Á föstudag býður borgarstjóri til opins málþings í Ráðhúsi Reykjavíkur um uppbyggingu íbúðarhúsnæðis í borginni. Kynnt verður samstarf í húsnæðismálum, sem og áherslur Reykjavíkurborgar til að mæta óskum íbúa og þörf fyrir húsnæði.

Dregin verður upp heildstæð mynd af framkvæmdum og framkvæmdaáformum á húsnæðismarkaði í Reykjavík. Áhersla verður lögð á samþykkt verkefni og framkvæmdir sem eru nýlega hafnar, en einnig verður gefin innsýn í verkefni á undirbúningsstigi.

Er þörf fyrir meiri fjárfestingu?

Á málþinginu verður kynnt ný greining á fasteignamarkaði sem Capacent vann fyrir Reykjavíkurborg.  Kannað var hverjar væntingar landmenn hafa til framtíðarbúsetu og á grundvelli þeirra er dregið saman yfirlit yfir hverjar  húsnæðisóskir og þarfir þeirra eru skipt upp eftir aldurhópum.  Meðal þess sem kemur fram er að flestir búast við því að næsta húsnæði þeirra verði 91 – 120 fermetra stórt með tveimur svefnherbergjum.

Í greiningunni er lagt mat á stöðu eftirspurnar og framboðs eftir húsnæði.  Sérstaklega er  fjallað um stöðu leigumarkaðarins og mögulega framtíðarþróun hans, en ný lög munu hafa áhrif á rekstur almennra leigufélaga.  Búist er við að leigumarkaður muni stækka þar sem 26% þeirra sem vilja búa í Reykjavík gera ráð fyrir að búa í leiguhúsnæði. Í dag er þetta hlutfall 20%.
Umræður verða á málþinginu í kjölfar kynningar Capacent.

Fjölmörg uppbyggingar og samstarfsverkefni

Málþingið hefst kl. 8.30 með yfirlitskynningu borgarstjóra um  íbúðauppbyggingu í Reykjavík og síðan taka við fjölmargar kynningar á uppbyggingar- og samstarfsverkefnum sem nú eru í gangi eða eru að fara af stað:

• Uppbygging á vegum Félags eldri borgara
• Brynjureitur / Hljómalindarreitur
• Hafnartorg
• Stúdentaíbúðir við Háskólann í Reykjavík
• Höfðatorg
• Uppbygging á vegum Búseta
• Almenna íbúðafélagið
• RÚV-reitur
• Byko-reitur
• Elliðabraut 4-12
• Stúdentaíbúðir á vegum FS
• Ráðstöfun á lóðum í Vogabyggð
• Bryggjuhverfi
• Ártúnshöfði – rammaskipulag
• Borgarlínan

Nánar

• Dagskrá málþingsins í heild er á reykjavik.is/ibudir
• Skráning er vel þegin í viðburði á Facebook: Nýjar íbúðir í Reykjavík

Follow

Ýmislegt hefur verið rætt og ritað um Bryggjuhverfið, tilurð þess, uppbyggingu og framtíð þess.

Árið 1992 var gerður samningur milli Björgunar og Reykjavíkurborgar um uppbyggingu íbúðar- og atvinnuhverfis á uppfyllingu austan athafnasvæðis Björgunar í Grafarvogi. Björgun fékk Björn Ólafs arkitekt i París til að annast deiliskipulag og að hluta til hönnun húsa í hverfinu. Fyrstu húsin í Bryggjuhverfinu risu árið 1998. Í skipulaginu er mikið lagt upp úr innbyrðis samræmi á yfirbragði hverfisins og að nýta nálægðina við hafið til útivistar og afþreyingar. Gerð var smábátahöfn þar sem íbúum og öðrum er búin aðstaða til frístundasiglinga og hafa margir nýtt sér þá aðstöðu. Segja má að með uppbyggingu Bryggjuhverfisins í Grafarvogi hafi Björgun unnið ákveðið frumkvöðlastarf.

Hverfið hefur þó að ýmsu leyti liðið fyrir nálægð sína við Björgun. Þegar uppbygging hófst var gert ráð fyrir að starfsemi félagsins yrði fljótlega flutt annað og hverfið mundi í framhaldin stækka til vesturs. Umræður um flutning fyrirtækisins hafa lengi staðið yfir og nú hyllir loks undir lausn á því máli.

