„Við viljum búa vel að fjölskyldufólki en reynslan hefur sýnt að fjölskyldufólk flýr í nágrannasveitarfélög þar sem þjónustan reynist betri. Við ætlum að tryggja öllum börnum leikskólapláss frá 12 mánaða aldri. Þá leggur flokkurinn áherslu á svokallaðan foreldrastyrk fyrir foreldra sem kjósa að dvelja heima með börnin sín eftir fæðingarorlof, til tveggja ára aldurs,” segir Hildur Björnsdóttir, oddviti Sjálfstæðismanna í Reykjavík en frambjóðendur flokksins kynntu málefnaáherslur flokksins fyrir komandi borgarstjórnarkosningar á blaðamannafundi í Perlunni í dag.

Sjálfstæðisflokkurinn ætlar að skapa barnvæna borg sem setur fjölskyldur í forgang.

Sjálfstæðisflokkurinn leggur áherslu á jöfn tækifæri fyrir öll börn að stunda íþróttir og tómstundir. „Við ætlum að hækka frístundakortið í 70 þúsund krónur árlega og tryggja aðgang að kortinu fyrir börn frá 5 ára aldri. Þá viljum við að uppbyggingu íþróttamannvirkja í borginni sé forgangsraðað í þágu barna og ungmenna.”

Sjálfstæðisflokkurinnn vill tryggja að höfuðborgin verði eftirsóknarverður staður fyrir fólk á öllum æviskeiðum. „Við viljum borgarumhverfi sem laðar að sér hæfileikafólk með spennandi búsetukostum, fjölbreyttum samgöngum og úrvali atvinnutækifæra – meðal annars með því að setja á fót nýsköpunarþorp í Örfirisey með áherslu á hugvitsdrifna starfsemi. Við ætlum jafnframt að búa betur að eldri Reykvíkingum með uppbyggingu lífsgæðakjarna og auknum afsláttum af fasteignagjöldum,” segir hún.

Einfaldari kerfi og rafræn stjórnsýsla

Sjálfstæðisflokkurinn leggur áherslu á að Reykjavík verði borg sem ryður veginn fyrir þá sem vilja sækja fram. „Þessu vill flokkurinn meðal annars ná fram með því að einfalda kerfin, innleiða rafræna stjórnsýslu og tryggja 30 daga afgreiðslufresti innan borgarkerfisins,” segir Hildur.

Sjálfstæðisflokkurinn ætlar að ráðast í kröftuga húsnæðisuppbyggingu með skipulagi nýrra hverfa samhliða þéttingu byggðar innan hverfa sem hafa til þess svigrúm. Samhliða ætlar flokkurinn að fjölga 15 mínútna hverfum og efla nærþjónustu hverfanna. „Við leggjum áherslu á öflugri verslunarkjarna innan borgarhverfa og hyggjumst setja á laggirnar stofnstyrki til þeirra sem vilja hefja starfsemi í auðum rýmum.”

Fjölþættar lausnir við samgönguvanda

Jafnframt er lögð áhersla á lausn samgönguvandans með fjölþættum lausnum.  „Við viljum vinna að lausn vandans strax. Hefja uppbyggingu Sundabrautar á næsta kjörtímabili, innleiða hjólreiðaáætlun af krafti, fjölga heitum stígum í borginni og fara í öfluga uppbyggingu almenningssamgangna á höfuðborgarsvæðinu. Frjálsir valkostir í samgöngum er lykilatriði,” segir Hildur.

Flokkurinn vill enn fremur að grunnþjónusta verði efld. Sorphirða verði öflugri og betur verði staðið að snjóruðningi að vetri og götusópun að vori. „Hrein borg – fögur torg er gamal slagorð Sjálfstæðisflokksins sem sannarlega er tilefni til að endurvekja, enda borgin sóðaleg og illa hirt,” segir Hildur.

„Sjálfstæðisflokkurinn berst fyrir höfuðborg sem byggist á frjálsum valkostum, jöfnum tækifærum, frjálsu framtaki og hagkvæmum rekstri, til að mynda með minna stjórnkerfi, fækkun borgarfulltrúa og minni umsvifum í samkeppnisrekstri,” segir Hildur.

