Framundan eru árlegar hverfakosningar í Reykjavík, Betri hverfi 2015, en þær hefjast í næstu viku, þriðjudaginn 17. febrúar og standa yfir til 24. febrúar. Kosið er á milli verkefna í hverfum borgarinnar á slóðinni https://kjosa.betrireykjavik.is

Á undanförnum árum hafa fjölmargar góðar hugmyndir íbúa orðið að veruleika í Grafarvogi en framkvæmt hefur verið fyrir 125 milljónir króna í hverfinu, samkvæmt niðurstöðum kosninga frá 2012-2014.  Flestar hugmyndanna gagnast börnum og unglingum í hverfinu enda snúast verkefnin um það að bæta umhverfið – leiksvæði, útivistaraðstöðu, gönguleiðir, umferðaröryggi, gróðursetningu og fleira sem gerir hverfið miklu betra.

Ég hvet þig til að kynna þér hugmyndirnar sem kosið verður um í hverfinu þínu og dreifa þeim sem víðast til þinna tengiliða í hverfinu og foreldra sem eiga börn í skólanum. Hægt er að sjá hugmyndirnar fyrir Grafarvog hér:  http://reykjavik.is/betri-hverfi-grafarvogur

Það er mikilvægt fyrir íbúalýðræðið að sem flestir taki þátt í kosningunum sem nú eru haldnar rafrænt í fjórða sinn. Notast er við Íslykil eða rafræn skilríki til auðkenningar í kosningunum.

Ég vil einnig vekja athygli þína á því að aldurstakmark í kosningunum er 16 ár. Kosningarnar eru góð æfing fyrir ungt fólk að læra að nýta kosningaréttinn sinn.

Munum að kjósa

Með bestu kveðjum

Bjarni Brynjólfsson

Upplýsingastjóri Reykjavíkurborgar

Tínum upp rusl á víðavangi – það er gott fyrir bakið að beygja sig.