Snjóhreinsun og hálkuvarnir

Snjóvaktin

Snjóvakt með skipulögðum bakvöktum er í Reykjavík frá því í nóvember til loka mars (frá 46. viku til loka 13. viku) og utan þess tíma eftir þörfum. Aðstæður eru metnar oft, meðal annars kl. 3:00 á nóttunni.  Starfsmenn Reykjavíkurborgar og verktakar á vegum borgarinnar eru ræstir út eftir þörfum.

Í grófum dráttum má skipta verkefnum við snjóhreinsun og hálkueyðingu í tvennt eftir því hvort um er að ræða umferðargötur eða stíga og gangstéttar.  Aðstæður bjóða upp á mismunandi tækjakost og aðferðir, en markmiðið er það sama: að tryggja greiðar leiðir.

Stofnbrautir, strætóleiðir og fjölfarnar safngötur njóta forgangs, en miðað er við að stofnbrautir og strætóleiðir séu færar fyrir kl. 7:00 að morgni og að hreinsun annarra megin umferðargatna sé lokið fyrir kl. 8:00.

Stofnstígar svo sem göngu- og hjólastígar milli borgarhluta fá forgang í hreinsun og síðan helstu gönguleiðir að strætóbiðstöðvum og skólum sem eiga að vera greiðfærar fyrir kl. 8:00 virka daga. Aðrir almennir stígar eiga að klárast fyrir hádegi. Síðan 36 tímum eða daginn eftir að snjór hættir að falla er hægt að ljúka hreinsun stíga.

„Á hinum fullkomna degi þegar góð samstilling næst við máttarvöldin og hvorki frýs né bætir í snjó eftir að búið er að skafa eða sanda gengur áætlunin eftir. Reynslan kennir okkur þó að oft þarf að fara aftur á byrjunarreit og þá reynir á að íbúar sýni skilning á aðstæðum og skilji að tímaáætlanir geta gengið úr skorðum. Við búum nú einu sinni á Íslandi. “

Hvenær er gatan mín rudd?

Íbúar vilja eðlilega vita hvenær þeirra gata verður rudd. Eins og segir hér að framan njóta stofnbrautir, strætóleiðir og fjölfarnar safngötur forgangs.

Íbúagötur eru aðeins hreinsaðar séu þær þungfærar einkabílum, mikil hálka, eða snjódýpt meiri en 15 cm. Út af  þessari reglu hefur þó verið brugðið ef talin er hætta á að frysti þegar snjóhryggir hafa myndast.  Snjóhreinsun takmarkast við að gera þessar götur akfærar og við hálkueyðingu er ýmist notaður sandur eða salt. Við snjóhreinsun íbúagatna er líklegt að við innkeyrslur myndist snjóruðningar sem Reykjavíkurborg sér ekki um að hreinsa. Það fellur því í hlut íbúanna sjálfra að hreinsa burt snjó úr innkeyrslum.

Hægt er að fylgjast með gangi snjóhreinsunar í Borgarvefsjá. – en þar undir kassanum „lifandi gögn“ er hægt að velja yfirlit yfir akstur hreinsunartækja annars vegar á umferðargötum og hins vegar á göngu- og hjólastígum.  Hægt er að skoða upplýsingar um akstur þeirra allt upp í síðustu 8 klukkustundirnar.  Öll tæki sem eru reglubundið í snjóhreinsun hafa senda, en tilfallandi verktakar eru undanskildir.

Salt eða sandur

Á umferðargöturnar fara stórvirk snjóruðningstæki sem komast hratt yfir og þau nota salt til hálkueyðingar. Hér hefur í auknum mæli verið notast við saltpækil og taka á í notkun nýja saltpækilstöð sem auðveldar alla blöndun og stýringu á styrk pækils. Markmiðið er að tryggja öryggi með eins litlu saltmagni og mögulegt er.

Á stíga og gangstéttar fara sérútbúnar dráttarvélar og til hálkueyðingar er notaður þveginn sandur (0 – 8 mm).

Mögulegt er að fá saltkassa í húsagötur þar sem aðstæður eru erfiðar, til dæmis í bröttum brekkum. Þjónustuver Reykjavíkurborgar veitir nánari upplýsingar í síma 4 11 11 11.

Fyrirspurnir og/eða ábendingar

Við viljum gjarnan fá ábendingar um það sem betur má fara. Þú getur sett inn ábendingu og upplýsingar í ábendingakerfið okkar >>> SETJA INN ÁBENDINGU <<< eða hringt í þjónustuver Reykjavíkurborgar, Borgartúni 12 – 14, í síma 4 11 11 11. Starfsmenn þar færa þá ábendingu inn í kerfið. Opið kl. 8:20 – 16:15 alla virka daga. Netfang: upplysingar@reykjavik.is. Á snjóþungum dögum er annríki mikið í þjónustuveri og biðjum við íbúa um að sýna biðlund á slíkum stundum.