Hrafn Jökulsson skákfrömuður hóf skákmaraþon í Hörpunni kl. 9:00 í morgun föstudaginn 6. mars og ætlar að halda því áfram til miðnættis á laugardag. Hrafn sem er með skákmarþoninu að styðja góðan málstað og safna framlögum í söfnun Fatímusjóðs og UNICEF í þágu skólahalds fyrir sýrlensk flóttabörn. Hann óskaði sérstaklega eftir því að fá að tefla við skákstúlkur í Rimaskóla, núverandi Íslandsmeistarasveit grunnskóla í stúlknaflokki.

Þær Nansý, Halldóra Hlíf og Sara í 7-EH og Valgerður og Heiðrún Anna í 8. bekk tóku áskoruninni og tefldu allar við Hrafn sem var ánægður með þá góðu taflmennsku sem þær sýndu. Norðurlandameistarinn Nansý Davíðsdóttir tefldi afar vel og þrátt fyrir tímaþröng þá knúði hún fram sigur á lokasekúntunum og var þar með sú fyrsta til að leggja Hrafn.

Nansý uppskar langt lófatak allra þeirra sem voru viðstaddir í Hörpunni og ekki síst Hrafns sjálfs sem var afar ánægður með endataflið hjá Nansý. (HÁ)

Grafarvogskirkja

Útvarpsmessa kl. 11.00.
Séra Arna Ýrr Sigurðardóttir prédikar og þjónar fyrir altari.
Kór kirkjunnar syngur.
Organisti: Hákon Leifsson

Sunnudagaskóli kl. 11.00.
Séra Vigfús Þór Árnason
Umsjón hefur: Ásthildur Guðmundsdóttir
Undirleikari: Stefán Birkisson

Þess verður minnst að 8. mars er alþjóðlegur baráttudagur kvenna, og einnig alþjóðlegur bænadagur kvenna.

Kirkjuselið í Spöng

Messa kl. 13.00
Séra Vigfús Þór Árnason prédikar og þjónar fyrir altari
Kirkjuvinir syngja
Organisti: Hilmar Örn Agnarsson

Sunnudagaskóli á sama tíma
Umsjón hefur: Ásthildur Guðmundsdóttir
Undirleikari: Stefán Birkisson

Í ár er áætlað að verja 690 milljónum til malbiksframkvæmda í Reykjavík og er það 250 milljón króna hækkun frá síðasta ári.

Fjárhagsáætlun þessa árs gerði ráð fyrir 110 milljón króna hækkun og í borgarráði í dag var tillaga umhverfis- og skipulagsráðs um 150 milljón króna viðbótarframlag samþykkt. Í greinargerð með tillögunni segir að veðurfarslegar aðstæður í vetur hafi valdið miklu tjóni á gatnakerfinu.

Með viðbótarframlaginu sem samþykkt var í dag eru fjárframlög til malbikunar þau sömu og framlög voru árið 2008 að núvirði.

Starfsmenn Reykjavíkurborgar sinna tilfallandi viðhaldi og holufylla eftir þörfum eins og ávallt hefur verið gert. Vegfarendur eru hvattir til að láta vita af holum svo hægt sé að bregðast við.

Nú í mars og apríl verður ástand gatna metið faglega og á grundvelli þess mats verður framkvæmdaáætlun fyrir malbikun gerð.

Ending gatna fer eftir álagi á þær. Þannig er talið að minni húsagötur endist í 35 ár, fjölfarnari húsagötur í 30 ár, safngötur í 20 ár og tengibrautir í 12 ár. Rétt er að taka fram að viðhald og malbikun stofnbrauta er verkefni Vegagerðarinnar.

Um síðustu helgi tóku stelpur úr Fimleikadeild Fjölnis þátt í hópfimleikamóti Þórs í Þorlákshöfn. Á mótinu kepptu stúlkur úr hópi A-3 hjá Fjölni og stóðu sig með prýði og lentu í fjórða sæti samanlagt af 11 liðum.

Mótið gekk mjög vel og allir voru ánægðir með mótsdaginn. Það fengu allir keppendur verðlaun fyrir sitt besta áhald og fengu stúlkurnar verðlaun í dansi. Þær voru að keppa í fyrsta skipti sem hópur í dansi. Það voru miklar framfarir frá síðasta móti og gaman að fylgjast með stelpunum. Foreldrar fjölmenntu á mótið og studdu vel við bakið á stelpunum.