Sjálfstæðisflokkurinn mun setja eftirfarandi mál á dagskrá fyrir borgarstjórnarkosningar í vor:

1. Barnvæn borg: Sjálfstæðisflokkurinn vill að Reykjavíkurborg verði eftirsóknarverður búsetukostur fyrir fjölskyldufólk. Við ætlum að tryggja:

• Leikskólapláss fyrir öll börn frá 12 mánaða aldri.
  • Foreldrastyrk fyrir foreldra sem vilja dvelja heima með börnin sín eftir fæðingarorlof, til tveggja ára aldurs. 100 þúsund krónur á mánuði.
  • Frístundakort sem gildir frá 5 ára og verði hækkað í 70 þúsund krónur.
  • Uppbygging íþróttamannvirkja verði í þágu barna og ungmenna.
  • Aukið valfrelsi í skólamálum með auknum stuðningi við sjálfstætt starfandi skóla, þannig að ekki þurfi að innheimta skólagjöld.
• Kröftug húsnæðisuppbygging í lifandi hverfum: Sjálfstæðisflokkurinn vill hefja kröftuga húsnæðisuppbyggingu um alla borg í lifandi borgarhverfum. Við ætlum að tryggja:
• Skipulag nýrra hverfa að Keldum og í Örfirisey.
  • Þéttingu byggðar innan hverfa sem hafa til þess svigrúm, svo Úlfarsárdal, Staðarhverfi og Kjalarnesi.
  • Fleiri 15 mínútna hverfi, þar sem verslun og þjónusta finnast í korters göngufæri.
  • Öflugri verslunarkjarna innan borgarhverfa með stofnstyrkjum til þeirra sem vilja hefja starfsemi í auðum rýmum.
  • Einfaldara kerfi, rafræna stjórnsýslu og 30 daga afgreiðslufresti.
• Frjálsir valkostir í samgöngum: Sjálfstæðisflokkurinn vill tryggja frelsi og val um fjölbreyttar samgöngur. Einn fararmáti á ekki að útiloka annan – framtíðin á að fela í sér valfrelsi og sveigjanleika. Við ætlum að tryggja að:
• Uppbygging Sundabrautar verði hafin á kjörtímabilinu.
  • Öflugar og nútímalegar almenningssamgöngur.
  • Hjólreiðaáætlun Reykjavíkurborgar verði framfylgt af metnaði.
  • Upphituðum stígum verði fjölgað í borginni.
  • Snjallar ljósastýringar um alla borg.
  • Orkuskiptum verði hraðað með bættum aðgangi að hleðslustöðvum í borgarlandinu, í samstarfi við aðila á markaði.
• Umhverfis- og loftslagsmál: Sjálfstæðisflokkurinn leggur ríka áherslu á grænt og heilnæmt borgarumhverfi. Við ætlum að tryggja að:
• Kolefnisbindingu með lausnum á borð við Carbfix, skógrækt og endurheimt votlendis.
  • Staðið verði vörð um græn svæði og þau byggð upp til útivistar.
  • Sorphirða verði öflugri og endurvinnsla samræmd.
  • Betur verði staðið að snjóruðningi að vetri og götusópun að vori.
• Atvinnulíf, menning og nýsköpun: Sjálfstæðisflokkurinn vill tryggja jákvæða hvata fyrir framfarir, lifandi menningarlíf og verðmætasköpun í Reykjavík.  Við ætlum að tryggja:
• Aukið framboð atvinnulóða í Reykjavík.
  • Lækkun fasteignaskatta á atvinnuhúsnæði.
  • Nýsköpunarþorp í Örfirisey fyrir hugvitsdrifna starfsemi.
  • Aukinn stuðning við menningarlíf í borginni.
• Eldri Reykvíkingar: Sjálfstæðisflokkurinn vill byggja upp aldursvæna höfuðborg. Við ætlum að tryggja:
• Uppbyggingu lífsgæðakjarna fyrir eldri Reykvíkinga.
  • Lækkun fasteignaskatta af íbúðarhúsnæði þeirra sem eru 67 ára eða eldri. Tekjumörk vegna afslátta verði hækkuð sem nemur 1.800.000 kr. af árstekjum.
• Heilbrigður fjárhagur: Sjálfstæðisflokkurinn telur mikilvægt að rekstur borgarkerfisins verði endurskipulagður. Stjórnkerfi borgarinnar hefur orðið að bákni –  minnka þarf yfirbyggingu, stöðva skuldasöfnun og sýna ráðdeild þegar sýslað er með fjármuni borgarbúa. Við ætlum að tryggja:
• Hagræðingu í opinberum rekstri.
  • Minni umsvif í samkeppnisrekstri.
  • Þrýsting hvað varðar fækkun borgarfulltrúa úr 23 í 15.

