Aðgerðaáætlun í úrgangsmálum samþykkt í borgarstjórn
0
Aðgerðaáætlun í úrgangsmálum Reykjavíkurborgar var samþykkt í borgarstjórn í dag. Áætlunin gildir fyrir árin 2015 – 2020 og er markmið hennar að draga úr myndun úrgangs og auka endurnýtingu og endurvinnslu.
Reykjavíkurborg vill sýna gott fordæmi með vistvænum lausnum og ábyrgri meðhöndlun úrgangs stofnana borgarinnar. Borgin myndaði því starfshóp með kjörnum fulltrúum Reykjavíkurborgar til að vinna að aðgerðaáætluninni. Leitað var til hagsmunaaðila og borgarbúa um ábendingar og athugasemdir. Hópurinn var að störfum frá vormánuðum 2013 og hafði hann góða þjónustu við íbúa og hagkvæmni við hirðu og meðhöndlun úrgangs að leiðarljósi.
„Þessi aðgerðaáætlun snýst um meiri flokkun og minni úrgang í markvissum skrefum til 2020. Þetta gekk vel með pappírinn. Nú kemur plastið og glerið og svo koll af kolli,“ segir Dagur B. Eggertsson borgarstjóri. „Þetta sparar hjá okkur öllum til lengri tíma. Þeir sem flokka meira geta líka lækkað hjá sér sorphirðugjaldið. Þeir sem flokka minna borga fyrir það og ég held að þetta sé skynsamleg stefna því hún stuðlar að betra umhverfi og vinnur gegn loftslagsbreytingum.“
42 aðgerðir og tíu leiðarljós
Aðgerðaáætlun borgarinnar felst í 42 aðgerðum. Einnig eru sett fram tíu leiðarljós í málaflokknum og megináherslur um þjónustu grenndar- og endurstöðva. Söfnum plasts við heimili sem hófst í Reykjavík í október 2015 er hluti af aðgerðaráætluninni.
Kannanir hafa sýnt að borgarbúar eru duglegir að flokka til endurvinnslu og vilja flokka enn meira og kemur aðgerðaráætlunin til móts við þann vilja. Kostnaður við umbúðir er hluti af kostnaði hverrar vöru en neytendur geta haft mikil áhrif til að draga úr umbúðum með innkaupavenjum sínum. Sérstök áhersla er lögð á úrgangsforvanir þar sem miðað er að því að draga úr þeim úrgangi sem myndast og þar með að draga úr fjárhagslegum og umhverfislegum kostnaði meðhöndlunar. Þannig eru níu aðgerðir sem snúa beint að úrgangsforvörnum svo sem að draga úr notkun einnota umbúða, minnka matarsóun og hvetja til endurnotkunar hluta.
Fjárhagslegur og umhverfislegur ávinningur
Úrgangsmál eru hluti af lögbundinni grunnþjónustu sveitarfélaga og mikilvægur málaflokkur í rekstri þeirra. Skilvirk meðhöndlun úrgangs hefur í för með sér fjárhags-, samfélags- og umhverfislegan ávinning fyrir sveitarfélög og íbúa þeirra. Aðgerðaáætlun í úrgangsmálum er ætlað að auka yfirsýn og gegnsæi málaflokksins og auðvelda skipulagningu og forgangsröðun verkefna sem ráðast skal í.
Reykjavíkurborg hefur farið þá leið að bjóða íbúum að velja það þjónustustig í úrgangsmálum sem hentar þeim og að greiða fyrir þjónustuna í takt við það. Þannig geta íbúar valið hvort þeir vilja nýta sér þjónustu grenndar- eða endurvinnslustöðva eða hvort þeir kjósi að úrgangur sé sóttur á heimili þeirra.
Dæmi um aðgerðir:
- Plastsöfnun við heimili í græna tunnu er þegar hafin. Safnað verður 2.400 tonnum af plasti á ári.
- Átaki gegn umbúðanotkun verður hrundið af stað í Reykjavík
- Íbúar fái fræðslu um og hvatningu til að stunda heimajarðgerð
- Niðurgröfnum grenndarstöðvum verði komið fyrir í áföngum á fjölförnum stöðum þar sem byggð er hvað þéttust og landrými takmarkað
- Komið verði á glersöfnun á öllum grenndarstöðvum í áföngum.
- Boðið verði upp á hirðu heimilisúrgangs úr niðurgröfnum ílátum
- Söfnun á lífrænum úrgangi við heimili
- Gerð verði tilraun með söfnun á lífrænum úrgangi frá heimilum borgarbúa og honum komið til gas- og jarðgerðar
Aðgerðaáætlun í úrgangsmálum 2015 – 2020
Follow
Í ljósi umræðu um helgarmáltíðir hjá félagsmiðstöðinni Borgum í Grafarvogi er rétt að árétta nokkur atriði. Borgir eru meðal 17 félagsmiðstöðva sem Reykjavíkurborg rekur þar sem boðið er upp á hádegismat og kaffiveitingar alla virka daga en ekki um helgar.
