„Knattspyrnudeild Fjölnis er að fara í stefnumótunarvinnu á næstu misserum. Mikilvægur hluti af þeirri vinnu er viðhorfskönnun okkar félagsmanna.

Það er mikilvægt að sem flestir svari svo að könnunin verði sem marktækust og svo það sé hægt að styðjast í meira mæli við gögn en tilfinningar við ýmsar ákvarðanatökur.

Könnunin lokar sunnudaginn 24. maí nk, það er því áríðandi að fólk taki sér tíma og svari eins fljótt og kostur er.

Jafnframt er fólk vinsamlegast beðið um að svara þessu hreinskilnislega svo að könnunin nýtist félaginu sem best.

Taktu könnunina með því að smella á hlekkinn hér:

https://forms.office.com/Pages/ResponsePage.aspx?id=tQYbx3SIz0emX0cicrdwfzigwmgmt4RCsFNL6niotMBUNVA3TjlIVFkxRE9MVjdFRjVFRVhMRDRXTC4u&fbclid=IwAR1qrzbysXmBUtt_Hyw9KadMRMU_iER8ifA-5RZSugrPcZzBj_1i1TkHmGM  

Takk fyrir þitt framlag.

Kær kveðja,
Stjórn knattspyrnudeildar Fjölnis „

---

Helgihald hefst á ný í Grafarvogskirkju sunnudaginn 17. maí.

Messa kl. 11:00 í Grafarvogskirkju. Séra Arna Ýrr Sigurðardóttir prédikar og þjónar. Organisti er Hákon Leifsson og meðlimir úr kór Grafarvogskirkju leiða söng.

Ekki verður sunnudagaskóli á neðri hæð kirkjunnar né selmessa í Kirkjuseli vegna samkomutakmarkana.

Skák og skúffukaka, skotheld uppskrift í samfellt 16 ár

Skákæfingum Fjölnis lauk með fjölmennri skákhátíð í hátíðarsal Rimaskóla 14. maí. Í tilefni af skemmtilegu skákári var öllum 50 þátttakendum æfingarinnar boðið upp á Domínó´s pítsur þar sem allir fengu nægju sína. Til kynnt var um val skákdeildarinnar á afreks-og æfingameistara vetrarins. Margir voru verðugir heiðursins en aðeins tveir útvaldir. 

Hin efnilega Emilía Embla B. Berglindardóttir í 2. bekk Rimaskóla var kjörin afreksmeistari. Hún leiddi hina efnilegu stúlknaskáksveit skólans sem sigraði í opnum flokki bæði á jólamóti ÍTR og TR og Reykjavíkurmóti grunnskóla 2020 í flokki 1. – 3. bekkjar, afrek sem engin stúlknasveit hefur fyrr né síðar náð að landa. Emilía Embla varð líka Íslandsmeistari grunnskóla í stúlknaflokki með sveit Rimaskóla 3. – 5. bekkur. Framtíðarskákkona Íslands. 

Arnar Gauti Helgason í 6. bekk Rimaskólavar valinn æfingameistari vetrarins. Hann var ásamt fjölmörgum Fjölniskrökkum með 100% mætingu og Reykjavíkurmeistari í flokki 4. – 7. bekkjar 2020 ásamt félögum sínum í Rimaskóla. 

Helgi Árnason formaður skákdeildaarinnar sem hefur haft umsjón með og stjórnað skákæfingum Fjölnis frá upphafi, afhenti þessum afrekskrökkum veglega verðlaunabikara. Auk Helga hafa þeir Jóhann Arnar Finnsson, Joshua Davíðsson, Anton Breki Óskarsson og Arnór Gunnlaugsson aðstoðað við æfingarnar í vetur. 

Eins og áður segir hefur alltaf verið góð mæting á skákæfingar Fjölnis í gegnum árin og áberandi hversu jafnt kynjahlutfall er meðal þátttakenda. Það á líka við þegar kemur að verðlaunaafhendingu í lok hverrar æfingar. Ekki má gleyma hinni gómsætu skúffuköku sem alltaf er í boði á þessum ókeypis skákæfingum. Heiðurinn af bakstrinum eiga þau Kiddi kokkur, Aneta og Maja starfsmenn mötuneytis Rimaskóla sem láta sér lítið muna um að skella í risauppskrift hvern fimmtudag. 

Skák er skemmtileg í Grafravogi og skemmtunin hefst að nýju um miðjan september. 