Dagur B. Eggertsson borgarstjóri var gestur á útboðsþingi Samtaka iðnaðarins sem haldið var á föstudag og kynnti þar verklegar framkvæmdir Reykjavíkurborgar á þessu ári.

Framkvæmda- og fjárfestingaáætlun Reykjavíkurborgar hljóðar upp á  8,7 milljarða í ár og fer upp í 9,3 milljarða á næsta ári.  Stærstu verkefnin sem ráðið verður í á næstu árum er nýr leik- og grunnskóli í Úlfarsárdal auk þess sem byggð verður í dalnum íþróttaaðstaða og bókasafn.  Af öðrum stórum skólaverkefnum sem ráðist verður í er viðbygging við Vesturbæjarskóla og Klettaskóla og hús fyrir frístundastarf Vogaskóla. Áfram verður unnið að endurbótum á skólalóðum grunnskóla og á þessu ári verður lokið við 2. áfanga lóða Árbæjarskóla, Breiðagerðisskóla, Fossvogsskóla og Ölduselsskóla.

Uppbygging íbúðasvæða

Mörg íbúðarsvæði eru á undirbúningsstigi og verður vaxandi kraftur í uppbyggingu þeirra á næstu árum. Reykjavíkurborg annast gatnagerð og að gera lóðir byggingahæfar. Meðal þeirra svæða sem eru á framkvæmdaáætlun í ár eru hafnarsvæðin, Hlíðarendi, reitir við Laugaveg og á Hlemmsvæðinu auk hverfa í Úlfarsárdal og Norðlingaholti þar sem unnið verður að ræktun og frágangi.

Almenningssamgöngur, hjólastígar, samgöngumiðstöð og aukin framlög til malbiksframkvæmda

Af stærri gatnaframkvæmdum sem eru á dagskrá eru gatnamót Geirsgötu og Lækjargötu, sem tengjast uppbyggingu í Austurhöfn. Þá verður Fellsvegur lagður en hann tengir betur Grafarholt og Úlfarsárdal. Þá verður áfram unnið í gerð forgangsreina fyrir strætó og unnið að úrbótum við biðstöðvar.  Þörf fyrir göngu- og hjólastíga verður áfram mætt af krafti, bæði verða lagðir nýir stígar og endurbætur gerðar á eldri stígum. Átak verður gert í að bæta aðstöðu með hjólastöndum og hjólaskýlum.

Dagur gerði malbiksframkvæmdir að umtalsefni og varpaði upp glæru þar sem greint var frá nýsamþykktri tillögu umhverfis- og skipulagsráðs um aukið fé til þeirra en með samþykkt hennar eru fjárframlög til malbiksframkvæmda 690 milljónir króna árið 2015, sem eru sömu framlög og árið 2008, að núvirði.

Ný samgöngumiðstöð með fjölbreyttum möguleikum fyrir almenningssamgöngur, hjólaleigur og snjallbíla mun rísa í Vatnsmýrinni á næstu árum. Hönnunarsamkeppni um skipulag umferðarmiðstöðvar verður væntanlega á þessu ári.

Endurgerð á torgum og götum miðborgar

Dagur sagði að áfram yrði unnið að endurgerð á torgum og götum miðborgarinnar. Endurgerð á Hverfisgötu hafi tekist vel og mannlífið blómstrar.  Nú í ár verður Smiðjustígur endurgerður og Hjartatorg  endurbyggt. Samkeppni var nýlega haldin um endurgerð Laugavegar og verður hugað að hönnun á þessu ári, en framkvæmdir árið 2017.  Á dagskrá eru einnig torg í Þingholtum, Óðinstorg, Baldurstorg og Freyjutorg en tillögur um endurgerð þeirra voru fyrst settar fram af Evu Maríu Jónsdóttur sjónvarpskonu árið 2000.  Á næsta ári verður áfram unnið að endurgerð Frakkastígs sem og síðusta kaflanum á Hverfisgötu.

