Ein ánægjulegasta breytingin í fjárhagsáætlun borgarinnar 2017 er hækkun frístundakortsins upp í 50.000 krónur. Nú hefur það verið í 35.000 kr undanfarin tvö ár en hækkar um næstu áramót.

Frístundakortið er mjög mikilvægt til að gera öllum kleift að stunda íþróttir eða aðrar tómstundir enda getur verið ansi dýrt að læra á hljóðfæri eða æfa íþróttir, jafnvel þótt það sé bara ein íþróttagrein.

Kortið er ótrúlega mikið notað af krökkunum í borginni og fjölskyldum þeirra en ég vona að við getum fengið enn fleiri til að nota frístundakortið og munum við fara í sérstakt kynningarátak á völdum stöðum í borginni þar sem notkun á kortinu er minni en annarstaðar. 

Follow

Mánudaginn 19. desember, klukkan 08:00-19:00, verður heitavatnslaust í Folda-, Húsa- og Hamrahverfi í Grafarvogi. Gera á við stofnæð sem liggur inn í hverfið og gaf sig í nóvember. Þá var gerð bráðabirgðaviðgerð á æðinni en nú á að ganga tryggilega frá henni fyrir veturinn.

Starfsmenn Veitna biðjast velvirðingar á þessum óþægindum svona í hámarki jólaundirbúningsins en talið var mikilvægt að nýta hið milda veður sem nú ríkir á höfuðborgarsvæðinu til verksins. Svona lokanir hafa mun meiri og verri áhrif þegar kaldara er í veðri. Með þessari viðgerð er vonast til að komið verði í veg fyrir frekari bilanir og að sunnanverður Grafarvogur njóti öruggrar afhendingar heits vatns til neyslu og húshitunar.

Fólki er ráðlagt að hafa hafa glugga lokaða og útidyr ekki opnar lengur en þörf krefur til að koma í veg fyrir að híbýli kólni. Einnig að gæta þess að skrúfað sé fyrir alla heitavatnskrana til að draga úr hættu á slysi eða tjóni þegar vatnið kemst á að nýju.  Starfsfólk Veitna biðst velvirðingar á óþægindum vegna þessa.

Follow

Fjölnir vann Bose mótið eftir að hafa burstað Íslandsmeistara FH 6-1 í úrslitaleik í Egilshöll í kvöld.

Bojan Stefán Ljubicic leikmaður Keflavíkur er á reynslu hjá Fjölni þessa dagana og hann skoraði fyrsta mark leiksins á 14. mínútu með glæsilegu skoti upp í samskeytin. FH jafnaði með marki Atla Guðnasonar mínútu síðar.

Fjölnir rúllaði svo yfir Hafnfirðingana með fimm mörkum í viðbót. Ægir Jarl Jónsson kom þeim yfir með skallamarki og Viðar Ari Jónsson skoraði svo gott mark á lokamínútu fyrri hálfleiks.

Þórir Guðjónsson lyfti boltanum yfir Vigni Jóhannsson markvörð FH eftir klukkutíma leik og Ingimundur Níels Óskarsson skoraði fimmta markið af stuttu færi tíu mínútum síðar. Hinn 18 ára gamli Ingibergur Kort Sigurðsson skoraði svo sjötta markið á lokamínútunum.

Fjölnir er því Bose meistari árið 2016 og að verðlaunum fékk liðið Bose hljóðkerfi í búningsklefann.

Þórir Guðjónsson leikmaður Fjölnis fékk svo verðlaun fyrir að vera leikmaður mótsins

Markaskorið sáu þessir um:

1-0 Bojan Stefán Ljubicic (’14)
1-1 Atli Guðnason (’15)
2-1 Ægir Jarl Jónsson (’35)
3-1 Viðar Ari Jónsson (’45)
4-1 Þórir Guðjónsson (’63)
5-1 Ingimundur Níels Óskarsson (’70)
6-1 Ingibergur Kort Sigurðsson (’88)

Follow

jóla, jóla …Opinn vinnustofa í Gufunesi í  „Gullhöllin“ hús nr. 8 hjá Íslenska Gámafélaginu.
Listamennirnir Sigrún Lára Shanko og Þóra Björk Schram opna vinnustofu sína ásamt hönnuðinum Ólafi Þór Erlensdssyni, grænmetiskokkinum Hönnu Hlíf Bjarnadóttur, rithöfundunum Ingibjörgu Kr. Ferdinandsdóttur, Þorgrími Kára Snævarr og Gunnari Helgasyni leikara.