Árið 2008 var samhliða breytingum á vinnslusvæði Björgunar ráðist í viðamiklar framkvæmdir til að afmarka betur starfsemi félagsins og íbúðahverfisins, með það að markmiði að draga sem mest úr óþægindum sem íbúar Bryggjuhverfisins verða fyrir vegna starfseminnar við Sævarhöfða. Jafnframt var gerð tillaga að breyttu deiliskipulagi sem hefur það að markmiði að ljúka uppbyggingu fyrsta áfanga hverfisins.

Það var fjallað um nýjustu tillögur í Morgunblaðinu í dag, þar sem sagt er frá því „jákvæð afstaða og samþykktir um að fullgera samninga um rýmingu hverfisins“

Hér er fréttin sem Sigtryggur skrifa.

Fyrir liggur jákvæð afstaða og samþykktir stjórnar Björgunar ehf. og stjórnar Faxaflóahafna sf. um að fullgera samninga um rýmingu Björgunar af lóðinni Sævarhöfða 33. Þetta var kynnt á fundi stjórnar Faxaflóahafna í gær. Samkvæmt samkomulaginu fær Björgun að vera með starfsemi á svæðinu fram í maí árið 2019. Þar er m.a. geymt byggingarefni sem skip félagsins dæla af hafsbotni. Íbúar í Bryggjuhverfi hafa þrýst á það í mörg ár að starfsemi fyrirtækisins verði flutti af svæðinu, enda hafi sandurinn fokið yfir hverfið.Fram kemur í minnisblaði Gísla Gíslasonar hafnarstjóra að samningarnir byggjast á því að leysa úr áratuga löngum ágreiningi um gildi samninga frá árunum 1968 og 1994 og fleiri atriði. Efnisatriði samninganna séu í meginatriðum án ágreinings milli aðila, en unnið sé að frágangi orðalags og verklýsingu.

Höfnin kaupir húseignir og laust efni

Í samningunum felst að Faxaflóahafnir sf. kaupa þrjár húseignir, sem eru á lóðinni, af Björgun ehf., alls liðlega 1.600 fermetrar, á 195 milljónir króna. Faxaflóahafnir kaupa laust efni á lóð Björgunar ehf., alls 236.000 rúmmetra, enda nýtist það efni í 1. áfanga landfyllingar utan Sævarhöfða og farghauga. Kaupverð er alls 145 milljónir. Björgun mun svo annast gerð 25.000 fermetra landfyllingar sem 1. áfanga landfyllinga samkvæmt aðalskipulagi. Kostnaður samkvæmt verksamningi þar að lútandi er 151 milljón. Verklok eru miðuð við lok árs 2019.Alls fela samningar við Björgun í sér útgjöld að fjárhæð um 553 milljónir króna fyrir Faxaflóahafnir, sem skiptast að stærstum hluta á árin 2016 og 2017 vegna húsakaupa og efniskaupa.

Í fyrirliggjandi drögum að samningum er ekkert fjallað um hugsanlega framtíðarstarfsaðstöðu Björgunar. Faxaflóahafnir höfðu boðið fram svæði á Grundartanga undir starfsemina, sem ekki þótti álitlegt af hálfu Björgunar.

Follow

Grafarvogskirkja kl. 11:00

Guðsþjónusta þar sem barn verður borið til skírnar. Sr. Arna Ýrr Sigurðardóttir prédikar og þjónar fyrir altari ásamt messuþjónum. Hákon Leifsson og Hilmar Örn Agnarsson eru organistar og Kirkjukórinn og Vox populi leiða söng.

Sunnudagaskóli á neðri hæð kirkjunnar. Umsjón hafa Þóra Björg Sigurðardóttir og sr. Sigurður Grétar Helgason. Undirleikari er Stefán Birkisson.

Kirkjuselið kl. 13:00

Jassmessa þar sem Dr. Sigurjón Árni Eyjólfsson prédikar og leikur á saxófón ásamt hljómsveit. Sr. Sigurður Grétar Helgason leiðir messuna.

Sunnudagaskóli í umsjá Matthíasar Guðmundssonar.

Kaffisopi á eftir!

Follow

Mánudaginn 10. október kl. 16:00  verður haldin kynning á skýrslunni sem Rannsóknir og Greining gerði þar sem greint er frá niðurstöðum úr Ungt Fólk rannsókninni árið 2016.  Kynningin fer fram í Rimaskóla og verður áhersla lögð á svörunina sem barst í Grafarvogi og á Kjalarnesi.