Hægt er að lesa meira um komandi kostningar hér á vef Reykjavíkurborgar

Fjölmenningarverkefni Lyngheima

„Halló“

Í tilefni af degi móðumálsins, sem var þann 22. febrúar síðastliðinn, fannst okkur tilvalið að gera samvinnuverkefni sem allar deildar leikskólans tóku þátt í.

Vikurnar 7.-25. mars voru tileinkaðar fjölmenningu leikskólans og unnið var með hin ýmsu þjóðerni, lönd og tungumál. Unnið var með jörðina og að jörðin væri okkar allra, sama hvaðan við komum þá eigum við jörðina saman og það er verkefni okkar allra að hugsa vel um hana. Stóra verkefnið okkar í ár er því að skoða jörðina og fræðast um það hvaðan við erum, bæði börn og starfsfólk i leikskólanum Lyngheimum. Við fögnum fjölbreytileikanum og tökum á móti honum með opnum örmum, fræðum, lærum og dreifum kærleikanum.

Við höfum dregið ýmsan lærdóm af ferlinu t.d eins og við eigum ekki öll sama uppruna, við tölum ekki öll eins, menning okkar er ólík, en samt getum við öll verið hér á Lyngheimum í sátt og samlyndi og borið virðing fyrir hvort öðru.

Hér að neðan eru myndir frá verkefninu

Með bestu kveðjum starfsfólk Lyngheima

Aðalfundur Fjölnis fór fram þriðjudaginn 15. mars kl. 17:30. Fundurinn var haldinn í félagsaðstöðu Fjölnis í Egilshöll.

Ásamt venjulegum aðalfundarstörfum voru veittar heiðursveitingar til handa góðum hópi Fjölnis fólks.

Silfurmerki

Nr. 187  Davíð Arnar Einarsson handboltadeild

Nr. 188 Magnús Þór Arnarsson handboltadeild

Nr. 189 Þorgeir Lárus Árnason.

Nr. 190 Þorsteinn Yngvi Guðmundsson karatedeild

Nr. 191 Baldvin Örn Berndsen aðalstjórn/ljósmyndari

Nr. 192 Zoran Stosic

Gullmerki.

Merki nr. 34 Ingibjörg Kristinsdóttir

Heiðursfélagi Fjölnis.

Merki nr. 3 Erla Gunnarsdóttir.

Óskum þessum fagra hópi fólks til hamingju með viðurkenningarnar.

Áfram Fjölnir

Hérna er hægt að skoða ársskýrslu

Lög Fjölnis má finna hér

Samskiptaráðgjafi íþrótta- og æskulýðsstarfs tók til starfa á vormánuðum eftir að mennta- og menningarmálaráðuneytið setti lög um starfið síðastliðið haust. Samskiptaráðgjafi er óháður aðili sem getur aðstoðað og leiðbeint einstaklingum sem telja sig hafa verið beittir ofbeldi eða misrétti í íþrótta- eða æskulýðsstarfi. Þjónusta samskiptaráðgjafa er gjaldfrjáls.

Samskiptaráðgjafi hefur það markmið að auka öryggi í íþrótta- og æskulýðsstarfi barna, ungmenna og fullorðinna. Markmiðið er að allir geti tekið virkan þátt á sínum vettvangi og jafnframt leitað sér aðstoðar eða leitað réttar síns vegna atvika og misgerða sem hafa átt sér stað án þess að óttast afleiðingar. 