---

„Samstarfið Vinnum saman með Stöð 2 Sport er komið í gang.

Styrktu Fjölni og fáðu fullan aðgang að allri umfjöllun Stöð 2 Sport um íslenskar íþróttir! 

Smellið hér og veljið Fjölni sem aðildarfélag: http://stod2.is/vinnumsaman Áskriftin kostar 3.990 krónur á mánuði og er bindandi til 1. desember. Hver áskrift mun færa Fjölni 6.470 krónur í sölulaun. Takk fyrir stuðninginn! #FélagiðOkkar „

---

Vængir Júpiters verða með í 2.deild í handbolta á næsta tímabili!

Vængir Júpiters eru skráðir til leiks í deildarkeppni HSÍ tímabilið 2020/21. Þetta er stór áfangi í sögu félagsins þar sem starfrækt hefur verið sterkt fótboltalið Vængja síðustu ár.

Í dag voru undirritaðir samningar við þjálfarateymi liðsins. Hér á mynd sést Jóhann Tómas Guðmundsson, Director of Handball hjá Vængjum, skrifa undir samninga við þjálfarana Arnór Ásgeirsson og Viktor Lekve og taka snertingalaust handaband í ljósi aðstæðna.

Nú þegar hefur sterkur leikmannakjarni verið myndaður og leikmannakynningar fara fram á næstu dögum. Það eru þó alltaf pláss fyrir góða leikmenn og ef þú telur þig hafa það sem þarf endilega hafðu samband við Arnór og Viktor.

Fáum að kynnast þjálfurum liðsins hér að neðan:

Arnór Ásgeirsson:
Arnór Ásgeirsson er uppalinn í Grafarvoginum og er hokinn af reynslu úr þjálfun. Hann byrjaði í yngri flokka starfi Fjölnis áður en hann fór til Molde í Noregi þar sem hann var aðstoðarþjálfari meistaraflokks kvenna og aðalþjálfari karlaliðs Molde. Eftir að Arnór kom heim tók hann við meistaraflokk Fjölnis og stýrði þeim í Olís deildinni tímabilið 2017/18. Arnór hefur einnig komið að yngri landsliðum fyrir hönd HSÍ. Arnór er hámenntaður þjálfari sem á mikla framtíð fyrir sér.

Viktor Lekve:
Viktor er úr Árbænum.

Við hlökkum til að koma með meira efni hér á miðlana.

Fylgið okkur á:
📸 Intagram: instagram.com/vaengir_jupiters_handbolti/
🖋 Twitter: twitter.com/VJ_handbolti
☝️ Facebook: facebook.com/VJ.handbolti

Lifi Vængir!

Myndir frá undirskrift má sjá HÉR.

Með kærri kveðju,

Handknattleiksdeild Vængja Júpiters

---

Þeim verður ekki haggað

Daglega eru teknar margar ákvarðanir í Ráðhúsi Reykjavíkur. Það heyrir til undantekninga ef einhverjar af þeim koma frá fulltrúum í minnihlutanum. Það er nefnilega þannig að það er ekki sama hvaðan gott kemur. Vissulega þegar eru teknar margar ákvarðanir eru einhverjar þeirra umdeildar, auðvitað því þær snerta oft marga íbúa Reykjavíkurborgar. Því er mikilvægt að hlusta þegar kemur gagnrýni og vera tilbúin að bakka með ákveðnar ákvarðanir sér í lagi ef fagleg rök koma fram fyrir því að betra sé að hætta við þær ákvarðanir sem hafa verið teknar. Það er þó ekki gert og meirihlutanum verður ekki haggað t.d í  þeirri ákvörðun að loka og sameina skóla í norðanverðum Grafarvogi, sú ákvörðun er meitluð í stein. Loka skal Kelduskóla Korpu, það verður gerður unglingaskóli í Kelduskóla Vík og börnum frá 6 ára til 12 ára er skipt á milli Borgarskóla og Engjaskóla. Þessar aðgerðir hafa áhrif á 820 börn í norðanverðum Grafarvogi.