Vímuefnaneysla unglinga er skoðuð yfir tíma og ítarlega skipt niður eftir flokkum og þá eru umfangsmiklar niðurstöður er varða lýðheilsu ungmenna settar fram. Greindir eru þættir sem hafa áhrif á líkur á áhættuhegðun og vímuefnaneyslu, svo sem samband við foreldra, eftirlit og útivistartími, viðhorf til náms, líðan í skóla og þátttaka í skipulögðu íþróttastarfi og tómstundastarfi. Einnig er greint frá niðurstöðum um tölvunotkun og neteinelti meðal nemenda. 

Allir starfsmenn grunnskólanna í Grafarvogi og á Kjalarnesi eru boðnir velkomnir ásamt starfsfólki félagsmiðstöðvanna í hverfunum. Auk þess viljum við bjóða foreldra velkomna og vonumst við til þess að sem flestir komi á þennan spennandi viðburð. 

Margrét Lilja Guðmundsdóttir frá Rannsóknum og Greiningu ætlar að kynna helstu niðurstöður skýrslunnar og ræða áhættuþætti í nærumhverfi unglinga í dag. 

Við vonumst til að sjá sem flesta. 

kveðja,

Þorvaldur Guðjónsson

Verkefnastjóri frístunda og félagsauðs

valdi@reykjavik.is

Follow

Íslandsmóti ungmenna fer fram helgina 8.-9. október í Rimaskóla. Teflt er í fimm flokkum. Krýndir verða 10 Íslandsmeistarar – efsti strákur og efsta stelpa í öllum flokkunum fimm. Glæsilegar vinningar í boði.

Allir flokkar hefjast 12:00 á laugardeginum. Tekið verður við þátttökugjöldum og staðfestingu á mætingu frá 11:20 – 11:50. Þeir keppendur sem mæta eftir 11:50 geta misst sæti sitt í mótinu.

Skráning er á Skák.is (guli kassinn efst) til og með 6. október. Upplýsingar um þegar skráða keppendur má finna hér.

Þátttökugjald er krónur 1.500 og greiðist með reiðufé við staðfestingu á mætingu. Systkini borga aldrei meira en 2.500 kr. samtals. Hægt er jafnframt að greiða í gegnum netbanka fyrir mót inn á reikning 101-26-12763, kt. 58026-5409. Vinsamlegast látið nafn keppenda koma fram í skýringu og sendið kvittun á skaksamband@skaksamband.is.

Stefnt er að því að tefla í sérflokkum fyrir stráka og stelpur en mögulega þarf að sameina einstaka flokka verði þátttaka ekki nægjanleg. Sigurvegari í flokki 9-10 ára tryggir sér sæti á Norðurlandamótinu í skák sem fer fram í febrúar í Noregi. Sigurvegarar í elstu flokkunum þremur tryggja sér sæti á Unglingameistaramóti Íslands.

Verði menn jafnir í efstu sætum er teflt um Íslandsmeistaratitla en stig reiknuð um önnur sæti. Í flokki átta ára og yngri verða þó reiknuð stig um öll sæti.

8 ára og yngri (f. 2008 og síðar)

Umhugsunartími: 10 mínútur.

Fjöldi umferða: Allir keppendur tefla fimm umferðir á laugardeginum. Eftir fimm umferðir verður niðurskurður þannig að keppendur með þrjá vinninga eða fleiri komast áfram og mæta líka á sunnudegi. Umferðafjöldi á sunnudegi verður tvær til fjórar umferðir eftir heildarfjölda keppenda.

Dagskrá: Mótið hefst 12:00 á laugardeginum og 12:00 á sunnudeginum fyrir þá sem komast áfram. 

9-10 ára (f. 2006 og 2007)

Umhugsunartími: 10 mínútur.

Fjöldi umferða: Allir keppendur tefla fimm umferðir. Eftir fimm umferðir verður niðurskurður þannig að keppendur með þrjá vinninga eða fleiri komast áfram og mæta líka á sunnudegi. Umferðafjöldi á sunnudegi verður tvær til fjórar umferðir eftir heildarfjölda keppenda.

Dagskrá: Mótið hefst 12:00 á laugardeginum og 12:00 á sunnudeginum fyrir þá sem komast áfram.

11–12 ára (f. 2004 og 2005)

Umhugsunartími: 15 mínútur með 5 sekúndna viðbótartíma fyrir hvern leik.

