Hugmyndir um stofnun þróunarfélags um uppbyggingu og breytingar á landnýtingu Ártúnshöfða voru kynntar á fundi með lóðarhöfum nýlega, en á næstu árum verða miklar breytingar á hverfinu.
Skipulagshugmyndir úr hugmyndasamkeppni gera ráð fyrir að Ártúnshöfði breytist í blandaða byggð íbúða og atvinnuhúsnæðis, auk þess sem hverfið mun stækka til norðurs á landfyllingum.
Ellefu þúsund íbúa hverfi
Gert er ráð fyrir uppbyggingu íbúðahúsnæðis og innviða í hverfinu fyrir allt að 11.500 manns. Fjöldi íbúða gæti orðið um 5.100. Meirihluti þeirra eða 4.100 á reitum sem skilgreindir eru fyrir íbúðabyggð, en um þúsund íbúðir yrðu í blandaðri byggð. Uppbyggingin mun tengjast nýrri borgarlínu á samgönguás frá vestri til austurs. Áherslur í hönnun verða á vistvænt borgarhverfi með fólk í fyrirrúmi.
Sigurður Björn Blöndal formaður borgarráðs sagði í kynningu sinni á fundi með hagsmunaaðilum að Elliðavogur og Ártúnshöfði væri eitt mikilvægasta svæðið í Reykjavík á þessu aðalskipulagstímabili og nú væri komið að næsta áfanga í þróun þess. Fyrir lægi að vinna rammaskipulag og síðan deiliskipulag og á grundvelli þeirrar skipulagssamkeppni um svæðið sem Reykjavíkurborg stóð fyrir. „Hverfið er mjög áhugvert og eitt stærsta þróunarverkefni sem gert er ráð fyrir að fara í á næstunni,“ segir Sigurður Björn Blöndal.
Viðbótarbyggingarmagn samkvæmt skipulagshugmyndum er um 780 þúsund fermetrar og þar af eru um 500 þúsund fermetrar fyrir nýjar íbúðir eða rúmar 5000 nýjar íbúðir eins og áður segir.
Samningsmarkmið Reykjavíkurborgar á uppbyggingarsvæðum
Reykjavíkurborg hefur sett sér samningsmarkmið vegna fyrirhugaðrar uppbyggingar og þróunar þéttingarsvæða við Elliðaárvog – Ártúnshöfða og voru þau samþykkt í borgarráði 27. nóvember 2014. Markmiðin eru í samhljóm við Aðalskipulag Reykjavíkur 2010 til 2030 þar sem áherslur eru lagðar á fjölbreytileika í stærð og gerð íbúða; á gæðasvæði og gott umhverfi; sem og á að varðveita staðaranda og yfirbragð byggðar.
Í samningsmarkmiðunum eru m.a. þessi atriði:
- Land og innviðir borgarinnar verði nýtt sem best.
- Stofnkostnaður innviða fyrir uppbyggingarsvæði verði greiddur með fjármunum sem fást af uppbyggingunni eða að Reykjavíkurborg fái hluta af viðbótarbyggingarrétti og ráðstafi með úthlutun og sölu byggingarréttarins.
- Ákveðinni fjárhæð verði varið í listaverk í almenningsrýmum á svæðinu og verði sú fjárhæð ákveðinn hluti af heildarstofnkostnaði innviða.
- Byggt verði upp í samræmi við Húsnæðisstefnu Reykjavíkurborgar og stuðlað að uppbyggingu leigumarkaðar og félagslegri blöndun íbúa. Stefnt verði að því að 20-25% íbúða í hverfum verði leiguíbúðir, stúdentaíbúðir, búseturéttaríbúðir og/eða Nýju Reykjavíkurhúsin. Einnig verði stefnt að því að Félagsbústaðir hf. hafi kauprétt á allt að 5% íbúða fyrir félagslegt leiguhúsnæði.
Stofnun þróunarfélags er til skoðunar
Á fundinum með hagsmunaaðilum var farið yfir þá tvo kosti sem Reykjavíkurborg sér til að mæta kostnaði borgarinnar við uppbyggingu innviða hverfisins. Annars vegar að á hvern byggðan fermetra á svæðinu verði lagt innviðagjald, auk gatnagerðargjalds og rennur það til fjármögnunar nauðsynlegra innviða sem uppbygging svæðisins kallar á, þ.m.t. samgöngumannvirkja, torga, opinna svæða, skólabygginga og samgönguás, skv. almennum reglum sem Reykjavíkurborg setur. Hins vegar kemur til greina að hluti byggingarréttar íbúðarhúsnæðis sem skilgreindur verði á svæði félagsins í deiliskipulagi verði til ráðstöfunar hjá Reykjavíkurborg. Byggingarréttur Reykjavíkurborgar skal dreifast sem jafnast um allt skipulagssvæðið til að tryggja félagslega blöndun.
Á upplýsingasíðu í Framkvæmdasjá má sjá kynningar frá fundinum með hagsmunaaðilum sem og kynnisblað um mögulegt hlutverk þróunarfélags. Skoða upplýsingasíðu í Framkvæmdasjá: Ártúnshöfði – uppbygging hverfis.
Nánari upplýsingar og tenglar eru einnig í frétt á vef Reykjavíkurborgar > http://reykjavik.is/frettir/throunarfelag-um-uppbyggingu-artunshofda
Follow