Hvernig gengur að sameina skóla

Já því miður þá gengur það ekkert of vel, vegna þess að mikil vinna hefur skiljanlega farið í allt það sem fylgdi COVID-19. Einhver myndi spyrja sig eigum við þá ekki að staldra við. Þetta er gríðarlega kostnaðarsamt ferli enda hafa síðustu sameiningar sem farið var í árið 2012 sýnt það að ekki króna sparaðist á þeim. Núna á að keyra þetta í gegn og þau rök sem er beitt eru að þetta sé gert af því að faglega sé þetta betra. Því hafa kennarar sem vinna í Kelduskóla Korpu mótmælt og benda réttilega á að þar er verið að loka einum af verðlaunuðu þekkingarskólum í Reykjavík. Reykjavíkurborg er því að rýra þau gæði sem nemendum í norðanverðum Grafarvogi hefur verið boðið upp á.

Hvað er nýsköpunarskóli

Til stendur að stofna nýsköpunarskóla fyrir börn í 8. 9. og 10. bekk. Hvað er nýsköpunarskóli? þrátt fyrir að hafa óskað eftir svörum hefur mér ekki tekist að fá þau. Ekkert hefur verið kynnt fyrir foreldrum. Af hverju er haldið áfram, af hverju fá ekki börnin okkar í norðanverðum Grafarvogi að vera í sínum skólum áfram. Hér er verið að leika sér með börn, þau eru vissulega tölur í excel skjölum borgarinnar en þeirra framtíð og þeirra hagsmunir verða að vega þyngra en ákvörðun sem hefur fyrir einhverju síðan verið meitluð í stein og og mun mögulega fegra bókhald Reykjavíkurborgar.

Höfundur er borgarfulltrúi Sjálfstæðisflokks og er búsett í Grafarvogi.

---

Dagur B. Eggertsson borgarstjóri tók í dag fyrstu skóflustunguna að nýjum íbúðarhúsum í Gufunesi, en Þorpið vistfélag byggir 137 íbúðir á þessu nýja uppbyggingarsvæði sem er í tengslum við skapandi iðnað, frumkvöðlastarfsemi og menningu.

„Það er sérstakt fagnaðarefni að fyrsta verkefnið sem ætlað er að fjölga hagkvæmum íbúðum á viðráðanlegu verði fyrir ungt fólk og fyrstu kaupendur sé að fara af stað,” sagði Dagur. „Alls verða þessi fjölbreyttu verkefni níu um alla borg og heildarfjöldi íbúða verður yfir fimm hundruð. Hugsunin er sú að þessi verkefni byggi á nýrri hugsun og hafi það öll að markmiði að gera húsnæðismarkaðinn fjölbreyttari. Til viðbótar er frábært að sjá fyrstu íbúðirnar í Gufunesi rísa en svæðið er nýtt íbúðahverfi og spennandi atvinnusvæði skapandi greina“.

Þetta eru fyrstu nýbyggingarnar í þessu nýjasta hverfi borgarinnar og eru þær á sjávarlóð nyrst í Gufunesi með útsýni yfir Geldinganes og Viðey.  Yrki Arktitektar sáu um hönnun og verktaki framkvæmdarinnar er Eykt.

Framkvæmdir hefjast næstu daga og byggt verður upp í áföngum. Í fyrsta áfanga eru 45 íbúðir, 41 íbúð í öðrum áfanga og 51 íbúð í þeim þriðja. Sameiginleg sameign allra áfanga eru byggðir í öðrum áfanga utan hjóla- og vagnagreymslu sem er byggð samhliða þriðja áfanga.

Framkvæmdatími er stuttur, en afhenda á fyrstu íbúðirnar í maí á næsta ári og ljúka uppbyggingunni allri  í maí ári síðar.  Íbúðir Þorpsins eru úr verksmiðjuframleiddum einingum sem styttir byggingartímann og lækkar kostnað.

Hagkvæmt húsnæði fyrir ungt fólk og fyrstu kaupendur 

Reykjavíkurborg úthlutaði lóðinni í tengslum við verkefni sitt um Hagkvæmt húsnæði, þar sem sérstaklega er horft til þarfa ungs fólks og fyrstu kaupenda og er Þorpið fyrsti byggingaraðilinn til að hefja framkvæmdir innan verkefnisins. Ódýrustu íbúðir Þropsins verða til sölu á innan við 20 mkr.