Þjónusta og ráðgjöf samskiptaráðgjafa stendur öllum þeim til boða sem tilheyra skipulögðu íþrótta- og æskulýðsstarfi á landinu. Til samskiptaráðgjafa er hægt að leita með mál er varða andlegt-, líkamlegt- og kynferðislegt ofbeldi og áreitni, einelti og önnur sambærileg tilvik sem hafa komið upp á vettvangi íþrótta- eða æskulýðsstarfs. Einnig mun samskiptaráðgjafi koma á samræmdum viðbragðsáætlunum á landsvísu í þessum málaflokkum.

Eftir samtal eða fyrstu samskipti við samskiptaráðgjafa er boðið upp á viðtal ef málið varðar áreitni, ofbeldi eða einelti. Þá er frekari upplýsinga aflað og í kjölfarið eru næstu skref ákveðin, ávallt í samráði við þann sem leitar til samskiptaráðgjafa. Einnig er hægt að leita eftir ráðgjöf hjá samskiptaráðgjafa, ekki þarf að fara lengra með mál ef viðkomandi kýs það ekki. 

Heimasíða samskiptaráðgjafa mun þjóna sem upplýsinga- og fræðslusíða starfsins. Hægt er að setja sig í samband við samskiptaráðgjafa í gegnum síðuna, tilkynna atvik og fá ráðgjöf eða aðrar upplýsingar. 

Sambandsaðilar eru hvattir til að setja lógó samskiptaráðgjafa á heimasíður sínar með beina tengingu inn á heimasíðu embættisins.

Kynning á starfi samskiptaráðgjafa

Skákdeild Fjölnis og Frístundamiðstöðin Gufunesbær stóðu fyrir Vetrarleyfisskákmóti í Hlöðunni fyrir grunnskólanemendur í vetrarleyfi. Um 50 krakkar fjölmenntu og hvert borð skipað strákum og stelpum, allt frá 6 – 15 ára.

Tefldar voru sex umferðir og í lok móts var boðið upp á skúffuköku af stærri gerðinni.

Keppt var í þremur flokkum og veitt 20 verðlaun. Bestum árangri náði skákdrottningin Emilía Embla sem sigraði í öllum sínum skákum. Hún tefldi í stúlknaflokki. Sigrún Tara, Nikola, Silja Rún,Tara Líf, Stefnanía og Lilja Kathlen nældu sér einnig í verðlaun.

30 drengir tefldu í eldri og yngri flokki. Verðlaunahafar: Viktor, Tristan Fannar, Oliver, Ásgeir Smári, Ómar Jón, Kristján Freyr og Arthur í yngri flokk. – Birkir, Örvar, Adam, Engilbert Viðar, Jósef, Guðmundur Orri og Theodór Helgi í eldri flokki. Einnig var dregið í happadrætti og endaði því helmingur þátttakenda með glaðning.

Þau Lenka Ptacnikova, Kristjan Dagur Jonsson og Helgi Árnason stjórnuðu skákmótinu sem lauk nákvæmlega kl. 16:00 eins og stefnt var að. Veitingastjóri var Aneta Kamila Klimaszewska sem býr til bestu skúffukökurnar að mati skákkrakka í Skákdeild Fjölnis.

Takk krakkar fyrir flotta frammistöðu og góða framkomu.

Grafarvogskirkja er ein stærsta og myndarlegasta kirkjubygging landsins. Kirkjan hýsir stærsta söfnuð landsins. Eitt af mikilvægari verkefnum safnaðar, sem á aðsetur sitt í svo myndarlegri kirkju, er að eignast orgel. Að því hefur nú verið unnið jafnt og þétt í á þriðja áratug.

