Í þessari viku höfum við haldið forkeppnir fyrir Grafarvogsleikana sem fara fram í næstu viku. Fjöldinn allur af unglingum kemur þá saman til að keppa í ýmsum greinum fyrir hönd sinnar félagsmiðstöðvar. Keppt verður í kúluvarpi, fótbolta, guitar hero og blásturskeppni svo eitthvað sé nefnt. Krakkarnir eru mjög spenntir fyrir þessu og ætla sér að vinna í ár!
Sjá nánar í viðburðardagatali vefsins.
Mynd: Baldvin Örn Berndsen
Strákarnir okkar mæta Fram í kvöld í sannkölluðum botn baráttuslag á Laugardalsvelli kl. 19.15.
Strákarnir eru staðráðnir að selja sig dýrt í kvöld og innbyrða þessi þrjú stig sem þeir svo nauðsynlega þurfa á að halda til að spila í deild þeirra bestu að ári. Það má með sanni segja að þetta sé svokallaður 6 stiga leikur. Með sigri í kvöld kemst Fjölnir upp fyrir Fram í 10. sæti og jafnar þá einnig Keflavík að stigum sem er í 9. sætinu. Svo eru Breiðablik, ÍBV og Fylkir þar skammt undan svo þetta bendir allt í gríðarlega spennandi lokaumferðir í Pepsideildinni.
Sjáumst í Laugardalnum í kvöld.
ÁFRAM FJÖLNIR
Hér má sjá stöðuna í deildinni
Fyrsta guðsþjónustan í Kirkjuselinu í Spöng var kl. 13 í dag. Fullt út úr dyrum eða um 200 manns mættu. Fólk á öllum aldri var komið til að eiga létta og notarlega stund saman í kirkjunni á torginu. Takk Vox Populi, Hilmar Örn Agnarsson Þóra Björg Sigurðardóttir, Ásthildur Guðmundsdóttir, Erla Karlsdottir, Vigfús Þór Árnason, Kristinn Sigurðsson og öll hin sem tólku þátt í dag!
Sunnudagaskólinn var í umsjón Ásthildar Guðmundsdóttur.. Undirleikari Stefán Birkisson.
Fjölnir handbolti skorar á nemendur grunnskólana að mæta og keppa fyrir hönd síns skóla um SKÓLAMÓTSBIKARINN eftirsótta! Engin skráning…. bara að mæta með liðið á staðinn og taka þátt!
Í gær undirrituðu Guðmundur L Gunnarsson framkvæmdastjóri Fjölnis og Kristín P. Gunnarsdóttir útibússtjóri Landsbanka Íslands, Grafarholtsútibúi með sér nýjan samstarfssamning á milli félaganna. Fjölnir og Landsbankinn hafa verið samstarfsaðilar í fjölda mörg ár og hefur samstarfið verið mjög farsælt. Fjölnir hefur innan sinna raða um 3.000 iðkendur sem eru allt frá 3 ára og uppí 80 ára. Innan félagsins eru starfandi 10 deildir þar sem saman fer barna- og unglingastarf og afreksstarf. Starfið í félaginu er mjög fjölbreitt, einstaklingsgreinar, skák og boltagreinar, þannig að flestir ættu að geta fundið sér íþrótt við hæfi.
Landsbankinn kappkostar að styðja íslenskt íþróttalíf. Það gera útibú bankans með beinum samstarfssamningum við íþróttafélög hringinn í kringum landið. Í slíku samstarfi leggur bankinn mikla áherslu á að styðja barna- og unglingastarf og að stuðningur nýtist jafnt íþróttum kvenna og karla.
Það er okkur mjög mikilsvert hjá Fjölni að eiga svona öflugan samstarfsaðila í okkar hópi og Landsbankinn sýnir það í verki að hann kappkostar að styðja við íþróttastarf í Grafarvogi og Bryggjuhverfi með myndarlegum hætti.
Landsbankinn er jafnframt viðskiptabanki Fjölnis.