Dagskrá:
Sigrún Lára mun sýna textíl myndverk og hönnun sína ásamt öðrum myndverkum og kortum.
Þóra Björk verður með tilboð á púðum og kynnir einnig teppi, málverk og kort unnin út frá málverkum hennar.
Þóra Björk og Ólafur Þór sýna og kynna samvinnuverkefni sitt „Spot“ og „Spor“ húsgögnin sem þau unnu fyrir HönnunarMars 2016.
Ólafur Þór verður einnig með hönnunina „Hár úr Hala“ til kynnis og sölu.
Upplestur verður úr bókinni „Rödd hafsins“ milli kl 15.00-17.00, en Ingibjörg Kr. Ferdinandsdóttir höfundur bókarinnar les sjálf upp úr verkinu.
Kl. 16.00-18.00 mun Þorgrímur Kári Snævarr kynna og lesa úr skáldsögu sinni “ Skögla“ en fjallar hún um dverg í jötunheimum.
Gunnar Helgason leikari og barnabókarithöfundur les með leikrænum tilburðum úr nýjustu bókinni sinni kl 17.00-19.00
„Pabbi prófessor“ og áritar plaggöt.
Hanna Hlíf Bjarnadóttir grænmetiskokkur mun kynna bókina sína „Eldhús grænkerans“ og gefur fólki að smakka kl. 18.00-19.00.

Boðið verður upp á mjög jólalegar veitingar og nokkrir heppnir gestir geta dottið í lukkupottinn og fengið jólapakka með sér heim.
Allir eru velkomnir.

Follow

Það voru kátir krakkar úr Rimaskóla sem heimsóttu Grafarvogskirkju í morgun.

Krakkarnir léku á hljóðfæri, sungu, hlustuðu á sögu og höfðu gaman.

Voru þau öll til fyrirmyndar.

Follow

“ JólaVox 2016 verður haldið í Grafarvogskirkju laugardaginn 17. des kl 17. Við lofum notalegu andrúmslofti, hátíðlegri dagskrá og skemmtilegum tónleikum. JólaVox kakó og smákökusmakk eftir tónleika.

Með okkur verða meðal annars beatboxari og óvæntir gestir ásamt glæsilegri hljómsveit.

2500kr inn, frítt fyrir börn yngri en 12 ára og eldri borgara afsláttur.

Sjáum ykkur sem flest! „

Follow

Jólabingó í Borgum. 14 desember 2016. Mikið af frábærum vinningum.

Follow

Á laugardaginn kemur, 17.desember,  ætla meistaraflokkar boltagreina Fjölnis að sameinast og spila handbolta,fótbolta og körfubolta í fjórum blönduðum liðum í íþróttahúsinu í Dalhúsum.

Gleðin byrjar kl 16:00 og stendur yfir til 18:00 ( nánari dagskrá að neðan). Hvert lið hefur fyrirliða og hafa náðst samningar við Aron Sigurðarson leikmann Tromsö og Guðlaug Victor Pálsson leikmann Esbjerg  að taka það hlutverk að sér. Samningar standa yfir við handboltamann og körfuboltamann.

Dagskrá:
16:00 Liðin kynnt út á völl ( Kynnir Ingvar Örn Ákason)
16:10 Leikir í körfubolta
16:30 Þriggja stiga keppni
16:45 Leikir í handbolta
17:10 Hálfleikur Svavar Elliði
– Happadrætti
– Áttan
– Donni og Malín
– Kristmundur Axel
– Miðjuskot handbolti
17:50 Leikir í fótbolta
18:10 Dagskrá lokið

Dómarar verða:
Gunnar Jarl Jónsson
Gunnar Óli Gústafsson

Hægt að kaupa sig inn í lið og spila með einn leik á 5.000 k

Happadrættismiðinn kostar 500 kr. og eru vinningarnir eftirfarandi:
Árituð treyja af leikmönnum sem taka þátt
Fontana heilsulind á Laugarvatn, spa fyrir tvo X3
Hummel taska *2
HSÍ landsliðstreyja
Pizza og gos af matseðli frá Shake&pizza *4
Pizzuveisla fyrir tvo á Gullöldinni *5
Bíómiðar fyrir tvo *5

Uppboð á eftirfarandi treyjum stendur yfir til 13.desember kl 12:00.
1) Bandaríska landsliðstreyja Arons Jóhannssonar,
2) Esbjerg treyja Guðlaugs Victors Pálssonar,
3) Íslenska landsliðstreyja Ægis Þórs Steinarssonar,
4) Ausburg treyja Alfreðs Finnbogasonar.
5) Fjölnistreyja Harðar Axels Vilhjálmssonar.
6) Treyja Gunnars Steins Jónssonar

Lágmarksboð í hverja treyju er 10.000 kr. Sendið tilboð í treyjur og upplýsingar um þann sem býður á unnar@fjolnir.is.