Vilja byggja upp hagkvæmt vistvænt samfélag 

Hugmyndafræði Þorpsins vistfélags fellur vel að markmiðum Reykjavíkurborgar fyrir hagkvæmt húsnæði. „Við erum fyrir fólk sem vill eign­ast þak yfir höfuðið án þess að þurfa að ráðstafa nær öll­um framtíðar­tekj­um sín­um til margra ára­tuga í hús­næði,“ segir Runólfur Ágústsson talsmaður Þorpsins vistfélags. „Við gerum hlutina öðruvísi til að ná niður byggingakostnaði á sama tíma og við bjóðum fólki að taka þátt í upp­bygg­ingu vist­væns sam­fé­lags sem bygg­ir á deili­lausn­um, sam­vinnu fólks og sam­starfi“.

Þorpið leggur áherslu á mikla sameign og grænan lífsstíl, hvað varðar umhverfis- og samgöngumál.

Mikill áhugi hefur verið fyrir þessum nýju íbúðum og að sögn Runólfs. „Rúmlega 1.100 manns skráðu sig sem áhugasama kaupendur fyrir ári síðan og af þeim hafa nú í apríl á fjórða hundruð staðfest umsókn. Umsóknafrestur um íbúð rennur út þann 15. maí næstkomandi, frestur til að skila inn greiðslumati rennur út 31. maí og við stefnum á að úthluta íbúðum til kaupenda í byrjun júní þar sem dregið verður á milli umsækjenda.“ Þorpið selur sínar íbúðir beint til kaupenda án milliliða.

Áhersla á góða nýtingu rýmis 

Byggð Þorpsins í Gufunesi er brotin upp í þriggja til fimm hæða þyrpingu íbúðarhúsa með alls 137 íbúðum og hverfast húsin um miðlægt torg og garða. Göngustígar í nágrenni eru tengdir inn og í gegnum svæðið. Um er að ræða 5 íbúðarhús, 3ja hæða í suðurhluta og 4ra hæða í vestur- og miðhluta og 5 hæða í austurhluta lóðarinnar. Staðsetning húsa innan hverfisins er ákvörðuð eftir veðurfræðilegri ráðgjöf til að mynda skjól um sólríka garða og torg.

Áhersla er á vandaða hönnun og góða rýmisnýtingu íbúðanna sem eru af fjórum gerðum; stúdíó, tveggja, þriggja og fjögurra herbergja. Þrír stiga- og lyftukjarnar eru í íbúðarhúsunum og eru þau tengd saman um svalaganga og brýr. Byggðin hefur létt yfirbragð og er fjölbreytt í lita- og efnisvali. Í fyrsta áfanga er 5 hæða fjölbýlishús með 45 íbúðum. Húsin eru hvert með sínu litaþema, brotin upp með björtum máluðum flötum. Þetta fyrsta hús verður í gulum og grænum litum sem kallast á við hvíta og gráa fleti. Gaflar eru mynstruð sjónsteypa og mynda með þakkanti ramma utan um húsið. Svalagangar vísa í austur með fjölbreyttu efnisvali í handriðum. Svalir vísa í vestur fyrir síðdegis- og kvöldsól.

Húsin eru verksmiðjuframleidd úr steyptum einingum sem gerðar eru innanhúss við bestu aðstæður.

Bíllaust hverfi: Skjól, sól og grænmetisgarðar  

Íbúðarhúsin mynda garðrými fyrir skjólgott torg, leikvöll, boltavelli og grasfleti. Torgið verður við aðalinngang hverfisins við sameiginleg rými íbúa. Leik- og dvalaraðstaða er norðan megin gegnt ströndinni þar sem gert er ráð fyrir sparkvelli og götuboltasvæði. Tekið er tillit til sólarátta og byggð skipulögð þannig að garðrýmin eru í góðu skjóli fyrir veðri og vindum.  Við íbúðarbyggðina eru matjurtagarðar til afnota fyrir íbúa til ræktunar. Þar verður heimilt að gera vermireiti og gróðurskýli. Bílastæði eru utan byggðarinnar í nýrri breiðgötu þar sem gatnaframkvæmdir eru nú á lokastigi. Þar verða einnig stæði fyrir sameiginlega deilibíla.

Sameiginleg vinnurými, deilibílar og rafhjól 

Sameiginleg fjölnota rými/vinnurými/veislusalur er á jarðhæð við miðlægt hellulagt sólríkt torg. Þetta rými nýtist á daginn sem vinnusetur fyrir íbúa (co-working space), en sem kaffihús eða veislusalur á kvöldin og um helgar. Fyrir utan kaffihúsið, á hellulögðu torgi, er sameiginlegt grill. Við torgið er einnig sameiginlegt þvottahús. Að auki er gert ráð fyrir að í hverri íbúð sé möguleiki á lögnum fyrir þvottavél og þurrkara á baði. Pósthús/deilibúr er einnig við torgið þar sem eru póstkassar íbúa ásamt móttökuhólfum fyrir aðsendan mat og vörur. Léttbyggt hjóla- og vagnaskýli fyrir samtals 120 hjól, eru á einum stað í inngarði og tengjast megin aðkomuleiðum. Í hjólageymslu verða tenglar til hleðslu rafhjóla. Íbúar munu einnig hafa aðgang að deilibílum.