Fjölnir og Landsbankinn eru stoltir samstarfsaðilar.
Nú eru aðeins fjórir leikir eftir af Íslandsmótinu (Pepsideildinni) í sumar og sitjum við Fjölnismenn í 11 sæti deildarinnar. Næsti leikur er gegn Fram á mánudaginn á Laugardalsvelli kl. 19:15.
Andstæðingar okkar Framarar eru í sætinu fyrir ofan okkur (10 sæti) og með sigri náum við Fjölnismenn að komast upp úr fallsætinu svo við þurfum á öllum okkar Fjölnismönnum að halda til að hvetja strákana áfram í markmiði sínu að vera í deild þeirra bestu að ári.
Það má alveg búast við ágætis mætingu á völlinn þar sem þetta verður eini leikurinn á mánudeginum, en allir hinir leikirnir í umferðinni fara fram deginum áður (sunnudeginum).
Af leikmannahópnum er allt gott að frétta eftir ansi gott landsleikjafrí, allir leikmenn eru heilir og koma Bergsveinn fyrirliði og „Herra Fjölnir“ Gunnar Már aftur inn í hópinn eftir að hafa tekið út leikbann gegn FH vegna fjögurra gulra spjalda.
Strákarnir spiluðu æfingarleik við Val á mánudaginn s.l. á neðsta svæðinu í Dalhúsum og vannst ágætis sigur 2-1 með mörkum frá Gunnari Má og Mark Magee.
Koma svo Fjölnismenn, sjáumst á mánudaginn í fljóðljósunum á Laugardalsvelli.
ÁFRAM FJÖLNIR
Leikir Fjölnis sem eftir eru.
Fram – Fjölnir 15. september kl. 19:15 Laugardalsvöllur
Fjölnir – Stjarnan 21. september kl. 16.00 Fjölnisvöllur
Fylkir – Fjölnir 28. september kl. 14.00 Fylkisvöllur
Fjölnir – ÍBV 04. október kl. 14.00 Fjölnisvöllur
Hér má sjá stöðuna í deildinni
Bætt aðgengi starfsfólks Sorphirðu Reykjavíkur vegna losunar á úrgangsíláta borgarbúa var til umræðu í umhverfis- og skipulagsráði í dag. Tilefnið var ný úttekt sem gerð hefur verið um aðgengið. Þar kemur fram að aðgengi að tunnum og kerjum sé víða slæmt í borginni.
Umhverfis og skipulagsráð hvetur íbúa Reykjavíkur til samvinnu við Reykjavíkurborg um að bæta aðgengi starfsfólks sem sinnir tæmingu úrgangsíláta við heimili í borginni.
Úttektina vann Þröstur Ingólfur Víðisson fyrir umhverfis- og skipulagssvið. Heilbrigðisnefnd Reykjavíkur setur samþykkt um meðhöndlun úrgangs þar sem kveðið er á um meðferð hans innan borgarmarkanna og sér Sorphirða Reykjavíkur um losun við heimili.
Í úttektinni kemur fram að aðgengi að tunnum og kerjum undir úrgang við heimili sé víða slæmt í borginni og valdi miklu óhagræði, skapi lélegt starfsumhverfi og í sumum tilvikum slysahættu fyrir starfsmenn sorphirðunnar. Sums staðar sé aðgengið beinlínis óviðunandi.
Niðurstaðan er m.a. sú að með bættu aðgengi megi minnka kostnað við hirðu og bæta þjónustu við borgarbúa. Þá megi auka öryggi starfsmanna sem sinna losun og tryggja að farið sé að lögum um vinnuvernd. Einnig má minnka líkur á tjóni á eigum borgarbúa svo sem í sorpgeymslum og á aðkomuleiðum að úrgangsílátum. Jafnframt dregur bætt aðgengi úr líkum á tjóni á tækjum og ílátum í eigu Reykjavíkurborgar.