Fjöldi umferða: 9

Dagskrá: Mótið hefst 12:00 á laugardeginum og verða þá tefldar 5 umferðir. Mótinu verður framhaldið 12:00 á sunnudeginum og verða þá tefldar fjórar umferðir.

13–14 ára (f. 2002 og 2003)

Umhugsunartími: 15 mínútur með 5 sekúndna viðbótartíma fyrir hvern leik.

Fjöldi umferða: 9

Dagskrá: Mótið hefst 12:00 á laugardeginum og verða þá tefldar 5 umferðir. Mótinu verður framhaldið 12:00 á sunnudeginum og verða þá tefldar fjórar umferðir.

15–16 ára (f. 2000 og 2001)

Umhugsunartími: 15 mínútur með 5 sekúndna viðbótartíma fyrir hvern leik.

Fjöldi umferða: 9                                                                           

Dagskrá: Mótið hefst 12:00 á laugardeginum og verða þá tefldar 5 umferðir. Mótinu verður framhaldið 12:00 á sunnudeginum og verða þá tefldar fjórar umferðir. 

Follow

Fyrsti hluti að nýjum Dalskóla í Úlfarsárdal var tekinn í notkun í síðasta mánuði aðeins ári eftir fyrstu skóflustungu. Húsnæðið sem tekið hefur verið í notkun er hannað sem leikskóli Dalskóla en verður fyrst um sinn nýtt fyrir grunnskólanemendur.  Það er 820 fermetrar að stærð, auk 2.000 fermetra lóðar sem nýtist vel fyrir leikglaða nemendur skólans.   

Dalskóli er hluti af því sem kallað hefur verið „Miðstöð skóla, menningar og íþrótta“ í Úlfarsárdal og er ein stærsta framkvæmd Reykjavíkurborgar.  Einstakir verkhlutar eru leik- og grunnskóli, menningarmiðstöð, sundlaugar innanhúss og utan, sem og önnur íþróttamannvirki. Heildarkostnaður framkvæmda er áætlaður um 10,2 milljarðar króna. 

Nýr grunnskóli mætir þörfum stækkandi hverfis

Næsti áfangi framkvæmda er grunnskólahluti Dalskóla um 5.200 fermetrar og verður hann tekinn í notkun eftir tvö ár, haustið 2018. Húsið verður steypt upp og frágengið að utan í einni heild, en ákvörðun um endanlegan frágang innanhúss verður tekin eftir því sem þörf fyrir húsnæði eykst með stækkandi hverfi og þannig komið til móts við þarfir íbúa. Áætlanir gera ráð fyrir að nemendur Dalskóla verði um 300 haustið 2018, en fullbúinn skóli mun rúma 500 nemendur.   

Í dag voru opnuð tilboð í annan áfanga byggingarinnar og bárust tilboð frá Ístaki, Íslenskum aðalverktökum, Eykt, Prima og LNS Sögu. Niðurstöðu um hvaða tilboði verður tekið er að vænta á næstu dögum.  

Heilnæm bygging og lágur rekstrarkostnaður

Dalskóli er vistvænt mannvirki, eins og aðrir hlutar miðstöðvar skóla, menningar og íþrótta í Úlfarsárdal. Mannvirkið er hannað og verður byggt undir ströngum kröfum BREEAM vottunarkerfisins, sem hvetur til umhverfisvænnar hönnunar á byggingum og jafnframt betri umhverfisstjórnunar á verktíma og rekstrartíma byggingarinnar.  BREEAM stendur fyrir Building Research Establishment´s Environmental Asessment Method og er kerfið þróað og viðhaldið af bresku rannsóknarstofnuninni í byggingariðnaði.  

Með BREEAM vottunarkerfinu er verið að svara þörf fyrir viðmiðunarramma um hvað sé vistvænt mannvirki. Kröfurnar endurspegla ákveðið mat á því hvað er vistvænt og hvað ekki og hönnuðir og aðrir sem að mannvirkjagerð koma fá í hendur verkfæri sem leiðbeinir á þessu sviði.   