Um leikinn:
Boban Ristic hefur unnið undanfarin árin í íþróttamiðstöðinni í Grafarvogi. Hann setti strax svip sinn á hlutina og hefur unnið frábært starf. Það líkar öllum vel við meistara Boban.

Núna er faðir hans í Serbíu langt leiddur af krabbameini og á lítið eftir. Boban er að sjálfsögðu farinn út að njóta hugsanlegra síðustu vikna með föður sínum. Þetta er ekki gefins að ferðast svona á milli og eins og hann gerir.

Núna þarf Fjölnisfjölskyldan að sameinast – eigum góðan dag saman í Dalhúsum með skemmtilegri dagskrá og hjálpum okkar manni á sama tíma, hann á það skilið.

Hægt er að skoða myndir hérna……

Follow

Sveitarfélögin sex á höfuðborgarsvæðinu undirrituðu í byrjun mánaðarins samninga um innleiðingu Borgarlínu – léttlesta- eða hraðvagnakerfis um höfuðborgarsvæðið.

Borgarlínan hefur verið í undirbúningi um nokkurt skeið. Sveitarfélögin vinna nú með hugmyndir hvar biðstöðvar og leiðir hennar muni liggja en endanlegar tillögur koma frá innlendum og erlendum sérfræðingum í byrjun næsta árs.

Dagur B. Eggertsson borgarstjóri segir það tímamót að sveitarfélög á höfuðborgarsvæðinu, öll sem eitt, séu með þessu að setja stefnuna á hágæða almenningssamgöngur, hraðvagna eða léttlestir.

Sveitarfélögin horfa til þess að Borgarlínan dragi úr umferðartöfum í framtíðinni og ljóst er að til mikils er að vinna. Á næstu 25 árum er búist við að íbúum höfuðborgarsvæðisins fjölgi um a.m.k. 70.000. Það jafngildir íbúafjölda í Hafnarfirði, Garðabæ og Kópavogi í dag og að óbreyttu fjölgar einkabílum á götunum um 40.000 á þessum tíma. Verði ekkert að gert mun tafatími í umferðinni margfaldast. Umferðarspár sýna að þrátt fyrir mjög miklar fjárfestingar í nýjum umferðarmannvirkjum myndu umferðartafir aukast verulega ef þeim fjölgar ekki sem nýta sér aðra ferðamáta en einkabíl. Þess vegna eru afkastamiklar almenningssamgöngur mikilvægt lífsgæðamál fyrir íbúa höfuðborgarsvæðisins.

Þorsteinn R. Hermannsson samgöngustjóri Reykjavíkur segir gott léttlesta- og hraðvagnakerfi auka afkastagetu samgöngukerfisins verulega, ein akrein Borgarlínu geti afkastað á við 2-4 akreinar fyrir almenna umferð. Borgarlínan verði lykilverkefni næstu ára í samgöngum á höfuðborgarsvæðinu og jafnframt hryggjarstykkið í skipulags- og uppbyggingaráætlunum. Reynsla annarra þjóða sýni að svæði nálægt borgarlínunni verði eftirsótt til búsetu og starfsemi.

Áslaug Hulda Jónsdóttir formaður bæjarráðs Garðabæjar, Haraldur Sverrisson bæjarstjóri Mosfellsbæjar, Dagur B. Eggertsson borgarstjóri Reykjavíkur, Ásgerður Halldórsdóttir bæjarstjóri Seltjarnarness, Ármann Kr. Ólafsson bæjarstjóri Kópavogs og Haraldur L. Haraldsson bæjarstjóri Hafnarfjarðar.

Kostnaðurinn við að koma kerfinu upp mun hlaupa á tugum milljarða og víða erlendis kemur ríkið inn í fjármögnun verkefna af þessari stærðargráðu.  Á vef samtaka sveitarfélaga á höfuðborgarsvæðinu (SSH) kemur fram að stofnun sjálfstæðs félags sem tekst á við uppbygginguna sé í undirbúningi.  Þar má einnig sjá skýrslur og kynningarefni tengt verkefninu >  skoða vefsíðu ssh.is/borgarlina

Follow