski sem náði 80% vinningshlutfalli og vakti taflmennska hans athygli og aðdáun.

Síðari hluti Íslandsmótsins verður tefldur í Egilshöll helgina 17. – 19. mars 2023. (Skoðið myndirnar)

TORG Listamessa Reykjavík er haldin á Hlöðuloftinu á Korpúlfsstöðum og er einn stærsti sýningar – og söluvettvangur myndlistar á Íslandi þar sem sjá má á einum stað fjölbreytileg listaverk eftir listamenn sem allir eru félagsmenn í Sambandi íslenskra myndlistarmanna.

Tilgangur Torgs er margþættur þ.e. að auka sýnileika myndlistarinnar og gera fólki auðveldara fyrir að kynna sér samtímalist sem og að eignast listaverk eftir íslenska eða erlenda listamenn sem starfa hér á landi. Ætlunin er auk þess að veita áhugafólki um myndlist tækifæri til að fjárfesta í myndlist milliliðalaust og eiga um leið persónulegt samtal við listamennina sjálfa. 

TORG Listamessa 2022 verður haldin dagana 14.-23. október nk.

Nánar má lesa um Torg Listamessu hérna…..