Í BREEAM hafa verið skilgreindar kröfur eða viðmið sem að lágmarki uppfylla lagalegar kröfur á viðkomandi sviði og er það síðan hönnuða, byggingaraðila og rekstraraðila að leita leiða til nýsköpunar og útfærslu leiða sem uppfylla kröfurnar eins og hentar fyrir hverja byggingu.  Kröfurnar eru uppfærðar reglulega sem þýðir að þær kröfur sem gerðar eru í BREEAM í dag  eru ekki þær sömu og gerðar voru fyrir 5 árum.  Þannig eru kröfurnar sífellt í endurskoðun sem leiðir til framþróunar í mannvirkjagerð. Vottunarkerfið er þannig hvatakerfi fyrir vistvæna hönnun og byggingu mannvirkja en jafnframt viðurkennd staðfesting á að mannvirkið uppfylli ákveðnar gæðakröfur.  Kristinn J. Gíslason, verkfræðingur, segir að stefnt sé að því að mannvirkin nái BREEAM einkuninni „VERY GOOD“ . 

Í frétt á vef Reykjavíkurborgar eru ljósmyndir og vísanir á nánari upplýsingar:

Follow

Reykjavík er höfuðborg í herlausu landi. Það markar borginni sérstöðu og í allri stefnumótun hennar hefur verið lögð áhersla á mannréttindi og friðarstarf. Á næstu dögum verða hinir ýmsu viðburðir á vegum borgarinnar helgaðir friði.

Reykjavík er höfuðborg í herlausu landi. Það markar borginni sérstöðu og í allri stefnumótun hennar hefur verið lögð áhersla á mannréttindi og friðarstarf. Á næstu dögum verða hinir ýmsu viðburðir á vegum borgarinnar helgaðir friði.

Viðburðir á Friðardögum í Reykjavík:

HÖFÐI Friðarsetur Reykjavíkurborgar 7. október
Þann 7. október hefst starfsemi HÖFÐA Friðarseturs Reykjavíkurborgar og Háskóla Íslands með opnu málþingi í Hátíðarsal Háskóla Íslands.
Málþingið stendur frá kl. 13-18 og hefst með opnunarávarpi hr. Guðna Th. Jóhannessonar forseta Íslands. Aðalfyrirlesarar eru Steve Killelea, stofnandi og stjórnarformaður Institute for Economics and Peace og Annika Bergman Rosamond, dósent í stjórnmálafræði við Háskólann í Lundi. Þá ávarpa málþingið Jón Atli Benediktsson rektor Háskóla Íslands, Lilja Alfreðsdóttir utanríkisráðherra og Dagur B. Eggertsson borgarstjóri Reykjavíkur.

Sjá dagskrá
Friðarþema á RIFF
Alþjóðleg kvikmyndahátíð í Reykjavík, RIFF, leggur áherslu á frið í vali á kvikmyndum í ár og umræður um þær en hátíðin stendur yfir til 9. október. RIFF stendur  enn fremur fyrir pallborðsumræðum á opnunarmálþingi HÖFÐA Friðarseturs þann 7. október. Sjá riff.is
Stríð og friður í Listasafni Reykjavíkur 7. október
Þrjár sýningar Listasafns Reykjavíkur sem verða eða hafa verið opnaðar á síðustu dögum eru ýmist tileinkaðar friði eða átökum. Sýningar á verkum Yoko Ono og Errós verða opnaðar föstudaginn 7. október  kl. 18 þar sem friðarboðskapurinn er leiðarstefið.
Yfirskrift yfirlitssýningar Yoko Ono er Ein saga enn…. sem endurspeglar m.a. trú hennar á að okkar bíði betri tíð, „ef við bara óskum þess nógu heitt.“ Sýning Errós nefnist Stríð og friður en hann vann verkin undir sterkum áhrifum frá seinni heimsstyrjöldinni. Þá stendur yfir sýning á ljósmyndaverkum Richards Mosse sem nefnist Hólmlendan sem sýnir á magnþrunginn hátt stríðshörmungar í austurhluta Kongó.