Safnast hafa yfir 70 milljónir króna í orgelið. Fyrirhugað orgel mun með öllu kosta 110 milljónir, þannig að okkur vantar nú um 40 milljónir króna til að ljúka verkefninu. Þess vegna langar okkur nú að leita til ykkar, safnaðarfólk, um að taka þátt í þessu verðuga verkefni með okkur. Gerður hefur verið samningur við Aeris Organa, (Budapest) um smíði orgels. Stefnt er að því að það verði vígt í semptember 2021. Orgel kirkjunnar mun auka til muna fjölbreytni í öllu helgihaldi í Grafarvogskirkju og þátttöku kirkjunnar í menningarlífi borgarinnar. Orgelið mun þá einnig styrkja menningarlega ásýnd og stöðu Grafarvogs. Tónleikalíf hverfisins mun styrkjast til mikilla muna og athafnir allar fá dýpra inntak.

Ljóst má vera Grafarvogssöfnuður hefur ekki fjárhagslegt bolmagn til að kosta þetta verkefni einn og sér. Örlátir einstaklingar og velunnarar kirkjunnar hafa fært okkur, söfnuðinum, allt það fé sem nú myndar höfuðstól orgelsjóðs. Fyrir þær gjafir erum við afar þakklát. En betur má ef duga skal.

Möguleikar til söfnunar eru miklir í Grafarvogi, þar sem í Grafarvogssókn telur nú um sjö þúsund heimili. Hver hjálparhönd og hver gjöf, lítil eða stór, skiptir miklu máli til þess að klára smíði þessa undursamlega hljóðfæris. Gaman er geta þess, að orgelið er í sögulegu samengi, oft kallað „Drottning allra hjóðfæra“ !!!

Hægt er lesa meira um þetta glæsilega orgel og söfnunina hérna á vef Grafarvogskirkju……

FYRRI HELGIN 29. JANÚAR – 1. FEBRÚAR

Hér að neðan má sjá grófa dagskrá fyrri keppnishelgarinnar, 29. – 1. febrúar. Allar tímasetningar eru birtar með fyrirvara um breytingar og er mælt með að áhugasamir fari inná Facebook viðburði hverrar greinar til að fá nánari upplýsingar og tilkynningar ef eitthvað breytist. Hægt er að finna alla Facebook viðburði hér eða með því að ýta á nöfn greinanna í töflunni hér fyrir neðan.

SEINNI HELGIN 2. – 6. FEBRÚAR

Hér að neðan má sjá grófa dagskrá seinni keppnishelgarinnar, 2. – 6. febrúar. Allar tímasetningar eru birtar með fyrirvara um breytingar og er mælt með að áhugasamir fari inná Facebook viðburði hverrar greinar til að fá nánari upplýsingar og tilkynningar ef eitthvað breytist. Hægt er að finna alla Facebook viðburði hér eða með því að ýta á nöfn greinanna í töflunni hér fyrir neðan.

Hérna er hlekkur á dagskrá leikanna…..https://www.rig.is/dagskra-2022

Aðalskipulag Reykjavíkur 2040 er uppfærð og endurbætt útgáfa AR2030, sem samþykkt var árið 2014. Aðalskipulagið var samþykkt í borgarstjórn Reykjavíkur þann 19.október 2021, sbr. einnig samþykkt hennar 21. desember 2021. Aðalskipulagið var undirritað þann 13. janúar 2022 og mun taka gildi með birtingu í Stjórnartíðindum á næstu dögum

Dagur B. Eggertsson borgarstjóri, Ásdís Hlökk Theodórsdóttir forstjóri Skipulagsstofnunar og Pawel Bartoszek form. skipulags- og samgönguráðs undirrituðu. Hér má sjá fleiri myndir í fullri upplausn: Hlekkur.

„Það er með einstakri ánægju og gleði sem ég staðfesti gildistöku nýs aðalskipulags Reykjavíkur til 2040 með undirritun minni. Nýtt aðalskipulag Reykjavíkur til 2040 leggur grunn að kraftmeiri og grænni uppbyggingu borgarinnar en dæmi eru um í sögu hennar,“ sagði Dagur B. Eggertsson borgarstjóri við undirritun í Höfða í dag.

