Getraunakaffi Fjölnis á laugardaginn milli kl. 10:00 og 12:00 í Egilshöll. Allir velkomnir! 

Við ætlum að bjóða til sannkallaðrar veislu núna laugardaginn 3.febrúar!

Guðni Bergsson, formaður KSÍ, mun heiðra okkur með nærveru sinni og halda erindi í tilefni af 30 ára afmæli Fjölnis í Getraunakaffinu kl. 11:00.

Þetta er eitthvað sem enginn vill missa af.

Frábærar veitingar í boði; sérstök Fjölnis-afmæliskaka frá Myllunni, gos, kaffi, mjólk, kristall og auðvitað snúðar og vínarbrauð frá Bakarameistaranum.

Follow

Á Heimsdegi barna gefst börnum og fjölskyldum tækifæri að taka þátt í fjölbreyttum smiðjum og ævintýrum í menningarhúsum Borgarbókasafnsins í Árbænum, Gerðubergi, Grófinni, Kringlunni, Sólheimum og Spönginni.

Í ár hafa myrkvaverur tekið yfir söfnin; draugar, nornir, beinagrindur, skrímsli og uppvakningar. Þorir þú að kíkja í heimsókn? Boðið verður upp á búningasmiðjur, föndursmiðjur, slímgerð, getraunir og æsispennandi Háskaleika!

Kynntu þér hvað verður um að vera á þínu safni í dagskránni hér fyrir neðan:

Spöngin:
– Uppvakningar herja á Grafarvoginn! Hvernig er hægt að stoppa þá? Hvað er til ráða?

– Gakktu til liðs við her Uppvakninga og búðu til þinn eigin uppvakningabúning í Spönginni.

– Fáðu einnig ógnvekjandi andlitsförðun og enginn mun þora að mæta þér í myrkrinu!

– Seiðkarlar og nornir frá Sirkus Íslands koma í heimsókn og kenna alls kyns kúnstir og galdrabrögð.

Athugið breyttan opnunartíma en opið verður í öllum söfnum frá 13:00-16:00.

Kíktu á vef Vetrarhátíðar, www.vetrarhatid.is

Gerðuberg:
– Hvað gera berrössuðu beinagrindurnar þegar myrkva tekur?
Búðu til þína eigin beinagrind og dansaðu með henni í drungalegu skuggaleikhúsi.

– Leynast draugar meðal okkar? Móri, Kasper, Djákninn á Myrká eða Næstum-hauslausi Nick?
Í draugasmiðjunni bregðum við okkur í draugabúninga, bregðum á leik og bregðum hinum fullorðnu.

– Viltu koma og máta grímur og búninga jarðarfólksins?
Jarðarfólkið eru verndarar jarðarinnar og gæta hennar eftir fremsta megni. Settu þig í spor þeirra og fáðu mynd af þér í ævintýralegu gervi.

– Hlæjandi nornir, svífandi draugar og skoppandi galdrakarlar koma í heimsókn frá Sirkus Íslands og sýna listir sínar fyrir gesti og gangandi.

– Hvað viltu verða? Norn, vampíra, varúlfur eða kónguló?
Þú getur fengið andlitsmálningu sem fær alla til þess að óttast þig!

– Hægt verður að taka þátt í ógnarlegri getraun á bókasafninu.
Getur þú fundið faldar ævintýraverur í bókahillunum?

– Ert þú næsti Mozart? Beyoncé? Björk?
Búðu til þitt eigið tónverk með ógnvekjandi hljóðum sem fá hárin til að rísa!

Kringlan:
– Hver kemur frá Transylvaníu, sefur í líkkistu og finnst gott að drekka blóð?

– Kíktu í Drakúlasmiðjuna og búðu til þína eigin skikkju og blóðþyrstar tennur.

– Þorir þú að kasta tengingunum sem stýra örlögum þínum?
Komdu þá í Spiladýflissuna og spilaðu hlutverkaspil að hætti Seiðkarlsins.

– Hægt verður að taka þátt í ógnarlegri getraun á bókasafninu.
Getur þú fundið faldar ævintýraverur í bókahillunum?

Sólheimar:
– Í Sólheimum hafa undarleg skrímsli sest að! Þau eru vinaleg en geta breytt um ham á svipstundu!
Komdu og teiknaðu þessi skrýtnu skrímsli og prófaðu að blanda þitt eigið skrímslahor!

Árbær:
– Óhugnaðurinn mun svífa yfir vötnum í Árbæ en þar verður hægt að búa til sitt eigið draugaslím sem lýsir í myrkri!
Hver getur búið til hræðilegasta slímið?

– Einnig verður hægt að smakka kóngulóarsnarl og drekka galdraseyði.

Grófin:
– Í myrkrinu leynast margar kynjaverur og vættir sem vakna til lífsins. Þær fundið sér íverustað í Grófarhúsi og fara á kreik þegar dimma tekur og leynast í skúmaskotum á öllum hæðum. Kjarkmiklum krökkum er boðið að koma og taka þátt í háskaleikunum og fara um húsið og takast á við voðalegar áskoranir!