Í lok árs 2013 voru 46.200 úrgangsílát í Reykjavík. Þar af voru 11.200 blá ílát undir pappírsefni. Slíkum ílátum fjölgaði um 176% á milli áranna 2012 og 2013. Í hverjum mánuði hirða starfsmenn Sorphirðunnar að meðaltali um 1.600 tonn af blönduðum úrgangi og pappírsefnum. Að jafnaði eru þetta 70 tonn á hverjum starfsdegi sorphirðunnar. Árið 2013 voru hirt alls 19.010 tonn af blönduðum úrgangi og 2.380 tonn af pappírsefnum eða 179 kg á ári á hvern íbúa Reykjavíkur. Þetta jafngildir því að hver starfsmaður við sorphirðu handleiki að jafnaði 480-530 tonn af úrgangi yfir árið.
Margir þættir geta torveldað aðgang að úrgangsílátum. Eftirtalin atriði voru talin vandasömust: Tröppur, erfitt undirlag, hindranir, lofthæð og staðsetning. Þessi atriði má lagfæra ef vilji er fyrir hendi. Önnur atriði eru breytingum háð en hafa áhrif: snjór, hálka, birta og lausir hundar innan lóðamarka.
Oft á tíðum má bæta aðgengið með einföldum og ódýrum aðgerðum eins og að moka snjó frá tunnum, setja upp hurðarpumpur og króka til að þær haldist opnar og tjóðra hunda. Auk þess skiptir staðsetning íláta á lóð miklu máli. Dæmi eru um að starfsfólk sorphirðunnar þurfi að ganga yfir sex kílómetra til að losa 20 tunnur.
Niðurstöður sýna einnig hve aðgengi er ólíkt eftir hverfum. Aðgengi er almennt betra í nýrri hverfum borgarinnar en eldri. Þó eru dæmi um að í nýlega endurbættum húsum sé aðgengi óviðunandi. Tillögur að úrbótum eru settar fram í úttektinni.
Aðgengi að úrgangsílátum í Reykjavík
Grafarvogskirkja kl. 11:00
Guðsþjónusta
Fermingarbörn úr Vættaskóla Engi og Kelduskóla Vík eru sérstaklega boðin til guðsþjónustu ásamt foreldrum sínum. Fundur um fermingarstarfið
verður að lokinni guðsþjónustu. Fjölskyldur fermingarbarna eru vinsamlegast beðnar um að koma með eitthvað góðgæti á hlaðborðið í kirkjukaffinu.
Séra Vigfús Þór Árnason prédikar og þjónar ásamt sr. Örnu Ýrr Sigurðardóttur og messuþjónum. Hákon Leifsson er organisti og kór kirkjunnar leiðir söng.
Sunnudagaskóli
Þóra Björg Sigurðardóttir og sr. Guðrún Karlsdóttir hafa umsjón með stundinni. Undirleikari er Stefán Birkisson.
Guðsþjónusta með gospelívafi
Séra Guðrún Karls Helgudóttir prédikar og þjónar. Vox Populi syngur. Organisti er Hilmar Örn Agnarsson.
Sunnudagaskóli
Umsjón hefur Ásthildur Guðmundsdóttir. Undirleikari er Stefán Birkisson.
Velkomin í lifandi kirkju á tveimur stöðum í Grafarvogi!
Fuglaskoðun í Grafarvogi þar sem fylgst er með vaðfuglum hópa sig á leirum vogsins.
Síðasti fræðsluviðburður á sumardagskrá Reykjavík-iðandi af lífi verður þriðjudaginn 9. september í hádeginu kl 12:30. Um er að ræða fuglaskoðun í Grafarvogi þar sem fylgst verður með vaðfuglum hópa sig saman og undirbúa sig fyrir að kveðja land og þjóð og halda á vetrarstöðvar í suðri.
Hist verður við Grafarvogskirkju. Snorri Sigurðsson fuglafræðingur leiðir og eru gestir hvattir til að taka með sér kíki.
Follow