Fjörudagurinn, samstarfsverkefni Náttúruskóla Reykjavíkur og fræðsluátaksins Reykjavík – iðandi af lífi fór fram miðvikudaginn 29. janúar síðastliðinn. Kelduskóli og Grandaskóli voru þátttakendur í verkefninu og var farið í fjöruferðir þar sem nemendur fengu að kynnast fjölbreytilegu umhverfi og lífríki fjörunnar og unnu margvísleg verkefni. Þema Fjörudagsins var Líffræðileg fjölbreytni í fjörum Reykjavíkur.
Tveir hópar í sjöunda bekk Kelduskóla, einn frá Kelduskóla – Korpu og hinn frá Kelduskóla – Vík, hittust á miðri leið klukkan tíu um morguninn í Gorvík milli Geldinganess og Blikastaðakrór. Á stórstreymi er þar víðáttumikil leirfjara en einnig vex töluvert af þangi undir klettum og fjölbreytileiki þörunga og dýra töluverður. Eftir hádegi var komið að fimmta bekk í Grandaskóla sem mætti í fjöruna í Skerjafirði fyrir neðan Sörlaskjól rétt eftir hádegi. Þar er breið og gróskumikil þangfjara, nokkuð stórgrýtt en vel aðgengileg og líffræðileg fjölbreytni mikil.
Starfsmenn Reykjavík – iðandi af lífi og Náttúruskólans höfðu útbúið sérstök verkefni sem nemendurnir unnu í hópum á báðum stöðum. Meðal annars var notaður lítill rammi til að skoða og meta hversu mikill fjölbreytileiki getur leynst á einungis litlum blett í fjörunni. Nemendur settu mat sitt á fjölbreytileika lífvera t.d. hvað varðar stærð, lögun, lit og áferð, á eigin forsendum. Einnig var unnið verkefni þar sem beltaskipting fjörunnar var skoðuð og mæld. Ekki vaxa sömu þangtegundir efst í fjörunni, um miðbik fjörunnar eða neðst í fjörunni og myndast þá greinileg belti sem hafa sín sérkenni.
Nemendurnir mældu breidd þessara belta og reyndu að greina þangtegundirnar sem einkenna hvert belti. Nemendur Grandaskóla unnu eitt verkefni þar sem viðfangsefnið var fjölbreytileiki innan tegundar, með því að safna klettadoppum og leggja mat á fjölbreytileika í útliti þeirra. Klettadoppur eru smávaxnir en skrautlegir sniglar sem finnast efst í fjörunni þar sem þeir sitja á steinum. Nemendurnir mældu stærð þeirra og flokkuðu þær eftir lit og mynstri. Þá var hópur nemenda sem fylgdist með fuglum er voru í og við fjöruna, greindu þá til tegunda og töldu.
Þrátt fyrir nokkuð kalt veður var aðstaða til útiveru og útináms til fyrirmyndar. Fjaran var merkilega gróskumikil miðað við hávetur og fuglalífið var sérstaklega auðugt. Nemendurnir höfðu gagn og gaman af því að vera í fjörunni og tíðrætt var hversu dýrmætt það er fyrir Reykjavík að á nokkrum stöðum í borginni sé aðgangur að hreinni og heilbrigðri fjöru. Þá kemur það alltaf skemmtilega á óvart þegar grannt er skoðað hversu fjölskrúðugt og merkilegt vistkerfi fjaran er.
Follow