Skýrar kröfur um forgangshópa  

Þorpið í Gufunesi er hluti af verkefni Reykjavíkurborgar til að auðvelda ungu fólki að eignast sitt fyrsta húsnæði. Forgang að kaupum/leigu á íbúðum hafa einstaklingar á aldrinum 18-40 ára. Við endursölu skal þess gætt að söluverð á hvern brúttófermeter íbúðar haldist í sömu hlutföllum milli upphaflegs kaupverðs og almenns söluverðs fjölbýlishúsa í hverfinu.

Uppbygging í Gufunesi 

Mikil uppbygging verður í Gufunesi á næstu árum. Þar verður blönduð byggð fyrir íbúðir, smærri atvinnurekstur, skapandi iðnað, menningu, menntun, sýningar- og atburði, ferðamannaiðnað og sjálfbærar samgöngur. Gufunesið verður þannig einstakt hverfi í borginni þar sem iðnaðarmannvirki, manngert landslag, afþreying- og útivist og stórfengleg fjallasýn við sjávarsíðu mynda órjúfanlega heild.

Þorpið er samkvæmt skipulagi hluti af grænu íbúðarsvæði við sjó. Uppbygging reitsins einkennist af þyrpingu fjölbýlishúsa af ýmsum stærðum, byggingargerðum og hæðum. Leitast er við að skapa aðlaðandi umhverfi með samfélagslegri blöndun. Rammi hverfisins er samfellt, grænt svæði sem tengir saman stök hús og húsaþyrpingar. Andrými þetta er aðgenglegt fótgangandi og hjólandi ásamt sameiginlegum svæðum, s.s. matjurtargörðum, leiksvæðum, grillaðstöðu o.s.frv. Allar íbúðarbyggingar eiga það sameiginlegt að tengjast græna svæðinu á afgerandi hátt, bæði með göngu- og hjólastíg meðfram strandlengjunni, sjónásum og aðalinngöngum húsa. Allar íbúðir á jarðhæð fá verönd sem skilur að almennings- og einkarými. Meginaðkoma bílaumferðar er um breiðgötu sem liggur á milli athafnasvæðis til suðurs og íbúðarsvæðis við sjó til norðurs. Í breiðgötunni er gert ráð fyrir töluverðu magni bílastæða á yfirborði sem skapar jákvæðar forsendur fyrir hagkvæmar íbúðargerðir. Áhersla er lögð á unga byrjendur á íbúðamarkaðinum, virka íbúaþátttöku, deilihagkerfi og umhverfismál.

Nánari upplýsingar:     

• Kynningarbréf Þorpsins til kaupenda íbúða    
• Húsnæðisáætlun Reykjavíkurborgar   
• Húsnæðisuppbygging án hagnaðarsjónarmiða      

---

Þar sem aðstæður í samfélaginu eru með öðrum hætti en við þekkjum er gott að minna á að aðhald og eftirlit er eftir sem áður mikilvægt fyrir börn og unglinga.

---

Það er ljóst að mikið mun mæða á ungum og uppöldum Fjölnismönnum í meistaraflokki karla á næsta keppnistímabili. Tveir leikmenn sem munu spila lykilhlutverk í liðinu á næstu árum hafa nú framlengt samninga sína við félagið og fögnum við því.

Elvar Otri Hjálmarsson er öflugur leikstjórnandi með mikinn leikskilning og tækni í sínum leik.

---

Þorleifur Rafn Aðalsteinsson er rétthentur hornamaður sem er þekktur fyrir sinn ótrúlega hraða, áræðni og sprengikraft.

• 

• 

• 

• 

Báðir hafa þeir, þrátt fyrir ungan aldur, átt fast sæti í meistaraflokksliði Fjölnis undanfarin ár.

#FélagiðOkkar

Með Fjölniskveðju,

Virðing – Heilbrigði – Samkennd – Metnaður

---