Upplýsingar um stjórn, stefnu og skipulag skólans eru í  Skólanámskrá.

Borgarholtsskóli er framhaldsskóli, staðsettur við Mosaveg í Grafarvogi. Hann er framsækinn og tæknivæddur nútímaskóli með um 1400 nemendur og fjölbreytt námsframboð. Boðið er upp á dagskóla og dreifnám.

Mikil birta og gott rými einkenna skólahúsið. Það skapar hlýlega og jákvæða umgjörð um skólastarfið.

Borgarholtsskóli hefur frá upphafi haft þá stefnu að stuðla að bókmennt, handmennt og siðmennt nemenda sinna.

Við skólann starfar samstilltur hópur starfsfólks sem sinnir kennslu, þjónustu við nemendur, stjórnun skólastarfsins ásamt eftirliti og þrifum á skólahúsnæðinu.

Leiðarljós í starfi okkar og samskiptum í skólanum eru agi, virðing, væntingar og við leggjum áherslu á jákvætt og hlýtt viðmót gagnvart nemendum.

Skólinn starfar eftir lögum um framhaldsskóla, aðalnámskrá framhaldsskóla og ýmsum reglugerðum semMenntamálaráðuneytið gefur út.

Upplýsingar um námsbrautir og áfanga eru á síðunni Nám í boði.

Í skólanámskrá Borgarholtsskóla er að finna þann ramma sem skólastarfinu er sniðinn. Þar er hægt að nálgast þær upplýsingar sem nemendur, foreldrar, kennarar og aðrir starfsmenn þurfa á að halda í námi og starfi. Í 22. gr. laga um framhaldsskóla frá 2008 segir meðal annars:

Sérhver framhaldsskóli skal gefa út skólanámskrá. Skólanámskrá skiptist í tvo hluta, almennan hluta og námsbrautalýsingar. Í almennum hluta skólanámskrár skal gerð grein fyrir starfsemi skólans, helstu áherslum og stefnumörkun, stjórnskipan, námsframboði og skipulagi náms, kennsluháttum, námsmati, stuðningi, ráðgjöf og þjónustu við nemendur, réttindum og skyldum nemenda, foreldrasamstarfi og samstarfi við utanaðkomandi aðila, sjálfsmati og gæðamálum og öðru sem skóli kýs að kveða á um í skólanámskrá. Jafnframt skal skóli gera grein fyrir því hvernig hann uppfyllir skilyrði samkvæmt almennum hluta aðalnámskrár framhaldsskóla og markmið laga þessara og reglna sem settar eru með stoð í þeim.

Um námsbrautalýsingar er fjallað í 23. gr. laganna. Þar er kveðið á um að námsbrautalýsingar skuli leggja fyrir menntamálaráðuneytið til samþykkis. Þegar námsbraut hefur verið samþykkt af hálfu ráðuneytis er hún orðin hluti af aðalnámskrá.

Borgarholtsskóli leggur metnað sinn í að viðhalda lifandi umræðu um einstaka þætti skólanámskrár með það að markmiði að fullur samhljómur sé milli skólastarfsins og námsskrárinnar.