Ný meginmarkmið, breytingar og aðrar viðbætur sem settar eru fram í AR2040, miða allar að því að herða á framfylgd þeirrar stefnu sem mörkuð var í fyrra aðalskipulagi um sjálfbæra þróun, þétta og blandaða borgarbyggð og vistvænar ferðavenjur. Markmiðið er að stuðla að kröftugri borgarþróun innan núverandi vaxtarmarka til ársins 2040. Með skipulaginu er sýnt fram á að þau landsvæði sem við höfum tekið frá undir íbúðarbyggð, atvinnusvæði og samgöngumannvirki í aðalskipulagi undanfarna áratugi, geta dugað okkur til ársins 2040. Þetta þýðir að auðveldara verður að framfylgja markmiðum borgarinnar um sjálfbæra þróun, verndun ósnortinna svæða í útjaðri byggðar, líffræðilega fjölbreytni, kolefnishlutleysi, vernd grænna útivistarsvæða, vistvænni ferðavenjur og uppbyggingu Borgarlínu og fjölbreyttari og skemmtilegri borg.

Meiri borg, meiri náttúra

Fjölgun íbúa og starfa innan núverandi byggðar er mikilvæg af svo mörgum ástæðum. Með því styttum við almennt vegalengdir innan borgarinnar, styðjum við vistvænar ferðavenjur, drögum úr losun CO₂ og komum í veg fyrir rask á ósnortinni náttúru í útjaðri byggðar. Þétting byggðar gefur okkur tækifæri til nýta betur fjárfestingar, s.s. í skólum, opnum svæðum, götum og veitukerfum. Hægt er að draga þar með úr kolefnisspori uppbyggingar og skapa hagkvæmari borgarþróun. Fjölgun íbúa innan eldri byggðar leiðir einnig til þess að skólasamfélagið styrkist, bakland verslunar og þjónustu eflist og almenningsrýmin verða meira lifandi. Áhersla á þéttingu innan núverandi byggðar gefur okkur líka tækifæri til að skapa fjölbreyttara og lífvænlegra samfélag, fyrir alla félagshópa. Uppbygging vistvænnar íbúðarbyggðar á eldri atvinnusvæðum leiðir einnig til þess að umhverfisgæðin í hverfinu aukast og leiðir til frekari endurbóta á innviðum og opnum svæðum í grenndinni. Það er líka ákveðið réttlætismál að nýir íbúar fái tækifæri til að njóta þeirra umhverfisgæða, þjónustustofnana og innviða sem eru til staðar í grónum hverfum borgarinnar. 

Betra stjórntæki og skilvirkari stjórnsýsla

Jafnhliða því að endurbæta og herða á stefnu aðalskipulagsins um sjálfbæra þróun, hefur vinnan við skipulagið miðað að því að gera áætlunina að betra stjórntæki.  Markmiðið er að styrkja samningsstöðu borgaryfirvalda í viðræðum við lóðarhafa um magn og gerð uppbyggingar á einstaka reitum. Með því verður auðveldara að tryggja gæði byggðar í samræmi við sett markmið. Breytt framsetning miðar einnig að því að stefna aðalskipulagsins verði almennari og sveigjanlegri, sem ætti að leiða til færri breytinga á því í framtíðinni og skjótvirkara afgreiðsluferlis í húsnæðismálum.

Fjölbreytt húsnæðisuppbygging og vistvænar ferðvenjur

„Borgin mun byggjast þéttar en áður meðfram nýjum þróunarásum Borgarlínu, virkir samgöngumátar eru stórefldir og Reykjavík á að verða hjólaborg á heimsmælikvarða. Hugað er að þróun og eflingu grænna svæða og tengingum þeirra á milli og fjölbreyttri húsnæðisuppbyggingu í þágu allra tekjuhópa. Loftslagsmálum er mætt af meiri festu en nokkru sinni áður og lýðheilsa borgarbúa er meðal nýrra áherslna. AR2040 leggur grunn að því og staðfestir að næstu tveir áratugir verða áratugir Reykjavíkur,“ segir borgarstjóri.

