Það var mikið um dýrðir og fjölmenni eftir því á jólaskákæfingu Fjölnis sem haldin var í Rimaskóla 13. desember. Líkt og í fyrra voru það hjónin Valgerður og Steinn sem útdeildu girnilegum veitingum í skákhléi til krakkanna . Í lok æfingar gáfu þau hverjum þátttakanda velfylltan gjafapoka með allskyns glingri, hollu og óhollu sem gerðu mikla lukku. Allir þátttakendur tóku þátt í skákmóti, fimm umferðum, og var virkilega tekist á við taflborðið og barist um hvern vinning.

Virðingin gegn andstæðingnum er alltaf frumskilyrði á Fjölnisæfingu. Handaband í upphafi og við endi hverrar skákar er til merkis um það. Skákæfingar Fjölnis hafa verið afar vel sóttar í vetur og „uppselt“ á hverja æfingu en miðað er við hámark 40 krakka. Leiðbeinendur á jólaskákæfingunni voru fjórir.

Auk Helga Árnasonar formanns deildarinnar sem stýrði æfingunni voru það Leó Jóhannesson, Jóhann Arnar Finnsson og Sigríður Björg Helgadóttir sem liðsinntu efnilegum og áhugasömum skákkrökkum. Á jólaæfingunni urðu í efstu sætum þeir Kristján Dagur, Arnór Gunnlaugsson, Bjarki Kröyer, Sæmundur Árnason, Eiríkur Emil Hákonarson og Aðalbjörn Kjartansson.

Í stúlknaflokki var að finna marga verðlaunahafa frá Jólaskákmóti grunnskóla Reykjavíkur. Þar urðu í efstu sætum Ylfa Ýr, Embla Sólrún, og Sóley Kría.

Ókeypis skákæfingar Fjölnis hefjast aftur á nýju ári. Þær eru haldnar alla miðvikudaga kl. 16:30 – 18:00 í Rimaskóla og er gengið um íþróttahús.

Jólaball í Grafarvogskirkju sunnudaginn 17. desember kl. 11:00. Við syngjum saman jólalög, hlustum á tónlistaratriði, dönsum í kringum jólatré og fáum jólasveina í heimsókn.

Umsjón með stundinni hafa séra Guðrún Karls Helgudóttir og Þóra Björg Sigurðardóttir.

Undirleikari er Stefán Birkisson.

Óskasálmar jólanna verða í Kirkjuselinu kl. 13:00. Séra Sigurður Grétar Helgason þjónar.

Organisti er Hilmar Örn Agnarsson og forsöngvari er Björg Þórhallsdóttir.

JólaVox 2017 verður í Grafarvogskirkju 16. des kl. 16:00

Lofað verður óvæntum, spennandi og skemmtilegum tónleikum. JólaVox kakó, smákökur og mandarínur verða í boði eftir tónleikana.

Pálmi snigill fer á kostum á píanóinu og leikur við hvern sinn fingur. Arnar raddlistamaður þenur rödd sína og býr til töfrandi takta og Hilmar Örn Agnarsson stjórnar herlegheitunum. Það kostar 2.500 kr á tónleikana, en frítt fyrir börn 12 ára og yngri.

Sjáumst í JólaVox stuði!

Kór Grafarvogskirkju og barnakór Grafarvogskirkju ætla að halda saman notalega jólatónleika miðvikudaginn 13. desember kl. 19:30 í Grafarvogskirkju.

Einsöngvarar verða Gissur Páll Gissurarson, Dísella Lárusdóttir og Þórdís Sævarsdóttir.

Stjórnendur kóranna eru Hákon Leifsson og Sigríður Soffía Hafliðadóttir.

Miðaverð er 3.000 kr.

Góðan dag,

Það er okkur sönn ánægja að láta ykkur vita af því að allir sveinkar geta fundið úrval af fallegu Fjölnis vörum á skrifstofu Fjölnis á milli kl  10:00 og  11:30 einnig er hægt að kaupa vörurnar alla virka daga frá klukkan 13:00 og 15:00.

Gjafir sem gleðja

Vörurnar eru á sérstöku tilboði:

Kveðja starfsfólk Fjölnis.

Messa kl. 11:00 í Grafarvogskirkju. Séra Grétar Halldór Gunnarsson prédikar og þjónar. Tónlistaratriði frá Tónlistarskólanum í Grafarvogi. Kór Grafarvogskirkju leiðir söng og organisti er Hákon Leifsson. Eftir messu verður verðulaunaafhending og uppboð á jólakúlunum sem sendar voru inn í jólakúluhönnunarkeppni Grafarvogskirkju. Ágóðinn af uppboðinu rennur til Píeta Ísland, sjálfsvígsforvarnarsamtök.