Listasafn Reykjavíkur

30 ár liðin frá leiðtogafundi Reagan og Gobatsjov í Höfða 8. október
Þann 8. október munu utanríkisráðuneytið og Höfði Friðarsetur Reykjavíkurborgar og Háskóla Íslands standa fyrir opnu málþingi í Hátíðarsal Háskóla Íslands í tilefni af því að 30 ár eru liðin frá leiðtogafundi Reagans og Gorbatsjovs í Höfða. Málþinginu er ætlað að stofna til almennrar umræðu um leiðtogafundinn og áhrifa hans hér heima fyrir og á alþjóðavísu. Fjallað verður um fundinn í sögulegu samhengi en sjónum einnig beint að þeim áskorunum sem blasa við í heiminum í dag. Aðalræðumaður verður frú Vigdís Finnbogadóttir en auk hennar flytja erindi Albert Jónsson sendiherra og Silja Bára Ómarsdóttir, aðjúnkt í stjórnmálafræði við Háskóla Íslands. Auk framsögumanna munu Lilja Alfreðsdóttir utanríkisráðherra, Dagur B. Eggertsson, borgarstjóri og Davíð Oddsson ritstjóri Morgunblaðsins, flytja ávörp. Ráðstefnustjóri verður Jón Atli Benediktsson rektor Háskóla Íslands. Lokaávarp ráðstefnunnar verður flutt af Ban Ki-moon, aðalframkvæmdastjóra Sameinuðu þjóðanna.

Friðarverðlaun LennonOno í Hörpu 9. október 
Yoko Ono afhendir Friðarverðlaunin LennonOno  í Hörpu sunnudaginn 9. október en þau voru fyrst afhent árið 2002. Að þessu sinni eru verðlaunahafarnir Ai Weiwei, kínverskur listamaður og aðgerðarsinni f. 1957 í Peking. Anish Kapoo, bresk/indverskur listamaður f. 1954 í Bombay,  Katalin Ladik ungverskt tónskáld, gjörningalistamaður og leikari f. 1942 í  Novi Sad í Serbíu og Ólafur Elíasson listamaður f. 1967 í Kaupmannahöfn.

Heimasíða LennonOno Grant for Peace

10 ára afmæli Friðarsúlunnar í Viðey 9. október
Friðarsúlan í Viðey verður tendruð í 10. skipti með friðsælli athöfn á fæðingardegi Johns Lennons þann 9. október klukkan 20.00 og verður kveikt á henni til 8. desember sem er dánardagur hans. Boðið er uppá fríar ferju-og strætóferðir í kringum tendrunina. Listasafn Reykjavíkur, Borgarsögusafnið, Söngfjelagið, Snorri Helgason og fleiri halda úti dagskrá sem hefst kl. 16.30 og stendur til 21.30.  Óskatré Yoko Ono verða staðsett í Viðeyjarnausti og Viðeyjarstofu þar sem gestir geta skilið eftir óskir sínar í tengslum við frið. IMAGINE PEACE TOWER

Málþing um leiðtogafundinn í Höfða 11. október
Þriðjudaginn 11. október verður lokað málþing haldið í Höfða þar sem minnst verður 30 ára afmælis leiðtogafundarins þar sem Ronald Reagan forseti Bandaríkjanna og Mikhail Gorbachev leiðtogi Sovétríkjanna hittust.

Friðarskipið / Peace Boat í Ráðhúsinu 12. október
Miðvikudaginn 12. október verður svo dagskrá á vegum Peace Boat (friðarskipið) í Tjarnarsal Ráðhúss Reykjavíkur. Friðarskipið hefur frá árinu 1983 siglt um heiminn með það að leiðarljósi að vekja athygli á friðarstarfi, mannréttindum og umhverfisvernd. Ferð skipsins er tileinkuð friðarboðskap þeirra sem lifðu af kjarnorkuárásirnar á Hiroshima og Nagasaki 1945. Þeir eru á aldrinum 75-81 árs en voru 6-11 ára þegar sprengjunum var varpað. Eftirlifendur búa enn yfir lifandi minningum um daginn þegar heimurinn breyttist og munu segja íslenskum börnum sögu sína og benda þeim á nauðsyn þess að vinna að friði í heiminum. Peace Boat á Facebook

Follow

Sunnudagaskóli á neðri hæð kirkjunnar. Þóra Björg Sigurðardóttir og séra Sigurður Grétar Helgason hafa umsjón með stundinni. Undirleikari er Stefán Birkisson.

Messa á efri hæð kirkjunnar. Séra Guðrún Karls Helgudóttir prédikar og þjónar ásamt messuþjónum og fermingarbörnum. Kór kirkjunnar leiðir söng. Undirleikari er Hákon Leifsson.

Kirkjuselið kl. 13:00

Sunnudagaskóli. Umsjón hefur Matthías Guðmundsson og undirleikari er Stefán Birkisson.

Selmessa. Séra Sigurður Grétar Helgason prédikar og þjónar ásamt messuþjónum og fermingarbörnum. Vox populi syngur og organisti er Hilmar Örn Agnarsson.

Kaffisopi eftir messu!

Follow