Mikilvægar breytingar í mörgum skilningi

• Sett eru metnaðarfyllri markmið um vöxt Reykjavíkur og fjölgun íbúða.
• Skapaðar eru forsendur fyrir stóraukið framboð íbúðarhúsnæðis á fjölbreyttum svæðum í öllum borgarhlutum. Lagður er grundvöllur að hinum nýja borgarhluta í Elliðaárvogi og Ártúnshöfða með þremur nýjum skólahverfum. 
• Réttur þeirra sem höllum fæti standa á húsnæðismarkaði er betur tryggður.
• Gerðar eru auknar kröfur um hönnun íbúðarbyggðar og blandaðrar byggðar varðandi gróðursvæði, sólrík dvalarsvæði og önnur umhverfisgæði. 
• Skerpt er almennt á kröfum um lýðheilsu, umhverfisáhrif, umhverfisgæði og vernd náttúru, menningarminja og byggðar.
• Stefnan miðar að því að styrkja stöðu borgaryfirvalda í samningagerð við byggingaraðila um magn og umfang byggðar á einstökum reitum.
• Leiðarljósið er að stuðla að markvissara skipulags- og uppbyggingarferli, m.a. með fækkun tafsamra breytinga á aðalskipulaginu. 
• Réttindi starfandi fyrirtækja um endurnýjun starfsleyfis til skemmri tíma eru betur tryggð og þannig létt á þrýstingi á ótímabæran flutning viðkomandi starfsemi.
• Sett fram skýrari markmið um þróun byggðar í Keldnalandi og skapað svigrúm til að hefja undirbúning skipulagsvinnu á svæðinu.
• Tryggð eru starfsskilyrði fyrir innanlandsflugvöll í Vatnsmýri til ársins 2032 og sköpuð aðstaða til framtíðar fyrir þyrluflug Landhelgisgæslunnar.
• Stefna um stokk á Miklubraut og á Sæbraut og aukin umhverfisgæði í aðliggjandi hverfum er fest í sessi.
• Borgarlínan er fest í sessi í aðalskipulaginu og uppbyggingarsvæði í grennd við hana njóta forgangs. Áréttað er að uppbygging innviða byggi á þeim samgöngusáttmála sem samþykktur var 2019, milli sveitarfélaga á höfuðborgarsvæðinu annars vegar og hins vegar þeirra og ríkisvaldsins. 
• Sett eru metnaðarfyllri markmið í loftslagsmálum og kröfur um mat á kolefnisspori allrar uppbyggingar.

Sjá greinargerð Aðalskipulags Reykjavíkur 2040

Slóð á eldri fréttir af AR2040:

Aðalskipulag í auglýsingu 19.6.21

Sjá kynningarskjal (ágrip) með auglýstri tillögu

Hlaupahópur Fjölnis í Grafarvogi hefur starfað í nær 30 ár. Hópurinn er öllum opinn og eru meðlimir hans á öllum aldri og á getustigi sem spannar allt frá frístundaskokkurum til afrekshlaupara. Hlaupahópurinn starfar innan frjálsíþróttadeildar Fjölnis.

Nú leitar frjálsíþróttadeildin að nýjum þjálfara (eða þjálfurum) sem er tilbúinn að leiða áframhaldandi starf hópsins og hefur metnað til frekari uppbyggingar og nýliðun hjá hópnum. Æskilegt er að viðkomandi hafi reynslu af þjálfun í langhlaupum auk þess að eiga auðvelt með mannleg samskipti. Kostur er að viðkomandi hafi menntun í íþrótta- og þjálfunarfræðum. Möguleiki er að tveir þjálfarar skipti með sér verkum. Gert er ráð fyrir þremur föstum æfingum á viku sem fela í sér hlaupaþjálfun auk styrktarþjálfunar. Æskilegt er að viðkomandi geti hafið störf sem fyrst.
Áhugasamir eru hvattir til að skila inn umsókn til formanns frjálsíþróttadeildar Fjölnis á netfangið: toggi@vov.is, sem fyrst. Ráðið verður í stöðuna eins fljótt og kostur er.

Nánari upplýsingar veita formaður frjálsíþróttadeildar Fjölnis; Þorgrímur Guðmundsson í síma 861 6131 eða í pósti toggi@vov.is og hjá meðlimi hlaupahópsins Bragi Birgisson sími 669-0888 (bragi.birgisson@gmail.com).