Nánari upplýsingar veitir:
Guðrún Baldvinsdóttir, verkefnastjóri viðburða og fræðslu
Netfang: gudrun.baldvinsdottir@reykjavik.is
Sími: 411 6182 / 661 6178
Ókeypis aðgangur

Ath. Í tilefni Heimsdagsins verður einnig opið í Borgarbókasafninu Árbæ þennan laugardag.

Hvetjum ykkur til að kynna ykkur dagskrá Vetrarhátíðar á www.vetrarhatid.is

Follow

Reykjavíkurborg fjárfestir í innviðum og þjónustu fyrir 18 milljarða á þessu ári, sem er það mesta á einu ári í sögu borgarinnar. Á næstu fimm árum mun borgin fjárfesta í innviðum fyrir 70 milljarða.

Sé horft til samstæðu Reykjavíkurborgar nemur fjárfesting næstu ára 226 milljörðum næstu fimm árin.

Þessar upplýsingar komu fram í kynningu á  framkvæmdaáætlun Reykjavíkurborgar, en Dagur B. Eggertsson borgarstjóri var gestur á Útboðsþingi Samtaka iðnaðarins í dag.

Fjárfestingar ársins skiptast í grunninn í þrennt. Um 8 milljörðum verður ráðstafað í fasteignir og stofnbúnað, nær 8,5 milljarðar fara í götur og umhverfisframkvæmdir og rúmir 2 milljarðar í aðrar fjárfestingar.

Bróðurparturinn af framkvæmdafé fasteigna fer til skóla- og frístundasviðs eða nær 2,8 milljarðar og þá fer 1,8 milljarður til íþrótta- og tómstundamála. Stærsta einstaka framkvæmdin er leik- og grunnskóli í Úlfarsárdal. 

Nánar um einstök verkefni má sjá í kynningu borgarstjóra.

Nýbyggingahverfi eru svo stærsti einstaki liðurinn í gatna- og umhverfisfjárfestingum en til þeirra mála fara rúmlega 2,5 milljarðar, en þar undir fellur gatnagerð á Hlíðarenda, Vogabyggð, Úlfarsárdal, Kirkjusandi og við Landspítala. Undir gatna- og umhverfisfjárfestingar falla einnig malbikunarframkvæmdir, en í sumar verður slegið met í malbikun gatna.

Kynning borgarstjóra er aðgengileg í frétt á vef Reykjavíkurborgar >  http://reykjavik.is/frettir/staersta-framkvaemdaar-i-sogu-borgarinnar

Follow

Messa kl. 11:00 í Grafarvogskirkju á sunnudaginn. Séra Guðrún Karls Helgudóttir prédikar og þjónar. Kór Grafarvogskirkju leiðir söng og organisti er Hákon Leifsson.

Sunnudagaskóli á neðri hæð kirkjunnar kl. 11.00. Umsjón hefur Aldís Rut Gísladóttir og undirleikari er Ásgeir Páll Ágústsson. Sögur, söngvar og límmiðar.

Selmessa kl. 13:00 í Kirkjuselinu. Séra Sigurður Grétar Helgason þjónar. Vox Populi leiðir söng og organisti er Hilmar Örn Agnarsson.

Follow

Fyrirlestur fyrir alla foreldra, stjúpforeldra, forráðamenn, kennara, ömmur, afar og allra sem koma að uppeldi barna sem nota snjalltæki, fartölvur, leikjatölvur eða önnur tæki sem tengjast inn á internetið.

Fræðslumolar um:
• meðferð persónuupplýsinga.
• alvarleika rafræns eineltis.
• alvarleika óvarlegra samskipta.
• alvarleika myndbirtinga á netinu.
• slæm áhrif ofnotkunar á tölvum og neti.
• helstu heilræði í rafrænu uppeldi.
• einfaldar öryggisstillingar.

Fyrirlesarar:
Bryndís Jónsdóttir, verkefnastjóri SAFT og Ingibjörg (Systa) Jónsdóttir, verkefnastjóri SAFT.

Netið hefur opnað fyrir ótal möguleika sem notendur geta nýtt sér á uppbyggilegan hátt. En ótal dæmi um misnotkun og óvarlega netnotkun sýna fram á nauðsyn þess að við temjum okkur og börnum okkar snemma að nota netið á uppbyggilegan hátt.

Rannsóknir sýna að á grunnskólaaldri er netnotkun orðin hluti af daglegu lífi. Mörg börn eiga snjalltæki sem býður þeim upp á að vera nettengd allan sólarhringinn alla daga vikunnar auk þess sem félagslíf barna fer að stórum hluta fram á netinu.