Ný útilaug við Sundhöllina

Við Sundhöllina verður byggð ný útisundlaug á grundvelli hönnunarsamkeppni og í Úlfarsárdal verður byggð sundlaug og nýtt íþróttahús hverfisins.  Framkvæmdir hefjast á báðum stöðum innan tíðar.
Þá verður ráðist í skemmtilega uppbyggingu fyrir káta krakka í Fjölskyldu- og húsdýragarðinum. Það verkefni er viðvarandi á dagskrá næstu fimm ár.  Nýr frjálsíþróttavöllur verður byggður upp í Mjóddinni á athafnasvæði ÍR.

Betra svið í Borgarleikhúsinu og stækkun Grófarhúss

Af verkefnum tengd menningar- og ferðamálum ber hæst á þessu ári ný geymslubygging við Árbæjarsafn, en einnig eru fyrirhugaðar miklar endurbætur á sviði Borgarleikhússins. Á næsta ári verður mestu fé varið í viðbyggingu við borgarbókasafnið í Grófarhúsi.

1,7 milljarður til viðhaldsverkefna í fasteignum borgarinnar

Til reglubundins viðhalds fasteigna Reykjavíkurborgar er ráðstafað rúmum 900 milljónum, en einnig verður 800 milljónum varið í átak vegna stærri viðhaldsverkefna.  Stærstur hluti þessa fjár fer til skóla- og leikskóla.

Mikil almenn uppbygging í Reykjavík

Dagur gerði einnig að umtalsefni mikla almenna uppbyggingu í Reykjavík. Áform fyrirtækja, verktaka og fjárfesta, væru í takt fyrir framtíðarsýn borgarinnar og aðalskipulag um þéttingu byggðar.  Reykjavíkurborg hefur efnt til samstarfs þar sem hugsað verður fyrir markmiðum borgarinnar um að stuðla að uppbyggingu leigumarkaðar og félagslega blöndun.  Hann greindi einnig frá samstarfi um búseturéttaríbúðir, námsmannaíbúðir og íbúðir fyrir aldraða.  Nánari upplýsingar er að finna í glærukynningu sem sýnd var á fundinum.

Tengt efni:

Kynning borgarstjóra á útboðsþingi Samtaka iðnaðarins. 

Slökkvilið höfuðborgarsvæðisins hafði allan varann á og mætti með fjölmennt lið að Laufrima laust fyrir klukkan 16 í dag. Reyk lagði út um glugga en þegar slökkviliðið kom á staðinn kom í ljós að reyknum olli pottur frá eldavél. Þetta verkefni gekk vel og fljótt fyrir sig og að lokum var íbúðin reykræst.

Stelpurnar þurfa á góðum stuðningi að halda í Olís-deildinni næsta vetur.

Handknattleiksdeild Fjölnis ákvað það í vikunni að senda lið til keppni í Olís-deild kvenna næsta vetur. Fyrir áramótin var gefin út viljayfirlýsing með stuðningi allra foreldra og núverandi leikmanna og nú var enn eitt skrefið tekið í átt að þessu áhugaverða verk­efni.

Kvennalið Fjölnis er mjög efnilegt og verður spennandi að fylgjast með stelpunum í baráttunni við sterkustu lið landsins. Þá hafa ennfremur verið gerðir samningar til þriggja ára við leikmenn og framtíðarleikmenn liðsins allt niður í fjórða flokk.

Það fór vel á því að efnilegustu skákmenn Íslands, þau Vignir Vatnar Stefánsson og Nansý Davíðsdóttir, kæmu hnífjöfn í mark með fullt hús á gífurlega fjölmennu barna-og unglingaskákmóti sem Rótarýklúbburinn Reykjavík Grafarvogur og Skákdeild Fjölnis héldu í Rimaskóla í gær.

Skákhátíðin í Rimaskóla togaði til sín 115 grunnskólakrakka á öllum aldri, drengi og stúlkur. Ábyggilega hafa glæsilegir vinningar og ekki síður pítsuveislan og ókeypis bíómiði haft sitt að segja því allt var þetta í boði Rótarýklúbbsins.

Jón L. Árnason stórmeistari og heimsmeistari unglinga árið 1977 og Rótarýfélagi var heiðursgestur mótsins og lék fyrsta leikinn fyrir Óskar Hákonarson í skák hans við Vigni Vatnar.