Sunnudagaskóli verður á neðri hæð kirkjunnar kl. 11:00. Brúðuleikhús, söngvar, sögur og límmiðar.Umsjón hafa Þóra Björg Sigurðardóttir og Hólmfríður Frostadóttir. Undirleikari er Stefán Birkisson.

Selmessa í Kirkjuselinu kl. 13:00. Séra Arna Ýrr Sigurðardóttir prédikar og þjónar. Tónlistaratriði frá Tónskóla Hörpunnar. Vox Populi syngur og organisti er Hákon Leifsson.

Rimaskóli heldur áfram að láta að sér kveða á grunnskólaskákmótum og nú í byrjun aðventu, sunnudaginn 3. des.  urðu þau einstöku úrslit á Jólaskákmóti grunnskóla Reykjavíkur að skáksveitir Rimaskóla urðu í þremur efstu sætum mótsins í keppnni  4. – 7. bekkjar af þeim 22 skáksveitum sem þátt tóku í mótinu. 

A sveit Rimaskóla sigraði örugglega með 20 vinninga af 24 mögulegum. Stúlknasveit Rimaskóla, stelpur í 5. og 6. bekk, sýndi það og sannaði að skákin höfðar ekki síður til stelpna og þessar efnilegu skákstelpur náðu 2. sæti. B sveit Rimaskóla varð síðan í 3. sæti. Verðlaunin sem veitt voru á mótinu fóru öll til Rimaskóla. Fyrr um morguninn höfðu nemendur í 1. – 3. bekk keppt á jólaskákmótinu og þar lentu báðar skáksveitir Rimaskóla í verðlaunasætum, stelpurnar í 1. sæti stúlkna og blandaða sveitin í 3. sæti mótsins.  Það eru þeir Helgi Árnason skólastjóri og Björn Ívar Karlsson skákkennari sem halda utan um skákstarf skólans og hefur áhuginn líkast til aldrei verið meiri en núna enda skákin einstaklega skemmtileg hugaríþrótt ef vel er að henni staðið. 

Aðalmynd :1616 Jólaskákmeistarar grunnskóla Reykjavíkur 2017 eru fjórir bekkjarbræður í 7-EH: Kjartan Gunnar, Anton Breki, Arnór og Joshua

Mynd: 1612 Jólaskákmeistarar grunnskóla stúlkur eru: Batel 5-IMF, Sara Sólveig 5-IMF, Embla Sólrún 6-HS og Eva Björg 5-EDG

Félag sjálfstæðismanna í Grafarvogi heldur opinn fund um almenn löggæslumálefni í Grafarvogi  í félagsheimilinu að Hverafold 1-3 2. hæð, en húsið opnar kl.10:30.
Laugardagsfundur um löggæslumál í Grafarvogi
9. desember 2017 kl. 11.00

Gestur fundarins verður Kristján Ólafur Guðnason, aðstoðaryfirlögregluþjónn og stöðvarstjóri á lögreglustöð 4 við Vínlandsleið.

Kristján mun fjalla um löggæslumá í hverfinu og stöðu afbrota á svæðinu.

Spurning hvort eftirlitsmyndavélar og aukin nágrannavarsla geti ekki auðveldað uppljóstrun að þeim og stuðlað að forvörnum.

Kaffi og kruðerí í boði.
Allir velkomnir á meðan húsrúm leyfir.
FSG

Það er fjölbreyttur sunnudagur framundan í Grafarvogssöfnuði.

Bangsablessun kl. 11:00 á efri hæð kirkjunnar. Við hvetjum börnin til að taka bangsana sína með í guðsþjónustu í kirkjuna. Umsjón með stundinni hafa séra Sigurður Grétar Helgason, Þóra Björg Sigurðardóttir og Hólmfríður Frostadóttir. Undirleikari er Stefán Birkisson.

Selmessa í Kirkjuselinu kl. 13:00. Séra Guðrún Karls Helgudóttir prédikar og þjónar. Vox Populi leiðir söng og organisti er Hilmar Örn Agnarsson.

Aðventuhátíð kl. 20:00. Guðmundur Andri Thorsson flytur hugvekju. Fermingarbörn lesa ritningarvers. Kór Grafarvogskirkju, Vox Populi og barnakór Grafarvogskirkju syngja. Stjórnendur kóranna eru Hákon Leifsson, Hilmar Örn Agnarsson og Sigríður Soffía Hafliðadóttir.