Hins vegar fá þau mis mikla leiðsögn heima fyrir um hvernig umgangast beri netið á jákvæðan og uppbyggilegan hátt. Mörg börn eru þ.a.l. ekki nógu vel upplýst um ýmsar hættur sem steðja að þeim. á þar helst nefna tælingu, óvarlegar myndbirtingar, rafrænt einelti og netfíkn svo fátt eitt sé nefnt. Því miður er raunin sú að á netinu fyrirfinnst fólks sem villir á sér heimildir í þeim tilgangi að komast í tæri við börn á þessum aldri.

Follow

Okkar vinsæla TORG skákmót Fjölnis verður haldið í Rimaskóla næsta föstudag, 26. janúar kl. 15.00 – 17.15

Stórmeistarinn okkar og goðsögnin Friðrik Ólafsson verður heiðursgestur mótsins. Hann á afmæli þennan dag á Skákdegi Íslands.

Það er mikill heiður fyrir okkur Fjölnismenn að fá Friðrik til okkar af þessu tilefni og því vona ég að allir grunnskólakrakkar í Fjölni nýti sér þetta tækifæri og taki þátt í mótinu.

• Ókeypis þátttaka
• 40 verðlaun eða happadrætti
• Fríar veitingar frá Hagkaup og Emmess

Gott er að mæta tíu mínútum fyrir mót upp á að ná skráningu.  

Skoða upplysingar hérna……

Sjá www.fjolnir.is,  www.skak.is

Follow

Ungmennafélagið Fjölnir í Grafarvogi heldur í kvöld, laugardaginn 20 janúar eitt glæsilegasta og fjölmennasta þorrablót landsins. Þar sem 30 ára afmæli félagsins verður fagnað með stæl. Þetta er áttunda þorrablótið sem félagið heldur og uppselt var á blótið strax í október. Þorrablótsgestir eiga heldur betur von á góðu.  

Dagskrá þorrablótsins er öll hin glæsilegasta þar sem Eyfi, Birgitta, Margrét Eir, Ingó og leynigestur munu skemmta gestum. Ásamt skemmtiatriði frá þorrablótsnefnd.

Það er því ljóst að stuðið verður í Grafarvoginum á laugardagkvöldið. 

Follow

Reykjavíkurborg kaupir Sævarhöfða af Faxaflóahöfnum

• Gatnagerð á nýju íbúðasvæði hefst í ár
• Heildargreiðslur fyrir lóð og fasteignir eru um 1,1 milljarður króna
• Nýtt deiliskipulag er í auglýsingaferli
• Búið að veita Bjargi og Búseta vilyrði fyrir lóðum

Í dag var gengið frá kaupum Reykjavíkurborgar á Sævarhöfða 33 af Faxaflóahöfnum. Dagur B. Eggertsson borgarstjóri og Gísli Gíslason hafnarstjóri skrifuðu undir kaupsamninginn. Kaupin eru gerð í tengslum við fyrirhugaða uppbyggingu á lóðinni og landfyllingu henni tengdri. Heildargreiðslur fyrir landið og húseignir eru nær 1,1 milljarður króna.  Lóðin Sævarhöfði 33 er alls um 76 þús. fermetrar en einnig er keypt 400 fermetra skrifstofubygging, rúmlega 800 fermetra verkstæði og 400 fermetra vörugeymsla, sem og 100 metra viðlegukantur.

Kaupin eru gerð að undangengnum samningum við Björgun ehf. um brottflutning og hreinsun svæðisins ásamt gerð hluta þeirrar landfyllingar sem fyrirhuguð er. Um langt skeið hefur legið fyrir að notkun svæðisins muni breytast úr hafntengd starfsemi yfir í íbúðabyggð. Fyrir liggur rammaskipulag um svæðið og er deilskipulag í auglýsingaferli. Umhverfismat fyrir landfyllingu liggur fyrir ásamt framkvæmdaleyfi og eru framkvæmdir við fyllingargerðina hafnar af hálfu Björgunar samkvæmt verksamningi milli Faxaflóahafna og Björgunar þar um.

Björgun mun afhenda lóðina í áföngum og verður síðasti hlutinn afhentur 1. júní 2019. Byggingarhæfar lóðir verða þó til á hluta svæðisins nokkru fyrr, en lengri tíma mun taka að gera lóðir byggingarhæfar á nýrri landfyllingu. Gert er ráð fyrir að hefja gatnaframkvæmdir á þessu ári á hluta svæðisins.

Vilyrði fyrir tveimur lóðum á svæðinu hefur þegar verið veitt. Annars vegar til Bjargs hses. og hins vegar til Búseta á þeim lóðum sem verða fyrstar byggingarhæfar. Eftir því sem að landfyllingu vindur fram og hægt verður að losa jarðefni af þegar gerðu landi verður fyrsti hluti svæðisins síðan einnig byggingarhæfur.

Myndir eru í frétt á vef Reykjavíkurborgar >  http://reykjavik.is/frettir/reykjavikurborg-kaupir-saevarhofda-af-faxafloahofnum

Follow