Í framhaldinu hófst taflmennskan út um allan sal og inn um ganga Rimaskóla. Mótið gekk einstaklega vel fyrir sig þrátt fyrir hálftíma seinkun við innritun þegar löng röð myndaðist við skráningarborðið. Eftir fjórar umferðir var öllum keppendum boðið upp á pítsur og safa sem runnu ljúft niður í skákmeistarana. Strax að móti loknu fór fram glæsileg verðlaunahátíð.

Tíu efstu skákmenn mótsins og þrjár efstu stúlkurnar fengu gjafabréf upp á 4000 – 5000 kr. Auk þess voru dregnir út sjö happadrættisvinningar frá nammibar Hagkaups. Allir 115 keppendurnir luku keppni með glæsibrag og fengu ókeypis bíómiða í Laugarásbíó að launum.

Rótarýklúbburinn Reykjavík Grafarvogur á heiður skilið fyrir frábæran stuðning við unga og áhugasama skákkrakka. Rótarýklúbburinn var með þessari skákhátíð að halda upp á Rótarýdaginn og vöktu um leið athygli á fyrirmyndar félagsstarfi í hverfinu. Þar völdu þeir Skákdeild Fjölnis og undirbjuggu hátíðarhöldin í samstarfi við Helga Árnasonformann skákdeildarinnar sem var skákstjóri ásamt Páli Sigurðssyni.

Í verðlaunasætum auk þeirra Vignis Vatnars og Nansýjar voru þeir Dawid Kolka Álfhólsskóla, bræðurnir Óskar Víkingur og Stefán Orri Davíðssynir Ölduselsskóla, Jóhann Arnar Finnsson ogJoshua Davíðsson úr Rimaskóla, Alexander Mai Laugarnesskóla, Benedikt Þórisson og ArnarM. Heiðarsson Hörðuvallaskóla. Þær Andrea Rut Friðriksdóttir Rimaskóla og Elsa Kristín Arnaldardóttir Hofsstaðaskóla hlutu 2. og 3. verðlaun stúlkna og er frammistaða þeirrar fyrrnefndu athyglisverð því að hún var að taka þátt í sínu fyrsta skákmóti.

Reykjavíkurborg mun innan tíðar bjóða út ýmis stærri viðhaldsverkefni í fasteignum borgarinnar. Áætlunin var kynnt í borgarráði í dag. Verja á 800 milljónum króna til 355 verkefna í 170 fasteignum borgarinnar.  Þetta er annað árið í röð sem 800 milljónum er bætt við hefðbundið viðhald með sérstakri fjárveitingu á fjárfestingaáætlun.

Flest átaksverkefnanna eru viðhald skóla- og frístundamannvirkja, en til þeirra fara 688 milljónir enda eru þar flest og stærstu mannvirkin.  Sérstök áhersla er lögð á regnþéttingu ytra byrðis fasteigna og er það framhald verkefna sem unnið var að á síðasta ári. Einnig verður lögð áhersla á málun innanhúss.

Meðal helstu verkefna eru endurgerð þaks Austurbæjarskóla, ný utanhússklæðning Árbæjarskóla, þakviðgerðir og ýmsar endurbætur á Breiðholtsskóla, endurnýjun þaka og  þakglugga á Hagaskóla og í Hlíðaskóla hefst 1. áfangi í endurgerð kennslustofa.  Þá verður útveggjaklæðning á Ingunnarskóla endurbætt, þök verða endurnýjuð á leikskólunum Nóaborg, Fálkaborg og Mýri.  Jafnframt verða ýmis konar endurbætur gerðar utanhúss á leikskólunum Arnarborg og Bakkaborg.  Þá verður ytra byrði Ráðhússins háþrýstiþvegið og sílanbaðað.

Í mörgum fasteignum verða gerðar ýmsar endurbætur vegna eldvarna og víða verða brunaviðvörunarkerfi endurnýjuð. Loftræsikerfi verða víða endurbætt eða endurnýjuð.

Um helgina verður auglýst eftir verktökum sem vilja vera á lista Reykjavíkurborgar þegar einstaka verkþættir eru boðnir út.

Í kynningu fyrir borgarráði í dag var sýnt hvernig fjármunir skiptast eftir hverfum, fagsviðum og  iðngreinum.

Tengt efni:

• Kynning: Átaksverkefni fasteigna 2015.